Con pa Haña Berdadero Felicidad

UN LIDER religioso budista, e Dalai Lama, a bisa: “Ami ta kere cu e propósito mes di bida ta di busca felicidad.” Despues el a splica cu segun e, bo por logra felicidad dor di entrená of disipliná bo mente i bo curason. El a bisa: “Un mente ta tur e ekipo básico cu nos tin mester pa nos por logra felicidad completo.” E ta haña cu kere den Dios no ta necesario. *

Na contraste, wak Jesus, kende tabatin un fe fuerte den Dios i kende su siñansanan a influenciá bida di cientos di miyones di hende atrabes di siglonan. Jesus tabata interesá den felicidad humano. El a cuminsá su famoso Sermon Riba Ceru cu nuebe bienaventuransa, nuebe expresion cu ta cuminsá cu: “Felis ta . . .” (Mateo 5:1-12) Den e mésun sermon ei, el a siña su oyentenan pa nan examiná, purificá i disipliná nan mente i nan curason, dor di remplasá pensamentu violento, inmoral i egoista cu pensamentu pacífico, limpi i amoroso. (Mateo 5:21, 22, 27, 28; 6:19-21) Manera un di su disipelnan a urgi despues, nos mester “sigui considerá” cos cu ta ‘berdadero, di consideracion serio, hustu, decente, amabel, di bon reputacion, di birtud i digno di alabansa.’—Filipensenan 4:8.

Jesus tabata sa cu berdadero felicidad ta ligá cu nos relacion cu otro hende. Di naturalesa nos como hende tin necesidad di asociá cu otro hende. Pues nos no por ta berdaderamente felis si nos isolá nos mes, of si constantemente nos ta den conflicto cu hende rond di nos. Nos por ta felis solamente si nos sinti nos mes stimá, i si nos stima otronan. Jesus a siña cu un factor fundamental den e amor ei ta nos relacion cu Dios. Aki specialmente ta caminda e siñansa di Jesus ta diferenciá for di esun dje Dalai Lama, pasobra Jesus a siña cu hende no por ta berdaderamente felis sin enbolbé Dios. Di con ta asina?—Mateo 4:4; 22:37-39.

Pensa Riba Bo Necesidadnan Spiritual

Un dje bienaventuransanan ta: “Felis ta esnan cu ta conciente di nan necesidad spiritual.” (Mateo 5:3) Di con Jesus a bisa asina? Dor cu nos, distinto for di bestia, tin necesidad spiritual. Ya cu hende ta creá den e imágen di Dios, te na cierto grado nos por cultivá Dios su atributonan, manera amor, husticia, misericordia i sabiduria. (Génesis 1:27; Mikéas 6:8; 1 Juan 4:8) Un di nos necesidadnan spiritual ta di tin sentido den bida.

Con nos por satisfacé tal necesidadnan spiritual? No cu meditacion trasedental of dor di djis analisá nos mes. Mas bien Jesus a bisa: “Hende tin cu biba, no di pan so, sino di tur expresion cu ta sali for dje boca di Jehova.” (Mateo 4:4) Wak con Jesus a bisa cu Dios ta e fuente di “tur expresion” vital pa nos bida. Tin pregunta cu ta Dios so por yuda nos contestá. E comprendimentu aki ta particularmente oportuno awe, si nos tuma na cuenta e cantidad di  teoria cu ta lanta tocante e propósito di bida i e manera pa logra felicidad. Librerianan tin seccionnan completo dedicá na buki cu ta primintí e lesadónan salú, rikesa i felicidad. Hende a crea Internet site cu ta trata specíficamente cu felicidad.

Sin embargo, hopi bes idea di hende den e áreanan aki ta ekibocá. Nan tendencia ta di satisfacé deseonan egoista, of e persona su imágen propio. E pensamentunan aki ta basá riba conocimentu i experencia limitá, i hopi bes nan ta fundá riba idea robes. Por ehempel, un tendencia creciente entre escritornan di buki di guia pa desaroyo i adelanto personal, ta pa basa nan ideanan riba e teoria di “sicologia di evolucion,” cu ta asumí cu emocionnan humano tin rais den nos supuesto antecedencia animal. E berdad ta cu cualkier intento pa haña felicidad, basá riba un teoria cu ta ignorá e papel di nos Creador, no por ta válido, i finalmente lo hiba na decepcion. Un profeta di antigwedad a bisa: “E sabínan a keda bergonsá. . . . Mira! Nan a rechasá e palabra mes di Jehova, i ki sabiduria nan tin?”—Jeremías 8:9.

Jehova Dios sa con nos ta hincá den otro, i e sa kico lo haci nos berdaderamente felis. E sa pakico el a pone hende riba tera i kico futuro ta encerá, i e ta compartí e informacion ei cu nos den Bijbel. Loke e ta revelá den e buki inspirá ei ta causa un reaccion positivo den hende cu tin e disposicion corecto, i e ta inspirá felicidad. (Lucas 10:21; Juan 8:32) Esei tabata e caso cu dos disipel di Jesus. Nan tabata desconsolá despues cu el a muri. Pero despues cu nan a siña cerca Jesus resucitá mes tocante e papel cu e ta hunga den Dios su propósito pa salbacion di humanidad, nan a bisa: “Nos curason no tabata kima ora e tabata papia cu nos na caminda, ora e tabata habriendo completamente e Scritura pa nos?”—Lucas 24:32.

E goso ei ta bira mas intenso ora nos permití e berdad di Bijbel guia nos bida. Den e sentido aki, bo por compará felicidad cu un regenboog. E ta aparecé ora cu e condicion di atmósfera ta faborabel, pero e ta bira mas briyante—i por bira asta un regenboog dòbel—ora cu e condicion di atmósfera ta ideal. Awor, laga nos considerá algun ehempel cu ta mustra con nos felicidad por aumentá dor di aplicá siñansanan di Bijbel.

Tene Bo Bida Simpel

Promé, considerá e conseho di Jesus riba e asuntu di rikesa. Ora el a caba di duna conseho contra corementu tras di rikesa como e cos principal den bida, el a bisa un cos poco usual. E di: “P’esei, si bo wowo ta simpel, henter bo curpa lo ta briyante.” (Mateo 6:19-22) Básicamente, loke el a bisa ta cu si nos core di manera golos tras di rikesa, poder of cualkier un dje otro metanan cu hende ta establecé pa nan  mes, nos lo perde di gana cosnan mas importante. Al fin i al cabo, manera Jesus a bisa na un otro ocasion, “asta ora un persona tin na abundancia, su bida no ta resultá dje cosnan cu e ta poseé.” (Lucas 12:15) Si nos pone e cosnan berdaderamente importante na promé lugá—manera nos relacion cu Dios, asuntu di famia i otro cos relacioná cu nan—e ora ei nos “wowo” lo ta “simpel,” sin muchu cos innecesario.

Nota cu Jesus no ta recomendando asetismo, esta, nengamentu extremo di bo mes. Al fin i al cabo, Jesus mes no tabata asético. (Mateo 11:19; Juan 2:1-11) Mas bien el a siña, cu hende cu ta mira bida como nada mas cu un oportunidad pa acumulá rikesa, en realidad ta perdiendo chens den bida.

Comentando riba algun hende cu a bira masha ricu trempan den bida, un sicoterapeuta na San Francisco, Merca, a bisa cu pa nan, placa ta “e rais di stres i confusion.” El a agregá cu e hendenan aki “ta cumpra dos of tres cas, un auto, i ta gasta placa na cos. Anto ora cu esei no haci nan felis, nan ta bira deprimí, bashí i insigur tocante kico pa haci cu nan bida.” Na contraste, esnan cu ta sigui e conseho di Jesus pa hiba un bida mas simpel den sentido material i laga lugá pa cos spiritual, tin hopi mas chens di haña berdadero felicidad.

Tom, un hende cu ta traha den construccion, bibá na Hawai, a ofrecé su mes como boluntario pa traha lugá di adoracion riba e islanan di océano Pacífico caminda hende tin masha poco den sentido material. Tom a nota algu tocante e hendenan humilde aki. El a bisa: “Mi rumannan cristian riba e islanan aki tabata berdaderamente felis. Nan a yuda mi mira mas cla, cu placa i posesion material no ta e secreto di felicidad.” Tambe el a observá e boluntarionan cu a traha cuné riba e islanan, i a nota con satisfecho nan tabata. Tom a bisa: “Nan por a gana masha hopi placa, pero nan a scoge pa pone cos spiritual na promé lugá, i mantené un estilo di bida simpel.” Motivá dor dje ehempelnan ei, Tom a simplificá su mes bida, pa e por a dedicá mas tempu na su famia i na actividadnan spiritual; un decision cu nunca el a lamentá.

Felicidad i Balor Propio

Un sintimentu di dignidad personal, esta balor propio, ta vital pa felicidad. Dor di imperfeccion humano i e debilidadnan cu e ta trece cuné, algun hende tin un punto di bista negativo di nan mes, i cerca hopi di nan e sintimentunan ei a cuminsá for di den nan infancia. Por ta difícil pa vence sintimentunan profundamente ankrá, pero e ta posibel. E solucion ta sinta den aplicá e Palabra di Dios.

Bijbel ta splica kico e Creador ta pensa di nos. Su punto di bista no ta mas importante cu di cualkier ser humano, asta di nos mes? Como e personificacion mes di amor, Dios ta mira nos tur sin prehuicio ni malicia. E ta mira nos pa loke nos ta, pero tambe pa loke nos por bira. (1 Samuel 16:7; 1 Juan 4:8) De echo, esnan cu kier agrad’é ta precioso den su bista, sí, deseabel, sin importá ki imperfeccion nan tin.—Daniel 9:23; Ageo 2:7.

Claro cu Dios no ta ignorá nos debilidadnan ni e picánan cu nos por cometé. E ta spera di nos cu nos ta traha duru pa haci loke ta bon, i e ta apoyá nos ora nos hacié. (Lucas  13:24) Sin embargo, Bijbel ta bisa: “Manera un tata ta mustra misericordia na su yunan, Jehova a mustra misericordia na esnan cu ta tem’é.” Tambe e ta bisa: “Si ta eror ta loke bo ta vigilá, o Jah, o Jehova, ken lo por keda pará? Pasobra cu bo tin e berdadero pordon, pa asina hende teme bo.”—Salmo 103:13; 130:3, 4.

Pues, siña mira bo mes manera Dios ta mira bo. Si un hende sa cu esnan cu ta stima Dios ta deseabel den su bista, i cu E tin confiansa den nan—maske nan ta considerá nan mes indigno—esei por yuda un hende asina hopi pa aumentá su felicidad.—1 Juan 3:19, 20.

Speransa—Vital pa Felicidad

Un idea popular nobo cu nan ta yama sicologia positivo ta bisa cu optimismo, cultivá dor di pensa positivo i dor di enfocá riba bo puntonan fuerte, por hiba na felicidad. Poco hende lo nenga cu un punto di bista optimista di bida i di futuro ta haci nos mas felis. Sin embargo, tal optimismo mester ta basá riba echo, no djis riba speransa irealístico. Ademas, ni cuantu optimismo of pensamentu positivo nos tin, esei lo no eliminá guera, murimentu di hamber, malesa, polucion, behes, enfermedad of morto; cosnan cu ta horta asina hopi hende di felicidad. Apesar di esei, optimismo ta na su lugá.

Ta interesante pa nota cu Bijbel no ta usa e palabra optimismo, sino unu mas fuerte: speransa. Vine’s Complete Expository Dictionary ta definí “speransa” manera e ta ser usá den Bijbel, como “expectativa faborabel i sigur, . . . anticipacion felis di cos bon.” Manera Bijbel ta us’é, speransa ta mas cu djis un punto di bista optimista di un situacion. E ta referí tambe na e cos cu nos ta cifra nos speransa riba dje. (Efesionan 4:4; 1 Pedro 1:3) E speransa cristian, por ehempel, ta cu pronto tur e cosnan indeseabel cu nos a mencioná den e paragraf anterior lo ser kitá. (Salmo 37:9-11, 29) Pero e ta abarcá mas.

Cristiannan ta spera riba un tempu ora hende fiel lo alcansá bida perfecto riba un tera paradísico. (Lucas 23:42, 43) Ampliando riba e speransa ei, Revelacion 21:3 i 4 ta bisa: “Mira! E tent di Dios ta cu humanidad, i lo e biba cu nan, i nan lo ta su pueblo. . . . I lo e seca tur lágrima di nan wowo, i lo no tin morto mas, ni lo no tin lamento ni sclamacion ni dolor mas. E cosnan anterior a pasa bai.”

Ken cu ta spera un futuro asina tin tur motibu pa ta felis, asta si circunstancianan actual ta laga hopi di deseá. (Santiago 1:12) Pues, di con bo no ta investigá Bijbel i haña sa di con bo por kere aden? Fortalecé bo speransa dor di dedicá tempu tur dia pa lesa Bijbel. Esei lo enrikesé bo spiritualmente, yuda bo evitá e cosnan cu ta horta hende su felicidad, i fortalecé bo sentido di satisfaccion. Sí, e secreto máximo pa haña berdadero felicidad, ta di haci e boluntad di Dios. (Eclesiástes 12:13) Un bida edificá rond di obedencia na principionan di Bijbel ta un bida felis, pasobra Jesus a bisa: “Felis ta esnan cu ta tende e palabra di Dios i ta ward’é!”—Lucas 11:28.

[Nota]

[Plachinan na página 5]

Hende no por haña felicidad dor di acumulá rikesa, isolá su mes, of confia riba hende su conocimentu limitá

[Plachi na página 6]

Un bida basá riba obedencia na e Palabra di Dios ta un bida felis

[Plachi na página 7]

E speransa cristian ta haci hende felis