E Bon Nobo dje Reino—Kico E Ta?

Aña pasá, 6.035.564 hende hóben i grandi den 235 pais rond mundu a dedicá 1.171.270.425 ora papiando cu otro hende tocante dje. Ademas di transmitié cu boca, nan a laga mas cu 700 miyon ehemplar di literatura den man di público pa anunci’é i splik’é. Ademas nan a distribuí miles di audiocaset i videocaset pa dun’é publicidad. Di kico nos ta papiando?

NOS ta papiando di e bon nobo dje Reino di Dios. Di berdad, nunca promé den historia di humanidad “e bon nobo aki dje reino” a ser predicá n’e escala cu nos ta mira awe.—Mateo 24:14.

Tur esnan cu ta haci e obra mundial aki di predicá i siña ta boluntario. Den bista di mundu, kisas nan no ta parce cualificá pa haci e trabou. Kico anto ta splica nan curashi i e éxito cu nan tin? E poder dje bon nobo di Reino ta un factor importante, pasobra e noticia, of “nobo” aki, ta tocante bendicionnan cu lo bini pa humanidad. Ta bendicionnan cu tur hende ta anhelá p’e—felicidad, libertad for di problema económico, bon gobiernu, pas i siguridad, i un cos mas cu mayoria hende no ta ni pensa ariba: bida eterno! Esaki ta bon nobo di berdad pa hende cu ta busca nificacion i propósito den bida. Sí, tur e bendicionnan aki i mas por ta di bo si bo reaccioná faborablemente n’e proclamacion dje bon nobo dje Reino.

Kico e Reino Ta?

Pero e Reino ei cu ta ser declará como bon nobo, kico e ta? Ta e Reino cu miyones di hende a siña pidi p’e den oracion cu e palabranan bon conocí aki: “Nos Tata cu ta den shelu, laga bo nomber sea santificá. Laga bo reino bini. Laga bo boluntad sosodé, mescos cu den shelu, tambe riba tera.”—Mateo 6:9, 10.

E ta e Reino cu Daniel e profeta hebreo a papia di dje mas cu 25 siglo pasá, ora el a skirbi: “E Dios di shelu lo establecé un reino cu nunca lo no ser reducí na ruina. I e reino mes lo no pasa na ningun otro pueblo. Lo e aplastá i pone un fin na tur e reinonan aki, i e mes lo permanecé te na tempu indefiní.”—Daniel 2:44.

Pues, e bon nobo ta tocante e Reino of gobiernu di Dios cu lo eliminá tur maldad, anto goberná henter tera na pas. Lo e haci e propósito original dje Creador pa humanidad i pa tera bira realidad.—Génesis 1:28.

 “E Reino di Shelu A Yega Cerca”

Casi 2.000 aña pasá e bon nobo dje Reino a ser declará públicamente pa promé bes dor di un homber dedicá cu a hala hopi atencion dor di su aparencia i su manera di actua. E homber ei tabata Juan Bautista, yu dje sacerdote hudiu Zacarías i su casá Elisabet. Juan tabata bisti un paña largu di lana di camel, cu un faha di cueru na su heup, mescos cu profeta Elías, kende a prefigur’é. Pero ta su mensahe a atraé atencion di hopi hende. El a proclamá: “Repentí, pasobra e reino di shelu a yega cerca.”—Mateo 3:1-6.

E oyentenan di Juan tabata hudiu, i nan a profesá di ta adoradónan dje Dios berdadero, Jehova. Como nacion, nan a ricibí e pacto di Ley via Moises rond di 1.500 aña promé. Ainda e tempel magnífico tabata riba pia na Jerusalem, caminda nan tabata ofrecé sacrificio manera e Ley a prescribí. E hudiunan tabata sigur cu nan adoracion tabata corecto den bista di Dios.

Pero ora e hendenan a scucha Juan, algun di nan a cuminsá realisá cu nan religion no tabata loke nan a kere cu e ta. Cultura i filosofia griego a infiltrá drenta den siñansanan religioso hudiu. E Ley cu nan a ricibí di Dios pa medio di Moises a ser contaminá i asta invalidá caba dor di creencianan i tradicionnan cu hende a bini cuné. (Mateo 15:6) Pa motibu dje guia robes cu nan a ricibí cerca nan lidernan religioso sin misericordia i di curason duru, mayoria di nan no tabata adorá Dios na un manera aceptabel mas. (Santiago 1:27) Nan mester a repentí di nan picánan contra Dios i contra e pacto di Ley.

E tempu ei hopi hudiu tabata spera p’e Mesías of Cristo primintí aparecé, i algun di nan tabata puntra nan mes tocante Juan: “Acaso e ta e Cristo?” Pero Juan a nenga di ta e Mesías, i en bes di esei el a dirigí nan na un otro hende, di ken el a bisa: “E feter di su sandalia mi no ta digno di los.” (Lucas 3:15, 16) Ora Juan a introducí su disipelnan na Jesus, el a bisa: “Mira, e Lamchi di Dios cu ta kita picá di mundu!”—Juan 1:29.

Esei di berdad tabata bon nobo, pasobra básicamente, loke Juan tabata hala atencion di tur hende na dje ta e caminda cu ta hiba na bida i felicidad: Jesus, esun cu “ta kita picá di mundu.” Como desendientenan di Adam cu Eva, tur hende ta nace bou dje gobiernu tiránico di picá i morto. Romanonan 5:19 ta splica: “Mescos cu dor di desobedencia di un solo hende [Adam] hopi a ser hací pecadó, di igual manera tambe dor di obedencia di un solo persona [Jesus] hopi lo ser hací hustu.” Manera un lamchi sacrificial, Jesus mester a ‘kita picá’ i trece un cambio den e situacion tristu di humanidad. Bijbel ta splica cu “e salario cu picá ta paga ta morto, pero e don cu Dios ta duna ta bida eterno mediante Cristo Jesus nos Señor.”—Romanonan 6:23.

 Como homber perfecto, i de echo e homber mas grandi cu a yega di biba, Jesus a cuminsá predicá e bon nobo. E relato di Bijbel na Marco 1:14 i 15 ta bisa nos: “Awor despues cu Juan tabata arestá, Jesus a drenta den Galilea, predicando e bon nobo di Dios i bisando: ‘E tempu señalá a cumpli, i e reino di Dios a yega cerca. Boso repentí i tene fe den e bon nobo.’”

Esnan cu a reaccioná faborablemente n’e mensahe di Jesus i a ehercé fe den e bon nobo a ricibí bendicionnan grandi. Juan 1:12 ta bisa: “Na cuantu cu sí a ricibié [Jesus], el a duna autoridad pa bira yunan di Dios, pasobra nan tabata eherciendo fe den su nomber.” Como yunan di Dios, nan tabata den posicion pa ricibí e recompensa di bida eterno.—1 Juan 2:25.

Pero e privilegio di ricibí bendicionnan di Reino no a keda limitá n’e hendenan den promé siglo. Manera nos a mencioná caba, e bon nobo dje Reino di Dios ta ser proclamá i siñá den henter e tera habitá awe. Pues, bendicionnan di Reino ta disponibel ainda. Kico bo mester haci pa ricibí e bendicionnan ei? E siguiente artículo lo splica esaki.