Obedencia—Un Les Importante di Infancia?

“MAYORNAN Kier Yu cu Caracter Individual, i No Yu Cu Ta Simplemente Obedecé.” Asina titular di un korant a bisa. E parti chikitu aki dje artículo tabata basá riba un encuesta hací na Nueva Zelandia cu a revelá cu solamente “22 di cada 100 di e personanan cu a reaccioná a haña cu mester siña yu obedencia na cas.” Tambe e encuesta a saca afó cu awendia mayornan ta kere cu ta hopi mas importante pa siña mucha asuntunan manera bon manera, independencia i responsabilidad.

Den e era aki di individualismo i interes propio, no ta un sorpresa cu mayoria hende ta sképtico en cuanto obedencia i pa siñ’é na nan yunan. Pero por considerá siñamentu di obedencia desde hubentud djis como algu anticuá i ouderwets? Of e ta entre e lesnan importante cu muchanan por siña i beneficiá for di dje? Mas importante ainda, con Jehova Dios, e Originador dje areglo di famia, ta mira obedencia na mayornan, i kico ta algun beneficio cu ta resultá for di tal obedencia?—Echonan 17:28; Efesionan 3:14, 15.

“Esaki Ta Hustu”

Apostel Pablo a skirbi n’e cristiannan di promé siglo den e congregacion di Efeso: “Yunan, sea obediente na boso mayornan den union cu Señor, pasobra esaki ta hustu.” (Efesionan 6:1) Pues, e motibu principal pa tal obedencia ta, cu e ta na armonia cu normanan divino di loke ta corecto. Manera Pablo a mustra, “esaki ta hustu.”

Na armonia cu esaki, nos ta ripará cu e Palabra di Dios ta describí disiplina duná cu amor di parti di mayornan como un adorno, “un krans atractivo pa bo cabes i un bunita coyar pa bo garganta,” i como algu “masha agradabel den Señor.” (Proverbionan 1:8, 9; Colosensenan 3:20) Na contraste directo, desobedencia na mayornan ta causa desaprobacion di Dios.—Romanonan 1:30, 32.

“Pa Bai Bo Bon”

Pablo a señalá na un otro bentaha di obedencia ora el a skirbi: “‘Onra bo tata i bo mama’; cu ta e promé mandamentu cu un promesa: ‘Pa bai bo bon i pa bo dura un tempu largu riba tera.’” (Efesionan 6:2, 3; Éxodo 20:12) Den ki maneranan obedencia na mayornan lo por resultá den bienestar di un persona?

Pa cuminsá, no ta cierto cu mayornan tin bentaha debí na nan edad i experencia? Aunke kisas ta parce cu nan no sa mashá tocante computer i otro cosnan cu scol ta siña, nan sa hopi di bida i con pa trata cu problemanan di bida. Di otro banda, hóbennan ta falta un manera di pensa ekilibrá cu ta bini dor di madures. P’esei, nan tin tendencia di tuma decision lihé, hopi bes ta entregá na preshon di pareu perhudicial, i esaki hopi biaha ta perhudicá nan. Den un manera realístico Bijbel ta bisa: “Bobedad ta mará na curason di mucha homber.” Kico ta e solucion? “E bara di disiplina ta loke lo aleh’é for di dje.”—Proverbionan 22:15.

 E beneficionan di obedencia ta bai hopi mas ayá cu e relacion entre mayor i yu. Pa sociedad humano por funcioná suavemente i den un manera productivo, mester tin cooperacion, cu na su turno ta rekerí un midí di obedencia. Por ehempel, den un matrimonio, loke ta hiba na pas, armonia i felicidad ta e cualidad di ta cla pa entregá, en bes di ta exigente i insensitivo pa cu derecho i sintimentunan di otronan. Na trabou, sumision na doño di trabou ta un rekisito pa tur negoshi of proyecto por logra éxito. Relacioná cu ley i reglanan di gobiernu, obedencia no solamente ta libra nos di castigu pero tambe e ta duna nos por lo ménos un midí di siguridad i proteccion.—Romanonan 13:1-7; Efesionan 5:21-25; 6:5-8.

Hóbennan cu ta desobedecé autoridad, hopi bes ta bira rebeldenan den comunidad. Na contraste, e recompensanan dje les di obedencia siñá durante infancia por extendé durante henter un persona su bida. Ta ki beneficioso pa siña mucha esaki durante infancia!

E Gran Recompensa di Obedencia

Obedencia no solamente ta hiba na relacionnan di famia felis i otro beneficionan cu ta dura henter bo bida, pero tambe e ta percurá pa e fundeshi riba cua por edificá e relacion di mas importante cu tur: esun entre un persona i su Creador. Como e “Magnífico Creador” cu ken “e fuente di bida” ta, Jehova Dios corectamente ta merecé pa nos ta completamente obediente na dje.—Eclesiástes 12:1; Salmo 36:9.

E palabra “obedecé” den su vários formanan ta aparecé mas cu 160 bes den Bijbel. Huntu cu esei, tin cientos di referencia na Dios su ley, ordu, mandamentu, decisionnan hudicial, i reglamentunan, i esakinan tur ta rekerí sumision. Ta obvio cu Dios ta considerá obedencia como un rekisito pa disfrutá di su aprobacion. Sí, obedencia ta un ingrediente indispensabel pa edificá un relacion cu Jehova. (1 Samuel 15:22) Lamentablemente, e tendencia natural di hende no ta pa obedecé, sino pa desobedecé. Bijbel ta bisa cu “e inclinacion di curason di hende ta malu for di su hubentud.” (Génesis 8:21) P’esei, un persona mester siña e les di obedencia no solamente durante infancia sino durante henter su bida. Haciendo esei ta trece gran recompensa.

Corda cu, manera Pablo a mustra, e mandamentu pa ta obediente na mayornan ta conectá cu dòbel promesa, esta, “pa bai bo bon i pa bo dura un tempu largu riba tera.” Proverbionan 3:1, 2 ta duna un confirmacion dje promesa aki: “Mi yu, no lubidá mi ley, i laga bo curason warda mi mandamentunan, pasobra largura di dianan i añanan di bida i pas lo ser agregá na bo.” E gran recompensa pa esnan cu obedecé, ta un relacion personal cu Jehova awor i bida eterno den un mundu nobo yen di pas.—Revelacion 21:3, 4.

[Plachinan na página 30, 31]

Obedencia ta hiba na relacionnan felis den famia, na trabou i cu Jehova