Kico e Paradijs Spiritual Ta?

GUSTAVO a ser criá na un stad chikitu di Brazil. * For di tempu cu e tabata mucha el a siña cu bon hende ta bai shelu despues cu nan muri. E no tabata sa nada di Dios su propósito cu un dia humanidad fiel lo gosa di bida perfecto den un paradijs riba tera. (Revelacion 21:3, 4) I tabatin un otro cos cu tampoco e no tabata sa. E no a realisá cu for di awor caba e por ta den un paradijs spiritual.

Abo a yega di tende dje paradijs spiritual ei? Bo sa kico e ta i kico ta rekerí pa bo ta parti di dje? Ken cu kier ta berdaderamente felis mester sa tocante e paradijs ei.

Con pa Localisá e Paradijs Spiritual

Kisas ta zona irealístico pa bisa cu for di awor un hende por biba den un paradijs. E mundu aki ta leu di ta un paradijs. Muchu hopi hende ta experimentá loke un rey hebreo di antigwedad a describí: “Mira! e lágrimanan di esnan oprimí, pero nan no tabatin consoladó; i di parti di nan opresornan tabatin poder, di manera cu nan no tabatin consoladó.” (Eclesiástes 4:1) Cientos di miyones di hende ta sufri bou di sistemanan político, religioso i económico corupto, anto nan no tin ningun alivio, ningun “consoladó.” Hopi otro hende ta lucha pa cubri nan gastunan, cria nan yunan, i haci e cantidad di otro cosnan necesario pa sobrebibí. Posiblemente nan tambe lo apreciá si nan por haña un consoladó, un hende pa aliviá nan carga maske ta un tiki. Pa nan tur, bida ta leu di ta un paradijs.

Pues, unda e paradijs spiritual ta anto? Wel, e palabra “paradijs” na papiamento ta relacioná cu palabranan griego, perso i hebreo cu ta carga e idea di un parke of hofi, un lugá pacífico i refrescante. Bijbel ta primintí cu un dia tera lo ta un paradijs físico, un hogar manera un hardin pa un humanidad liber di picá. (Salmo 37:10, 11) Cu esei na mente, nos ta comprendé cu un paradijs spiritual ta un ambiente placentero pa nos wowo, i cu ta calma nos nervio, cu ta permití nos gosa di pas cu nos próhimo i cu Dios. Gustavo a descubrí cu ta existí un paradijs asina awe, i cu tin cada bes mas tantu hende den dje.

Cu 12 aña di edad, Gustavo a dicidí cu e kier a bira un pastor católico romano. Cu aprobacion di su mayornan el a drenta un seminario religioso. Ei el a enbolbé su mes cu música, teatro i política, cosnan cu e iglesia a promové pa atraé hóbennan. E tabata sa cu un sacerdote lo mester dedicá su mes na e pueblo, i cu e no por a casa. Sin embargo, algun dje pastornan i otro seminaristanan cu Gustavo a conocé tabata metí den prácticanan inmoral. Den un ambiente asina, no a dura muchu cu Gustavo a cuminsá bebe pisá. Claramente e no a haña un paradijs spiritual ainda.

Un dia Gustavo a lesa un tratado bíblico cu a papia di un paradijs terenal. E tratado a pon’é pensa tocante e propósito di bida. E ta bisa: “Mi a cuminsá lesa Bijbel cu frecuencia, pero mi no tabata comprend’é. Mi no a ni realisá cu Dios tabatin un nomber.” El a bandoná e seminario i acercá Testigonan di Jehova,  buscando yudansa p’e comprendé Bijbel. Despues el a progresá lihé, i den poco tempu el a dedicá su bida na Dios. Gustavo tabata siñando tocante e paradijs spiritual.

Un Pueblo pa Dios Su Nomber

Gustavo a haña sa cu e nomber di Dios, Jehova, ta mas cu djis un dato interesante pa un studiante di Bijbel. (Éxodo 6:3) E ta forma un parti vital di adoracion berdadero. Jesus a siña su siguidónan resa: “Nos Tata cu ta den shelu, laga bo nomber sea santificá.” (Mateo 6:9) Papiando di gentilnan cu a bira cristian, disipel Santiago a bisa: “Dios . . . a dirigí su atencion n’e nacionnan p’e saca for di nan un pueblo pa su nomber.” (Echonan 15:14) Den promé siglo, e “pueblo pa su nomber” tabata e congregacion cristian. Tin un pueblo pa e nomber di Dios awe? Sí, i Gustavo a bin realisá cu ta Testigonan di Jehova ta e pueblo ei.

Testigonan di Jehova ta activo den 235 pais i teritorio. Nan ta mas cu seis miyon minister, i tin ocho miyon otro hende interesá cu a yega di asistí na nan reunionnan. Nan ta bon conocí pa nan ministerio público; pues, nan ta cumpli e palabranan aki di Jesus: “E bon nobo aki dje reino lo ser predicá den tur e tera habitá como testimonio pa tur nacion.” (Mateo 24:14) Pero di con Gustavo a sinti cu el a haña un paradijs spiritual asociando cu Testigonan di Jehova? E ta bisa: “Mi a compará loke mi a mira den mundu, i specialmente den e seminario, cu loke mi a haña cerca Testigonan di Jehova. E gran diferencia ta e amor cu tin entre Testigonan.”

Mas hende a yega di duna comentarionan similar tocante Testigonan di Jehova. Miriam, un hóben brazilero, a bisa: “Mi no tabata sa con pa ta felis, ni sikiera den mi famia. E promé bes cu mi a yega di mira amor den accion tabata entre Testigonan di Jehova.” Un homber cu yama Christian a bisa: “Mi tabata mors cu spiritismo de bes en cuando, pero religion no tabata importante pa mi. Mas importante pa mi tabata mi posicion social i mi trabou como ingeniero. Apesar di esei, ora mi casá a cuminsá studia Bijbel cu Testigonan di Jehova, mi a mira un cambio den dje. Loke tambe a impresioná mi tabata e goso i e celo dje señoranan cristian cu tabata bishit’é.” Di con hende ta papia asina di Testigonan di Jehova?

Kico e Paradijs Spiritual Ta?

Un cos cu Testigonan di Jehova ta sobresalí p’e ta nan aprecio pa conocimentu bíblico. Nan ta kere cu Bijbel ta papia berdad, i cu e ta e Palabra di Dios. P’esei, nan no ta keda satisfecho cu djis sa e cosnan básico di nan religion. Nan tin un programa continuo di studio personal i lesamentu di Bijbel. Mas tantu tempu un hende asociá cu Testigonan di Jehova, mas e ta siña tocante Dios i Su boluntad revelá den Bijbel.

E conocimentu ei ta libra Testigonan di Jehova di cosnan cu ta kita hende su felicidad, cosnan manera supersticion i ideanan perhudicial. Jesus a bisa: “E berdad lo haci boso liber,” i Testigonan di Jehova ta haña cu en berdad ta asina. (Juan 8:32) Fernando, cu a practicá spiritismo un tempu, ta bisa: “Tabata un gran alivio ora mi a haña sa di bida eterno. Mi tabatin miedu cu sea mi mayornan of ami lo muri.” E berdad a libra Fernando di su miedu dje mundu di spiritu i dje asina yamá bida despues di morto.

Den Bijbel, conocimentu di Dios ta estrechamente ligá cu paradijs. Profeta Isaías a bisa: “Nan lo no haci ningun daño ni causa ningun ruina den henter mi ceru santu; pasobra tera sigur lo ta yená cu e conocimentu di Jehova mescos cu e awanan ta cubri laman mes.”—Isaías 11:9.

 Claro cu riba su mes, conocimentu no ta suficiente pa trece e pas cu Isaías a profetisá. Un hende mester actua a base di loke e ta siña. Fernando a comentá esaki: “Ora cu un hende cultivá e frutanan di spiritu, e ta contribuí na e paradijs spiritual.” Fernando a referí na e palabranan di apostel Pablo, kende a yama e bon cualidadnan cu un cristian mester cultivá, “fruta di spiritu.” Pablo a bisa cu nan ta: “Amor, goso, pas, gran pacenshi, amabilidad, bondad, fe, suavedad, dominio propio.”—Galationan 5:22, 23.

Bo por mira di con en berdad asociacion cu un comunidad di hende cu ta haci nan esfuerso pa cultivá cualidadnan asina lo ta manera biba den un paradijs? E paradijs spiritual cu profeta Sofonías a profetisá, lo a existí entre hendenan asina. El a bisa: “Nan lo no haci inhusticia, ni papia mentira, ni lo no ser hañá un lenga mañoso den nan boca; pasobra nan mes lo alimentá i realmente lo drumi curpa di rek, i lo no tin ningun hende cu lo haci nan tembla.”—Sofonías 3:13.

E Papel Vital di Amor

Kisas bo a nota cu e promé fruta di spiritu cu Pablo ta mencioná ta amor. E ta un cualidad cu Bijbel ta papia hopi di dje. Jesus a bisa: “Na esaki tur lo sa cu boso ta mi disipelnan, si boso tin amor entre boso.” (Juan 13:35) Ta berdad cu Testigonan di Jehova no ta perfecto. Tin bes cu nan tin problemanan personal entre nan, mescos cu e apostelnan di Jesus a yega di tin. Pero nan ta stima otro di berdad, i nan ta pidi den oracion pa e spiritu santu apoyá nan segun cu nan ta cultivá e cualidad aki.

Como resultado, nan ta un grupo único. No tin distincion a base di tribu, ni nacionalismo cu ta dividí nan. De echo, hopi Testigo cu a haña nan mes meimei di purificacion étnico i genocidio racial den e último añanan di siglo 20 a protehá otro asta riscando nan propio bida. Maske nan ta bini “for di tur nacion i tribu i pueblo i lenga,” nan ta gosa di un unidad cu ta difícil pa bo comprendé, te ora cu bo experiment’é personalmente.—Revelacion 7:9.

Paradijs Entre Esnan Cu Ta Haci e Boluntad di Dios

Den e paradijs spiritual no tin lugá pa golosidad, inmoralidad ni egoismo. Bijbel ta bisa cristiannan: “Stop di ser formá segun e sistema di cosnan aki, mas bien sea transformá dor di rehací boso mente, pa boso por proba pa boso mes loke ta e bon i aceptabel i perfecto boluntad di Dios.” (Romanonan 12:2) Dor di hiba un bida limpi i moral, i haci e boluntad di Dios den otro maneranan mas, nos ta yuda edificá e paradijs spiritual, i nos ta contribuí na nos mes felicidad. Carla a descubrí cu esei ta berdad. E ta bisa: “Mi tata a siña mi traha duru pa bira financieramente independiente. Pero maske mi studio na universidad a duna mi un sentido di siguridad, mi tabata sinti falta di e unidad familiar i e siguridad cu conocimentu dje Palabra di Dios so por duna nos.”

 Claro cu disfrutá dje paradijs spiritual no ta haci e problemanan físico di bida disparcé. Cristiannan ta bira malu tog. E nacion cu nan ta biba aden por cai den un lucha civil. Hopi di nan ta soportá pobresa. Sin embargo, un relacion íntimo cu Jehova Dios—un parti crucial dje paradijs spiritual—kier men cu nos por busca apoyo cerca dje. Asta e ta invitá nos pa nos ‘tira nos carga riba dje,’ i hopi cristian por duna testimonio dje manera maraviyoso cu el a apoyá nan den e situacionnan di mas difícil. (Salmo 55:22; 86:16, 17) Dios ta primintí su adoradónan cu lo e ta cu nan asta den “e vaye di sombra profundo.” (Salmo 23:4) E confiansa cu nos tin di cu Dios ta cla pa apoyá nos, ta yuda nos conserbá nos “pas di Dios cu ta surpasá tur pensamentu,” algu clave pa e paradijs spiritual.—Filipensenan 4:7.

Contribuí na e Paradijs Spiritual

Mayoria hende gusta bishitá un parke of un hofi. Nan gusta cana dor di nan of kisas sinta riba un banki i disfrutá dje ambiente. Di manera similar, hopi hende gusta asociá cu Testigonan di Jehova. Nan ta haña nan compania pacífico, refrescante i animante. Sin embargo, pa un hardin por keda parce un paradijs, e tin mester di cuido. Di igual manera, ta dor cu Testigonan di Jehova ta cultiv’é i Dios ta bendicioná nan esfuerso, e paradijs spiritual ta sigui existí den e mundu aki cu ta asina diferente for di un paradijs. Con anto un hende por haci un contribucion significativo na e paradijs ei?

Na promé lugá, bo mester asociá cu un congregacion di Testigonan di Jehova, studia Bijbel cu nan, i adkerí e conocimentu bíblico cu ta forma e base dje paradijs spiritual. Carla a remarcá: “Sin cuminda spiritual no tin paradijs spiritual.” Entre otro esaki ta encerá lesa e Palabra di Dios regularmente i pensa riba loke bo ta lesa. E conocimentu cu bo adkerí lo hala bo mas cerca di Jehova Dios, i lo bo bin stim’é. Tambe lo bo siña papia cuné den oracion i pidié su guia i su spiritu pa yuda bo segun cu bo ta haci su boluntad. Jesus a bisa nos pa nos persistí den oracion. (Lucas 11:9-13) Apostel Pablo a bisa: “Haci oracion sin stop.” (1 Tesalonicensenan 5:17) E privilegio di por papia cu Dios den oracion cu pleno confiansa cu e ta tende bo, ta un parti importante dje paradijs spiritual.

Cu transcurso di tempu lo bo mira progreso den bo bida dor di aplicá loke bo ta siña, i cu tempu lo bo kier papia cu otronan tocante esei. E ora ei lo bo ta den posicion pa obedecé e ordu aki di Jesus: “Laga boso lus briya dilanti hende, pa nan por mira boso obranan excelente i duna gloria na boso Tata cu ta den shelu.” (Mateo 5:16) Tin hopi felicidad den compartí e conocimentu di Jehova Dios i di Jesucristo cu otro hende, i alabá e gran amor cu nan a mustra humanidad.

E dia ta yega ora cu henter tera lo ta un paradijs físico; un lugá manera un hardin, liber di contaminacion, i un hogar apropiado pa humanidad fiel. E existencia dje paradijs spiritual den e ‘tempu crítico aki, duru pa trata cuné,’ ta evidencia dje poder di Dios, i un muestra di loke e por i lo logra den futuro.—2 Timoteo 3:1.

Awor aki mes, esnan cu ta disfrutando dje paradijs spiritual ta experimentá cumplimentu di Isaías 49:10: “Nan lo no padecé di hamber, ni padecé di sed, ni calor cu ta kima ni solo lo no dal nan. Pasobra Esun cu tin duele di nan lo guia nan, i lo e hiba nan na fuentenan di awa.” José ta testigo di esei. Su soño tabata di bira un músico famoso, pero el a haña mas satisfaccion den sirbi Dios huntu cu e congregacion cristian. E ta bisa: “Awor mi ta gosa di un bida cu sentido. Mi ta sinti mi sigur den e hermandad cristian, i mi conocé Jehova como un Tata amoroso cu nos por confia.” Pues, e felicidad di José, i di miyones di otro hende manera e, ta bon describí na Salmo 64:10: “E hustu lo alegrá den Jehova i lo busca refugio den dje di berdad.” Esta un excelente descripcion dje paradijs spiritual!

[Nota]

[Plachi na página 10]

Segun cu bo ta disfrutá dje paradijs spiritual, yuda expand’é!