Busca Jehova Promé cu e Dia di Su Rabia
Busca Jehova Promé cu e Dia di Su Rabia
“Busca Jehova . . . Busca husticia, busca suavedad. Probablemente boso lo ser scondí den e dia di Jehova su rabia.”—SOFONÍAS 2:3.
1. Den ki condicion spiritual Huda tabata ora Sofonías a cuminsá cu su trabou profético?
SOFONÍAS a cuminsá su trabou profético na un tempu crítico den historia di Huda. E condicion spiritual dje nacion tabata na un nivel hopi abou. En bes di confia den Jehova, e pueblo tabata acudí na sacerdote i astrólogonan pagano pa guia. Adoracion di Baal, cu su ritonan di fertilidad, tabata abundá den e pais. E lidernan civil—esta prinsnan, noblenan i huesnan—tabata oprimí net esnan cu nan mester a protehá. (Sofonías 1:9; 3:3) No ta straño anto cu Jehova a dicidí di ‘saca su man’ contra Huda i Jerusalem pa destruí nan!—Sofonías 1:4.
2. Ki speransa tabatin pa sirbidónan fiel di Dios na Huda?
2 Sin embargo, pa malu cu e situacion tabata, tabatin un rayo di speransa. Awor Hosías, yu di Amon, tabata riba trono. Maske e tabata mucha ainda, e tabatin amor sincero pa Jehova. Ki un animacion lo tabata pa e poco israelitanan cu a sirbi Dios fielmente, si e rey nobo aki restorá adoracion puru den Huda! Podisé otro hende lo a ser impulsá pa uni cu nan i tambe ser scondí den e dia di Jehova su rabia.
Loke Ta Necesario pa Ser Conserbá
3, 4. Pa un hende por scapa den “e dia di Jehova su rabia” cua tres rekisito e mester cumpli cuné?
3 Di berdad algun hende lo por a scapa den e dia di Jehova su rabia? Sí, basta cu nan a cumpli cu e tres condicionnan describí den Sofonías 2:2 i 3. Segun nos ta lesa e versículonan ei, laga nos tuma nota special dje tres rekisitonan aki. Sofonías a skirbí: “Promé cu e statuto duna lus na cualkier cos, promé cu e dia a pasa mescos cu bagas, promé cu e rabia ardiente di Jehova bini riba boso, promé cu e dia di rabia di Jehova bini riba boso, busca Jehova, boso tur e mansunan di tera, boso cu a practicá Su mes decision hudicial. Busca husticia, busca suavedad. Probablemente boso lo ser scondí den e dia di Jehova su rabia.”
4 Pues, pa conserbá su bida, un persona mester a: (1) busca Jehova, (2) busca husticia i (3) busca suavedad. E rekisitonan aki mester interesá nos mashá awe. Di con? Pasobra mescos cu Huda i Jerusalem a confrontá un dia di regla cuenta den siglo 7 P.E.C., asina tambe e nacionnan di cristiandad—i de echo, tur malbado—ta rumbo pa un confrontacion final cu Jehova Dios durante e binidero “tribulacion grandi.” (Mateo 24:21) Ken cu ta deseá di ser scondí n’e tempu ei tin cu tuma accion decisivo awor akí. Con? Dor di busca Jehova, busca husticia i busca suavedad promé cu ta demasiado lat!
5. Kico ta encerá “busca Jehova” awe?
5 Podisé bo ta bisa: ‘Mi ta un Testigo di Jehova, un sirbidó dedicá i bautisá di Dios. Mi no a cumpli caba cu e rekisitonan ei?’ En realidad, dedicá nos mes na Jehova, so no ta basta. Israel tabata un nacion dedicá, pero den tempu di Sofonías e pueblo di Huda no tabata biba na armonia cu e dedicacion ei. P’esei cu tempu Jehova a rechasá e nacion. Awe, “busca Jehova” ta nificá desaroyá i mantené un relacion caluroso i personal cuné den asociacion cu su organisacion terenal. E ta nificá haña sa con Dios ta mira cosnan i con e ta sinti. Nos ta busca Jehova ora nos ta studia su Palabra cuidadosamente i ta meditá riba dje i ta aplicá su conseho den nos bida. Tambe segun cu nos ta busca Jehova su guia den oracion intenso i ta sigui e direccion di su spiritu santu, nos relacion cu Jehova ta bira mas cerá i nos ta ser impulsá pa sirbié ‘cu tur nos curason, alma i forsa vital.’—Deuteronomio 6:5; Galationan 5:22-25; Filipensenan 4:6, 7; Revelacion 4:11.
6. Con nos por “busca husticia” i di con esei ta posibel asta den e mundu aki?
6 E di dos rekisito mencioná na Sofonías 2:3 ta “busca husticia.” Mayoria di nos a haci cambionan importante den nos bida pa asina nos por a cualificá pa bautismo cristian. Sin embargo, nos tin cu sigui sostené Dios su normanan moral hustu durante henter nos bida. Tin hende cu a cuminsá bon den e aspecto aki, pero despues nan a laga mundu contaminá nan. No ta fácil pa busca husticia, pasobra nos ta rondoná di hende cu ta mira inmoralidad sexual, gañamentu i otro picánan como algu normal. Pero un deseo fuerte di agradá Jehova por vence cualkier tendencia di busca aprobacion di mundu dor di purba pas den dje. Huda a perde Dios su fabor pasobra el a purba imitá su nacionnan bisiña malbado. En bes di imitá mundu anto, laga nos ta “imitadónan di Dios,” cultivando “e personalidad nobo cu a ser creá segun e boluntad di Dios den berdadero husticia i lealtad.”—Efesionan 4:24; 5:1.
7. Con nos ta “busca suavedad”?
7 E di tres punto na Sofonías 2:3 ta cu si nos kier ser scondí den e dia di Jehova su rabia, nos mester “busca suavedad.” Tur dia, nos ta den contacto cu homber, muher i hóbennan cu ta tur cos, ménos mansu. Pa nan, ser di genio suave ta un defecto. Nan ta considerá sumision un debilidad serio. Nan ta exigente, egoista i ta tene duru na nan mes ideanan, i nan ta kere cu mester duna nan tur loke nan ta considerá como nan “derecho” i preferencianan personal cueste loke cueste. Esta tristu si nos mester pega cu algun dje actitudnan ei! Awor ta tempu pa “busca suavedad.” Con? Dor di ta sumiso na Dios, aceptando su disiplina humildemente i cumpli cu su boluntad.
Di Con “Probablemente” Lo Bo Ser Scondí?
8. Kico uso dje palabra “probablemente” na Sofonías 2:3 ta indicá?
8 Ripará cu Sofonías 2:3 ta bisa: “Probablemente boso lo ser scondí den e dia di Jehova su rabia.” Di con Sofonías a usa e palabra “probablemente” ora el a dirigí su mes na “e mansunan di tera”? Wel, e mansunan ei a dal pasonan positivo, pero esei no kier men cu nan mester confia den nan mes. Nan no a yega na fin di nan curso di bida den fieldad. Tabata posibel cu algun di nan kisas lo cai den picá. Esei por sosodé cu nos tambe. Jesus a bisa: “Esun cu a wanta te na fin ta esun cu lo ser salbá.” (Mateo 24:13) Sí, salbacion den e dia di rabia di Jehova ta dependé di si nos ta sigui haci loke ta hustu den su bista. Esei ta bo determinacion firme?
9. Ki pasonan recto e rey hóben Hosías a tuma?
9 Parce cu e palabranan di profeta Sofonías a conmové rey Hosías pa “busca Jehova.” E Scritura ta bisa: “Den e di ocho aña di su reinado, miéntras e [Hosías] tabata mucha ainda [mas o ménos 16 aña], el a cuminsá busca e Dios di David su antepasado.” (2 Crónicanan 34:3) Tambe Hosías a sigui “busca husticia,” pasobra nos ta lesa: “I den e di diesdos aña [ora Hosías tabatin mas o ménos 20 aña] el a cuminsá limpia Huda i Jerusalem dje lugánan haltu i dje palunan sagrado i dje imágennan grabá i dje estatuanan bashá. Ademas, nan a basha abou dilanti dje e altarnan dje Baalnan.” (2 Crónicanan 34:3, 4) Hosías a “busca suavedad” tambe, actuando humildemente pa agradá Jehova dor di limpia e pais di idolatria i di otro prácticanan religioso falsu. Otro hende mansu lo mester a alegrá mashá pa e desaroyonan aki!
10. Kico a pasa na Huda na aña 607 P.E.C., pero ken a scapa?
10 Hopi hudiu a bolbe na Jehova durante e reinado di Hosías. Sin embargo, despues cu e rey a muri, mayoria a bolbe na nan custumbernan bieu, prácticanan cu tabata totalmente inaceptabel pa Dios. Manera Jehova a decretá, e babilonionan a conkistá Huda i a destruí su ciudad capital, Jerusalem, na aña 607 P.E.C. Pero, no ta tur cos tabata perdí. Profeta Jeremías, e etiopio Ebed-melec, e desendientenan di Jónadab i otronan cu tabata fiel na Dios a ser scondí den e dia ei di Jehova su rabia.—Jeremías 35:18, 19; 39:11, 12, 15-18.
Enemigunan di Dios, Tuma Nota!
11. Di con ta un desafio pa keda fiel na Dios awe, pero kico e enemigunan di e pueblo di Jehova lo haci bon di wak?
11 Miéntras nos ta warda e dia di Jehova su rabia riba e sistema malbado aki, nos “ta topa cu vários prueba.” (Santiago 1:2) Den vários pais cu ta bisa cu nan ta respetá libertad di adoracion, cleronan manipuladó a usa e influencia cu nan tin riba autoridadnan seglar pa persiguí e pueblo di Dios cruelmente. Hende sin escrúpulo ta calumniá e Testigonan di Jehova, ta tilda nan di ta un “secta peligroso.” Dios ta conciente di nan accionnan, i nan lo no keda sin castigu. E enemigunan ei di Dios lo haci bon di wak kico a sosodé cu antiguo enemigunan dje pueblo di Dios manera e filisteonan. E profecia ta bisa: “Pa loke ta Gaza, un stad bandoná ta loke lo e bira; i Askelon mester bira un desierto desolá. Pa loke ta Asdod, den pleno merdia nan lo core cuné; pa loke ta Ekron, lo rank’é saca cu rais.” E stadnan filisteo Gaza, Askelon, Asdod i Ekron lo a keda completamente destruí.—Sofonías 2:4-7.
12. Kico a pasa cu Filistea, Moab i Amon?
12 E profecia ta sigui: “Mi a tende e reproche di Moab i e palabranan insultante dje yunan di Amon, cu cua nan a reprochá mi pueblo i a sigui desplegá un aire di arogancia contra nan teritorio.” (Sofonías 2:8) Ta berdad, Egipto i Etiopia a sufri na man di invasornan babilonio. Pero kico tabata Dios su huicio contra Moab i Amon, nacionnan cu a bini di Lot, subrino di Abraham? Jehova a predicí: “Moab mes lo bira mescos cu Sódoma, i e yunan di Amon mescos cu Gomora.” Distinto di nan antepasadonan—Lot su dos yu muhernan, cu a sobrebibí e destruccion di Sódoma i Gomora—lo no sconde orguyoso Moab i Amon di Dios su huicio. (Sofonías 2:9-12; Génesis 19:16, 23-26, 36-38) Unda e nacion di Filistea ta awe, i unda su stadnan ta? I kico di Moab i Amon, un tempu nacionnan orguyoso? Busca cuantu cu bo kier, lo bo no haña nan.
13. Ki descubrimentu arkeológico nan a haci na Nínive?
13 Den tempu di Sofonías, e Imperio Asirio tabata na e punto máximo di su poder. E arkeólogo Austen Layard, describiendo un seccion dje palacio real cu el a descubrí n’e capital asirio Nínive, a skirbi: “E plafonnan . . . tabata dividí den seccionnan cuadrá, pintá cu flor of cu figuranan di bestia. Tin di nan cu tabata furá cu ivor, i cada seccion tabata dorná cu rand i malchi elegante. E biganan, i tambe muraya dje cuartonan, kisas tabata cubrí cu oro i plata, of kisas asta furá cu plachi di oro i plata; i pa obranan di palu nan a usa e palunan di mas exkisito, i entre nan palu di seda a destacá.” Tog, manera Sofonías a profetisá, Asiria mester a ser destruí i su stad capital Nínive lo a bira “un cunucu desolá.”—Sofonías 2:13.
14. Con e profecia di Sofonías a haña cumplimentu riba Nínive?
14 Apénas 15 aña despues cu Sofonías a papia e palabranan aki, e poderoso Nínive a ser destruí, i nan a haci su palacio real un ruina. Sí, e stad orguyoso ei a ser rebahá na stòf. E palabranan aki a predicí di un manera bibu con grandi e destruccion lo a bai ta: “Tantu pelican como porco di spiña lo pasa anochi ei mes entre e cabesnan di pilá [cu a cai]. Un bos lo sigui canta den e bentana. Lo tin destruccion n’e drempel.” (Sofonías 2:14, 15) Nínive su edificionan mahestuoso lo sirbi solamente como lugá di biba pa porco di spiña i pelican. Den e cayanan dje stad lo no tende mas e zonido di comercio, e gritunan di guerero ni e canto di sacerdote. Den e cayanan principal cu un tempu tabata asina druk, lo tende solamente un bos tristu asina ta canta den e bentana, kisas e canto tristu di un para of e yoramentu di bientu. Mare tur e enemigunan di Dios yega na nan fin den e mésun manera!
15. Kico nos por siña for di loke a pasa cu Filistea, Moab, Amon i Asiria?
15 Kico nos ta siña dor di considerá loke a pasa cu Filistea, Moab, Amon, i Asiria? Wel esaki: Como Jehova su sirbidónan, nos no tin ningun motibu pa teme nos enemigunan. Dios ta mira loke esnan cu ta oponé su pueblo ta haci. Jehova a tuma accion contra su enemigunan den pasado, i su huicio lo bini riba henter e tera habitá awe. Pero lo tin sobrebibiente: ‘un multitud grandi for di tur nacion.’ (Revelacion 7:9) Bo por ta entre nan, pero solamente si bo sigui busca Jehova, busca husticia i busca suavedad.
Ai di e Malechornan Insolente!
16. Kico e profecia di Sofonías a bisa tocante e prinsnan i e lidernan religioso di Huda, i pakico e palabranan aki ta pas pa cristiandad?
16 E profecia di Sofonías un biaha mas ta enfocá riba Huda i Jerusalem. Sofonías 3:1 i 2 ta bisa: “Ai di esun cu ta rebelá i contaminá su mes, e stad opresivo! E no a scucha na un bos; e no a aceptá disiplina. Den Jehova e no a confia. Na su Dios e no a hala cerca.” Esta trágico cu e pueblo no a haci caso di Jehova su esfuersonan pa disipliná nan! E crueldad dje prinsnan, noblenan i huesnan tabata realmente teribel. Sofonías a condená e sinbergwensa cu e lidernan religioso tabata dor di bisa: “Su profetanan tabata insolente, hombernan di traicion. Su sacerdotenan mes a profaná loke tabata santu; nan a actua cu violencia contra e ley.” (Sofonías 3:3, 4) Esta bon e palabranan ei ta describí cristiandad su profeta i sacerdotenan awe! Insolentemente, nan a kita e nomber divino for di nan traduccionnan di Bijbel i a siña doctrinanan cu ta malrepresentá Esun cu nan ta bisa cu nan ta adorá.
17. Sea hende ta scucha of no, di con nos mester sigui declará e bon nobo?
17 Jehova tabatin consideracion cu su antiguo pueblo i el a spierta nan dje accion cu e tabata bai tuma. El a manda su sirbidónan e profetanan—entre nan Sofonías i Jeremías—pa urgi e pueblo pa repentí. Sí, “Jehova . . . no tabata cometé inhusticia. Mainta tras mainta el a sigui duna su mes decision hudicial. Ora di dia habri esei no tabata falta.” Kico tabata e reaccion? “Pero e inhustu no tabata conocé bergwensa,” Sofonías a bisa. (Sofonías 3:5) Awe ta zona un spiertamentu similar. Si bo ta un publicadó dje bon nobo, bo ta participando den e trabou di spiertamentu aki. Sigui declará e bon nobo sin baha man! Sea cu e hendenan scucha of no, for dje punto di bista di Dios bo ministerio ta un éxito tanten cu bo ta cumpli cuné fielmente; bo no tin nodi sinti bergwensa ora bo ta haci Dios su trabou cu celo.
18. Con Sofonías 3:6 lo ser cumplí?
18 Dios su ehecucion di huicio lo no ta limitá na e desolacion di cristiandad. Jehova ta amplia su denunciacion p’e incluí tur e nacionnan di tera: “Mi a corta nacionnan kita afó; nan torennan di skina tabata desolá. Mi a destruí nan cayanan, di manera cu no tabatin niun hende ta pasa dor di nan. Nan stadnan a ser desolá.” (Sofonías 3:6) E palabranan aki ta asina confiabel cu Jehova ta papia dje destruccion como si fuera el a sosodé caba. Kico a pasa cu e stadnan di Filistea, Moab i Amon? I kico di Nínive, e capital di Asiria? Nan destruccion ta sirbi como un advertencia pa e nacionnan djawe. Niun hende no por tene mofa di Dios.
Sigui Busca Jehova
19. Ki preguntanan cu ta stimulá pensamentu serio nos por haci?
19 Den Sofonías su tempu, Dios a los su rabia riba esnan cu di un manera malbado a “haci tur nan tratonan ruinoso.” (Sofonías 3:7) Mescos lo sosodé den nos tempu. Bo ta mira evidencia cu e dia di Jehova su rabia ta cerca? Bo ta sigui “busca Jehova” dor di lesa su Palabra regularmente, esta, tur dia? Bo ta “busca husticia” dor di hiba un bida moralmente limpi na armonia cu Dios su normanan? I bo ta “busca suavedad” dor di desplegá un genio suave i un actitud sumiso na Dios i na su areglonan pa salbacion?
20. Cua preguntanan nos lo considerá den e artículo final di e seri aki basá riba e profecia di Sofonías?
20 Si nos sigui busca Jehova, husticia i suavedad fielmente, nos por spera di disfrutá di bendicionnan ricu awor, sí, asta den e “último dianan” aki cu ta proba bo fe. (2 Timoteo 3:1-5; Proverbionan 10:22) Probablemente nos lo kier puntra: ‘Den ki manera nos como Jehova su sirbidónan di tempu actual ta ser bendicioná, i ki futuro bendicionnan Sofonías su profecia ta pone dilanti di esnan cu lo ser scondí den e dia di Jehova su rabia cu ta acercando rápidamente?’
Con Lo Bo Contestá?
• Con hende ta “busca Jehova”?
• Kico “busca husticia” ta encerá?
• Con nos por “busca suavedad”?
• Di con nos mester sigui busca Jehova, husticia i suavedad?
[Preguntanan di Estudio]
[Plachi na página 18]
Abo ta busca Jehova mediante studio di Bijbel i oracion intenso?
[Plachi na página 21]
Dor cu nan ta sigui busca Jehova, un multitud grandi lo sobrebibí e dia di su rabia