“Ta un Echo Cu Señor A Lanta!”

Imaginá bo mes con afligí e disipelnan di Jesus tabata ora nan Señor a ser matá. Nan speransa a parce mes morto cu e curpa cu José di Arimatea a pone den e graf. Cualkier expectativa cu Jesus lo a libra e hudiunan for di opresion romano tambe tabata morto.

SI ESEI tabata fin di e asuntu, Jesus su disipelnan probablemente lo a disparcé manera e siguidónan di hopi cu a pretendé di ta Mesías. Pero Jesus tabata bibu! Segun e Scritura, el a aparecé na su disipelnan na vários ocasion djis despues di su morto. P’esei, algun di nan a sinti nan conmoví pa sclama: “Ta un echo cu Señor a lanta!”—Lucas 24:34.

E disipelnan mester a defendé nan fe den Jesus como Mesías. Nan a haci esei specialmente dor di señalá na su resureccion for di morto como prueba real di cu e ta Mesías. Sí, “cu gran poder e apostelnan a sigui duna testimonio tocante e resureccion di Señor Jesus.”—Echonan 4:33.

Si cualkier hende a yega di proba cu e resureccion aki tabata un fraude—kisas dor di logra cu un di e disipelnan ta admití cu e tabata un fraude of dor di proba cu Jesus su curpa a keda den e graf—cristianismo lo tabata un fracaso desde principio. Pero no tabata asina. Dor cu e siguidónan di Jesus tabata sa cu Cristo ta na bida, nan a bai tur caminda proclamando su  resureccion, i multitudnan a bira creyente di Cristo resucitá.

Di con abo tambe por kere den e resureccion di Jesus? Ki prueba tin cu esaki tabata algu cu realmente a sosodé?

Pakico Considerá e Evidencia?

Tur cuater relato di Evangelio ta relatá tocante Jesus su resureccion. (Mateo 28:1-10; Marco 16:1-8; Lucas 24:1-12; Juan 20:1-29) * Otro partinan di e Scritura Griego Cristian ta papia cu siguransa tocante e lantamentu di Cristo for di morto.

No ta nada straño cu Jesus su siguidónan a proclamá su resureccion! Si Dios realmente a lant’é for di morto, esei ta e noticia di mas asombroso cu mundu por a yega di tende. Esei ta nificá cu Dios ta existí. Mas ainda, esei ta nificá cu Jesus ta na bida n’e momento aki.

Con esei ta afectá nos? Wel, Jesus a resa: “Esaki ta nificá bida eterno, cu nan ta ganando conocimentu di bo, e único Dios berdadero, i di esun cu bo a manda, Jesucristo.” (Juan 17:3) Sí, nos por adkerí conocimentu cu ta duna bida, conocimentu di Jesus i di su Tata. Dor di aplicá tal conocimentu, asta si nos muri, nos tambe por haña resureccion, en bista dje echo cu Jesus a ser resucitá. (Juan 5:28, 29) Nos por tin e speransa di bida eterno riba un tera paradísico bou di e Reino celestial di Dios den man di su Yu glorificá, Jesucristo, e Rey di reynan.—Isaías 9:6, 7; Lucas 23:43; Revelacion 17:14.

Esei kier men cu e pregunta di cu si Jesus en berdad a lanta for di morto, ta crucial. E ta afectá nos bida awor i nos prospectonan pa futuro. P’esei nos ta invitá bo pa examiná cuater área di evidencia cu Jesus a muri i a ser resucitá.

Jesus di Berdad A Muri Riba Staca

Algun hende sképtico ta pretendé cu maske e tabata clabá na staca, Jesus en realidad no a muri na e staca. Nan ta bisa cu e tabata casi morto i cu e frescura den e graf a rebib’é. Sin embargo, tur fuente disponibel ta proba cu ta Jesus su curpa sin bida a ser poné den e graf.

Siendo cu Jesus a ser ehecutá públicamente, tabatin testigo dje echo cu di berdad el a muri na staca. E oficial cu tabata a cargo di su ehecucion a constatá su morto. E oficial di ehército ei tabata un profesional kende su tarea a incluí determiná si Jesus a muri en berdad. Ademas, ta solamente despues cu Jesus su morto a ser confirmá, e gobernadó romano Poncio Pilato a laga José di Arimatea bai cu e curpa di Jesus pa entiero.—Marco 15:39-46.

Nan A Haña e Graf Bashí

E graf bashí a duna e disipelnan nan promé prueba di e resureccion di Jesus, i te awe e evidencia aki ta bon conocí. Jesus tabata derá den un graf nobo, unu cu nunca a ser usá. E tabata cerca di e lugá caminda nan a cologá hende na staca i sin duda n’e tempu ei por a localisá esaki masha lihé. (Juan 19:41, 42) Tur e relatonan di Evangelio ta mustra cu Jesus su curpa no tabat’ei ora su amigunan a yega na su graf riba e di dos mainta despues cu el a muri.—Mateo 28:1-7; Marco 16:1-7; Lucas 24:1-3; Juan 20:1-10.

E graf bashí a sorprendé Jesus su enemigunan mes tantu cu su amigunan. Pa hopi tempu su enemigunan a traha duru pa mir’é morto i derá. Ora nan a logra nan meta, nan a percurá pa pone un guardia i seya e graf. Tog, riba e mainta di e promé dia di siman e graf tabata bashí.

Ta Jesus su amigunan a saca su curpa for di  e graf? Esei no ta probabel, como kiera cu e Evangelionan ta mustra cu nan tabata masha afligí despues cu el a ser ehecutá. Ademas, su disipelnan sigur lo no a sigui wanta persecucion i muri pa algu cu nan tabata sa cu ta fraudulento.

Ken a haci e graf bashí anto? Jesus su enemigunan lo tabata esnan ménos probabel cu lo a bai cu e curpa. Asta si nan a haci esei, nan sigur lo a laga sak’é despues pa refutá e afirmacion di e disipelnan di cu Jesus a ser resucitá i tabata bibu. Pero nada di esei no a sosodé nunca, pasobra ta Dios ta esun cu a tuma accion.

Simannan despues, Jesus su enemigunan no a trece muchu prueba padilanti pa refutá e asuntu ora Pedro a testificá: “Hombernan di Israel, tende e palabranan aki: Jesus e nazareno, un homber cu Dios a mustra na boso públicamente mediante obranan poderoso i milagernan i señalnan cu Dios a haci pa medio di dje meimei boso, manera boso mes sa, e homber aki, manera un hende cu a ser entregá na e conseho determiná i conocimentu adelantá di Dios, boso a claba na un staca mediante man di hende malbado i boso a elimin’é. Pero Dios a resucit’é kitando e dolor di morto, pasobra no tabata posibel pa e sigui ser tené dor di esei. Pasobra David ta bisa di dje: ‘Mi tabatin Jehova constantemente dilanti mi bista . . . Ademas, asta mi carni lo biba den speransa; pasobra lo bo no laga mi alma den Hádes, ni lo bo no permití esun leal na bo mira corupcion.’”—Echonan 2:22-27.

Hopi Hende A Mira Jesus Resucitá

E skirbidó di Evangelio, Lucas, a bisa den e buki di Echonan: “Mediante hopi prueba positivo, [Jesus] a mustra su mes bibu na [e apostelnan] tambe despues di a sufri, siendo mirá pa nan durante cuarenta dia i contando e cosnan tocante e reino di Dios.” (Echonan 1:2, 3) Vários disipel a mira Jesus resucitá na diferente ocasion: den un hofi, riba un caminda, durante un cuminda, n’e laman di Tiberias.—Mateo 28:8-10; Lucas 24:13-43; Juan 21:1-23.

Críticonan ta cuestioná e veracidad di e aparicionnan aki. Nan ta bisa cu e skirbidónan a inventá e relatonan, of nan ta cita e aparente discrepancianan den e relatonan. En realidad, variacionnan chikitu den e relatonan di Evangelio ta proba cu no tabatin conspiracion den e asuntu. Nos conocimentu di Jesus ta bira mas amplio ora un escritor ta duna detayenan cu ta complementá otro relatonan di cierto incidente den e bida di Cristo riba tera.

E aparicionnan di Jesus despues di su resureccion tabata halucinacion? Cualkier argumento den e direccion ei ta irazonabel pa kere, ya cu ta asina hopi hende a mir’é. Entre nan tabatin piscadó, hende muher, un funcionario público i asta apostel Tomas cu a duda, kende tabata convencí solamente ora el a mira prueba irefutabel cu Jesus a ser lantá for di morto. (Juan 20:24-29) Na vários ocasion, e disipelnan di Jesus na promé instante no a reconocé nan Señor resucitá. Un biaha, mas cu 500 hende a mir’é, mayoria di nan tabata na bida ainda ora apostel Pablo a usa e incidente ei como evidencia den su defensa di e resureccion.—1 Corintionan 15:6.

 Jesus, un Persona Bibu, Tin Efecto Riba Hende

E resureccion di Jesus no ta simplemente un asuntu di curiosidad of debate. E echo cu e ta na bida, tabatin un efecto positivo riba hende tur caminda. Desde promé siglo, un cantidad grandi di hende a cambia for di indiferencia of oposicion total contra cristianismo, pa siguridad absoluto cu cristianismo ta e religion berdadero. Kico a haci nan cambia? Un studio di e Scritura a duna nan prueba cu Dios a resucitá Jesus como un glorioso criatura spiritual den shelu. (Filipensenan 2:8-11) Nan a ehercé fe den Jesus i den Jehova Dios su provision pa salbacion mediante Cristo su sacrificio di rescate. (Romanonan 5:8) E hendenan ei a haña felicidad berdadero dor di haci e boluntad di Dios i biba na armonia cu Jesus su siñansa.

Considerá kico ser un cristian a nificá den e promé siglo. Prestigio, poder i rikesa no tabatin balor. Al contrario, hopi cristian di promé ‘a aceptá cu goso plundermentu di nan pertenencianan’ pa e beneficio di nan fe. (Hebreonan 10:34) Cristianismo a rekerí un bida di sacrificio i persecucion cu den hopi caso a terminá den martirio.

Promé cu nan a bira siguidó di Cristo, algun hende tabatin bon prospecto pa loke ta trata prestigio i rikesa. Saulo di Tarso a studia bou di guia di e maestro di Ley renombrá Gamaliel i a cuminsá distinguí su mes den bista di e hudiunan. (Echonan 9:1, 2; 22:3; Galationan 1:14) Sin embargo, Saulo a bira apostel Pablo. E i hopi otronan a bira nan lomba pa prestigio i poder cu e mundu aki a ofrecé. Di con? Pa dje manera ei nan por a plama un mensahe di berdadero speransa basá riba Dios su promesanan i riba e echo cu Jesucristo a ser lantá for di morto. (Colosensenan 1:28) Nan tabata dispuesto pa sufri pa un causa cu nan tabata sa cu ta basá riba berdad.

Esaki ta e caso tambe di miyones di hende awe. Bo por haña nan den e congregacionnan di Testigo di Jehova rond mundu. Testigonan ta invitá bo cordialmente pa asistí na e conmemoracion anual di e morto di Cristo, cu lo tuma lugá diadomingo 8 di april 2001 despues cu solo baha. Nan lo ta contentu cu bo presencia na e ocasion ei i na tur nan reunionnan pa studia Bijbel na nan Salonnan di Reino.

Pakico no siña mas, no solamente di e morto i resureccion di Jesus sino tambe tocante su bida i siñansanan? E ta invitá nos pa bini cerca dje. (Mateo 11:28-30) Actua awor pa gana conocimentu exacto di Jehova Dios i Jesucristo. Esei por nificá bida eterno bou di e Reino di Dios den man di su Yu stimá.

[Nota]

[Plachinan na página 7]

Miyones di hende ta haña berdadero felicidad como siguidónan di Jesucristo

[Rekonosementu pa Potrèt na página 6]

For di Self-Pronouncing Edition of the Holy Bible, cu ta contené e versionnan King James i Revised