“Jehova A Trata Mi Hopi Bon!”

RIBA un anochi masha agradabel na mart 1985, homber i muhernan den e Departamento di Redaccion n’e sede di Testigonan di Jehova na New York, Merca, a tuma nota di un logro significativo. Karl F. Klein a cumpli 60 aña den e sirbishi di tempu completo e tempu ei. Cu entusiasmo, ruman Klein a bisa: “Jehova a trata mi hopi bon!” El a remarcá cu Salmo 37:4 tabata su texto di Bijbel faborito. Despues el a toca su ‘cello’ deleitando tur presente.

Pa e siguiente 15 añanan, ruman Klein a sigui traha como miembro di staf di redaccion i a sirbi den e Cuerpo Gobernante di Testigonan di Jehova. Anto, dia 3 di januari 2001, na edad di 95 aña, Karl Klein a completá su bida terenal fielmente.

Karl a nace na Alemania. Su famia a muda bai Merca, i Karl a crece den un suburbio di Chicago, Illinois. Tempu cu nan tabata hóben ainda, tantu Karl como su ruman homber mas chikitu, Ted, a bira masha interesá den Bijbel. Karl a bautisá na 1918, i e cosnan emocionante cu el a tende na un congreso di Studiantenan di Bijbel na 1922 a lanta den dje un cariño p’e ministerio di veld, cu a dura henter su bida. E no tabata kier pa ningun siman pasa sin cu el a participá den e trabou di predicá, i el a haci esei asta durante e último simannan di su bida.

Karl a bira miembro di staf dje sede na 1925, caminda na principio el a traha den imprenta. E tabatin un berdadero amor pa música, i pa algun aña el a toca su cello den e orkesta cu tabata presentá durante transmision cristian na radio. Despues di esei, el a traha den e Departamento di Sirbishi, i a disfrutá foral di asociacion cu e superintendente dje departamento, T. J. Sullivan. Miéntras tantu, Ted a casa cu Doris, i nan a cuminsá traha den e sirbishi di misionero na Puerto Rico.

Pa mitar siglo, Karl Klein a traha den e Departamento di Redaccion, caminda el a duna un contribucion sobresaliente pasobra el a stima hacimentu di investigacion i e tabatin un conocimentu profundo di Bijbel. Na 1963, Karl a casa cu Margareta, un misionero aleman cu tabata sirbi na Bolivia. Cu su apoyo amoroso, foral ora Karl tabatin problema cu salú, Karl por tabata productivo pa hopi tempu despues dje edad cu mayoria hende ta stop di traha. Karl su frankesa natural combiná cu su entusiasmo di músico a contribuí na discursonan memorabel den congregacion i na congresonan. No muchu tempu promé cu su morto, el a presidí un consideracion di texto di dia p’e famia grandi di Betel na New York. Tur a disfrutá i beneficiá dje consideracion.

Hopi lector regular di E Toren di Vigilancia lo ta corda ruman Klein su historia di bida, un relato placentero cu a ser publicá den e edicion di 1 di october 1984, na spañó. Lo bo disfrutá di lesa of bolbe lesa e relato ei, si bo tene na mente cu e escritor a pasa un década i mei mas como un cristian fiel i dedicá.

Como un dje ungínan di Señor, di henter su curason ruman Klein a deseá di reina cu Cristo den shelu. Nos tin tur motibu pa kere cu awor Jehova a cumpli cu e deseo ei.—Lucas 22:28-30.

[Plachi na página 31]

Na 1943, Karl huntu cu T. J. Sullivan i Ted cu Doris

[Plachi na página 31]

Karl cu Margareta na october 2000