Fiha Mente Riba e Spiritu i Biba!
Fiha Mente Riba e Spiritu i Biba!
“Fiha mente riba e spiritu kier men bida.”—ROMANONAN 8:6.
1, 2. Ki contraste Bijbel ta haci entre “carni” i “spiritu”?
NO TA fácil pa mantené un posicion moralmente limpi dilanti Dios meimei di un sociedad degradá cu ta glorificá satisfaccion di deseo di carni. Sin embargo, e Scritura ta pone “carni” i “spiritu” na contraste cu otro, halando un liña di separacion masha cla entre e consecuencianan hopi tristu di laga bo mes ser dominá dor di e carni pecaminoso, i e resultadonan felis cu ta bini dor di someté nos na e influencia di e spiritu santu di Dios.
2 Por ehempel, Jesucristo a bisa: “Ta e spiritu ta loke ta dunadó di bida; e carni no ta sirbi pa nada en absoluto. E dichonan cu mi a papia cu boso ta spiritu i ta bida.” (Juan 6:63) Apostel Pablo a skirbi e cristiannan na Galacia: “E carni ta contra e spiritu den su deseo, i e spiritu contra e carni; pasobra esakinan ta contrario cu otro.” (Galationan 5:17) Tambe Pablo a bisa: “Esun cu sembra cu su carni na bista lo cosechá corupcion for di su carni, pero esun cu sembra cu e spiritu na bista lo cosechá bida eterno for dje spiritu.”—Galationan 6:8.
3. Kico ta necesario pa nos por libra di deseo i inclinacionnan robes?
3 E spiritu santu di Jehova—su forsa activo—por eliminá eficasmente tantu “deseo di carni” impuru como e dominio destructivo di nos carni pecaminoso. (1 Pedro 2:11) Pa libra for di sclabitud na inclinacion robes, ta vital pa nos tin e yudansa di e spiritu di Dios, pasobra Pablo a skirbi: “Fiha mente riba e carni kier men morto, pero fiha mente riba e spiritu kier men bida i pas.” (Romanonan 8:6) Kico ta nificá fiha mente riba e spiritu?
“Fiha Mente Riba e Spiritu”
4. Kico “fiha mente riba e spiritu” ta nificá?
4 Ora Pablo a skirbi tocante “fiha mente riba e spiritu” el a usa e palabra griego cu ta nificá “manera di pensa, mente(-fihá), . . . meta, aspiracion, empeño.” Un verbo cu ta relacioná cuné ta nificá “pensa, tene na mente.” Pues, fiha mente riba e spiritu ta nificá cu Jehova su forsa activo ta controlá, dominá i impulsá nos. E ta nificá cu nos boluntariamente ta laga e spiritu santu di Dios influenciá nos pensamentu, inclinacion i aspiracionnan completamente.
5. Te na ki grado nos mester someté nos mes na e influencia di e spiritu santu?
5 Pablo a enfatisá e grado cu nos mester someté nos mes na e influencia di e spiritu santu ora el a papia di ser ‘esclabo dor dje spiritu.’ (Romanonan 7:6) Riba base di nan fe den e sacrificio dje rescate di Jesus, cristiannan a ser librá for di dominio di picá i a “muri” pues en cuanto nan situacion anterior como esclabo. (Romanonan 6:2, 11) Esnan cu a muri den e sentido figurativo ainda ta na bida físicamente i awor ta liber pa sigui Cristo como “esclabo di husticia.”—Romanonan 6:18-20.
Un Transformacion Notabel
6. Esnan cu ta bira “esclabo di husticia” ta pasa dor di cua transformacion?
6 E transformacion for di ser “esclabo di picá” pa sirbi Dios como “esclabo di husticia” ta notabel en berdad. Relacioná cu algun hende cu a pasa dor di tal cambio, Pablo a skirbi: ‘Boso a ser labá limpi, boso a ser santificá, boso a ser declará hustu den e nomber di nos Señor Jesucristo i cu e spiritu di nos Dios.’—Romanonan 6:17, 18; 1 Corintionan 6:11.
7. Di con ta importante pa nos por mira asuntunan desde e punto di bista di Jehova?
7 Pa pasa dor di e transformacion remarcabel ei, promé nos mester siña Jehova su punto di bista di asuntunan. Siglonan pasá, salmista David a pidi Dios cu fervor: “Haci mi conocé bo mes camindanan, o Jehova . . . Haci mi cana den bo berdad i siña mi.” (Salmo 25:4, 5) Jehova a scucha David, i E por contestá e tipo di oracionnan ei pa su sirbidónan di tempu moderno tambe. Dor cu Dios su camindanan i su berdad ta limpi i santu, lo ta útil pa meditá riba nan ora nos ta ser tentá pa satisfacé deseonan di carni impuru.
E Papel Vital di e Palabra di Dios
8. Di con ta hopi importante pa nos studia Bijbel?
8 E Palabra di Dios, Bijbel, ta un producto di su spiritu. Pues, un manera vital pa laga e spiritu ei influenciá nos ta dor di lesa i studia Bijbel—tur dia si ta posibel. (1 Corintionan 2:10, 11; Efesionan 5:18) Yena nos mente i curason cu berdad i principionan di Bijbel lo yuda nos resistí atakenan contra nos spiritualidad. Sí, ora tentacion inmoral lanta, e spiritu di Dios por yuda nos corda recordatorio i principionan bíblico guiador cu por fortificá nos determinacion pa actua na armonia cu Dios su boluntad. (Salmo 119:1, 2, 99; Juan 14:26) P’esei, nos no ta engañá pa sigui un curso robes.—2 Corintionan 11:3.
9. Con studio di Bijbel ta fortalecé nos determinacion pa protehá nos relacion cu Jehova?
9 Segun cu nos ta sigui cu nos studio sincero i diligente di e Scritura cu yudansa di publicacionnan basá riba Bijbel, e spiritu di Dios ta influenciá nos mente i curason, pa asina nos respet pa e normanan di Jehova bira mas profundo. Nos relacion cu Dios ta bira e cos mas importante den nos bida. Ora nos confrontá tentacion, nos lo no sigui pensa con placentero lo ta pa cometé e malecho. Mas bien, nos preocupacion n’e momento ei lo ta pa nos warda integridad na Jehova. Un aprecio profundo pa nos relacion cuné ta conmové nos pa combatí cualkier inclinacion cu por dañ’é of destruyé.
“Cuantu Mi Stima Bo Ley!”
10. Di con ta necesario pa obedecé e ley di Jehova pa fiha mente riba e spiritu?
10 Pa nos fiha mente riba e spiritu, conocimentu di e Palabra di Dios no ta suficiente. Rey Sálomon tabata comprendé Jehova su normanan bon, pero e no a biba na armonia cu nan durante e parti final di su bida. (1 Reynan 4:29, 30; 11:1-6) Si nos ta hende spiritual, nos lo mira e necesidad di no solamente sa loke Bijbel ta bisa pero tambe pa obedecé e ley di Dios cu henter nos curason. Esei ta nificá haci un examinacion conciencial di Jehova su normanan i haci un esfuerso diligente pa sigui nan. E salmista tabatin e actitud ei. El a canta: “Cuantu mi stima bo ley! Henter dia e ta mi interes intenso.” (Salmo 119:97) Ora nos di berdad ta preocupá pa sigui e ley di Dios, esaki lo conmové nos pa desplegá cualidadnan divino. (Efesionan 5:1, 2) En bes di laga nos mes ser hibá pa malecho den un forma indefenso, nos ta manifestá e frutanan di spiritu, i un deseo di agradá Jehova ta apartá nos for di “obranan di carni” baho.—Galationan 5:16, 19-23; Salmo 15:1, 2.
11. Con lo bo splica cu e ley di Jehova cu ta prohibí fornicacion ta un proteccion pa nos?
11 Con nos por desaroyá respet i amor profundo pa e ley di Jehova? Un manera ta dor di examiná su balor cuidadosamente. Considerá e ley di Dios cu ta limitá relacion sexual na matrimonio i ta prohibí fornicacion i adulterio. (Hebreonan 13:4) Obedecé e ley aki ta priva nos di algu bon? Un amoroso Tata celestial lo traha un ley cu ta stroba nos di haña algu beneficioso? Claro cu no! Mira loke ta pasando den e bida di hopi hende cu no ta biba na armonia cu normanan moral di Jehova. Embaraso indeseá hopi bes ta resultá den aborto of kisas den matrimonio prematuro i infelis. Hopi hende mester lanta un yu sin un esposo of un esposa. Ademas, esnan cu ta practicá fornicacion ta exponé nan mes na malesanan transmití sexualmente. (1 Corintionan 6:18) I si un sirbidó di Jehova cometé fornicacion, e efecto emocional por ta devastador. Purba oprimí e remordimentu di un concenshi culpabel por causa anochinan sin drumi i angustia mental. (Salmo 32:3, 4; 51:3) Pues, no ta bisto cu e propósito dje ley di Jehova cu ta prohibí fornicacion ta pa protehá nos? Sí, sigur tin gran beneficio den mantené limpiesa moral!
Pidi Jehova Su Yudansa den Oracion
12, 13. Di con ta apropiado pa haci oracion ora deseonan pecaminoso atacá nos?
12 Fiha mente riba e spiritu sigur ta rekerí oracion sincero. Ta apropiado pa pidi pa yudansa dje spiritu di Dios, pasobra Jesus a bisa: “Si boso . . . sa con pa duna bon regalo na boso yunan, cu cuantu mas rason e Tata den shelu lo duna spiritu santu na esnan cu ta pidié!” (Lucas 11:13) Den oracion, nos por expresá cu nos ta dependé riba e spiritu pa yudansa relacioná cu nos debilidadnan. (Romanonan 8:26, 27) Si nos ripará cu deseo i actitudnan pecaminoso ta afectá nos, of si un amoroso compañero creyente hala esei na nos atencion, lo ta sabí pa nos ta specífico tocante e problema den nos oracionnan i pidi Dios su yudansa pa nos vence e tendencianan aki.
13 Jehova por yuda nos concentrá riba cosnan hustu, decente, birtuoso i digno di alabansa. I esta apropiado ta pa nos suplik’é fervorosamente pa asina “e pas di Dios” protehá nos curason i facultad mental! (Filipensenan 4:6-8) P’esei laga nos haci oracion pidi Jehova su yudansa pa “sigui tras di husticia, debocion na Dios, fe, amor, awante, genio suave.” (1 Timoteo 6:11-14) Cu yudansa di nos Tata celestial, ansiedad i tentacion lo no acumulá te n’e punto cu nos no por control’é mas. Mas bien, e trankilidad cu Dios ta duna lo sobresalí den nos bida.
No Afligí e Spiritu
14. Di con e spiritu di Dios ta un forsa pa limpiesa?
14 Sirbidónan maduro di Jehova ta aplicá Pablo su conseho personalmente: “No paga e candela dje spiritu.” (1 Tesalonicensenan 5:19) Siendo cu e spiritu di Dios ta “e spiritu di santidad,” e ta limpi, puru, sagrado. (Romanonan 1:4) Pues, ora e spiritu ei ta ehercé influencia riba nos, e ta un forsa di santidad of limpiesa. E ta yuda nos keda hiba un bida limpi cu ta caracterisá pa obedencia na Dios. (1 Pedro 1:2) Cualkier práctica impuru ta demostrá un falta di respet pa e spiritu ei, i esei por tin consecuencianan desastroso. Con asina?
15, 16. (a) Con nos lo por afligí e spiritu di Dios? (b) Con nos por evitá di afligí e spiritu di Jehova?
15 Wel, Pablo a skirbi: “No afligí e spiritu santu di Dios, cu cua boso a ser seyá pa un dia di liberacion mediante rescate.” (Efesionan 4:30) E Scritura ta identificá e spiritu di Jehova como un seyo, of un ‘garantia di loke mester a bini,’ pa fiel cristiannan ungí. I esei ta bida inmortal den shelu. (2 Corintionan 1:22; 1 Corintionan 15:50-57; Revelacion 2:10) E spiritu di Dios por dirigí esnan ungí i nan compañeronan cu tin un speransa terenal na un bida di fieldad i por yuda nan evitá obranan pecaminoso.
16 E apostel a duna spiertamentu contra tendencianan den e direccion di falsedad, hortamentu, conducta bergonsoso, etcétera. Si nos permití e tipo di cosnan ei hiba nos, nos lo ta bayendo contra di e conseho inspirá pa spiritu di e Palabra di Dios. (Efesionan 4:17-29; 5:1-5) E ora ei, te na cierto grado nos lo afligí e spiritu di Dios, i esei sigur ta algu cu nos kier evitá. P’e motibu ei, si cualkier un di nos cuminsá ignorá e conseho di e Palabra di Jehova, nos por cuminsá desaroyá actitud i característicanan cu por resultá den picá boluntario i pérdida total di aprobacion divino. (Hebreonan 6:4-6) Maske kisas nos no ta practicá picá awor akí, nos por ta bayendo den e direccion ei. Dor di bai continuamente contra e direccion di e spiritu, nos lo afligié. Tambe nos lo oponé i afligí Jehova, e fuente di e spiritu santu. Siendo cu nos ta stima Dios, nunca nos kier haci esei. Mas bien, laga nos haci oracion pidi Jehova su yudansa pa nos no afligí su spiritu, pero pa nos por duna onor na su nomber santu dor di sigui fiha mente riba e spiritu.
Sigui Fiha Mente Riba e Spiritu
17. Cua ta algun meta spiritual cu nos por pone, i di con lo ta sabí pa traha pa logra nan?
17 Un manera importante pa nos sigui fiha mente riba e spiritu ta dor di pone meta spiritual i traha pa alcansá nan. Dependiendo di nos necesidad i circunstancianan, nos metanan por incluí mehorá nos custumber di studia, aumentá nos participacion den e trabou di predicá of haci esfuerso pa alcansá un privilegio specífico di sirbishi, manera e ministerio di pionero di tempu completo, sirbishi di Betel of e trabou di misionero. Esaki lo mantené nos mente ocupá cu interesnan spiritual i lo yuda nos resistí di sucumbí na nos debilidadnan humano of laga metanan materialista i deseonan no-bíblico cu ta comun pa e sistema di cosnan aki impulsá nos. Esaki sigur ta un curso sabí, pasobra Jesus a urgi: “Stop di acumulá tesoronan pa bo mes riba tera, unda mòt i frus ta destruí, i unda ladron ta kibra drenta i horta. Mas bien acumulá tesoronan pa bo mes den shelu, unda ni mòt ni frus ta destruí, i unda ladron no ta kibra drenta i horta. Pasobra caminda bo tesoro ta, ei bo curason tambe lo ta.”—Mateo 6:19-21.
18. Di con ta asina importante pa sigui fiha mente riba e spiritu den e último dianan aki?
18 Fiha mente riba e spiritu i oprimí deseonan mundano sigur ta e curso di sabiduria den e “último dianan” aki. (2 Timoteo 3:1-5) Al fin i al cabo, “mundu ta pasa bai i tambe su deseo, pero esun cu haci e boluntad di Dios ta permanecé pa semper.” (1 Juan 2:15-17) Por ehempel, si un hóben cristian sigui tras di e meta di sirbishi di tempu completo, esei lo por sirbi como un guia durante e añanan difícil di adolesencia of hubentud. Ora e hañ’é preshoná pa comprometé, lo e tin loke e kier logra den e sirbishi di Jehova bon cla na mente. Un persona spiritual asina lo haña cu no ta sabí, i ta asta un bobedad, pa laga meta spiritual un banda pa sigui tras di metanan material of placer cu picá ta primintí di duna. Corda cu Moises cu tabata spiritual ‘a scoge pa ser maltratá cu e pueblo di Dios en bes di disfrutá temporalmente di picá.’ (Hebreonan 11:24, 25) Sea cu nos ta hóben of bieu, nos ta tuma un decision similar ora nos ta sigui fiha mente riba e spiritu en bes di riba e carni pecaminoso.
19. Ki beneficio nos lo haña si nos sigui fiha mente riba e spiritu?
19 “Fiha mente riba e carni kier men enemistad cu Dios,” miéntras cu “fiha mente riba e spiritu kier men bida i pas.” (Romanonan 8:6, 7) Si nos sigui fiha mente riba e spiritu, nos lo experenciá pas precioso. Nos curason i facultad mental lo ta mas protehá for di e influencia di nos condicion pecaminoso. Nos lo ta mihó ekipá pa por resistí tentacion pa cometé malecho. I nos lo tin yudansa divino pa trata cu e lucha constant entre carni i spiritu.
20. Di con nos por ta sigur cu ta posibel pa sali victorioso for di e bataya entre e carni i e spiritu?
20 Dor di sigui fiha mente riba e spiritu, nos ta mantené un laso vital cu Jehova, e fuente di tantu bida como spiritu santu. (Salmo 36:9; 51:11) Satanas e Diabel i su agentenan ta haci tur loke nan por pa destruí nos relacion cu Jehova Dios. Nan ta purba haña control riba nos mente, sabiendo cu si nos entregá, esaki finalmente ta hiba na enemistad cu Dios i na morto. Pero nos por sali victorioso for di e bataya aki entre e carni i e spiritu. Pablo mes a pasa dor di esei, pasobra ora el a skirbi tocante su mes bataya, el a puntra promé: “Ken lo rescatá mi for dje curpa padeciendo e morto aki?” Anto el a mustra cu rescate ta posibel, ora el a sclama: “Danki na Dios mediante Jesucristo nos Señor!” (Romanonan 7:21-25) Nos tambe por gradicí Dios mediante Cristo p’e echo cu el a duna nos un medio pa trata cu debilidad humano i sigui fiha mente riba e spiritu cu e maraviyoso speransa di bida eterno.—Romanonan 6:23.
Bo Ta Corda?
• Kico ta nificá fiha mente riba e spiritu?
• Con nos por laga Jehova su spiritu influenciá nos?
• Splica di con, den nos bataya contra picá, ta vital pa studia Bijbel, pa obedecé ley di Jehova i resa na dje.
• Di ki manera pone meta spiritual por yuda mantené nos riba e curso di bida?
[Preguntanan di Estudio]
[Plachi na página 16]
Studio di Bijbel ta yuda nos resistí atakenan contra nos spiritualidad
[Plachi na página 17]
Ta apropiado pa pidi Jehova su yudansa den oracion pa vence deseonan pecaminoso
[Plachinan na página 18]
Metanan spiritual por yuda nos sigui fiha mente riba e spiritu