Para Completo i cu Conviccion Firme

“Un Proyecto Maestral”

FOR di cuminsamentu di nan historia di tempu moderno, Testigonan di Jehova tabata sumamente interesá den un dje profecianan di Jesucristo: “E bon nobo aki dje reino lo ser predicá den tur e tera habitá como testimonio pa tur nacion; i e ora ei e fin lo yega.” (Mateo 24:14) Segun cu 1914—principio di “e último dianan”—tabata acercá, Studiantenan di Bijbel sincero a entamá cu conviccion firme un campaña mundial sin precedente di educacion basá riba e Scritura Santu.—2 Timoteo 3:1.

Pa alcansá nan meta di declará e bon nobo rond mundu, e sirbidónan di Jehova aki a usa un método cu tabata nobo, intrépido i bibu. Pa haña sa mas tocante dje, laga nos bai bek den tempu.

Un Manera Nobo pa Declará e Bon Nobo

Ta januari di aña 1914. Imaginá bo mes sintá huntu cu 5.000 otro hende den un auditorio scur na New York City. Dilanti bo tin un pantaya grandi pa pasa película. Un homber cabei blancu cu su ‘smoking’ ta presentá riba pantaya. Bo a yega di mira película muda, pero e homber aki ta papia i bo por tende su palabranan. Bo ta n’e estreno di algu técnicamente innovativo, i e mensahe ta único. E orador ta Charles Taze Russell, promé presidente di Sociedad Watch Tower, i e produccion ta e “Foto-Drama di Creacion.”

C. T. Russell a mira e potencial cu película tin pa alcansá masa di hende. P’esei na 1912, el a cuminsá prepará e “Foto-Drama di Creacion.” Finalmente, el a bira un produccion di ocho ora largu consistiendo di ‘slide’ i película, tur na color i zonido.

A diseñá e “Foto-Drama” pa pasa den cuater parti, for di creacion bini abou atrabes di historia humano te n’e culminacion di Jehova Dios su propósito pa tera i pa humanidad na fin dje Reino di Mil Aña di Cristo. Hopi aña a pasa promé cu uso dje tecnologia ei a bira comercialmente rendabel. Pero miyones di hende a mira e “Foto-Drama di Creacion” grátis!

E preparacion dje “Foto-Drama” a incluí grabacion musical di calidad haltu i 96 disco cu discurso riba nan. A usa dibuhonan artístico pa traha ‘slide’ cu ta drenta den otro i cu a ilustrá historia di mundu. Tambe tabata necesario pa traha cientos di pintura i dibuho nobo. Algun dje ‘slidenan’ di color i película a ser pintá na man cu masha delicadesa. I nan a haci esaki bes tras bes, pasobra finalmente, nan a prepará 20 set di cuater parti. Esaki a haci posibel pa na dado momento pasa un parti dje  “Foto-Drama” den 80 stad pareu!

Tras di Esenario

Kico a tuma lugá tras di esenario durante exhibicionnan dje “Foto-Drama”? “E Drama a cuminsá cu un presentacion di ruman Russell,” e Studiante di Bijbel Alice Hoffman a bisa. “Asina cu el a aparecé riba pantaya i su lipnan a cuminsá move, nan a pone un disco toca . . . i nos por a disfrutá di tende su stem.”

Zola Hoffman a referí n’e técnica di pasa accionnan lento na velocidad haltu, ora el a bisa: “Mi a keda boca habrí ora mi a mira e pasashi dje dianan di creacion. A pasa lelinan ta habri gradualmente dilanti nos propio bista.”

E amante di música Karl F. Klein dje Cuerpo Gobernante di Testigonan di Jehova ta agregá: “Na mes momento cu tabata pasa e plachinan aki, tabatin un acompañamentu di música masha bunita, cu hoyanan manera Narcissus i Humoreske.”

Tambe tabatin otro incidentenan memorabel. “Tabatin algun fayo cu a pone tur hende na harimentu,” Clayton J. Woodworth, Jr., ta corda. “Na un ocasion nan tabata toca e disco ‘Bula Manera un Para Bai Bo Ceru,’ anto riba pantaya a pasa e plachi di un gigantosaurio inmenso, un animal grandísimo dje tempu promé cu Diluvio”!

No hopi tempu despues dje “Foto-Drama di Creacion” regular, a sali e setnan di “Drama Eureka.” (Mira cuadro.) Unu tabata consistí dje discursonan i tambe di música grabá. E otro tabata consistí di tantu e grabacionnan como ‘slide.’ Aunke e “Drama Eureka” no tabatin película, tabatin hopi éxito cuné den zonanan ménos poblá.

Un Herment Poderoso pa Duna Testimonio

Pa fin di 1914, a presentá e “Foto-Drama” na auditorionan cu a conta cu un asistencia total di mas cu 9.000.000 persona na Norteamérica, Europa i Australia. Aunke e Studiantenan di Bijbel tabata poco na cantidad, nan no a falta e conviccion firme necesario pa declará e bon nobo cu e instrumento nobo aki. Gustosamente nan a contribuí e fondonan necesario pa huur sitionan adecuá p’e exhibicionnan aki. Dje manera ei e “Foto-Drama di Creacion” a haci un gran trabou den laga esnan cu a mir’é cera conocí cu Dios su Palabra i propósito.

Den un carta cu un persona a manda pa C. T. Russell, el a skirbi: “E promé bes ei cu mi a wak bo Drama, el a trece un cambio crucial den mi bida; of, mi mester bisa, un cambio crucial den mi conocimentu di Bijbel.” Un otro persona a bisa: “Mi fe tabata na punto di naufragá. Pero mi ta sinti cu e ‘Foto-Drama di Creacion’ cu a pasa último zomer aki, a salba mi. . . . Awor mi tin e pas cu mundu no por duna i cu lo mi no laga bai pa nada di mundu.”

Demetrius Papageorge, miembro di personal pa hopi aña dje sede di Sociedad, a comentá: “E ‘Foto-Drama’ tabata un proyecto maestral ora nos considerá e poco Studiante di Bijbel cu tabatin i, na proporcion, e cantidad limitá di finansa cu tabata disponibel. Di berdad e tabatin e spiritu di Jehova su tras!”

[Kuadro/Plachinan na página 8, 9]

E “Drama Eureka”

Ocho luna despues dje estreno dje “Foto-Drama,” Sociedad a mira e necesidad pa traha un otro version di dje yamá e “Drama Eureka.” Aunke nan a sigui pasa e “Foto-Drama” completo den stadnan grandi, e setnan di “Eureka” a presentá e mésun mensahe básico den pueblitonan i zonanan di cunucu. Nan a describí un dje versionnan dje “Drama Eureka” como unu cu a duna “e ruman muhernan un oportunidad único” pa predicá. Pakico asina? Pasobra su kashi di disco tabata pisa solamente 14 kilo. Claro cu pa por a pasa e drama, mester a carga un tocadisco tambe.