Informe di Proclamadónan di Reino

India—“Union Meimei di Variedad”

“UNION Meimei di Variedad” ta un lema popular cu nan ta usa pa describí e integracion nacional na India. No ta un tarea fácil pa alcansá unidad den un pais enorme cu un gran variedad di cultura, idioma, religion, orígen étnico, moda di bisti i tipo di cuminda. Sin embargo, tin un union asina na e oficina administrativo di Testigonan di Jehova na India, apesar dje echo cu e boluntarionan cu ta biba i traha einan ta bini di hopi estado i teritorio gubernamental, i ta papia un cantidad di diferente idioma.

• Cera conocí cu Rajrani, un mucha muher di Punjab, n’e parti mas nortwest di India. Tempu Rajrani tabata bai scol, un di su compañeronan di klas a cuminsá studia Bijbel cu Testigonan di Jehova. E mucha muher aki a purba lanta interes di Rajrani den Bijbel. Dor cu e mucha muher no tabata sa hopi ingles i E Toren di Vigilancia no tabata disponibel na punjabi ainda e tempu ei, el a pidi Rajrani yud’é traducí e contenido dje revista p’e tambe. Loke Rajrani a lesa den E Toren di Vigilancia a cuminsá tin un efecto asina profundo riba dje, cu maske su mayornan a opon’é, el a progresá te n’e punto di dedicá su bida na Jehova Dios. Awe e ta sirbi n’e Betel di India haciendo net e cos cu a habri su wowo p’e berdad. E ta traducí publicacionnan cristian na punjabi!

• Considerá Bijoe tambe. E ta bini di un otro parti di India, di Kerala, un estado den e parti zuidwest di India. Nan a expulsá Bijoe for di scol secundario dor cu el a tuma un posicion neutral den ceremonianan nacionalista. Despues di un caso largu den corte cu a culminá den un victoria importante pa adoracion puru, Bijoe a bai scol bek. * El a bai un scol avansá tambe, pero dor cu e ambiente inmoral cu a reina ei tabata molestiá su concenshi, el a kita for di scol durante e promé semester. Awor, despues di dies aña na Betel, e ta haña cu el a beneficiá mas como miembro di un famia di Betel variá pero uní, cu si el a sigui un educacion avansá.

• Tantu Norma como Lily tin mas cu 70 aña di edad, i tur dos ta biuda pa hopi aña. Tur dos a cumpli mas cu 40 aña den sirbishi di tempu completo. Lily tin 20 aña ta traha na e sucursal como traductor dje idioma tamil. Norma a bini Betel 13 aña pasá, despues cu el a perde su casá. Ademas di ta ehempel excelente como trahadó diligente i conciencial, nan ta un influencia unificador pa henter e famia di Betel. Nan gusta mashá pa invitá hende bin bishitá nan, i nan gusta e compania di miembronan mas hóben dje famia, i asina compartí e goso di nan hopi añanan di bida cristian. I e hóbennan di nan banda tambe ta invitá nan bini cerca nan den nan kamber pa asociá i duna un man ora nan mester di yudansa. Di berdad nan ta ehempelnan excelente!

E boluntarionan aki a vence e desunion cu ta causa pelea i falta di armonia na hopi caminda, i ta traha huntu felismente pa sirbi otronan como miembro dje famia uní di Betel na India.—Salmo 133:1.

[Nota]

[Rekonosementu pa Potrèt na página 8]

Background: Mountain High Maps® Copyright © 1997 Digital Wisdom, Inc.