Bo Ta Cumpli cu Bo Dedicacion?

“Cualkier cos cu boso ta haciendo, traha riba dje cu henter boso alma como pa Jehova, i no pa hende.”—COLOSENSENAN 3:23.

1. Den un contexto seglar, kico e palabra “dedicacion” ta implicá?

CON atletanan ta alcansá nan prestacion máximo? Den ténis, futbol, basketball, baseball, corementu, golf of cualkier otro deporte, e mihónan ta yega top solamente cu dedicacion total. Entrenamentu di nan condicion físico i mental ta nan prioridad. Esaki ta pas bon cu un dje definicionnan dje palabra “dedicá,” esta, “debocion total na cierto curso di pensamentu of accion.”

2. Kico “dedicacion” ta nificá den Bijbel? Ilustrá.

² Sin embargo, kico “dedicacion” kier men den e sentido bíblico? “Dedicá” ta e traduccion di un palabra hebreo cu kier men “tene separá; ser separá; kita.” * Na Israel di antigwedad, Sumo Sacerdote Aron tabatin “e señal santu di dedicacion” riba su tulban, un plachi briyante di oro puru cu e palabranan hebreo “Santidad ta pertenecé na Jehova” grabá riba dje. E plachi a sirbi pa recordá e sumo sacerdote cu e mester a evitá di haci cualkier cos cu lo profaná e santuario “pasobra e señal di dedicacion, e zeta di ungwento di su Dios, [tabata] riba dje.”—Éxodo 29:6; 39:30; Levítico 21:12.

3. Ki efecto dedicacion mester tin riba nos conducta?

³ Den e contexto aki nos por mira cu dedicacion ta un asuntu serio. E ta implicá identificá nos mes boluntariamente como un sirbidó di Dios, i e ta rekerí conducta limpi. P’esei, nos por comprendé di con apostel Pedro a cita Jehova bisando: “Boso mester ta santu, pasobra ami ta santu.” (1 Pedro 1:15, 16) Como cristiannan dedicá, nos ta carga un responsabilidad di peso pa cumpli cu nos dedicacion i ser fiel te na fin. Pero kico dedicacion cristian ta encerá?—Levítico 19:2; Mateo 24:13.

4. Con nos ta yega na e paso di dedicacion, i cu kico por compar’é?

⁴ Despues cu nos a gana conocimentu exacto di Jehova Dios i su propósitonan, i di Jesucristo i e papel cu e ta hunga den e propósitonan ei, nos a tuma e decision personal di sirbi Dios cu henter nos curason, mente, alma i forsa. (Marco 8:34; 12:30; Juan 17:3) Por considerá esei asta como un voto personal, un dedicacion sin reserva na Dios. Nos no a dedicá nos mes impulsá dor di un capricho emocional. Nos a pens’é cu cuidou i haciendo oracion, usando nos facultad di razoná. Pues, e no tabata un decision temporal. Nos no por ta manera un hende cu ta cuminsá ploeg un cunucu anto entregá na mitar caminda dor cu e trabou ta muchu pisá, of dor cu ta parce cu e cosecha ta muchu leu, of cu e no ta berdaderamente sigur. Considerá ehempel di algun hende cu a ‘pone nan man na e ploeg’ di responsabilidad teocrático den tempu bon i malu.—Lucas 9:62; Romanonan 12:1, 2.

Nan No A Renunciá Nan Dedicacion

5. Con Jeremías tabata un ehempel sobresaliente como sirbidó di Dios dedicá?

⁵ Jeremías su ministerio como profeta na Jerusalem a dura mas cu 40 aña  (647-607 P.E.C.), i e no tabata un asignacion fácil. Jeremías tabata hopi conciente di su limitacionnan. (Jeremías 1:2-6) E tabatin mester di curashi i awante p’e enfrentá e pueblo cabesura di Huda dia aden dia afó. (Jeremías 18:18; 38:4-6) Sin embargo, Jeremías a confia den Jehova Dios, kende a fortalec’é, di manera cu el a resultá di ta un sirbidó di Dios berdaderamente dedicá.—Jeremías 1:18, 19.

6. Ki ehempel apostel Juan a pone pa nos?

⁶ Kico di fiel apostel Juan, cu nan a exiliá den su behes riba Pátmos, un isla secu i bashí, dor cu el a “papia tocante Dios i a duna testimonio di Jesus”? (Revelacion 1:9) El a perseverá i a cumpli cu su posicion como un cristian dedicá pa rond di 60 aña. El a biba pa mira e destruccion di Jerusalem na man dje ehército romano. E tabatin e privilegio di skirbi un Evangelio, tres carta inspirá, i e buki di Revelacion den cua el a premirá e guera di Armagedon. El a entregá ora el a haña sa cu Armagedon lo no bini durante su bida? El a bira indiferente? No, Juan a keda fiel te na su morto, sabiendo cu maske ‘e tempu señalá tabata cerca,’ su visionnan lo mester a cumpli na un fecha mas despues.—Revelacion 1:3; Daniel 12:4.

Ehempelnan Moderno di Dedicacion

7. Con un cierto ruman tabata un excelente ehempel di dedicacion cristian?

⁷ Den tempu moderno, miles di cristian fiel a pega na nan dedicacion celosamente apesar cu nan no a keda bibu pa mira Armagedon. Un di nan tabata Ernest E. Beavor di Inglatera. El a bira un Testigo na 1939, na comienso di Segundo Guera Mundial, i el a sacrificá un negoshi próspero di agencia di potret pa prensa, pa e por cuminsá cu e ministerio di tempu completo. El a bai prizon pa dos aña dor cu el a mantené su neutralidad cristian. Su famia a apoy’é, i na 1950 su tres yunan a asistí na e Scol Bíblico di Galad di Watchtower na New York pa nan haña entrenamentu como misionero. Ruman Beavor tabata asina celoso den su actividad di predicá cu su amigunan tabata yam’é Ernie Armagedon. El a cumpli cu su dedicacion lealmente, i te na su morto na aña 1986 el a keda proclamá cu Armagedon, e guera di Dios, ta cerca. E no a mira su dedicacion como un contract cu Dios pa tempu limitá! *—1 Corintionan 15:58.

8, 9. (a) Ki ehempel hopi hóben na Spaña a pone durante régimen di Franco? (b) Ki preguntanan ta apropiado?

⁸ Un otro ehempel di celo cu no a mengua ta bini di Spaña. Durante régimen di Franco (1939-75), cientos di hóben Testigo dedicá a  tuma un posicion cristian neutral. Hopi di nan a pasa dies aña of mas den prizonnan militar. Un Testigo, Jesus Martín, a acumulá asta 22 aña di sentencia di prizon. Nan a batié mal batí tempu e tabata prezu den un prizon militar na Nort África. Nada di esei no tabata fácil, pero el a nenga di comprometé.

⁹ Mayoria bes e hóbennan aki no tabatin ni e menor idea di ki dia nan lo sali liber, of si un dia nan lo sali mes, pasobra nan a ricibí vários sentencia consecutivo. Tog nan a mantené nan integridad i nan celo p’e ministerio miéntras nan tabata prezu. Ora cu por fin e situacion a cuminsá mehorá na 1973, hopi dje Testigonan ei, cu tabatin rond di 30 aña p’e tempu ei, a sali di prizon anto drenta mesora den e trabou di tempu completo. Algun a bira pionero special i superintendente biahero. Nan a cumpli cu nan dedicacion den prizon, i mayoria di nan a sigui cumpli cuné for di tempu cu nan a sali liber. * Kico di nos awendia? Nos ta fiel na nos dedicacion mescos cu e rumannan leal ei?—Hebreonan 10:32-34; 13:3.

E Punto di Bista Apropiado di Nos Dedicacion

10. (a) Con nos mester mira nos dedicacion? (b) Con Jehova ta mira nos sirbishi na dje?

¹⁰ Con nos ta mira nos dedicacion pa haci Dios su boluntad? E ta e cos principal den nos bida? Sin importá ki circunstancia nos ta aden, sea nos ta hóben of di edad, casá of soltero, salú of enfermo, nos mester haci nos esfuerso pa cumpli cu nos dedicacion segun nos circunstancia personal. Un persona su situacion lo por permitié sirbi den e ministerio di tempu completo como pionero, como boluntario na un sucursal di Sociedad Watch Tower, como misionero of den e trabou di superintendente biahero. Di otro banda, kisas algun mayor tin nan man yen percurando pa e necesidadnan físico i spiritual di nan famia. E oranan relativamente poco cu nan ta dedicá n’e ministerio tur luna ta bal ménos den Jehova su bista, cu e hopi oranan cu un sirbidó di tempu completo ta dedicá? No. Nunca Dios no ta spera algu di nos cu nos no tin. Apostel Pablo a declará e principio aki: “Si e disponibilidad t’ei promé, e ta specialmente aceptabel segun loke un persona tin, no segun loke un persona no tin.”—2 Corintionan 8:12.

11. Di kico nos salbacion ta dependé?

¹¹ Di tur manera, nos salbacion no ta dependé di nada cu nos lo por haci, sino di Jehova su bondad inmerecí pa medio di Cristo Jesus nos Señor. Pablo a splica bon cla: “Tur a peca i no ta alcansá e gloria di Dios, i como un don grátis nan ta ser declará hustu dor di su bondad inmerecí mediante e liberacion dje rescate cu Cristo Jesus a paga.” Sin  embargo, nos obranan ta prueba di nos fe activo den Dios su promesanan.—Romanonan 3:23, 24; Santiago 2:17, 18, 24.

12. Di con nos no mester compará?

¹² Nos no tin nodi compará e tempu cu nos por dedicá n’e sirbishi di Dios, e cantidad di literatura bíblico cu nos ta laga of e cantidad di studio di Bijbel cu nos ta dirigí. (Galationan 6:3, 4) Ni maske kico nos logra den e ministerio cristian, nos tur tin cu corda e palabranan aki di Jesus cu ta siña nos ser humilde: “Asina boso tambe, despues cu boso a haci tur e cosnan cu tabata asigná na boso, bisa: ‘Nos ta esclabo cu no ta sirbi pa nada. Loke nos a haci ta loke nos tabatin deber di a haci.’” (Lucas 17:10) Cu cuantu frecuencia nos por ègt bisa cu nos a haci “tur e cosnan cu tabata asigná” na nos? Pues, e pregunta ta: Di ki calidad nos sirbishi na Dios mester ta?—2 Corintionan 10:17, 18.

Haci Cada Dia Conta

13. Ki actitud nos mester tin segun cu nos ta cumpli cu nos dedicacion?

¹³ Despues cu Pablo a caba di duna conseho na esposa, esposo, yu, mayor i esclabo, e ta skirbi: “Cualkier cos cu boso ta haciendo, traha riba dje cu henter boso alma como pa Jehova, i no pa hende, pasobra boso sa cu ta di Jehova boso lo ricibí e debido recompensa dje herencia. Sirbi como esclabo p’e Doño, Cristo.” (Colosensenan 3:23, 24) Nos no ta rindi sirbishi pa impresioná hende cu loke nos ta logra den Jehova su sirbishi. Nos ta purba sirbi Dios dor di sigui e ehempel di Jesucristo. Jesus a efectuá su ministerio relativamente breve cu un sentido di urgencia.—1 Pedro 2:21.

14. Ki advertencia Pedro a duna relacioná cu e último dianan?

¹⁴ Apostel Pedro tambe a desplegá un sentido di urgencia. Den su di dos carta, el  a advertí cu den e último dianan lo tin mofadó—apóstata i hende cu ta duda—cu, segun nan mes deseonan, lo plantia pregunta tocante e presencia di Cristo. Sin embargo, Pedro a bisa: “Jehova no ta lento en cuanto su promesa, manera algun hende ta considerá lentitud, pero e tin pacenshi cu boso pasobra e no ta deseá pa ningun hende ser destruí, sino ta deseá pa tur alcansá repentimentu. Sin embargo, e dia di Jehova lo bini manera ladron.” Sí, Jehova su dia ta bini sigur. P’esei tur dia nos mester pensa riba con sigur i sólido nos fe den Dios su promesa ta realmente.—2 Pedro 3:3, 4, 9, 10.

15. Con nos mester mira cada dia den nos bida?

¹⁵ Pa nos cumpli cu nos dedicacion den un manera conciencial, nos mester usa cada dia di tal forma cu e ta duna Jehova alabansa. Na fin di cada dia, nos por pensa bek i mira con nos a contribuí di un of otro manera n’e santificacion dje nomber di Dios i n’e proclamacion dje bon nobo di Reino? Kisas nos a hacié pa medio di nos conducta limpi, nos combersacion edificante of nos interes amoroso den nos amigu i famianan. Nos a usa oportunidadnan disponibel pa compartí nos speransa cristian cu otro hende? Nos a yuda un hende pensa seriamente riba Dios su promesanan? Laga nos acumulá algu positivo den sentido spiritual cada dia, como si fuera formando un cuenta di banco spiritual sólido.—Mateo 6:20; 1 Pedro 2:12; 3:15; Santiago 3:13.

Tene Bo Bista Cla

16. Den ki maneranan Satanas ta purba swak nos dedicacion na Dios?

¹⁶ Nos ta biba den un tempu cu ta birando mas difícil pa cristiannan. Satanas i su agentenan ta purba nubla e distincion entre bon i  malu, limpi i impuru, moral i inmoral, ético i contra ética. (Romanonan 1:24-28; 16:17-19) Satanas a haci cu ta masha fácil pa nos contaminá nos curason i nos mente pa medio di un ‘remote control’ di television of un keyboard di computer. Nos bista spiritual por bira nublá of perde enfoke, i pone cu nos ta keda sin dicerní su obranan mañoso. Nos determinacion pa cumpli cu nos dedicacion por debilitá, i nos gara riba e “ploeg” por floha si nos comprometé nos normanan spiritual.—Lucas 9:62; Filipensenan 4:8.

17. Con Pablo su conseho por yuda nos mantené nos relacion cu Dios?

¹⁷ P’esei, e palabranan di Pablo na e congregacion na Tesalónica ta masha oportuno: “Esaki ta e boluntad di Dios, boso santificacion, pa boso abstené di fornicacion; pa cada un di boso sa con pa haña posesion di su mes wea den santificacion i onor, no den apetit sexual cudicioso manera e nacionnan tambe tin cu no ta conocé Dios.” (1 Tesalonicensenan 4:3-5) Inmoralidad a hiba na expulsion di algun persona for dje congregacion cristian; esnan cu a neglishá nan dedicacion na Dios. Nan a permití nan relacion cu Dios bira swak, di moda cu Dios no a conta mas den nan bida. Sin embargo, Pablo a bisa: “Dios a yama nos, no cu permiso pa impuresa, sino en relacion cu santificacion. Pues, anto, e hende cu no ta haci caso, no ta di hende e no ta haci caso, sino di Dios, cu ta pone su spiritu santu den boso.”—1 Tesalonicensenan 4:7, 8.

Kico Ta Bo Determinacion?

18. Kico mester ta nos determinacion?

¹⁸ Si nos ta conciente dje seriedad di nos dedicacion na Jehova Dios, kico nos lo mester ta determiná pa haci? Nos mester ta firmemente determiná pa tene un bon concenshi, tantu cu nos conducta como cu nos ministerio. Pedro a urgi: “Tene un bon concenshi, di manera cu den e detaye den cua nan ta papia contra boso, esnan cu ta papia cu menosprecio di boso bon conducta en relacion cu Cristo por keda bergonsá.” (1 Pedro 3:16) Kisas nos lo mester sufri i enfrentá abusu dor di nos conducta cristian, pero ta esei Cristo tambe a enfrentá debí na su fe i lealtad na Dios. “P’esei,” Pedro a bisa, “siendo cu Cristo a sufri den carni, boso tambe arma boso cu e mésun disposicion mental; pasobra e hende cu a sufri den carni a abstené di picánan.”—1 Pedro 4:1.

19. Kico nos kier pa nan bisa di nos?

¹⁹ Sí, nos determinacion firme pa cumpli cu nos dedicacion lo protehá nos dje trampanan di Satanas su mundu enfermo den sentido spiritual, moral i físico. Pero tin mas ainda. Nos lo haña confiansa di cu nos tin e aprobacion di Dios, loke ta muchu mas mihó cu cualkier cos cu Satanas i su agentenan por ofrecé. Pues, no laga nan bisa nunca di nos cu nos a bandoná e amor cu nos tabatin tempu nos a conocé e berdad pa promé bes. Mas bien, laga nan bisa di nos mescos cu di e congregacion di promé siglo na Tiatira: “Mi conocé bo echonan, i bo amor i fe i sirbishi i awante, i cu bo echonan recien ta mas cu esnan di ántes.” (Revelacion 2:4, 18, 19) Sí, no laga nos ta lou relacioná cu nos dedicacion, sino laga nos “briya cu e spiritu,” celoso te na fin. I e fin ta cerca.—Romanonan 12:11; Revelacion 3:15, 16.

[Nota]

Bo Ta Corda?

• Kico dedicacion ta encerá?

• Cua ehempelnan di sirbidónan di Dios dedicá, antiguo i moderno, merecé pa nos imitá nan?

• Con nos mester mira nos sirbishi na Dios?

• Kico mester ta nos determinacion relacioná cu nos dedicacion na Dios?

[Preguntanan di Estudio]

[Plachi na página 15]

Jeremías a keda fiel apesar di maltrato feros

[Plachi na página 16]

Ernest Beavor a pone ehempel pa su yunan como un cristian celoso

[Plachi na página 17]

Cientos di Testigo hóben den prizon na Spaña a mantené nan integridad

[Plachinan na página 18]

Laga nos acumulá algu positivo den sentido spiritual cada dia