Jehova Su Dia di Huicio Ta Cerca!
Jehova Su Dia di Huicio Ta Cerca!
“E gran dia di Jehova ta cerca. E ta cerca, i e ta pura masha tantu.”—SOFONÍAS 1:14.
1. Ki advertencia Dios a duna mediante Sofonías?
JEHOVA DIOS ta cerca di drenta accion contra e malbadonan. Scucha! Esaki ta su advertencia: “Lo mi caba cu hende terenal . . . lo mi corta humanidad kita for di superficie di suela.” (Sofonías 1:3) Señor Soberano Jehova a expresá e palabranan aki pa medio di su profeta Sofonías, cu kisas tabata e bisa-bisanietu dje rey fiel Ezekías. E declaracion formal ei, expresá den tempu di bon rey Hosías, no tabata un bon indicacion pa e malbadonan cu tabata biba den e tera di Huda.
2. Di con Hosías su accionnan no a prevení Jehova su dia di huicio?
2 Sin duda, Sofonías su profetisamentu a haci e hóben Hosías mas conciente dje necesidad pa limpia Huda di adoracion impuru. Sin embargo, e accionnan cu e rey a tuma pa limpia e pais di religion falsu no a kita tur maldad for di entre e pueblo, ni no a compensá e picánan di su tawela, rey Manases, cu “a yena Jerusalem cu sanger inocente.” (2 Reynan 24:3, 4; 2 Crónicanan 34:3) P’esei, Jehova su dia di huicio lo a bini sin falta.
3. Con nos por ta sigur cu ta posibel pa sobrebibí “e dia di Jehova su rabia”?
3 Sin embargo, lo tabatin sobrebibiente di e dia inspirador di temor ei. P’esei e profeta di Dios a urgi: “Promé cu e statuto duna lus na cualkier cos, promé cu e dia a pasa mescos cu bagas, promé cu e rabia ardiente di Jehova bini riba boso, promé cu e dia di rabia di Jehova bini riba boso, busca Jehova, boso tur, e mansunan di tera, boso cu a practicá Su mes decision hudicial. Busca husticia, busca suavedad. Probablemente boso lo ser scondí den e dia di Jehova su rabia.” (Sofonías 2:2, 3) Teniendo na mente e speransa di sobrebibí Jehova su dia di huicio, laga nos ban considerá e buki bíblico di Sofonías. E tabata skirbí na Huda promé cu aña 648 P.E.C. i ta parti di Dios su “palabra profético,” na cua nos tur mester presta atencion di henter nos curason.—2 Pedro 1:19.
Jehova Su Man Ta Sacá
4, 5. Con Sofonías 1:1-3 a cumpli riba e malbadonan di Huda?
4 “E palabra di Jehova” na Sofonías ta cuminsá cu e advertencia citá na principio. Dios ta declará: “‘Sin falta lo mi caba cu tur cos for di riba superficie di suela,’ ta e expresion di Jehova. ‘Lo mi caba cu hende terenal i bestia. Lo mi caba cu e criatura buladó di shelu i e piscánan di laman, i cu e piedranan di trompecá huntu cu e malbadonan; i lo mi corta humanidad kita for di superficie di suela,’ ta e expresion di Jehova.”—Sofonías 1:1-3.
5 Sí, Jehova lo a pone fin na maldad grave den e tera di Huda. Pero, ken Dios lo a usa pa “caba cu tur cos for di riba superficie di suela”? Ya cu aparentemente Sofonías a profetisá durante e promé parti dje reinado di rey Hosías, cu a cuminsá na aña 659 P.E.C., e palabranan profético ei a haña cumplimentu den e desolacion di Huda i su ciudad capital, Jerusalem, na man dje babilonionan na aña 607 P.E.C. Na e tempu ei nan a “caba cu” e malbadonan di Huda.
6-8. Kico Sofonías 1:4-6 a profetisá, i con e profecia ei a cumpli den antiguo Huda?
6 Pronosticando Dios su actonan contra adoradónan falsu, Sofonías 1:4-6 ta bisa: “Lo mi saca mi man contra Huda i contra tur e habitantenan di Jerusalem, i lo mi corta kita for di e lugá aki esnan cu a sobra dje Baal, e nomber dje sacerdotenan dje diosnan stranhero huntu cu e sacerdotenan, i esnan cu ta buig riba dak dilanti e ehército di shelu, i esnan cu ta buig abou, haciendo huramentu firme na Jehova i haciendo huramentu firme pa Malcam; i esnan cu ta hala atras di sigui Jehova i cu no a busca Jehova i no a informá cerca dje.”
7 Jehova su man tabata sacá contra e pueblo di Huda i Jerusalem. E tabata decididu pa corta afó, es decir mata, e adoradónan dje dios cananeo di fertilidad, Baal. Vários dios local a ser yamá Baal dor cu nan adoradónan tabata considerá cu nan a poseé i tin influencia riba cierto lugánan specífico. Por ehempel, tabatin e Baal cu e moabita i madianitanan a adorá na ceru Peor. (Númeronan 25:1, 3, 6) Den henter Huda, Jehova lo a corta e sacerdotenan di Baal afó, i tambe e levitanan sacerdotal infiel cu tabata violá e ley di Dios dor di tin amistad cu nan.—Éxodo 20:2, 3.
8 Tambe Dios lo a corta afó esnan ‘cu ta buig pa e ehército di shelu,’ evidentemente dor di practicá astrologia i adorá solo. (2 Reynan 23:11; Jeremías 19:13; 32:29) Ademas Dios lo a los su rabia contra esnan cu a purba combiná adoracion berdadero cu religion falsu, dor di ‘haci huramentu firme na Jehova i pa Malcam.’ Malcam posiblemente ta un otro nomber pa Molec, e dios principal dje amonitanan. Adoracion di Molec a incluí sacrificá mucha.—1 Reynan 11:5; Jeremías 32:35.
Fin di Cristiandad Ta Cerca!
9. (a) Di kico cristiandad ta culpabel? (b) Distinto for di esnan infiel di Huda, kico nos mester ta determiná pa haci?
9 Tur esaki ta pone nos corda mashá riba cristiandad, cu ta metí profundamente den adoracion falsu i astrologia! I e rol cu el a hunga den sacrificá miyones di bida riba e altar di guera cu clero a apoyá, en berdad ta repugnante! Laga nos no bira nunca manera esnan infiel di Huda cu a ‘hala atras di sigui Jehova,’ dor di bira indiferente i no busk’é mas ni busca su guia. Mas bien, laga nos mantené nos integridad na Dios.
10. Con lo bo splica e nificacion profético di Sofonías 1:7?
10 E siguiente palabranan dje profeta ta cuadra tantu cu e malechornan di Huda como cu e malbadonan di nos tempu. Sofonías 1:7 ta bisa: “Warda silencio dilanti Señor Soberano Jehova; pasobra e dia di Jehova ta cerca, pasobra Jehova a prepará un sacrificio; el a santificá esnan cu el a invitá.” Parce cu “esnan cu el a invitá” tabata e enemigunan caldeo di Huda. E “sacrificio” tabata Huda mes, incluso su ciudad capital. Pues Sofonías a anunciá Dios su propósito di destruí Jerusalem, i tambe e profecia aki a señalá na e destruccion di cristiandad. De facto, dor cu Dios su dia di huicio ta asina cerca awe, henter mundu mester “warda silencio dilanti Señor Soberano Jehova” i tende loke e ta bisa pa medio di Jesus su siguidónan ungí—e “trupa chikitu”—i nan compañeronan, su ‘otro carnénan.’ (Lucas 12:32; Juan 10:16) Destruccion ta spera tur cu no scucha i cu di e forma ei ta pone nan mes en contra di e gobernacion di e Reino di Dios.—Salmo 2:1, 2.
Pronto, un Dia di Grita Yora!
11. Kico ta e nificacion básico di Sofonías 1:8-11?
11 Relacioná cu e dia di Jehova, Sofonías 1:8-11 ta agregá: “‘Tin cu sosodé riba e dia di Jehova su sacrificio cu lo mi duna atencion na e prinsnan, i na e yunan dje rey, i na tur esnan bistí cu paña stranhero. I lo mi duna atencion na tur cu ta subi riba e plataforma riba e dia ei, esnan cu ta yena e cas di nan doñonan cu violencia i decepcion. I tin cu sosodé riba e dia ei,’ ta e expresion di Jehova, ‘e zonido di un gritamentu for dje Porta di Piscá, i un gritu di yoramentu for di e segundo bario, i un gran krakmentu for dje cerunan. Grita yora, habitantenan di Maktes, pasobra a silenciá tur e personanan cu ta comerciante; a corta afó tur esnan cu ta pisa plata.’”
12. Con asina algun hende ta ser hañá “bistí cu paña stranhero”?
12 Jehoas, Jehoiakim i Joakin lo a subi trono despues di rey Hosías. Caba lo a bini e reinado di Sedekías, marcá pa e destruccion di Jerusalem. Maske nan tabata bai haña nan cu e calamidad ei, aparentemente algun hende a busca e aceptacion di nacionnan bisiña dor di ta “bistí cu paña stranhero.” Di igual manera, awe tin hopi hende cu ta mustra di vários forma cu nan no ta parti di Jehova su organisacion. Dor cu ta masha bisto cu nan ta parti dje organisacion di Satanas, nan lo ser castigá.
13. Na armonia cu Sofonías su profecia, kico mester a sosodé ora e babilonionan a atacá Jerusalem?
13 “E dia ei” di regla cuenta cu Huda ta corespondé cu Jehova su dia pa ehecutá huicio contra su enemigunan, caba cu maldad i proba su supremacia. Ora e babilonionan a atacá Jerusalem, lo a sali un gritu for dje Porta di Piscá. Posiblemente a yam’é asina dor cu e tabata cerca dje plasa di bende piscá. (Nehemías 13:16) E trupanan di Babilonia lo a drenta e sector cu yama e segundo bario, i e “krakmentu for dje cerunan” kisas a referí na e zonido dje caldeonan na caminda. Lo tabatin “un gritu di yoramentu” di parti dje habitantenan di Maktes, cu kisas tabata e parti superior dje vaye Central. Di con nan lo a grita yora? Dor cu actividad comercial lo a stop einan, incluso e actividad di “esnan cu ta pisa plata.”
14. Con leu Dios lo a bai examiná esnan cu a pretendé di ta su adoradónan?
14 Con leu Jehova lo a bai den examiná esnan cu a pretendé di ta su adoradónan? E profecia ta sigui: “Tin cu sosodé n’e tempu ei cu lo mi scudriñá Jerusalem cuidadosamente cu lampi, i lo mi duna atencion n’e hombernan cu ta cuaha riba nan kachi-kachi i cu ta bisa den nan curason: ‘Jehova lo no haci bon, i lo e no haci malu.’ I nan rikesa mester yega di ta pa plunder i nan casnan pa un desierto desolá. Anto nan lo traha cas, pero nan lo no biba den nan; i nan lo planta hofi di wijndruif, pero nan lo no bebe biña for di nan.”—Sofonías 1:12, 13.
15. (a) Kico lo a sosodé cu e sacerdotenan apóstata di Jerusalem? (b) Kico ta spera practicantenan di religion falsu djawe?
15 E sacerdotenan apóstata di Jerusalem tabata combiná adoracion di Jehova cu religion falsu. Maske nan a sinti nan den siguridad, Dios lo a busca nan manera cu lampi briyante cu lo a penetrá e scuridad spiritual caminda nan a bai busca refugio. Niun di nan lo no a scapa e proclamacion i e ehecucion di huicio divino. E apóstatanan despreocupá ei a sak manera kachi-kachi den bom di un poron di biña. Nan no tabata kier pa hende bin molestiá nan cu ningun declaracion di intervencion divino den asuntunan humano, pero nan lo no a scapa e ehecucion di Dios su huicio riba nan. Di igual manera lo no tin escape pa practicantenan di religion falsu djawe, incluso miembronan di cristiandad i esnan apóstata cu a bai for di Jehova su adoracion. Nengando cu nos ta den “e último dianan,” nan ta bisa den nan curason, “Jehova lo no haci bon, i lo e no haci malu.” Pero esta kibocá nan ta!—2 Timoteo 3:1-5; 2 Pedro 3:3, 4, 10.
16. Kico lo a sosodé ora huicio divino ser ehecutá riba Huda, i con conocimentu di esei mester influenciá nos?
16 E apóstatanan di Huda a haña spiertamentu cu e babilonionan lo a plunder nan rikesa, desolá nan casnan i coge e fruta di nan hofinan di wijndruif. Cos material lo no tabatin ningun balor ora Dios a ehecutá huicio riba Huda. Mescos lo ta e caso ora Jehova su dia di huicio bini riba e sistema di cosnan actual. P’esei, laga nos tin un punto di bista spiritual i ‘acumulá tesoro den shelu’ dor di mantené Jehova su sirbishi na promé lugá den nos bida!—Mateo 6:19-21, 33.
“E Gran Dia di Jehova Ta Cerca”
17. Segun Sofonías 1:14-16, con cerca Jehova su dia di huicio ta?
17 Con cerca Jehova su dia di huicio ta? Segun Sofonías 1:14-16, Dios ta duna e siguransa aki: “E gran dia di Jehova ta cerca. E ta cerca, i e ta pura masha tantu. E zonido dje dia di Jehova ta amargo. Ei un homber poderoso ta dal un gritu. E dia ei ta un dia di furia, un dia di afliccion i di angustia, un dia di tempestad i di desolacion, un dia di scuridad i di tiniebla, un dia di nubia i di tiniebla diki, un dia di cachu i di señal di alarma, contra e stadnan fortificá i contra e torennan haltu di skina.”
18. Di con nos no mester concluí cu Jehova su dia di huicio ta hopi leu ainda?
18 Nan a pone Huda su sacerdotenan, prinsnan i pueblo pecaminoso na altura cu ‘e gran dia di Jehova tabata cerca.’ Pa Huda ‘e dia di Jehova lo a pura masha tantu.’ Den nos tempu tambe, no laga niun hende pensa cu Jehova su ehecucion di huicio contra e malbadonan lo sosodé den un futuro lehano. Mas bien, mescos cu Dios a actua lihé na Huda, mescos lo e “pura” su dia di ehecucion. (Revelacion 16:14, 16) Lo ta ki un tempu amargo pa tur esnan cu ta ignorá e advertencia cu Jehova ta duna mediante su Testigonan i cu no ta aceptá adoracion berdadero!
19, 20. (a) Cua tabata algun rasgo di e ehecucion di Dios su rabia riba Huda i Jerusalem? (b) En bista di e destruccion selectivo cu ta enfrentá e sistema di cosnan aki, ki pregunta ta lanta?
19 E ehecucion di Dios su rabia riba Huda i Jerusalem tabata “un dia di afliccion i di angustia.” Invasornan babilonio a causa hopi sufrimentu p’e habitantenan di Huda, incluso e agonia mental di ser enfrentá cu morto i destruccion. E ‘dia di tempestad i desolacion’ ei tabata yen di scuridad, nubia i tiniebla diki, kisas no figurativamente so, sino literalmente tambe, pasobra lo tabatin huma i matansa tur caminda. E tabata “un dia di cachu i di señal di alarma,” pero e advertencianan lo tabata en bano.
20 E vigilantenan di Jerusalem no por a haci nada segun cu e babilonionan su balkinan di kibra muraya a tumba “e torennan haltu di skina.” Den nos tempu, e fortificacionnan dje actual sistema di cosnan malbado lo ta mes inútil contra e armanan di Dios su arsenal celestial, cu ta cla p’e usa na comienso di su destruccion selectivo. Bo ta spera di scapa? Bo a tuma un posicion firme na banda di Jehova ‘kende ta protehá tur esnan cu ta stim’é, pero cu lo exterminá tur e malbadonan’?—Salmo 145:20.
21, 22. Con Sofonías 1:17 i 18 lo cumpli den nos dia?
21 Esta un dia di huicio horibel a ser profetisá na Sofonías 1:17 i 18! “Lo mi causa angustia pa humanidad,” Jehova Dios ta bisa, “i sin duda nan lo cana manera hende ciegu; pasobra ta contra Jehova nan a peca. I di berdad lo drama nan sanger manera stof, i nan mondongo manera mest. Ni nan plata ni nan oro lo no por libra nan den e dia di furia di Jehova; sino cu mediante e candela di su celo henter e tera lo ser devorá, pasobra lo e haci un exterminacion, en berdad unu teribel, di tur e habitantenan di tera.”
22 Mescos cu el a haci den e dianan di Sofonías, Jehova pronto lo trece angustia riba “tur e habitantenan di tera” cu ta nenga di presta atencion na su spiertamentu. Dor cu nan ta peca contra Dios, nan lo cana rond mes desampará cu hende ciegu, sin por haña liberacion. Riba Jehova su dia di huicio, “di berdad lo drama nan sanger manera stof,” esta, manera algu sin balor. Nan fin lo ta realmente bergonsoso, pasobra Dios lo plama riba tera cadaver dje malbadonan aki, i asta nan mondongo, “manera mest.”
23. Maske e malechornan lo no scapa “den e dia di furia di Jehova,” ki speransa e profecia di Sofonías ta ofrecé?
23 Niun hende no por scapa esnan cu ta bringa contra Dios i su pueblo. Ni plata ni oro no por a scapa e malechornan di Huda, mescos cu ni rikesa acumulá ni soborno lo no percurá proteccion ni escape “den e dia di furia di Jehova” contra cristiandad i e resto dje sistema malbado aki. Riba e dia ei di decision, “henter e tera lo ser devorá” dor dje candela di Dios su celo segun cu e ta exterminá e malbadonan. Dor cu nos tin fe den Dios su palabra profético, nos ta convencí cu nos ta leu den “e tempu di fin.” (Daniel 12:4) Jehova su dia di huicio ta cerca, i pronto lo e ehecutá vengansa riba su enemigunan. Pues, Sofonías su profecia ta duna speransa di liberacion. Kico anto ta rekerí di nos pa nos ser scondí den e dia di Jehova su rabia?
Con Lo Bo Contestá?
• Con e profecia di Sofonías a cumpli riba Huda i Jerusalem?
• Kico ta spera cristiandad i tur malbado di nos tempu?
• Di con nos no mester pensa cu Jehova su dia di huicio lo bini den un futuro lehano?
[Preguntanan di Estudio]
[Plachi na página 13]
Cu curashi Sofonías a declará cu Jehova su dia di huicio tabata cerca
[Rekonosementu]
For di Self-Pronouncing Edition of the Holy Bible, cu ta contené e versionnan di King James i esun Revised
[Plachi na página 15]
E dia di Jehova a bini riba Huda i Jerusalem na man di Babilonia na aña 607 P.E.C.
[Plachi na página 16]
Bo ta spera di scapa ora Jehova destruí e malbadonan?