E Tatanan di Iglesia—Defensornan di Berdad Bíblico?

Sea cu bo ta profesá di ta un cristian of no, por ta masha bon cu loke bo ta pensa di e Dios di Bijbel, di Jesus i di cristianismo, a ser influenciá dor di nan. Un di nan a ser yamá Boca di Oro; un otro, e Grandi. Como grupo, hende a describí nan como “e personificacion supremo dje bida di Cristo.” Ken nan ta? E Tatanan di Iglesia; e antiguo pensadó, escritor, teólogo i filósofonan religioso cu a influenciá gran parti dje forma di pensa “cristian” djawe.

SEGUN Demetrios J. Constantelos, profesor griego ortodox di estudionan religioso: “Bijbel no ta completamente e palabra di Dios. E páginanan di un buki no por contené e Spiritu Santu cu ta revelá e palabra di Dios.” Kico por tabata un otro posibel fuente confiabel di revelacion divino? Den su buki Understanding the Greek Orthodox Church (Comprendiendo e Iglesia Griego Ortodox), Constantelos ta declará: “Tradicion Santu i Scritura Santu [ta ser] considerá como dos banda di e mésun moneda.”

E base di “Tradicion Santu” ta encerá siñansa i obranan skirbí dje Tatanan di Iglesia. Nan tabata teólogonan prominente i filósofonan “cristian” cu a biba entre siglo 2 i 5 E.C. Cuantu influencia nan tabatin riba e forma di pensa “cristian” di actualidad? Den nan siñansa, nan a pega na loke Bijbel ta bisa? Kico mester ta e base sólido di berdad cristian pa un siguidó di Jesucristo?

Antecedente Histórico

Meimei di siglo 2 E.C., esnan cu a profesá di ta cristian tabata defendé nan fe contra persiguidónan romano i tambe contra esnan cu a bandoná nan creencianan. Sin embargo, esaki tabata un era cu demasiado opinion teológico. Debatenan religioso relacioná cu e “divinidad” di Jesus i e naturalesa i obranan di spiritu santu, no a causa division intelectual so. Desacuerdonan serio i divisionnan ireparabel tocante doctrina “cristian” a plama bai te den e esfera político i cultural. Tabatin bes cu esaki a causa disturbio, rebelion, conflicto civil i asta guera. Historiadó Paul Johnson ta skirbi: “Cristianismo [apóstata] a cuminsá cu confusion, controversia i division i a sigui asina. . . . Den promé i di dos siglo A.D, e parti central i oost di Mediteráneo a abundá cu un cantidad incontabel di ideanan religioso cu tabata lucha pa plama nan mes. . . . Pues anto, desde comienso tabatin  un variedad di cristianismo cu tabatin poco cos en comun.”

Durante e era ei, escritor i pensadónan cu a haña cu ta imperativo pa interpretá siñansanan “cristian” den términonan filosófico, a cuminsá florecé. Pa satisfacé paganonan educá cu a caba di combertí na “cristianismo,” e escritornan religioso ei a dependé mashá riba literatura griego i hebreo di mas promé. Cuminsando cu Justino Mártir (rond di 100 pa 165 E.C.), kende a skirbi na griego, hende cu a profesá di ta cristian a bira mas i mas sofisticá den adoptá e herencia filosófico di cultura griego.

E tendencia aki a producí fruta notabel den e obranan skirbí di Origen (rond di 185 pa 254 E.C.), un autor griego di Alehandria. Origen su obra Tocante Principionan Básico tabata e promé esfuerso sistemático pa splica e doctrinanan principal di teologia “cristian”den términonan di filosofia griego. E Concilio di Nicea (325 E.C.), cu su intento pa splica i establecé e “divinidad” di Cristo, tabata e suceso importante cu a duna empuhe nobo na interpretacion di credo “cristian.” E concilio a marca e principio di un era durante cua consehonan di iglesia en general a haci esfuerso pa definí doctrina den un manera mas exacto cu nunca.

Escritor i Oradornan

Eusebio di Cesarea, kende a skirbi n’e tempu dje promé Concilio di Nicea, a uni su mes cu emperador Constantino. Djis algu mas cu 100 aña despues di Nicea, teólogonan, di cua mayoria a skirbi na griego, den un debate largu i skerpi a formulá loke a bira e doctrina cu ta distinguí cristiandad, esta, esun di Trinidad. E cabesantenan tabata e obispu masha sigur di su mes di Alehandria, Atanasio, i tres lider di iglesia for di Capadocia, Asia Menor: Basilio e Grandi, su ruman homber Gregorio di Nisa i nan amigu Gregorio di Nacianzo.

Escritor i predicadónan durante e era ei por a expresá nan mes masha bon mes. Gregorio di Nacianzo i Juan Crisóstomo (cu ta nificá “Boca di Oro”) papiando na griego i tambe Ambrosio di Milan i Agustin di Hippo papiando na latin, tabata oradornan sumamente ábil, maestronan dje arte mas respetá i popular di nan tempu. Agustin tabata e escritor di mas influencia durante e periodo ei. Su artículonan teológico tabatin influencia profundo riba e forma di pensa “cristian” djawe. Jerónimo, e homber educá mas distinguí dje periodo ei, tabata esun principalmente responsabel p’e traduccion di Bijbel Vulgata na latin for dje idiomanan original.

Sin embargo, e preguntanan importante ta: E Tatanan di Iglesia aki a pega estrechamente na Bijbel? Den nan siñansa, nan a pega n’e Scritura inspirá? Nan obranan skirbí ta un guia safe cu ta hiba na un conocimentu exacto di Dios?

Siñansa di Dios of Siñansa di Hende?

Recientemente, e funcionario griego ortodox Metodio di Pisidia a skirbi e buki The Hellenic Pedestal of Christianity (E Pedestal Helenístico di Cristianismo) pa mustra cu cultura i filosofia griego a percurá p’e infrastructura  di e forma di pensa “cristian” di actualidad. Sin vacilá e ta admití den e buki ei: “Casi tur e prominente Tatanan di Iglesia a considerá e elementonan griego masha útil, i nan a fia nan for di griego clásico di antigwedad, i a usa nan como un medio pa comprendé i expresá berdadnan cristian corectamente.”

Tuma por ehempel, e idea di cu e Tata, e Yu i e spiritu santu ta forma un Trinidad. Despues di e Concilio di Nicea hopi Tata di Iglesia a bira trinitarionan ferviente. Loke nan a skirbi i splica tabata crucial den haci Trinidad un doctrina principal di cristiandad. Sin embargo, Bijbel ta mencioná Trinidad? No. Di unda anto, e Tatanan di Iglesia a sali cuné? Segun A Dictionary of Religious Knowledge, hopi hende ta bisa cu Trinidad “ta un corupcion fiá for di religionnan pagano, i di ènter den e fe cristian.” I The Paganism in Our Christianity (Paganismo den Nos Cristianismo), ta afirmá: “E orígen di [Trinidad] ta henteramente pagano.” *—Juan 3:16; 14:28.

Of considerá e siñansa di inmortalidad di alma, un creencia cu un parti di hende ta sigui biba despues cu e curpa muri. Atrobe, e Tatanan di Iglesia a hunga un papel importante den introducí e creencia aki na un religion cu no tabatin e siñansa tocante un alma cu ta sobrebibí despues di morto. Bijbel ta mustra bon cla cu alma por muri: “E alma cu ta peca—e mes lo muri.” (Ezekiel 18:4) Kico tabata e base pa e Tatanan di Iglesia kere den un alma inmortal? Segun New Catholic Encyclopedia: “E concepto cristian di cu Dios a crea un alma spiritual i a hink’é den e curpa na momento di concepcion pa haci hende un ser bibu completo, ta fruta di un desaroyo  largu den filosofia cristian. Ta te na tempu di Origen den Oriente i San Agustin den Occidente, a establecé e creencia cu alma ta un substancia spiritual i a forma un concepto filosófico tocante su naturalesa. . . . [E doctrina di Agustin] . . . a debe hopi (incluso algun defecto) na neoplatonismo.” I e revista Presbyterian Life ta bisa: “Inmortalidad di alma ta un concepto griego cu a ser formá den cultonan antiguo di misterio i elaborá dor dje filósofo Plato.” *

E Base Sólido di Berdad Cristian

Asta despues di e examinacion breve aki dje antecedente histórico di e Tatanan di Iglesia, i tambe dje orígen di nan siñansanan, ta apropiado pa puntra: Un cristian sincero mester basa su creencianan riba siñansanan dje Tatanan di Iglesia? Laga Bijbel contestá.

Pa di promé, Jesucristo mes a descartá e uso di e título religioso “Tata” ora el a bisa: “No yama ningun hende boso tata riba tera, pasobra un so ta boso Tata, Esun celestial.” (Mateo 23:9) E uso dje palabra “Tata” pa referí na un figura religioso, no ta cristian ni bíblico. Rond di aña 98 E.C., e Palabra di Dios skirbí a ser completá cu e skirbimentu di apostel Juan. P’esei, cristiannan berdadero no tin cu acudí na ningun hende como e fuente di revelacion inspirá. Nan ta tene cuidou pa no “haci e palabra di Dios inválido” pa causa di tradicion di hende. Permití tradicion di hende tuma e lugá di e Palabra di Dios ta spiritualmente mortal. Jesus a spierta: “Si un ciegu ta guia un ciegu, tur dos lo cai den un buracu.”—Mateo 15:6, 14.

Un cristian tin mester di cualkier revelacion fuera dje palabra di Dios cu Bijbel ta contené? No. E buki di Revelacion ta spierta pa no agregá nada n’e registro inspirá: “Si un hende agregá algu n’e cosnan aki, Dios lo agregá na dje e plaganan cu ta skirbí den e rol aki.”—Revelacion 22:18.

Dios su Palabra skirbí, Bijbel, ta incorporá e berdad cristian. (Juan 17:17; 2 Timoteo 3:16; 2 Juan 1-4) E comprendimentu corecto no ta dependé di filosofia seglar. Relacioná cu hendenan cu a purba usa sabiduria humano pa splica revelacion divino, ta na su lugá pa ripití e preguntanan di apostel Pablo: “Unda e homber sabí ta? Unda e escriba ta? Unda e discutidó di e sistema di cosnan aki ta? Dios no a haci e sabiduria di mundu bobedad?”—1 Corintionan 1:20.

Ademas, e berdadero congregacion cristian ta “un pilar i apoyo dje berdad.” (1 Timoteo 3:15) Su superintendentenan ta protehá e puresa di nan siñansa den e congregacion, i asina ta prevení cu cualkier doctrina falsu ta sluip drenta. (2 Timoteo 2:15-18, 25) Nan ta tene e congregacion liber di ‘profetanan falsu, maestronan falsu i sectanan destructivo.’ (2 Pedro 2:1) Despues di morto dje apostelnan, e Tatanan di Iglesia a permití “expresionnan inspirá engañoso i siñansanan di demoño” saca rais den e congregacion cristian.—1 Timoteo 4:1.

E consecuencianan dje apostasia aki ta bisto den cristiandad awe. Su creencia i prácticanan ta leu for dje berdad di Bijbel.

[Nota]

 [Kuadro/Plachi na página 18]

TATANAN DI CAPADOCIA

“Iglesia Ortodox . . . tin un respet profundo notabel pa escritornan di siglo 4, i foral pa esnan cu e ta yama ‘e tres Gran Herarcanan,’ Gregorio di Nacianzo, Basilio e Grandi i Juan Crisóstomo,” segun e escritor Kallistos, kende ta un mónik. E Tatanan di Iglesia aki a basa nan siñansanan riba e Scritura inspirá? Relacioná cu Basilio e Grandi, e buki The Fathers of the Greek Church (E Tatanan di Iglesia Griego), ta bisa: “Loke el a skirbi ta mustra cu henter su bida el a mantené coneccion estrecho cu Plato, Homero i cu e historiadó i maestronan dje arte di skirbi i papia, i cu nan a influenciá su estilo. . . . Basilio a keda un ‘griego.’” Esei tabata e caso tambe cu Gregorio di Nacianzo. “Den su opinion, e mihó manera pa Iglesia mustra su victoria i superioridad lo tabata mediante e adopcion completo di tradicionnan di cultura clásico.”

Relacioná cu nan tur tres, profesor Panagiotis K. Christou ta skirbi: “Aunke de bes en cuando nan ta spierta contra ‘filosofia i engaño bano’ [Colosensenan 2:8]—pa ta na armonia cu e mandamentu den e Testament Nobo—na mésun tempu, ansiosamente nan ta studia filosofia i e disiplinanan relevante i ta asta recomendá otronan pa studia nan.” Ta obvio cu e maestronan ei di iglesia a pensa cu Bijbel no tabata suficiente pa apoyá nan ideanan. E echo cu nan a busca otro pilar di autoridad no a nificá cu nan siñansanan tabata diferente for di Bijbel? Apostel Pablo a spierta cristiannan hebreo: “No laga vários siñansa straño hiba boso.”—Hebreonan 13:9.

[Rekonosementu]

© Archivo Iconografico, S.A./CORBIS

[Kuadro/Plachi na página 20]

CIRILIO DI ALEHANDRIA—UN TATA DI IGLESIA CONTROVERSIAL

Un dje figuranan mas controversial entre e Tatanan di Iglesia ta Cirilio di Alehandria (rond di 375 pa 444 E.C.). Historiadó di iglesia Hans von Campenhausen, ta describié como un persona “dogmático, violento i astuto, dominá p’e grandesa di su vocacion i e dignidad di su funcion,” i Campenhausen ta agregá: “Nunca nada no ta bon pa Cirilio a ménos cu e cos ei ta útil pa e mehorá su poder i autoridad . . . Nunca e manera brutal i sin escrúpulo cu e tabata actua no a molesti’é.” Miéntras e tabata obispu di Alehandria, Cirilio a usa soborno, difamacion i calumnia pa tumba e obispu di Constantinopla. E ta ser considerá responsabel p’e asesinato cruel na aña 415 E.C. di un filósofo renombrá cu yama Hipatia. Relacioná cu Cirilio su skirbimentunan teológico, Campenhausen ta bisa: “Ta e a iniciá e práctica di resolvé cuestionnan di creencia no exclusivamente a base di Bijbel, sino tambe cu yudansa di citanan apropiado i coleccionnan di cita for di autoridadnan reconocí.”

[Plachi na página 19]

Jerónimo

[Rekonosementu]

Garo Nalbandian