Historia di Bida

Nos Tabata un Tim

SEGUN E RELATO DI MELBA BARRY

Dia 2 di juli 1999, ami cu mi casá tabata na un reunion grandi di Testigonan di Jehova, manera miles di otro biahanan durante nos 57 añanan di matrimonio. E diabierne ei Lloyd tabata dunando e último discurso n’e congreso di distrito na Hawai. Di ripiente el a sak den otro. Apesar di tur e esfuersonan pa rebib’é, el a muri. *

KI BALIOSO e rumannan cristian aki na Hawai tabata, nan tur a purba i a yuda mi trata cu e tragedia aki! Lloyd a influenciá bida di hopi di nan i tambe di hopi otro hende rond mundu.

Durante e casi dos añanan despues di su morto, mi a pensa riba e añanan precioso cu nos a pasa huntu. Hopi di nan nos a pasa den un asignacion di misionero den estranheria i tambe na e sede mundial di Testigonan di Jehova na Brooklyn, New York. Tambe mi a pensa bek riba mi bida promé na Sydney, Australia, i e desafionan cu ami cu Lloyd a enfrentá pa nos por a casa na principio di Segundo Guera Mundial. Pero promé, laga mi conta boso con mi a bira Testigo i con mi a conocé Lloyd aya na 1939.

Con Mi A Bira Testigo

James cu Henrietta Jones tabata mi mayornan amoroso i bondadoso. Mi tabatin 14 aña so ora mi a caba scol na 1932. E tempu ei mundu tabata meimei dje Gran Depresion. Mi a cuminsá traha pa yuda mi famia cu a incluí mi dos ruman muhernan mas chikitu. Denter di un par di aña mi tabatin un trabou  cu ta paga bon, cu vários mucha muher ta traha bou di mi.

Entretantu, na 1935, Mama a aceptá literatura bíblico for di un Testigo di Jehova, i no a dura mashá cu e tabata convencí cu el a haña e berdad. Nos, e otro miembronan di famia, a kere cu el a bira loco. Pero un dia, mi a mira un foyeto chikitu titulá Unda e Mortonan Ta? i e título a haci mi curioso. P’esei mi a lesa e foyeto den secreto. Esei tabata e punto crucial! Mesora mi a cuminsá bai huntu cu Mama n’e reunion den siman cu nan tabata yama Studio Modelo. E foyeto chikitu titulá Studio Modelo—cu tempu tabatin tres di nan—tabatin pregunta i contesta i tambe texto di Bijbel pa apoyá e contestanan.

Rond di e tempu ei na april 1938, Joseph F. Rutherford, un representante di e sede mundial di Testigonan di Jehova, a bishitá Sydney. Su discurso público tabata e promé cu mi a asistí na dje. Lo mester a ten’é den Sydney Town Hall, pero oponentenan a logra cu a cancelá e combenio cu nos tabatin pa usa e sitio. En bes di esei, e discurso a tuma lugá den Sydney Sports Ground, cu tabata un sitio hopi mas grandi. Pa motibu dje publicidad extra debí n’e oposicion, rond di 10.000 persona a asistí, un cantidad sorprendente teniendo na cuenta cu e tempu ei tabatin 1.300 Testigo so na Australia.

Djis despues, mi a participá den e ministerio di veld pa promé bes—i sin ningun entrenamentu. Ora nos grupo a yega n’e teritorio caminda nos mester a predicá, esun cu a hiba delantera a bisa mi: “E cas eibanda ta pa bo.” Mi tabata asina nervioso cu ora e señora a bini na porta, mi a puntr’é: “Bo por a bisa mi cuant’or tin, por fabor?” El a bai paden, wak ora, i a bin pafó i bisa mi. Esei tabata tur cos. Mi a bai bek den auto.

Pero mi no a entregá, i no a dura mashá cu mi tabata compartí e mensahe di Reino regularmente cu otro hende. (Mateo 24:14) Na mart 1939, mi a simbolisá mi dedicacion na Jehova dor di a bautisá den badkuip di nos bisiña Dorothy Hutchings, kende tabata biba den e cas despues di nos. Dor cu no tabatin ruman homber disponibel, djis despues di mi bautismo mi a haña responsabilidadnan di congregacion cu normalmente a ser asigná na hombernan cristian.

Generalmente nos a tene nos reunionnan den casnan privá, pero de bes en cuando nos tabata huur un sala pa tene discurso público. Un ruman homber hóben i atractivo di Betel, nos oficina di sucursal, a bin duna discurso na nos congregacion chikitu. Sin cu mi tabata sa, e tabatin un otro motibu pa bini, esta, pa haña sa mas tocante mi. Sí, asina mi a conocé Lloyd.

Mi A Topa Lloyd Su Famia

No a dura mashá cu mi a deseá di sirbi Jehova den e trabou di tempu completo. Sin embargo, ora mi a aplicá pa traha pionero (yena formulario pa haci e trabou di predicá di tempu completo), nan a puntra mi si mi tin gana di sirbi na Betel. Pues na september 1939, e luna cu Segundo Guera Mundial a cuminsá, mi a bira miembro dje famia di Betel na Strathfield, un suburbio di Sydney.

Na december 1939, mi a biaha bai Nueva Zelandia pa un congreso. Ya cu Lloyd tabata di Nueva Zelandia e tambe tabata bayendo einan. Nos a biaha riba e mésun barcu, i nos a siña conocé otro mihó. Lloyd a haci areglo pa mi topa cu su mama i tata i ruman muhernan n’e congreso na Wellington i despues na nan cas na Christchurch.

A Prohibí Nos Trabou

Diasabra dia 18 di januari 1941, autoridadnan gubernamental a bini oficina di sucursal den mas o ménos seis limosin pretu pa  confiscá e propiedad. Ya cu mi tabata traha na recepsi n’e entrada di Betel, mi tabata esun promé cu a mira nan. Un 18 ora promé nos a ser notificá dje prohibicion, p’esei casi tur literatura i fail a ser hibá for di sucursal. E siguiente siman nan a encarcelá cincu miembro dje famia di Betel, incluso Lloyd.

Mi tabata sa cu loke e rumannan den prizon tabatin mas mester di dje tabata cuminda spiritual. Pa animá Lloyd, mi a cuminsá skirbié “cartanan di amor.” Mi a cuminsá e carta den e estilo cu bo ta verwagt di un carta di amor, pero despues mi tabata copia artículonan completo di Toren di Vigilancia i firm’é como su dushi. Lloyd a haña su libertad despues di cuater luna i mei.

Nos A Casa i Sigui den Sirbishi

Na 1940, Lloyd su mama a bishitá Australia i Lloyd a bis’é cu nos ta pensa di casa. El a desconsehá Lloyd pasobra e fin dje sistema di cosnan a parce hopi cerca. (Mateo 24:3-14) El a bisa su amigunan tambe di su intencionnan, pero cada bes nan tabata conseh’é pa no casa. Finalmente un dia den februari 1942, den secreto, Lloyd a bai cu mi—huntu cu cuater Testigo cu a primintí di mantené secrecia—n’e oficina di registro civil i nos a casa. E tempu ei na Australia no tabatin percuracion pa Testigonan di Jehova casa hende.

Aunke nos no a ser permití pa sigui nos sirbishi di Betel como pareha casá, nan a puntra nos si nos kier a bai den e trabou di pionero special. Cu gustu nos a aceptá un asignacion den un pueblo den cunucu cu yama Wagga Wagga. Ainda nos trabou tabata prohibí i nos no tabatin yudansa financiero, pues di berdad nos a tira nos carga riba Jehova.—Salmo 55:22.

Nos tabata bai n’e pueblitonan riba un baiskel cu por a carga mas cu un persona, nos a topa algun hende masha amabel i nos tabatin combersacionnan largu cu nan. Hopi di nan no a aceptá un studio di Bijbel. Sin embargo, un comerciante a apreciá e trabou cu nos tabata haci asina tantu cu el a duna nos fruta i berdura tur siman. Despues cu nos a pasa seis  luna na Wagga Wagga, nos a haña invitacion pa bai Betel bek.

Na mei 1942, e famia di Betel a evacuá e oficina na Strathfield i a transferié den casnan privá. Despues di cada un par di siman nan tabata muda di un cas pa otro pa asina evitá cu ta detectá nan. Ora ami cu Lloyd a regresá Betel na augustus, nos a djoin nan na un dje sitionan aki. Nos asignacion tabata pa durante dia, traha den un dje imprentanan secreto cu a ser establecé. Finalmente na juni 1943, a kita e prohibicion riba nos trabou.

Preparacion pa Sirbishi den Estranheria

Na april 1947 nos a haña solicitud preliminar pa asistí n’e Scol Bíblico di Galad di Watchtower situá na South Lansing, New York, Merca. Miéntras tantu, nos a haña asignacion pa bishitá e congregacionnan na Australia pa fortalecé nan spiritualmente. Despues di un par di luna, nos a ricibí nos invitacion pa asistí n’e di 11 klas di Galad. Nos tabatin tres siman pa regla nos asuntunan i empaketá nos pertenencianan. Na december 1947, nos a bandoná famia i amigunan i a coge rumbo pa New York huntu cu 15 otro ruman di Australia cu a haña invitacion p’e mésun klas.

E par di lunanan cu nos a pasa n’e Scol di Galad a bula bai, i nos a ricibí un asignacion di misionero pa Hapon. Ya cu a tuma tempu pa nos papelnan pa bai Hapon bin cla, Lloyd a haña asignacion atrobe pa sirbi como superintendente biahero di Testigonan di Jehova. E congregacionnan na cua nos a ser asigná pa bishitá a extendé for dje ciudad di Los Angeles te n’e frontera di México. Dor cu nos no tabatin auto, tur siman Testigonan amoroso tabata transportá nos di un congregacion pa esun siguiente. E área cu e circuito grandi ei a cubri, ta consistí awe di tres distrito ingles i tres distrito spañó, i cada distrito ta consistí di mas o ménos 10 circuito!

Di ripiente tabata october 1949, i nos tabata riba caminda pa Hapon riba un barcu renobá cu ántes tabata transportá soldá. A apartá un banda dje barcu pa hende homber i e otro pa hende muher i mucha. Net un dia promé cu nos yega Yokohama, nos a haña nos cu un tifon. Evidentemente el a core cu e nubianan pasobra ora solo a sali e siguiente dia, esta dia 31 di october, nos por a mira ceru Fuji den su pleno gloria. Ki un tremendo bon biní na nos asignacion nobo!

Trahando Huntu cu Hende di Hapon

Ora nos a yega mas cerca di waf, nos a mira cientos di hende cabei pretu. ‘Esta un grupo di hende bochinchero!’ nos a pensa ora nos a tende e tremendo boroto. Tur hende tabatin klomp bistí i esaki tabata zona duru riba e wafnan di palu. Despues di a pasa un anochi na Yokohama, nos a coge trein bai nos asignacion di misionero na Kobe. Einan Don Haslett, un compañero di klas di Galad cu a yega Hapon un par di luna promé, a huur un cas di misionero. E tabata un cas grandi bunita di dos piso cu estilo di Nort América, completamente bashí!

Pa nos haña algu manera un matras pa drumi ariba, nos a corta yerba largu pafó di cas i a pon’é riba flur. Asina nos a cuminsá nos bida di misionero cu solamente loke nos tabatin den nos ekipahe. Nos a haña konfó cu nan tabata yama hibachi, pa percurá pa cayente i pa cushiná ariba. Un anochi, Lloyd a haña dos compañero misionero inconciente, nan tabata Percy cu Ilma Iszlaub. E por a yuda nan bini bij dor di habri bentana pa laga aire frescu i friu drenta. Mi tambe a yega di cai flou un biaha ora mi tabata cushiná riba carbon. A tuma un tiki tempu pa nos a custumbrá cu algun cos!

Siña e idioma tabata un prioridad i un luna largu nos a studia hapones 11 ora pa dia. Despues di esei, nos a cuminsá den e ministerio cu un of dos frase skirbí pa yuda nos cuminsá un combersacion. Riba mi promé dia mi a topa un señora encantador, Miyo Takagi cu a ricibí mi bondadosamente. Durante mi rebishitanan, nos a lucha cu yudansa di diccionarionan hapones-ingles te cu nos a cuminsá un  studio di Bijbel progresivo. Na 1999 ora mi a asistí na dedicacion dje facilidad di sucursal cu nan a expandé na Hapon, mi a mira Miyo atrobe i tambe un cantidad di otro ser kerí cu mi a studia cuné. Cincuenta aña a pasa, pero ainda nan ta proclamadó celoso dje Reino, haciendo loke nan por pa sirbi Jehova.

Na Kobe dia 1 di april 1950, mas o ménos 180 persona a asistí na nos celebracion dje Memorial dje morto di Cristo. Pa nos sorpresa, e siguiente mainta 35 persona a lanta bini pa participá den e ministerio di veld. Cada misionero a bai cu tres of cuater di e personanan nobo aki huntu cuné den sirbishi. E doñonan di cas no a papia cu mi—e stranhero cu tabata comprendé masha poco hapones—pero sí cu e haponesnan cu a asistí n’e Memorial i cu a compañá mi. Nan a combersá i combersá, pero mi no tabatin un idea di loke nan tabata papia. Mi ta contentu di por bisa cu algun di esnan nobo aki a progresá den conocimentu i a sigui den e trabou di predicá te awe.

Hopi Privilegio i Asignacion

Nos a sigui cu nos trabou di misionero na Kobe te na 1952, e aña cu nos a ser asigná na Tokio caminda a confia Lloyd cu superintendencia dje oficina di sucursal. Cu tempu, su asignacionnan di trabou a pone cu el a bai den henter Hapon i otro paisnan. Despues, durante un di su bishitanan na Tokio, Nathan H. Knorr di e sede mundial a bisa mi: “Por cierto, bo sa unda bo casá ta bai pa e siguiente biahe di zona? Australia i Nueva Zelandia.” El a agregá: “Bo tambe por bai, basta bo mes paga bo gastunan.” Esta emocionante! Al fin i al cabo, ya tabatin nuebe aña cu nos a bandoná nos pais.

Un avalancha di skirbimentu di carta a sigui. Mi mama a yuda mi cumpra mi pasashi. Ami cu Lloyd tabata ocupá cu nos asignacionnan, i nos no tabatin e moda pa bishitá nos famianan. Pues esaki tabata un contesta pa mi oracionnan. Manera bo por imaginá, Mama a keda masha contentu di mira mi. El a bisa: “Bo sa, mi ta bai spar pa bo bolbe bini denter di tres aña.” Nos a despedí cu esei na mente, pero lamentablemente, el a muri e siguiente luna di juli. Ki un rencuentro maraviyoso mi ta spera di tin cuné den e mundu nobo!

Te cu 1960 mi único asignacion tabata mi trabou di misionero, pero e aña ei mi a haña un carta cu ta splica: “Di awor en adelante, e areglo ta pa bo laba i strika paña pa e famia di Betel completo.” E tempu ei nos famia a consistí di rond di un dozijn di hende so, pues mi por a cumpli cu e trabou aki huntu cu mi asignacion di misionero.

Na 1962 a basha nos cas estilo hapones abou, i e siguiente aña a completá un cas di Betel nobo di seis piso n’e sitio. Mi a haña asignacion pa yuda e ruman hombernan betelita nobo i hóben mantené nan kamber na ordu i haci trabou di limpiesa. Ta e custumber na Hapon cu no ta siña mucha homber haci nada den cas. A pone énfasis riba educacion seglar i nan mama tabata haci tur cos pa nan. No a dura mashá cu nan a comprendé cu mi no ta nan mama. Cu tempu hopi di nan a progresá te cu nan a haña asignacionnan nobo i responsabel den e organisacion.

Riba un dia cayente den zomer un studiante di Bijbel a haña tour den nos facilidadnan, i el a mira mi ta frega baño. El a bisa: “Por fabor, bisa esun cu ta na cabes cu mi ta dispuesto pa paga un  criá p’e bin haci e trabou aki pa bo.” Mi a splik’é cu maske mi ta apreciá su idea bondadoso, mi ta mas cu dispuesto pa haci cualkier cos cu mi ser asigná den e organisacion di Jehova.

Rond dje tempu ei, ami cu Lloyd a ricibí invitacion pa asistí n’e di 39 klas di Galad! Ta ki un privilegio pa na 1964, na edad di 46 aña bolbe bai scol atrobe! E curso a sirbi foral pa yuda esnan cu ta sirbi den oficinanan di sucursal cumpli cu nan responsabilidadnan. Despues dje curso di dies luna, nos a ser asigná na Hapon bek. Pa e tempu ei tabatin mas cu 3.000 proclamadó di Reino den e pais ei.

E crecementu a bai cu asina un velocidad cu pa 1972 tabatin mas cu 14.000 Testigo, i a traha oficina di sucursal nobo di cincu piso na Numazu, zuid di Tokio. For di nos edificionan, nos tabatin un bista espectacular riba ceru Fuji. A cuminsá print mas cu un miyon revista pa luna n’e idioma hapones den e inmenso imprenta rotativo. Pero un cambio tabata spera nos.

Na final di 1974, Lloyd a ricibí un carta for dje sede mundial di Testigonan di Jehova na Brooklyn cu a invit’é pa sirbi como miembro dje Cuerpo Gobernante. Na principio mi a pensa: ‘Wel, esaki ta e fin. Ya cu Lloyd tin e speransa celestial i ami esun terenal, di tur manera nos lo tin cu separá tardi of trempan. Podisé Lloyd lo mester bai Brooklyn sin mi.’ Pero djis despues mi a cambia mi pensamentu i di buena gana mi a muda huntu cu Lloyd na mart 1975.

Bendicion n’e Sede Mundial

Aunke Lloyd tabata na Brooklyn, su curason tabata hopi pegá n’e veld hapones, i semper e tabata papia dje experencianan cu nos tabatin einan. Pero awor tabatin oportunidad pa expandé. P’e último 24 añanan di su bida, Sociedad a usa Lloyd masha hopi mes den e trabou di zona, loke a encerá biaha rond mundu. Hopi bes mi a compañ’é rond mundu.

Bishitando nos rumannan cristian den otro paisnan a yuda mi comprendé bou di ki condicionnan hopi di nan ta biba i traha. Nunca mas mi ta lubidá cara di Entellia, un mucha muher di dies aña cu mi a topa na Nort África. El a stima Dios su nomber i a cana un ora i mei ida i buelta pa bai reunionnan cristian. Apesar di persecucion severo di su famia, Entellia a dedicá su mes na Jehova. Ora nos a bishitá su congregacion, tabatin solamente un pera di lus di watt abou cologá riba notanan dje orador—di otro manera e sala di reunion tabata pretu-pretu. Den tur e scuridad ei, tabata asombroso pa tende e cantamentu bunita dje rumannan.

Un suceso sobresaliente den nos bida a tuma lugá na december 1998 ora ami cu Lloyd tabata entre e delegacion cu a bai e Congresonan di Distrito “Dios Su Caminda di Bida” na Cuba. Esta impresioná nos a keda dor dje gratitud i goso cu e rumannan einan a expresá, pasobra algun persona dje sede mundial for di Brooklyn a bishitá nan! Mi tin masha hopi recuerdo bunita di rumannan stimá cu mi a topa, kendenan celosamente ta expresá gritu fuerte di alabansa na Jehova.

Na Cas Huntu cu e Pueblo di Dios

Aunke mi pais natal ta Australia, unda cu e organisacion di Jehova a manda mi, mi a stima e hendenan. Esei tabata e caso na Hapon, i awor cu mi tin mas cu 25 aña na Merca, mi ta sinti mescos aki nan. Ora mi a perde mi casá, mi a pensa di no regresá Australia, sino di keda Betel na Brooklyn caminda Jehova a asigná mi.

Awor mi ta den mi 80 i picu aña. Despues di 61 aña di ministerio di tempu completo, ainda mi ta dispuesto pa sirbi Jehova caminda e ta haña ta bon. Di berdad el a percurá pa mi. Cu aprecio mi ta corda e mas cu 57 añanan durante cua mi tabatin e oportunidad di compartí mi bida cu un kerido compañero cu a stima Jehova. Mi tin confiansa cu Jehova lo sigui bendicioná nos, i mi sa cu E lo no lubidá nos trabou i amor cu nos a mustra pa su nomber.—Hebreonan 6:10.

[Nota]

[Plachi na página 25]

Huntu cu Mama na 1956

[Plachi na página 26]

Huntu cu Lloyd i un grupo di publicadó hapones na principio di añanan 1950

[Plachinan na página 26]

Huntu cu mi promé studiante di Bijbel na Hapon, Miyo Takagi, na principio di añanan 1950 i na 1999

[Plachi na página 28]

Huntu cu Lloyd den e trabou di revista na Hapon