Abo Por Ricibí Bendicionnan di Reino

PABLO e apostel cristian por a papia algun dje idiomanan principal di su tempu cu fluides. El a ricibí algu ekivalente na un educacion universitario djawendia. El a gosa dje bentaha i derechonan di ta un ciudadano romano. (Echonan 21:37-40; 22:3, 28) E credencialnan aki lo por a permitié bira ricu i famoso. Sin embargo, el a bisa: “Loke tabata ganashi pa mi, esakinan mi a considerá como pérdida pa causa di Cristo . . . i ta considerá nan como un monton di basura, pa mi gana Cristo.” (Filipensenan 3:7, 8) Di con Pablo a bisa asina?

Pablo, cu ántes tabata conocí como Saulo di Tarso, un persiguidó di esnan “cu a pertenecé na E Caminda,” a bira creyente despues cu el a ricibí un vision di Jesus resucitá i glorificá. (Echonan 9:1-19) Pa Pablo, e experencia aki riba caminda pa Damasco a proba mas ayá di tur duda cu Jesus ta e Mesías of Cristo primintí, e futuro gobernante dje Reino primintí. Ademas el a trece un cambio dramático den e rumbo di Pablo su bida, manera su declaracion firme mencioná anteriormente ta mustra. Cu otro palabra, ya cu Pablo tabata sincero i onesto di curason, el a repentí.—Galationan 1:13-16.

 Hopi bes den Bijbel e verbo “repentí” ta ser traducí for di un palabra griego cu literalmente kier men “haña sa despues,” lo contrario di “sa di antemano.” Pues, repentimentu ta enbolbé un cambio den bo manera di pensa, bo actitud of bo propósito, un rechaso di bo forma di anda anterior debí cu e no ta satisfactorio. (Echonan 3:19; Revelacion 2:5) Den caso di Pablo, e no a laga e suceso crucial ei riba caminda pa Damasco keda djis como un experencia emocional, of manera nan sa bisa, un experencia religioso. El a sirbi pa laga Pablo realisá cu su forma di bida anterior, sin conocé Cristo, no a yud’é cu nada. Ademas, el a realisá cu pa e por beneficiá dje conocimentu cu el a caba di haña tocante e Cristo, e mester a haci algu pa corigí e rumbo di su bida.—Romanonan 2:4; Efesionan 4:24.

Un Cambio Cu A Trece Bendicion

Promé, Pablo tabata haña su conocimentu tocante Dios principalmente dje secta di fariseonan, di cua e tabata miembro. Tabatin hopi filosofia i tradicion di hende den nan creencianan. Debí na prehuicio religioso, Pablo su celo i su esfuersonan tabata mal dirigí. Maske el a kere cu e tabata sirbi Dios, e tabata de echo bringando contra dje.—Filipensenan 3:5, 6.

Despues cu Pablo a ricibí conocimentu exacto tocante Cristo i e papel cu e ta hunga den Dios su propósito, e por a mira cu e tabatin cu scoge: E mester a keda un fariseo i sigui gosa di respet i un bon posicion den comunidad, of e mester a cambia e rumbo di su bida i cuminsá haci loke sea ta necesario pa gana Dios su aprobacion? Felismente, Pablo a tuma e decision corecto, pasobra el a bisa: “Mi no tin bergwensa dje bon nobo; loke en realidad ta e poder di Dios pa salbacion pa tur hende cu tin fe, pa hudiu promé i tambe pa griego.” (Romanonan 1:16) Pablo a bira un predicadó celoso dje bon nobo tocante Cristo i e Reino.

Hopi aña despues, Pablo a bisa su compañeronan cristian: “Mi no ta considerá cu mi a haña gara di dje ainda; pero tin un solo cos tocante dje: Lubidando loke ta patras i forsando padilanti pa loke ta mas ayá, mi ta sigui den direccion dje meta p’e premio dje yamada djariba di Dios mediante Cristo Jesus.” (Filipensenan 3:13, 14) Pablo a beneficiá dje bon nobo dor cu el a bandoná di buena gana loke tabata stroband’e di yega cerca Dios, i el a sigui di henter su curason tras di metanan cu tabata na armonia cu Dios su propósito.

Kico Abo Lo Haci?

Kisas bo a caba di tende e bon nobo dje Reino recientemente. E speransa di biba pa semper den un paradijs perfecto ta atraé bo? Lo mester ta asina, pasobra nos tur ta nace cu un deseo pa biba i disfrutá di biba na pas i den siguridad. Bijbel ta bisa cu Dios a pone “tempu indefiní” den nos curason. (Eclesiástes 3:11) Pues, ta normal pa nos spera riba un tempu ora hende por biba pa semper na pas i den felicidad. I esei ta loke e bon nobo dje Reino ta ofrecé.

Pero pa haci e speransa ei bira realidad, bo mester investigá i haña sa tocante kico e bon nobo ta. Apostel Pablo a spierta: “Proba pa boso mes loke ta e bon i aceptabel i perfecto boluntad di Dios.” (Romanonan 12:2) Pues, mescos cu Pablo, despues cu bo gana conocimentu i comprendimentu, bo tin cu scoge.

Di otro banda, kisas ya bo tin cierto creencianan tocante bo futuro. Corda cu Saulo tabatin su mes ideanan tocante e boluntad di Dios promé cu el a bira apostel Pablo. Pero na lugá di spera riba un revelacion milagroso di Dios, pakico bo no ta examiná e asuntu di un manera obhetivo? Puntra bo mes: ‘Di berdad mi sa kico Dios su boluntad ta pa humanidad i pa tera? Ki prueba mi por duna pa apoyá mi creencianan? E pruebanan cu mi duna tin valides si mi examiná nan den lus dje Palabra di Dios, Bijbel?’ Bo no tin nada di perde cu examiná bo creencianan religioso dje manera aki. De echo, lo bo mester kier hacié, pasobra Bijbel ta urgi nos: “Haci sigur di tur cos;  tene duru na loke ta excelente.” (1 Tesalonicensenan 5:21) Al fin i al cabo, no ta Dios su aprobacion ta loke realmente ta conta?—Juan 17:3; 1 Timoteo 2:3, 4.

Lidernan religioso por primintí nos un futuro eterno. Pero a ménos cu e promesa ei ta basá riba siñansanan bíblico, lo e no yuda nos haña e bendicionnan dje Reino di Dios. Den su famoso Sermon Riba Ceru, Jesus a duna e advertencia fuerte aki: “No ta tur hende cu ta bisa mi: ‘Señor, Señor,’ lo drenta e reino di shelu, sino esun cu ta haci e boluntad di mi Tata cu ta den shelu.”—Mateo 7:21.

Wak con Jesus a pone énfasis riba hacimentu dje boluntad di su Tata como e base pa ricibí bendicionnan dje Reino di Dios. Cu otro palabra, por tin cos cu parce religioso, pero cu no tin Dios su aprobacion. De echo, Jesus a sigui bisa: “Hopi lo bisa mi den e dia ei: ‘Señor, Señor, nos no a profetisá den bo nomber, i a expulsá demoñonan den bo nomber, i a ehecutá hopi obra poderoso den bo nomber?’ I sin embargo, e ora ei lo mi confesá na nan: Nunca mi a conocé boso! Bai for di mi, boso, hacidónan di maldad.” (Mateo 7:22, 23) Claramente, e cos principal ta pa nos haci sigur cu nos tin un comprendimentu exacto di loke e bon nobo dje Reino ta realmente, anto actua na armonia cuné.—Mateo 7:24, 25.

Tin Yudansa Disponibel

Pa mas cu 100 aña, Testigonan di Jehova a predicá e bon nobo dje Reino di Dios. Pa medio di literatura i cu boca, nan ta yuda hende rond mundu haña conocimentu exacto di loke e Reino ta, di e bendicionnan cu lo e trece, i di loke hende mester haci pa logra haña e bendicionnan ei.

Nos ta animá bo pa bo reaccioná n’e mensahe cu Testigonan di Jehova ta predicá. Dor di aceptá e bon nobo i actua di acuerdo cuné, bo por ricibí bendicionnan grandioso, no awor so, sino den futuro tambe, ora cu e Reino di Dios goberná henter e tera.—1 Timoteo 4:8.

Tuma accion awor, pasobra e bendicionnan dje Reino di Dios ta cerca!

[Plachinan na página 7]

Pa medio di literatura i cu boca, Testigonan di Jehova ta predicá e bon nobo dje Reino di Dios