Salbacion pa Esnan Cu Scoge e Lus
Salbacion pa Esnan Cu Scoge e Lus
“Jehova ta mi lus i mi salbacion. Di ken lo mi tin temor?”—SALMO 27:1.
1. Ki percuracionnan cu ta duna bida Jehova a haci?
JEHOVA ta e Fuente dje lus di solo cu ta haci bida riba tera posibel. (Génesis 1:2, 14) Ademas e ta e Creador di lus spiritual cu ta plama e scuridad mortal dje mundu di Satanas. (Isaías 60:2; 2 Corintionan 4:6; Efesionan 5:8-11; 6:12) Esnan cu scoge e lus por bisa huntu cu e salmista: “Jehova ta mi lus i mi salbacion. Di ken lo mi tin temor?” (Salmo 27:1a) Pero, mescos cu a sosodé den tempu di Jesus, esnan cu ta preferá scuridad no por spera nada otro sino un huicio desfaborabel.—Juan 1:9-11; 3:19-21, 36.
2. Den antigwedad, kico a pasa cu esnan cu a rechasá e lus di Jehova, i kico a pasa cu esnan cu a scucha su palabra?
2 Den tempu di Isaías, mayor parti di Jehova su pueblo di pacto a rechasá e lus. Como resultado, Isaías a mira e reino di Israel di nort bai destruí como nacion. Anto na aña 607 P.E.C. Jerusalem i su tempel a ser destruí, i e habitantenan di Huda a ser hibá den exilio. Sin embargo, esnan cu a scucha e palabra di Jehova a ser fortalecé pa resistí e apostasia cu tabatin e tempu ei. Relacioná cu aña 607 P.E.C., Jehova a primintí cu esnan cu scuch’é lo sobrebibí. (Jeremías 21:8, 9) Awe, nos cu ta stima e lus por siña hopi for di loke a sosodé n’e tempu ei.—Efesionan 5:5.
E Felicidad di Esnan den e Lus
3. Awe, ki confiansa nos por tin, cua “nacion hustu” nos ta stima, i cua “stad fuerte” e “nacion” ei tin?
3 “Nos tin un stad fuerte. [Dios] ta pone salbacion como muraya i fortificacion. Habri e portanan p’e nacion hustu cu ta mantené conducta fiel por drenta.” (Isaías 26:1, 2) Esakinan ta e palabranan di húbilo di hendenan cu a confia den Jehova. Hudiunan fiel den tempu di Isaías a dependé riba Jehova como e único berdadero Fuente di siguridad, i no riba e diosnan falsu di nan paisanonan. Awe nos tin e mésun confiansa. Ademas, nos ta stima Jehova su “nacion hustu”: “e Israel di Dios.” (Galationan 6:16; Mateo 21:43) Jehova tambe ta stima e nacion aki pa motibu di su conducta fiel. Cu su bendicion, e Israel di Dios tin “un stad fuerte,” un organisacion manera un stad cu ta apoy’é i proteh’é.
4. Ki actitud mental ta bon pa nos cultivá?
4 Esnan cu ta den e “stad” aki ta bon conciente cu ‘Jehova lo protehá den pas continuo e inclinacion cu ta bon sostené, pasobra ta den Jehova hende ta ser impulsá pa confia.’ Jehova ta sostené esnan cu tin e inclinacion mental pa confia den dje i cumpli cu su principionan hustu. Pues, esnan fiel den Huda a obedecé e spiertamentu aki di Isaías: “Confia den Jehova pa semper, pasobra den Jah Jehova ta e Baranca di tempu indefiní.” (Isaías 26:3, 4; Salmo 9:10; 37:3; Proverbionan 3:5) Esnan cu tin e actitud mental ei ta acudí na “Jah Jehova” como e único Baranca sigur. Nan ta disfrutá di “pas continuo” cuné.—Filipensenan 1:2; 4:6, 7.
Humiyacion p’e Enemigunan di Dios
5, 6. (a) Con Babilonia di antigwedad a ser humiyá? (b) Di ki manera “Babilonia e Grandi” a ser humiyá?
5 Kico si esnan cu confia den Jehova ta sufri tribulacion? Nan no tin nodi tene miedu. Jehova ta permití cos asina temporalmente, pero despues e ta trece alivio, i esnan cu ta causa e tribulacion ta enfrentá su huicio. (2 Tesalonicensenan 1:4-7; 2 Timoteo 1:8-10) Considerá e caso di un cierto “pueblo elevá.” Isaías ta bisa: “Esnan cu tabata biba den haltura, e pueblo elevá, [Jehova] a tira abou. E ta rebah’é, e ta rebah’é te na tera; e ta pon’é den contacto cu stòf. E pia lo trap’é, e pianan di esnan afligí, e pasonan di esnan di condicion humilde.” (Isaías 26:5, 6) E pueblo elevá mencioná aki lo por ta Babilonia. Definitivamente e stad ei a afligí Dios su pueblo. Pero kico a pasa cu Babilonia? Na aña 539 P.E.C. el a cai vencí na man di e medo i personan. Esta un rebahamentu!
6 Den nos tempu Isaías su palabranan profético ta un bon descripcion di loke a sosodé cu “Babilonia e Grandi” desde aña 1919. E pueblo elevá ei a sufri un caida humiyante na e aña ei ora cu el a hañ’é obligá di liberá Jehova su pueblo for di cautiverio spiritual. (Revelacion 14:8) Loke a pasa despues di esei tabata asta mas humiyante. E grupo chikitu aki di cristian a cuminsá ‘trapa’ esun cu ántes tabatin nan cautivo. Na 1922 nan a cuminsá anunciá e binidero fin di cristiandad, publicando e cuater tocánan di trompet angelical di Revelacion 8:7-12 i e tres ainan profetisá na Revelacion 9:1–11:15.
“E Caminda dje Hustu Ta Rectitud”
7. Ki guia esnan cu ta acudí na Jehova su lus ta ricibí, den ken nan ta pone nan speransa i kico nan ta stima?
7 Jehova ta percurá salbacion pa esnan cu ta acudí na su lus, i e ta guia nan caminda, manera Isaías ta sigui mustra: “E caminda dje hustu ta rectitud. Abo cu ta recto, lo bo nivelá asta e caminda di un hende hustu. Sí, pa e caminda di bo huicionan, o Jehova, nos a pone nos speransa den bo. E deseo di alma tabata pa bo nomber i pa bo memoria.” (Isaías 26:7, 8) Jehova ta un Dios hustu, i esnan cu ta ador’é mester tene nan mes na su normanan hustu. Ora nan hacié, Jehova ta guia nan i nivelá nan caminda. Dor cu e hende mansunan aki ta sigui su guia, nan ta mustra cu nan ta pone nan speransa den Jehova i stima su nomber—su “memoria”—di henter nan curason.—Éxodo 3:15.
8. Ki actitud ehemplar Isaías a desplegá?
8 Isaías a stima Jehova su nomber. Su siguiente palabranan ta mustra esaki bon cla: “Cu mi alma mi a deseá bo den anochi; sí, cu mi spiritu den mi paden mi ta keda busca bo; pasobra, ora tin huicio for di bo pa e tera, husticia ta loke e habitantenan dje tera productivo sigur lo siña.” (Isaías 26:9) Isaías a deseá Jehova ‘cu su alma,’ esta, cu henter su ser. Imaginá bo e profeta usando ratunan ketu den anochi p’e haci oracion na Jehova, expresando su pensamentunan di mas profundo, i buscando Jehova su guia cu gran empeño. Esta un ehempel excelente! Mas ainda, Isaías a siña husticia for di Jehova su actonan di huicio. Cu esei e ta corda nos cu ta necesario pa semper nos ta vigilante, alerta pa dicerní e boluntad di Jehova.
Algun Ta Scoge p’e Scuridad
9, 10. Ki actonan di bondad Jehova a efectuá pa su nacion infiel, pero con nan a reaccioná?
9 Jehova a mustra Huda hopi bondad amoroso, pero lamentablemente no ta nan tur a reaccioná faborablemente. Cu frecuencia, mayoria di nan a scoge pa rebelion i apostasia mas bien cu p’e lus di Jehova su berdad. Isaías a bisa: “Maske mustra fabor n’e malbado, simplemente lo e no siña husticia. Den e tera di rectitud, lo e actua inhustamente i lo no mira e grandesa di Jehova.”—Isaías 26:10.
10 Den tempu di Isaías, tempu cu Jehova su man tabata protehá Huda di su enemigunan, mayoria dje pueblo a nenga di reconocé esaki. Ora el a bendicioná nan cu pas, e nacion no tabata mustra ningun gratitud. P’esei Jehova a bandoná nan pa nan sirbi “otro doñonan,” permitiendo finalmente p’e hudiunan ser hibá den cautiverio na Babilonia, na aña 607 P.E.C. (Isaías 26:11-13) Tog cu tempu, despues cu nan a ser disipliná, un resto dje nacion a bolbe na nan tera natal.
11, 12. (a) Ki futuro tabatin pa esnan cu a tene Huda den cautiverio? (b) Na 1919, ki futuro tabatin pa esun cu ántes a tene Jehova su sirbidónan ungí den cautiverio?
11 Kico di esnan cu a capturá Huda? Proféticamente Isaías ta contestá: “Morto nan ta; nan lo no biba. Impotente den morto, nan lo no lanta. P’esei bo a dirigí bo atencion pa anikilá nan i destruí tur mencion di nan.” (Isaías 26:14) Sí, despues di su caida na aña 539 P.E.C., Babilonia no tabatin futuro. Cu tempu e stad lo a stop di existí. Lo el a bira “impotente den morto,” i su inmenso imperio lo a pasa pa historia. Esei sí ta un advertencia pa esnan cu ta confia den e poderosonan dje mundu aki!
12 Algun parti dje profecia aki a cumpli ora Dios a permití pa su sirbidónan ungí bai den cautiverio spiritual na 1918, anto despues a liberá nan na 1919. Dje momento ei padilanti, futuro di esun cu ántes tabatin nan den cautiverio, principalmente cristiandad, a pinta scur. Pero e bendicionnan cu tabatin na caminda pa Jehova su pueblo tabata berdaderamente grandi.
“Bo A Agregá n’e Nacion”
13, 14. Ki bendicionnan grandi Jehova su sirbidónan ungí a gosa di dje desde 1919?
13 Dios a bendicioná e actitud arepentí di su sirbidónan ungí na 1919 i a duna nan aumento. Promé, a duna atencion na recogementu dje último miembronan dje Israel di Dios, i despues a cuminsá recogé “un multitud grandi” di “otro carné.” (Revelacion 7:9; Juan 10:16) E profecia di Isaías a predicí e bendicionnan aki: “Bo a agregá n’e nacion; o Jehova, bo a agregá n’e nacion; bo a glorificá bo mes. Bo a extendé na un distancia grandi tur e fronteranan dje pais. O Jehova, durante angustia nan a dirigí nan atencion na bo; nan a drama un oracion di fluister ora nan a ricibí bo disiplina.”—Isaías 26:15, 16.
14 Awe e fronteranan dje Israel di Dios a extendé rond mundu, i e multitud grandi cu a ser agregá ta consistí awor di alrededor di seis miyon hende cu ta participá cu entusiasmo den e trabou di predicá e bon nobo. (Mateo 24:14) Esta un bendicion di Jehova! I esta un gloria esaki ta trece pa su nomber! Awe e nomber ei ta ser tendé den 235 pais, un cumplimentu magnífico di su promesa.
15. Ki resureccion simbólico a tuma lugá na aña 1919?
15 Huda tabatin mester di Jehova su yudansa pa nan a scapa for dje cautiverio na Babilonia. Nan lo no por a scapa riba nan mes. (Isaías 26:17, 18) Di igual manera, e liberacion di e Israel di Dios na 1919 a duna prueba di Jehova su apoyo. Lo e no por a sosodé sin djE. I e cambio di circunstancia tabata asina sorprendente cu Isaías ta compar’é cu un resureccion: “Bo mortonan lo biba. Un cadaver di mi—nan lo lanta. Spierta i sclama di goso, boso cu ta biba den stòf! Pasobra bo serena ta manera serena di mata di malva, i e tera mes lo laga esnan impotente den morto cai manera ora duna lus.” (Isaías 26:19; Revelacion 11:7-11) Sí, den un sentido esnan impotente den morto lo a renacé pa nan reanudá nan actividad!
Proteccion den Tempu Peligroso
16, 17. (a) Na aña 539 P.E.C., kico e hudiunan mester a haci pa nan sobrebibí e caida di Babilonia? (b) Posiblemente kico e “kambernan interior” ta awe, i di ki beneficio nan ta pa nos?
16 Semper Jehova su sirbidónan tin mester di su proteccion. Pero pronto e ta bai saca su man pa último bes contra e mundu di Satanas, i su adoradónan lo tin mester di su yudansa manera nunca promé. (1 Juan 5:19) Relacioná cu e tempu peligroso ei, Jehova ta advertí nos: “Bai, mi pueblo, drenta den bo kambernan interior, i cera bo portanan bo tras. Sconde bo mes pa un ratu so te ora e denunciacion pasa. Pasobra mira! Jehova ta saliendo for di su lugá pa exigí cuenta p’e eror dje habitante dje tera contra dje, i e tera sigur lo exponé su dramamentu di sanger i lo no tapa mas esnan matá di dje.” (Isaías 26:20, 21; Sofonías 1:14) E advertencia aki a mustra e hudiunan con pa sobrebibí e caida di Babilonia na aña 539 P.E.C. Esnan cu a obedec’é lo a keda den nan cas, a salbo for dje soldánan conkistadó pafó riba caya.
17 Awe, probablemente e “kambernan interior” dje profecia tin di haber cu e decenas di miles di congregacion di Jehova su pueblo rond mundu. For di awor e congregacionnan ei ta un proteccion, un lugá caminda cristiannan ta haña siguridad entre nan rumannan, bou dje cuido amoroso dje ancianonan. (Isaías 32:1, 2; Hebreonan 10:24, 25) Esaki ta berdad specialmente en bista cu e fin dje sistema di cosnan aki ta asina cerca, i sobrebibencia lo dependé di obedencia.—Sofonías 2:3.
18. Con Jehova lo “mata e monster di laman” pronto?
18 Tocante e tempu ei, Isaías ta profetisá: “Riba e dia ei Jehova, cu su spada duru i grandi i fuerte, lo dirigí su atencion na Leviatan, e colebra cu ta lastra, sí na Leviatan, e colebra trocí, i sigur lo e mata e monster di laman cu ta den laman.” (Isaías 27:1) Kico ta e “Leviatan” di tempu moderno? Aparentemente e ta “e colebra original,” Satanas mes, huntu cu su mal sistema di cosnan cu e ta usa pa haci guera contra e Israel di Dios. (Revelacion 12:9, 10, 17; 13:14, 16, 17) Na 1919 Leviatan a perde su gara riba e pueblo di Dios. Un dia lo e disparcé completamente. (Revelacion 19:19-21; 20:1-3, 10) Asina Jehova lo “mata e monster di laman.” Entre tantu, nada cu Leviatan purba contra Jehova su pueblo lo tin éxito duradero. (Isaías 54:17) Esta un consuelo cu nos tin e garantia ei!
“Un Cunucu di Wijndruif di Biña Cu Ta Scuma”
19. Den ki condicion e resto ta awe?
19 En bista di tur e lus aki cu Jehova a duna, nos no tin tur motibu pa alegrá? Sigur cu sí! Isaías a describí e goso di Jehova su pueblo na un manera masha bunita ora el a skirbi: “Riba e dia ei boso canta p’e: ‘Un cunucu di wijndruif di biña cu ta scuma! Ami, Jehova, ta proteh’é. Tur momento lo mi muh’é. Pa niun hende no dirigí su atencion contra dje, lo mi proteh’é asta anochi i den dia.’” (Isaías 27:2, 3) Jehova a cuida su “cunucu di wijndruif,” e resto dje Israel di Dios, i tambe nan asociadonan cu ta traha duru. (Juan 15:1-8) Como resultado, tin fruta cu ta trece gloria na su nomber i ta causa un gran goso entre su sirbidónan riba tera.
20. Con Jehova ta protehá e congregacion cristian?
20 Nos por ta sumamente contentu cu Jehova no ta rabiá mas cu su sirbidónan ungí. Dor cu e tabata rabiá cu nan el a permití pa na 1918 nan bai den cautiverio spiritual. Jehova mes ta bisa: “Mi no tin furia. Ken lo duna mi mata di sumpiña i mal yerba den e bataya? Lo mi trapa riba nan. Na mésun tempu lo mi pega nan na candela. Di otro manera, lagu’é gara mi lugá fortificá, lagu’é haci pas cu mi; pas, lagu’é haci cu mi.” (Isaías 27:4, 5) Pa haci sigur cu su mata di wijndruif lo sigui producí un abundancia di “biña cu ta scuma,” Jehova ta aplastá i kima cualkier influencia manera mal yerba cu lo por corumpí nan. P’esei, no laga niun hende pone e bienestar dje congregacion cristian na peliger! Laga tur hende ‘gara Jehova su lugá fortificá,’ dor di busca su fabor i proteccion. Dor di haci esei nos ta haci pas cu Dios, algu asina importante cu Isaías ta mencion’é dos bes.—Salmo 85:1, 2, 8; Romanonan 5:1.
21. Di ki manera e tera productivo a yena cu “producto”?
21 Tin mas bendicion: “Den e dianan binidero Jacob lo saca rais, Israel lo saca flor i realmente lo spruit; i nan simplemente lo yena e superficie dje tera productivo cu producto.” (Isaías 27:6) E versículo aki ta cumpliendo desde 1919, dunando evidencia maraviyoso di Jehova su poder. Cristiannan ungí a yena tera cu “producto,” cuminda spiritual nutritivo. Meimei di un mundu corupto, nan ta conserbá Dios su normanan haltu cu goso. I Jehova ta sigui bendicioná nan cu aumento. Como resultado, nan miyones di compañeronan, e otro carnénan, “ta rindiendo sirbishi sagrado na [Dios] di dia i anochi den su tempel.” (Revelacion 7:15) Laga nos nunca perde for di bista e gran privilegio di tuma dje “producto” i compartié cu otro hende!
22. Ki bendicionnan esnan cu aceptá e lus ta ricibí?
22 Nos no ta contentu cu den e tempu crítico aki cu scuridad ta tapa tera i tiniebla diki ta tapa e gruponan nacional, Jehova ta tira lus spiritual riba su pueblo? (Isaías 60:2; Romanonan 2:19; 13:12) Pa tur hende cu acept’é, e lus ei ta encerá pas mental i goso awor, i nada ménos cu bida eterno den futuro. Cu bon motibu anto, nos cu ta stima e lus ta lanta nos curason den alabansa na Jehova i bisa huntu cu e salmista: “Jehova ta e fortalesa di mi bida. Di ken lo mi tin teror? Spera den Jehova; tene curashi i laga bo curason sea fuerte. Sí, spera den Jehova.”—Salmo 27:1b, 14.
Bo Ta Corda?
• Ki futuro tin pa esnan cu ta oprimí Jehova su pueblo?
• Ki aumento e buki di Isaías ta profetisá?
• Den ki “kambernan interior” nos mester keda, i pakico?
• Di con e condicion di Jehova su pueblo ta trece alabansa p’e?
[Preguntanan di Estudio]
[Kuadro na página 22]
PUBLICACION NOBO
Mayoria dje informacion tratá den e dos artículonan di studio aki a ser presentá den forma di un discurso riba programa dje congreso di distrito di aña 2000/2001. Na fin dje discurso, un publicacion nobo a ser presentá, titulá E Profecia di Isaías—Lus pa Henter Humanidad I. E buki aki di 416 página ta contené un consideracion versículo-pa-versículo dje promé 40 capítulonan dje buki di Isaías.
[Plachi na página 18]
Esnan hustu so por drenta Jehova su “stad fuerte,” su organisacion
[Plachi na página 19]
Isaías a busca Jehova “den anochi”
[Plachi na página 21]
Jehova ta protehá su “cunucu di wijndruif” i ta hacié fructífero