Con Ser Biuda A Afectá Dos Hende Muher

SANDRA ta un biuda cu ta biba na Australia. Ora su casá a muri un par di aña pasá, Sandra su promé reaccion tabata shok total. “Ora mi a realisá cu di ripiente mi a perde mi compañero i mi mihó amigu, mi a keda aplastá. Di berdad mi no por corda mes con mi a yega cas bek for di hospital ni kico mi a haci pa resto dje dia ei. Durante e siguiente par di simannan, mi temornan a duna mi un dolor físico constante.”

Sandra tin un amiga di mas edad, Elaine, cu ta biuda pa mas o ménos seis aña. Elaine a cuida su casá David pa seis luna promé cu el a muri di cancer. Su duele tabata asina intenso, cu poco despues di morto di su casá el a bira ciegu temporalmente. Dos aña despues el a bai flou den hende. Su dokter no a mira ningun señal di malesa físico. Sin embargo, el a descubrí cu Elaine tabata tene su tristesa paden. Pues, el a recomend’é p’e bai cas i haci un esfuerso pa yora. Elaine ta admití: “A tuma mi basta tempu pa mi por a superá mi duele,” i e ta agregá cu ora e tabata solitario, e tabata ‘bai den kamber anto hinca su cara den paña di David.’

Sí, morto di un compañero stimá por causa un variedad di reaccion, pasobra si bo wak bon, ser biuda kier men mas cu simplemente biba sin un casá. Por ehempel Sandra, durante un temporada a sinti cu el a perde su identidad. Mescos cu hopi otro hende cu caba di bira biuda, el a sinti su mes vulnerabel i insigur tambe. Sandra ta corda: “Mi a custumbrá cu ta mi esposo tabata tuma decision final, i di ripiente ta mi so mester a tuma tal decisionnan ora mi a bira biuda. Mi no por a drumi bon. Mi tabata sinti cansá i fatigá. Tabata difícil pa mi sa precis kico pa haci.”

Historianan manera di Sandra cu Elaine ta ripití diariamente rond mundu. Enfermedad, accidente, guera, purificacion étnico i violencia en general ta contribuí na un cantidad creciente di biuda. * Hopi dje hende muhernan aki ta sufri den silencio, sin sa kico pa haci. Kico amigu i famianan por haci pa yuda esnan cu ta adaptando nan mes n’e bida di biuda? E siguiente artículo tin un par di sugerencia cu por resultá útil.

[Nota]