Presta Atencion na Dios Su Obranan Maraviyoso
Presta Atencion na Dios Su Obranan Maraviyoso
“Hopi cos bo mes a haci, o Jehova mi Dios, asta bo obranan maraviyoso i bo pensamentunan pa cu nos; no tin ningun cu por ser compará cu bo.”—SALMO 40:5.
1, 2. Ki evidencia nos tin di e obranan maraviyoso di Dios, i kico esakinan mester impulsá nos pa haci?
ORA bo lesa Bijbel, bo por mira mesora cu Dios a haci cosnan maraviyoso pa su antiguo pueblo, Israel. (Hosué 3:5; Salmo 106:7, 21, 22) Asta si Jehova actualmente no ta intervení dje manera ei den asuntunan humano, nos ta haña masha hopi prueba mes rond di nos di su obranan maraviyoso. Pues nos tin motibu pa uni cu e salmista den bisa: “Cuantu ta bo obranan, o Jehova! Bo a traha nan tur den sabiduria. E tera ta yen di bo produccion.”—Salmo 104:24; 148:1-5.
2 Awe hopi hende ta ignorá of rechasá tal evidencia cla di e actividadnan dje Creador. (Romanonan 1:20) Sin embargo, ta bon pa nos refleccioná riba nan i saca conclusionnan en cuanto nos posicion dilanti di Esun cu a traha nos i nos obligacion pa cuné. Job capítulo 38 pa 41 ta un yudansa excelente den esaki, pasobra ei Jehova a hala Job su atencion riba cierto aspectonan di Su obranan maraviyoso. Considerá algun cuestion válido cu Dios a lanta.
Obranan Poderoso i Maraviyoso
3. Segun e registro na Job 38:22, 23, 25-29, tocante ki cosnan Dios a haci pregunta?
3 Na dado momento, Dios a puntra Job: “Bo a yega di drenta den e depósitonan di sneu, of bo ta mira sikiera e depósitonan di hagel, cu mi a tene atras pa e tempu di angustia, pa e dia di pelea i guera?” Den hopi parti di mundu sneu i hagel ta parti di bida. Dios a sigui: “Ken a habri un canal pa e inundacion i un caminda pa e nubia di tempestad i bos [strena], pa laga awaceru cai riba e tera caminda no tin hende, riba e desierto den cua no tin hende terenal, pa satisfacé lugánan desolá i asotá pa tempestad i pa pone crecementu di yerba spruit? Awaceru tin tata, of ta ken a duna lus na e gotanan di serena? Ta for di ken su barica ijs eigenlijk ta sali i pa loke ta ijs di shelu, ken realmente ta duna lus na dje?”—Job 38:22, 23, 25-29.
4-6. Den ki sentido hende su comprendimentu di sneu ta incompleto?
4 Hende cu ta biba den un sociedad cu ta move na paso rápido i cu tin cu biaha, kisas ta mira sneu puramente como un obstáculo. Tog, un cantidad incontabel di otronan ta mira sneu como algu dushi cu ta producí un mundu di maraviya di winter, yen di oportunidad pa actividadnan special. Cu e pregunta di Dios na mente, bo tin un conocimentu a fondo di sneu, sikiera di ki aparencia e tin? Claro, nos a yega di mira un paisahe yen di sneu, sea personalmente of riba potret. Pero kico dje vloknan di sneu individual? Bo sa ki aparencia nan tin, kisas dor cu bo a examiná nan desde nan orígen?
5 Tin hende cu a studia i saca potret di sneuvlok pa décadanan largu. Un solo sneuvlok por consistí di shen cristal di ijs precioso den un variedad infinito di diseñonan bunita. E buki Atmosphere (Atmósfera) ta bisa: “E variedad infinito di sneuvlok ta legendario, i maske científiconan ta insistí cu no tin ningun ley di naturalesa cu ta prohibí pa tin dos mescos, nunca hende a haña dos sneuvlok idéntico. Un investigacion na gran escala a ser dirigí dor di . . . Wilson A. Bentley, kende a dedicá mas cu 40 aña na examiná i saca potret di sneuvlok bou di un microscop sin nunca haña dos cu tabata exactamente igual.” I asta si den un caso excepcional dos a parce di ta ohochi, esei realmente lo a cambia e maraviya di e variedad enorme di sneuvlok?
6 Corda Dios su pregunta: “Bo a yega di drenta den e depósitonan di sneu?” Hopi hende ta pensa cu nubia ta e depósito di sneu. Bo por imaginá bo mes ta bai e depósitonan ei pa tuma inventario dje variedad infinito di sneuvlok i purba studia con nan a ser formá? Un enciclopedia científico ta bisa: “E naturalesa i orígen dje núcleonan di ijs, cu ta necesario pa pone e gotanan chikitu di nubia vris na temperaturanan rond di -40°F (-40°C), ainda no ta comprendibel.”—Salmo 147:16, 17; Isaías 55:9, 10.
7. Con profundo hende su comprendimentu en cuanto awaceru ta?
7 Kico di awaceru? Dios a puntra Job: “Awaceru tin tata, of ta ken a duna lus na e gotanan di serena?” E mésun enciclopedia científico ta bisa: “Debí cu movementunan den atmósfera ta complicá i tin un enorme variacion den e contenido di vapor i di partículanan di aire, ta parce imposibel pa elaborá un teoria detayá i general dje manera cu nubia i awaceru ta forma.” Senciyamente bisá, científiconan a bin cu teorianan detayá, pero no por splica completamente kico awaceru realmente ta. No obstante, bo sa cu e awaceru vital ta cai, muha nos tera, sostené mata i haci bida posibel i agradabel.
8. Di con Pablo su palabranan registrá na Echonan 14:17 ta apropiado?
8 Bo no ta di acuerdo cu e conclusion cu apostel Pablo a yega na dje? El a urgi otro hende pa mira den e obranan maraviyoso aki, testimonio tocante Esun cu ta tras di nan. Pablo a bisa di Jehova Dios: “E no a laga su mes sin testimonio pasobra el a haci bon, dunando boso yobida di shelu i temporadanan fructífero, yenando boso curason completamente cu cuminda i alegria.”—Echonan 14:17; Salmo 147:8.
9. Con e obranan maraviyoso di Dios ta manifestá su gran poder?
9 No cabe duda cu e Hacidor di e obranan maraviyoso i beneficioso ei tin sabiduria infinito i poder inmenso. Pa loke ta su poder, pensa riba esaki: Científiconan ta calculá cu tin mas o ménos 45.000 tempestad compañá pa bos i weerlicht tur dia, mas cu 16 miyon pa aña. Esei kier men cu tin rond di 2.000 ta tumando lugá n’e momento aki. E nubianan complicá di un solo tempestad asina ta drei violentamente cu un energia ekivalente na dies of mas dje bomnan nuclear cu nan a tira durante Segundo Guera Mundial. Bo ta mira parti dje energia ei como weerlicht. Ademas di ta impresionante, weerlicht de echo ta yuda producí formanan di nitrógeno cu ta drenta den suela unda e matanan ta absorbá nan como fertilisante natural. Pues weerlicht ta un despliegue di energia, pero tambe e ta trece beneficio práctico.—Salmo 104:14, 15.
Na Ki Conclusion Bo Ta Yega?
10. Con abo lo contestá e preguntanan na Job 38:33-38?
10 Imaginá bo na lugá di Job, ta ser interogá dor di Dios Todopoderoso. Probablemente lo bo ta di acuerdo cu mayoria hende ta presta tiki atencion na e obranan maraviyoso di Dios. Jehova ta haci nos e preguntanan cu nos ta lesa na Job 38:33-38. “Bo a yega di conocé e statutonan di shelu, of abo lo por pone su autoridad conta riba tera? Bo por hisa bo bos sikiera na e nubia, pa un masa agitá di awa mes tapa bo? Bo por manda weerlicht pa nan por bai i bisa bo: ‘Ata nos akí!’? Ta ken a pone sabiduria den e capanan di nubia, of ta ken a duna e fenómeno den shelu comprendimentu? Ta ken por conta, cu exactitud, e nubianan cu sabiduria, of e poronnan di awa den shelu—ta ken por boltu nan, ora cu stòf ta basha manera un masa cu a dirti, i e klompinan di tera mes ta pega na otro?”
11, 12. Kico ta algun cos cu ta proba cu Dios ta e Hacidor di obranan maraviyoso?
11 Nos a toca solamente un par di punto cu Elihú a plantia na Job, i nos a tuma nota di algun dje preguntanan cu Jehova a pidi Job contestá “manera un homber físicamente fuerte.” (Job 38:3) Nos ta bisa “algun” pasobra den capítulo 38 i 39, Dios a enfocá atencion riba mas aspectonan notabel di creacion. Por ehempel, el a mencioná e constelacionnan den shelu. Ken conocé tur nan leynan of statutonan? (Job 38:31-33) Jehova a hala Job su atencion riba algun bestia: leon i raf, cabritu di ceru i zebra, toro salbahe i abestrus, cabai poderoso i águila. De echo, Dios a puntra Job si ta e a duna tur e diferente bestianan aki nan característicanan permitiendo nan biba i crece. Podisé lo bo disfrutá di studia e capítulonan aki, foral si bo ta gusta cabai of otro bestia.—Salmo 50:10, 11.
12 Lo bo por examiná Job capítulo 40 i 41 tambe, caminda Jehova a bolbe puntra Job p’e contestá preguntanan tocante dos criatura en particular. Probablemente e ta referí na hipopótamo (Behemot), di tamaño extraordinario i curpa fuerte, i e imponente crocodil di Nilo (Leviatan). Cada un riba su mes ta un maraviya di creacion cu ta merecé atencion. Laga nos wak awor na ki conclusion nos mester yega.
13. Ki efecto Dios su interogacion tabatin riba Job, i con e asuntunan aki mester afectá nos?
13 Job capítulo 42 ta mustra nos ki efecto Dios su interogacion tabatin riba Job. Na principio Job a presta demasiado atencion na su mes i na otro hende. Pero dor di aceptá e coreccion cu tabatin den e preguntanan cu Dios a haci, Job a cambia su manera di pensa. El a confesá: “Mi a haña sa cu bo [Jehova] por haci tur cos, i cu no tin ningun idea cu ta inalcansabel pa bo. ‘Ken ta esun cu ta haci conseho scur sin conocimentu?’ P’esei mi a papia, pero mi no tabata comprendé cosnan demasiado maraviyoso pa mi, cuanan mi no conocé.” (Job 42:2, 3) Sí, despues di presta atencion na Dios su obranan, Job a bisa cu e cosnan aki tabata demasiado maraviyoso p’e. Despues di repasá e maraviyanan aki di creacion, nos tambe lo mester keda impresioná cu Dios su sabiduria i poder. Cu ki meta? Ta djis un asuntu di keda impresioná cu Jehova su inmenso poder i abilidad? Of nos mester ser impulsá mas leu cu esei?
14. Con David a reaccioná riba e obranan maraviyoso di Dios?
14 Wel, na Salmo 86, nos ta haña expresionnan relacioná cu esaki di David, kende den un salmo anterior a bisa: “Shelunan ta declarando e gloria di Dios; i dje obra di su mannan e expansion ta informá. Dia tras dia ta haci papiamentu brota, i anochi tras anochi ta manifestá conocimentu.” (Salmo 19:1, 2) Pero David a bai mas leu. Na Salmo 86:10 i 11 nos ta lesa: “Bo ta grandi i ta haci cosnan maraviyoso; bo ta Dios, bo so. Instruí mi, o Jehova, tocante bo caminda. Lo mi cana den bo berdad. Unificá mi curason pa teme bo nomber.” E admiracion cu David tabatin pa e Creador debí na tur Su obranan maraviyoso, a encerá un debido midí di temor respetuoso pa Dios. I bo por comprendé di con. David no kier a desagradá Esun cu por a haci tur e obranan maraviyoso aki. Nos tampoco lo no kier.
15. Di con David su temor respetuoso pa Dios tabata na su lugá?
15 David mester a realisá cu siendo cu Dios tin tremendo poder i ta control’é, e por usa esaki contra esnan cu ta merecé su desaprobacion. Pa nan, esei ta desastroso. Dios a puntra Job: “Bo a yega di drenta den e depósitonan di sneu, of bo ta mira sikiera e depósitonan di hagel, cu mi a tene atras pa e tempu di angustia, pa e dia di pelea i guera?” Sneu, hagel, tempestad di awaceru, bientu i weerlicht, tur ta den su arsenal. I esta increiblemente potente forsanan di naturalesa ta!—Job 38:22, 23.
16, 17. Kico ta ilustrá e poder impresionante cu Dios tin, i con el a usa e poder ei den pasado?
16 Probablemente bo ta corda un catástrofe local causá dor di sea un horcan, tifon, ciclon, tempestad di hagel of inundacion repentino. Pa ilustrá: na fin di aña 1999, un tormenta fuerte a asotá zuidwest di Europa. El a sorprendé asta e meteorólogonan. Bientunan fuerte a alcansá velocidad di 200 kilometer pa ora, i a ranca miles di dak bai cuné, basha mastnan di coriente abou i boltu truck. Purba visualisá esaki: E tormentanan dje periodo ei a saca cu rais of kibra na dos rond di 270 miyon palu, 10.000 den un solo parke na Versailles, pafó di Paris. Miyones di cas a keda sin coriente. E saldo total di morto tabata casi 100. Tur esei, den un periodo breve di tormenta. Ke se yama un forsa!
17 Tin hende lo bisa cu tempestad ta un fenómeno abnormal, sin direccion i incontrolabel. Sin embargo, kico lo por pasa si e Todopoderoso efectuá obranan maraviyoso dor di usa e forsanan ei den un manera controlá i dirigí? El a haci algu similar den e tempu di Abraham, cu a haña sa cu e Hues di tur e tera a evaluá e maldad di dos stad, Sódoma i Gomora. Nan tabata asina corupto cu gritunan tocante nan a yega na Dios, kende a yuda tur hende hustu scapa dje stadnan condená. Historia ta informá: “Anto Jehova a haci yobe swafel i candela for di Jehova, for di shelu,” riba e stadnan ei. Esei tabata un obra maraviyoso cu a conserbá e hustunan i a destruí e malbadonan incoregibel.—Génesis 19:24.
18. Na ki cosnan maraviyoso Isaías capítulo 25 ta señalá?
18 Mas despues Dios a decretá un decision hudicial contra e antiguo stad di Babilonia, na cua Isaías capítulo 25 kisas ta referí. Dios a profetisá cu un stad lo a bira un ruina: “Pasobra bo a haci un stad un monton di piedra, un pueblo fortificá un ruina cu ta basha abou, un toren di habitacion di stranheronan pa no ta stad mas, cu asta pa tempu indefiní lo no ser reedificá.” (Isaías 25:2) Hende djawe cu bishitá e sitio di Babilonia por confirmá cu esei a resultá asina. Destruccion di Babilonia tabata djis un coincidencia? No. Mas bien, nos por aceptá Isaías su evaluacion: “O Jehova, abo ta mi Dios. Mi ta halsa bo, mi ta elogiá bo nomber, pasobra bo a haci cosnan maraviyoso, consehonan for di tempu mas promé, den fieldad, den confiabilidad.”—Isaías 25:1.
Obranan Maraviyoso den Futuro
19, 20. Ki cumplimentu di Isaías 25:6-8 nos por spera?
19 Den pasado Dios a cumpli cu e profecia mencioná ariba, i lo actua di un forma maraviyoso den futuro. Den e contexto aki caminda Isaías ta mencioná e “cosnan maraviyoso” di Dios, nos ta haña un profecia confiabel cu ta bai cumpli, mescos cu e huicio contra Babilonia a tuma lugá. Kico ta e ‘cos maraviyoso’ primintí? Isaías 25:6 ta bisa: “Jehova di ehércitonan sigur lo prepará pa tur pueblo, riba e ceru aki, un bankete di plato cu hopi zeta, un bankete di biña mantené riba kachi-kachi, di plato cu hopi zeta yená cu tuti di wesu, di biña mantené riba kachi-kachi, filtrá.”
20 E profecia ei lo cumpli sigur den e mundu nobo cu Dios a primintí i cu ta djis nos dilanti. N’e tempu ei, humanidad lo ser aliviá di problemanan cu awor ta un carga pisá pa hopi hende. De echo, e profecia na Isaías 25:7 i 8, ta garantisá cu Dios lo usa su poder creativo pa haci un dje obranan mas maraviyoso di tur tempu: “Lo e realmente traga morto pa semper, i Señor Soberano Jehova sigur lo seca e lágrimanan for di tur cara. I e reproche di su pueblo lo e kita di tur e tera, pasobra Jehova mes a papi’é.” Despues, apostel Pablo a cita for di e pasashi ei i a aplik’é n’e echo cu Dios ta lanta hende morto bek na bida via e resureccion dje mortonan. Esta un obra maraviyoso esei lo ta!—1 Corintionan 15:51-54.
21. Cua obranan maraviyoso Dios lo haci pa e mortonan?
21 Un otro motibu pakico lágrima di tristesa lo disparcé ta pasobra hende lo no tin malesa físico mas. Ora Jesus tabata riba tera, el a cura hopi hende, el a duna bista na esnan ciegu, oido na esnan surdu, vigor na esnan desabilitá. Juan 5:5-9 ta relatá con el a cura un homber cu tabata paralisá pa 38 aña. Observadónan a pensa cu esaki tabata algu asombroso, un obra maraviyoso. I tabata asina mes! Sin embargo Jesus a bisa nan cu e echo cu lo e resucitá e mortonan lo ta mas maraviyoso ainda: “No straña boso riba esaki, pasobra e ora ta bini den cua tur esnan cu ta den grafnan conmemorativo lo tende su bos i lo sali, esnan cu a haci bon cosnan pa un resureccion di bida.”—Juan 5:28, 29.
22. Di con esnan pober i afligí por mira padilanti cu speransa?
22 Esei lo sosodé sigur pasobra Jehova ta esun cu ta primintí esei. Keda sigur cu ora e usa su gran poder curativo i dirigié cuidadosamente, e resultado lo ta maraviyoso. Salmo 72 ta señalá na loke lo e haci mediante su Yu-Rey. E tempu ei e hustunan lo spruit. Pas lo abundá. Dios lo libra esnan pober i afligí. E ta primintí: “Lo yega di tin abundancia di grano riba tera; riba top dje cerunan lo tin sobreabundancia. Su fruta lo ta manera riba [antiguo] Líbanon, i esnan cu ta di stad lo florecé manera vegetacion dje tera.”—Salmo 72:16.
23. E obranan maraviyoso di Dios mester conmové nos pa haci kico?
23 Ta keda claro anto cu nos tin motibu pa presta atencion na tur Jehova su obranan maraviyoso: loke el a haci den pasado, loke e ta haciendo awe, i loke e ta bai haci den futuro cercano. “Bendicioná sea Jehova Dios, e Dios di Israel, e único cu ta haci obranan maraviyoso. I bendicioná sea su glorioso nomber te na tempu indefiní, i laga su gloria yena henter e tera. Amen i Amen.” (Salmo 72:18, 19) Cu regularidad esei mester ta nos tema di combersacion entusiasmá cu famianan i otro hende. Sí, laga nos “declará entre e nacionnan su gloria, entre tur e pueblonan su obranan maraviyoso.”—Salmo 78:3, 4; 96:3, 4.
Con Lo Bo Contestá?
• Con e preguntanan cu a ser plantiá na Job a enfatisá cu conocimentu humano ta limitá?
• Cua ehempelnan di e obranan maraviyoso di Dios resaltá den Job capítulo 37-41 a impresioná bo?
• Con nos mester reaccioná despues di a considerá algun dje obranan maraviyoso di Dios?
[Preguntanan di Estudio]
[Plachinan na página 10]
Ki conclusion bo ta saca en cuanto e variedad tolondrador di sneuvlok i e poder di weerlicht cu ta inspirá temor?
[Rekonosementu]
snowcrystals.net
[Plachinan na página 13]
Laga e obranan maraviyoso di Dios ta un parti regular di bo combersacion