Con pa Trata cu Sintimentunan Negativo

● Asaf a keha: “Siguramente ta en bano cu mi a limpia mi curason i cu mi a laba mi mannan den inocencia mes. I mi a yega di ta plagá henter dia, i mi coreccion ta tur mainta.”—Salmo 73:13, 14.

● Baruc a suspirá: “Ai di mi, awor, pasobra Jehova a agregá pena na mi dolor! Mi a keda completamente cansá pa causa di mi suspiro, i mi no a haña lugá di descanso.”—Jeremías 45:3.

● Noemí a lamentá: “E Todopoderoso a haci e situacion hopi amargo pa mi. Mi tabata yen ora mi a bai, i ta cu man bashí Jehova a haci mi bolbe. Pakico boso mester yama mi Noemí, ora ta Jehova ta esun cu a humiyá mi i e Todopoderoso ta esun cu a causa mi calamidad?”—Rut 1:20, 21.

BIJBEL ta contené un gran cantidad di ehempel di fiel adoradónan di Jehova cu de bes en cuando a ser aplastá dor sintimentunan di desanimacion. Echo ta cu como hende imperfecto, tempu-tempu nos tur ta experenciá tal sintimentunan. Algun di nos por ta mas incliná na sinti desanimacion—kisas asta cu un grado di duele di nos mes—cu otronan, debí na experencianan trágico.

Sin embargo si nos no controlá e sintimentunan ei, nan por ruiná nos relacion cu otro hende i cu Jehova Dios. Un muher cristian cu ta lihé pa sinti duele di su mes, ta admití: “Mi sa keda sin aceptá vários invitacion pa actividadnan social pasobra mi ta sinti cu mi no ta bon asociacion pa esnan den congregacion.” Ki un efecto devastador e sintimentunan ei por tin riba bida di un persona! Kico bo por haci pa contrarestá nan?

Hala Cerca Jehova

Na Salmo 73, Asaf a skirbi abiertamente tocante su confusion. Ora el a compará su mes situacion cu e bida próspero dje malbadonan, el a cuminsá envidiá nan. El a ripará cu e malbadonan tabata orguyoso i violento, i a parce cu nan no tabata haña castigu. E ora ei, Asaf a expresá su dudanan en cuanto si tin balor p’e sigui tras di un curso di bida recto.—Salmo 73:3-9, 13, 14.

Mescos cu Asaf, abo a yega di ripará e supuesto éxito dje malbadonan, kendenan ta broma cu nan malecho? Con Asaf a vence su sintimentunan negativo? El a sigui bisa: “Mi a sigui considerá pa sa esaki; tabata un cos trabahoso den mi bista, te ora mi a pasa na drenta den e santuario magnífico di Dios. Mi kier a dicerní nan futuro.” (Salmo 73:16, 17) Asaf a dal pasonan positivo dor di acudí na Jehova den oracion. Pa usa e palabranan cu apostel Pablo a usa despues, Asaf a dominá e “hende físico” dor di spierta e “hende spiritual” den su mes persona. Cu vision spiritual renobá, el a comprendé cu Jehova a odia maldad i cu n’e debido tempu e malbadonan lo a haña nan castigu.—1 Corintionan 2:14, 15.

Ta ki vital anto pa bo permití Bijbel yuda bo enfocá riba e realidad di bida! Jehova ta  recordá nos cu e no ta ciegu pa loke hende malbado ta haci. Bijbel ta siña: “No sea gañá: hende no por tene mofa di Dios. Pasobra kico cu un hende sembra, esaki lo e cosechá tambe . . . Pues, laga nos no entregá di haci loke ta excelente.” (Galationan 6:7-9) Jehova lo pone e malbado “riba suela cu ta slip”; lo e pone nan “cai den ruina.” (Salmo 73:18) Finalmente, husticia divino semper lo prevalecé.

Un programa constant di alimentá bo mes den sentido spiritual n’e mesa di Jehova i asociacion saludabel cu e pueblo di Dios lo yuda bo fortalecé bo fe i vence desanimacion of otro sintimentunan negativo. (Hebreonan 10:25) Mescos cu Asaf, dor di keda den un relacion estrecho cu Dios, bo por experenciá su apoyo amoroso. Asaf ta sigui: “Mi ta constantemente cu bo; bo a gara mi man drechi. Cu bo conseho lo bo guia mi, i despues lo bo hiba mi asta na gloria.” (Salmo 73:23, 24) Un cristian cu a ser abusá na mucha, a siña e sabiduria dje palabranan aki. “Asociacion estrecho cu e congregacion,” e ta bisa, “a mustra mi un otro ángulo di bida. Mi a ripará bon cla cu ancianonan cristian ta hende amoroso, cu nan no ta polis sino wardadó.” Sí, ancianonan cristian compasivo ta hunga un papel vital den eliminá emocionnan perhudicial.—Isaías 32:1, 2; 1 Tesalonicensenan 2:7, 8.

Aceptá Jehova Su Conseho

Baruc, secretario di profeta Jeremías, a suspirá debí n’e stres emocional cu su asignacion a trece cuné. Pero bondadosamente Jehova a enfocá Baruc su atencion riba e realidad. “‘En cuanto abo, bo ta sigui busca cosnan grandi pa bo mes. No sigui busca. Pasobra, ata, mi ta bai trece un calamidad riba tur carni,’ ta e expresion di Jehova, ‘i lo mi duna bo bo alma como botin na tur e lugánan cu bo bai.’”—Jeremías 45:2-5.

Cu palabranan franco Jehova a splica cu e fuente di Baruc su frustracion tabata su propio metanan egoista. Baruc no por a haña goso den e asignacion cu Dios a dun’é miéntras cu na mésun tempu e tabata busca cosnan grandi pa su mes. Bo tambe lo por ripará cu un paso realmente positivo den direccion di vence desanimacion ta di evitá distraicion i aceptá e pas mental cu ta bini di contentamentu divino.—Filipensenan 4:6, 7.

E biuda Noemí no a permití duele pon’é para ketu na Moab ora cu su casá i dos yu hombernan a muri. Tog, tin indicacion cu pa algun tempu e tabata sintié amargá debí na su mes situacion i esun di su dos suegranan. Mandando nan bai, Noemí a bisa: “Ta hopi amargo pa mi, pa causa di boso, cu e man di  Jehova a sali contra mi.” Ora nan a yega Betlehem, el a insistí atrobe: “No yama mi Noemí [“Mi Agradabilidad”]. Yama mi Mara [“Amargá”], pasobra e Todopoderoso a haci e situacion hopi amargo pa mi.”—Rut 1:13, 20.

Sin embargo, Noemí no a isolá su mes den tent di esnan na luto, leu for di Jehova i su pueblo. Na Moab el a tende cu “Jehova a dirigí su atencion na su pueblo dor di duna nan pan.” (Rut 1:6) Noemí a comprendé cu e mihó lugá p’e, ta huntu cu e pueblo di Jehova. Despues, huntu cu su suegra Rut, Noemí a bolbe Huda i ábilmente el a guia Rut den e manera cu e mester a comport’é cu nan pariente i su recompradó, Boaz.

Mescos awe tambe, rumannan leal cu nan casá a muri tin éxito den trata cu problemanan emocional dor di keda ocupá den e congregacion cristian. Mescos cu Noemí, nan ta sigui dedicá nan mes na asuntunan spiritual, i na lesa e Palabra di Dios tur dia.

Beneficionan di Aplicá Sabiduria Divino

E relatonan bíblico aki ta duna un comprendimentu mas profundo den maneranan cu un persona por enfrentá e efectonan di sintimentunan negativo cu éxito. Asaf a busca yudansa den e santuario di Jehova i cu pacenshi el a warda riba Jehova. Baruc a sigui conseho i a evitá distraicion materialista. Noemí a keda activo entre e pueblo di Jehova, preparando e muher hóben Rut pa cumpli cu su privilegionan den adoracion dje Dios berdadero.—1 Corintionan 4:7; Galationan 5:26; 6:4.

Bo por vence desanimacion i otro sintimentunan negativo dor di meditá riba victorianan divino cu Jehova a duna su pueblo tantu individualmente como colectivamente. Cu e fin ei, meditá riba Jehova su acto supremo di amor ora el a percurá e rescate pa bo. Mustra aprecio pa e amor genuino dje hermandad cristian. Enfocá bo bida riba Dios su sistema nobo cu ta hopi cerca. I mare bo por reaccioná manera Asaf: “En cuanto ami, hala cerca Dios ta bon pa mi. Den e Señor Soberano Jehova mi a pone mi refugio, pa declará tur bo obranan.”—Salmo 73:28.