Bo Por Enfrentá Desanimacion cu Éxito!

UN HOMBER sabí a yega di skirbi: “Bo a mustra bo mes desanimá den e dia di afliccion? Bo poder lo ta poco.” (Proverbionan 24:10) Si bo a yega di ta desanimá, probablemente lo bo ta di acuerdo cu e declaracion ei.

Niun hende no ta immuun pa e efectonan di desanimacion. Un atake leve di desanimacion por dura un of dos dia asina i despues pasa. Pero ora un hende ofendé bo of bo tin un rencor, e problema por dura mas largu. Algun cristian cu tabata fiel pa añanan largu, a bira asina desanimá cu nan a asta stop di bai reunionnan di congregacion i di participá den e ministerio di veld.

Si bo ta sinti bo descurashá, cobra ánimo! Sirbidónan fiel di pasado a enfrentá desanimacion cu éxito, i cu Dios su yudansa, bo tambe por.

Ora Otro Hende Ofendé Bo

Bo no por verwagt cu lo bo ser protehá di tur palabra of acto desconsiderá. Sin embargo, bo por nenga sí di permití imperfeccion di otro hende interferí cu bo sirbishi na Jehova. Si un hende a ofendé bo, lo ta útil kisas pa bo considerá con Ana, mama di Samuel, a manehá un situacion desanimante.

Ana tabata desesperá pa haña yu, pero e tabata steril. Penina, e di dos esposa di su casá, sí a duna lus caba na yunan homber i yunan muher. En bes di tene consideracion cu Ana su situacion penoso, Penina a mir’é como un rival i a comportá su mes di tal manera cu Ana, cu Ana “tabata yora i no come.”—1 Samuel 1:2, 4-7.

Un dia Ana a bai n’e tabernáculo pa haci oracion. Eli, e sumo sacerdote di Israel, a observá su lipnan ta move. Eli no a realisá cu ta oracion Ana tabata haci, i el a concluí cu Ana mester tabata burachi. “Pa cuantu tempu mas lo bo comportá bo como un buraché?,” Eli a puntr’é. “Kita bo biña for di bo.” (1 Samuel 1:12-14) Bo por imaginá bo con Ana mester a sinti? El a bini n’e tabernáculo pa haña animacion. Último cos cu lo el a verwagt ta di ser acusá inhustamente dor di un dje hombernan mas influyente di Israel!

Esei fácilmente por a laga Ana bira masha desanimá mes. Lo e por a bira bai mesora for dje tabernáculo, hurando di no bolbe nunca mas tanten cu Eli tabata sirbi einan como sumo sacerdote. Sin embargo, tabata bisto cu Ana a duna gran balor na su relacion cu Jehova. E tabata sa cu Jehova lo no a keda contentu si e haci asina. E tabernáculo tabata e centro di adoracion puru. Jehova a pone su nomber einan. I pa imperfecto cu Eli tabata, e tabata Jehova su representante scogí.

E manera piadoso cu Ana a contestá Eli su acusacion ta un excelente ehempel pa nos awe. E no a permití su mes ser acusá inhustamente, pero a respondé den un manera masha respetuoso. El a contestá: “No, mi señor! Mi ta un muher cu un spiritu hopi oprimí; i mi no a bebe biña ni bebida cu ta haci burachi, mas bien mi ta drama mi alma dilanti di Jehova. No tuma bo esclaba pa un muher cu no ta sirbi pa nada, pasobra ta debí na e abundancia di mi preocupacion i di mi iritacion cu mi a papia te awor.”—1 Samuel 1:15, 16.

Ana a lagu’é comprendé su punto? Definitivamente. Sin embargo, el a papia cu Eli cu tacto, i no a tribi critik’é pa su acusacion falsu. Eli na su turno, a respond’é bondadosamente, i a bis’é: “Bai na pas, i cu e Dios di Israel duna  bo bo peticion cu bo a pidié.” Una bes e asuntu a keda resolvé, Ana “a procedé di bai riba su caminda i come i su cara no a bolbe mustra preocupacion mas.”—1 Samuel 1:17, 18.

Kico nos ta siña for dje relato aki? Ana a actua mesora pa corigí un malcomprendimentu, pero el a haci esei cu profundo respet. Como resultado, el a conserbá un bon relacion cu Jehova i cu Eli. Cuantu biaha bon comunicacion i un poco tacto por prevení problemanan chikitu di para bira problemanan grandi!

Mester admití sí cu pa resolvé diferencianan di opinion cu otro hende ta rekerí humildad i flexibilidad di ámbos banda. Si un compañero creyente ta keda sin reaccioná faborabel riba bo esfuerso pa resolvé un diferencia di opinion, podisé bo tin cu laga e asuntu den man di Jehova, confiando cu lo e atend’é na su debido tempu i na su mes manera.

Bo A Perde un Privilegio di Sirbishi?

Algun cristian a bira deprimí debí cu nan mester a bandoná un privilegio cu nan tabata atesorá den e sirbishi di Dios. Nan tabata disfrutá di sirbi nan rumannan, i ora nan a perde e privilegio, nan a sinti cu nan no tabata útil mas pa Jehova ni pa su organisacion. Si ta asina bo ta sinti, lo bo por haña un mihó bista dje asuntu dor di considerá e ehempel di e escritor bíblico Marco, cu tambe ta ser yamá Juan Marco.—Echonan 12:12.

Marco a compañá Pablo cu Barnabas riba nan promé biahe como misionero, pero na mitar di caminda, el a bandoná nan i a regresá Jerusalem. (Echonan 13:13) Despues, Barnabas kier a hiba Marco huntu cu nan riba un otro biahe. Sin embargo, Bijbel ta bisa: “Pablo no a haña cu tabata apropiado pa hib’é cu nan, siendo cu el a bai for di nan na Pamfilia i no a bai cu nan na e trabou.” Barnabas no tabata di acuerdo. E relato ta sigui bisa: “Cu esaki a sosodé un explosion intenso di rabia, di manera cu [Pablo i Barnabas] a separá for di otro; i Barnabas a hiba Marco cuné i a barca pa Chipre. Pablo a scoge Sílas i a bai.”—Echonan 15:36-40.

Marco lo mester a sintié abatí ora el a haña sa cu e apostel respetá Pablo, no kier a traha huntu cuné i cu un pleitu tocante su cualificacionnan a causa e kiebro entre Pablo cu Barnabas. Pero esei no tabata fin dje asuntu.

Pablo cu Sílas ainda tabatin mester di un compañero di biahe. Ora nan a yega Listra, nan a haña un hende pa remplasá Marco, un yoncuman cu yama Timoteo. Wel Timoteo por tabatin dos of tres aña so bautisá ora nan a scog’é. Di otro banda, Marco tabata asociá cu e congregacion cristian desde su formacion, de echo, asta promé cu Pablo mes. Sin embargo, Timoteo tabata esun cu a ricibí e asignacion privilegiá.—Echonan 16:1-3.

Con Marco a reaccioná ora el a haña sa cu un homber mas yong i cu ménos experencia a remplas’é? Bijbel no ta bisa. No obstante, Bijbel ta indicá sí cu Marco a keda activo den Jehova su sirbishi. El a probechá dje privilegionan cu tabata disponibel p’e. Aunke e no por a sirbi cu Pablo cu Sílas, e por a biaha cu Barnabas bai Chipre, cu tabata Barnabas su teritorio di cas. Tambe Marco a sirbi cu Pedro den Babilonia. Cu tempu, el a haña e oportunidad tog di traha huntu cu Pablo—i Timoteo—na Roma. (Colosensenan 1:1; 4:10; 1 Pedro 5:13) Despues Marco asta a ser inspirá pa skirbi un dje cuater Evangelionan!

Tin un les balioso den tur esaki. Marco no a preocupá asina tantu cu el a perde un privilegio te cu el a keda sin apreciá e privilegionan cu sí e tabatin ainda na su alcanse. Marco a sigui ocupá den e sirbishi di Jehova, i Jehova a bendicion’é.

Pues, si abo a perde un privilegio, no sea desanimá. Si bo mantené un actitud positivo i keda ocupá, kisas otro privilegionan lo bini pa bo. Tin hopi di haci den e trabou di Señor.—1 Corintionan 15:58.

 Un Sirbidó Fiel Ta Bira Desanimá

No ta fácil pa hiba un lucha duru pa e fe. Tin biaha, bo por descurashá. Anto bo por asta sinti bo culpabel cu bo ta desanimá, concluyendo cu un sirbidó fiel di Dios nunca no mester sinti asina. Pensa riba Elías, un dje profetanan sobresaliente di Israel.

Ora cu reina Jezabel di Israel, un promotor fanático di adoracion di Baal, a haña sa cu Elías a mata e profetanan di Baal, el a hura cu lo e mata Elías. Elías a confrontá enemigunan mas grandi cu Jezabel, pero di ripiente el a bira asina desanimá cu e kier a muri. (1 Reynan 19:1-4) Con esei por a sosodé? El a lubidá algu.

Elías a lubidá di acudí na Jehova como e Fuente di su fortalesa. Ta ken a duna Elías poder pa lanta morto i pa enfrentá e profetanan di Baal? Jehova. Sigur Jehova lo por a dun’é forsa pa enfrentá e furia di reina Jezabel.—1 Reynan 17:17-24; 18:21-40; 2 Corintionan 4:7.

Ken cu ta por tambaleá momentáneamente den su confiansa den Jehova. Mescos cu Elías, tin biaha bo por mira un cierto problema desde un punto di bista humano en bes di usa “e sabiduria djariba” pa trata cuné. (Santiago 3:17) Sin embargo, Jehova no a bandoná Elías pa su fayo temporal.

Elías a hui bai Beer-seba i despues el a bai den desierto, caminda el a pensa cu niun hende lo no por a hañ’é. Pero Jehova a hañ’é. Jehova a manda un angel pa consol’é. E angel a soru pa Elías haña pan frescu pa come i awa refrescante pa bebe. Despues cu Elías a sosegá, e angel a mand’é biaha bai casi 300 kilometer te na ceru Horeb, caminda Jehova lo a fortalec’é mas ainda.—1 Reynan 19:5-8.

Na ceru Horeb, Elías tabata testigo di un demostracion di Jehova su poder cu a fortalecé su fe. Anto, cu un stem calmu i abou, Jehova a sigur’é cu e no tabata su so. Jehova tabata cuné, i 7.000 di su rumannan tambe tabata cuné, aunke Elías no tabata sa esaki. Finalmente, Jehova a dun’é trabou pa haci. Jehova no a benta Elías afó como su profeta!—1 Reynan 19:11-18.

Tin Yudansa Disponibel

Si de bes en cuando bo sufri di un atake leve di desanimacion, podisé lo bo ripará cu bo ta sinti bo mihó si bo sosegá extra of come un cuminda nutritivo. Nathan H. Knorr, kende a sirbi como un miembro di Cuerpo Gobernante di Testigonan di Jehova te na su morto na 1977, a comentá un biaha cu problemanan grandi hopi bes ta parce hopi mas chikitu despues di a sosegá bon anochi. Pero ora un problema ta mas persistente, kisas esei no ta suficiente, lo bo tin mester di yudansa pa combatí desanimacion.

Jehova a manda un angel pa fortalecé Elías. Awe, Dios ta percurá animacion via e ancianonan i otro cristiannan maduro. Di berdad e ancianonan por “resultá di ta manera un lugá di sconde for di bientu.” (Isaías 32:1, 2) Pero pa haña animacion for di nan, abo tin cu tuma e iniciativa. Pa desanimá cu Elías tabata, tog el a biaha bai ceru Horeb pa ricibí instruccion for di Jehova. Nos ta ricibí instruccion fortalecedor via e congregacion cristian.

Ora nos aceptá yudansa i enfrentá prueba cu curashi, pruebanan manera sinti ofendí of pérdida di privilegio, nos ta apoyá Jehova su banda den un cuestion importante. Cua cuestion? Satanas a pretendé cu hende ta sirbi Jehova solamente pa interes propio. Satanas no ta nenga cu nos lo sirbi Dios ora tur cos den nos bida ta bai bon, pero e ta pretendé cu nos lo stop di sirbi Dios ora nos haña nos cu problema. (Job, capítulo 1 cu 2) Dor di sigui padilanti firme den Jehova su sirbishi apesar di desanimacion, nos por yuda contestá Diabel su acusacion calumniador.—Proverbionan 27:11.

Tantu Ana, Marco como Elías tabatin problema cu a horta nan brevemente di nan  goso. Sin embargo, nan a enfrentá nan problemanan cu éxito i a hiba un bida productivo. Cu Jehova su yudansa, bo tambe por enfrentá desanimacion cu éxito!