“Un Peliger Scondí pa Salú Público”
“Un Peliger Scondí pa Salú Público”
UN ENCUESTA recien tocante sex riba Internet a revelá cu un cantidad asombroso di hende, esta, un tercer parti di tur e usuarionan adulto di Internet na Merca, a yega di bai riba un of otro ‘Web site’ di sex. Awe, un cantidad inmenso di hende ta entregá na nan impulsonan sexual via Internet. Dokter Al Cooper, e sicólogo cu a guia e encuesta, a bisa: “Esaki ta un peliger scondí pa salú público i e ta plamando lihé, en parte, pa motibu cu masha poco hende ta reconoc’é como tal of ta tum’é na serio.”
Ken foral ta vulnerabel pa sex riba Internet? Segun dr. Cooper: “Esnan cu podisé a restringí i limitá nan sexualidad henter nan bida,” pero cu “di ripiente ta haña un suministro infinito di oportunidadnan sexual” riba Internet.
Sin embargo, mayoria di esnan cu ta frecuentá e sitionan sexual riba Internet ta considerá e práctica aki algu inofensivo. Esei ta asina? Mescos cu un drogadicto ta desaroyá un tolerancia p’e droga na cua e ta adicto, hopi persona adicto na sex riba Internet ta busca un “dósis” mas grandi di sexualidad riba Internet pa satisfacé nan pasion. Sí, nan por asta pone nan trabou i nan relacion cu nan partner na peliger!
Sin embargo, personanan cu kier agradá Dios tin mas motibu ainda pa evitá di bishitá sitionan sexual riba Internet. E Palabra di Dios ta spierta: “P’esei, mata boso miembronan di curpa cu ta riba tera pa loke ta fornicacion, impuresa, apetit sexual, deseo perhudicial, i cudishi, loke ta idolatria. Pa causa dje cosnan ei e rabia di Dios ta biniendo.” (Colosensenan 3:5, 6) Pa un persona por ‘mata miembronan di su curpa’ pa loke ta apetit sexual sushi, e mester cultivá amor fuerte pa Jehova Dios. (Salmo 97:10) Si e ripará cu e peliger pa salú público, esta, sex riba Internet, ta atraé, e tin cu fortalecé su amor pa Jehova dor di studia e Palabra di Dios, Bijbel. Asociacion saludabel cu Testigonan di Jehova n’e Salon di Reino local por contribuí hopi na yuda un persona fortalecé su determinacion pa agradá Dios.