Sea Gososo cu e Dios Felis

“Finalmente, rumannan, sigui alegrá, . . . i e Dios di amor i di pas lo ta cu boso.”—2 CORINTIONAN 13:11.

1, 2. (a) Di con hopi hende ta falta goso den bida? (b) Kico ta goso, i con nos por cultiv’é?

DEN e tempu scur aki, hopi hende no ta mira muchu motibu pa alegrá. Ora cu un tragedia sosodé cu nan of cu un hende cu nan stima, kisas nan ta sinti manera Job di antigwedad, kende a bisa: “Hende, nací di muher, tin un bida corticu i hartá cu molester.” (Job 14:1) Cristiannan no ta immuun pa e stres i preshon dje ‘tempu crítico aki, duru pa trata cuné,’ i no ta nada straño cu tin bes sirbidónan fiel di Jehova ta bira desanimá.—2 Timoteo 3:1.

² Apesar di esei, cristiannan por ta gososo asta ora nan ta bou di prueba. (Echonan 5:40, 41) Pa comprendé con esaki ta posibel, considerá promé kico goso ta. Goso a yega di ser definí como “e emocion cu ta lanta dor di obtené of anticipá algu bon.” * P’esei, si nos tuma tempu pa pensa riba e bon cosnan cu nos tin actualmente, i na mes momento meditá riba e bendicionnan cu ta spera nos den e mundu nobo di Dios, nos por tin goso.

3. Den ki sentido nos por bisa cu tur hende tin por lo ménos algun motibu pa alegrá?

³ Tur hende tin algun bendicion cu nan por ta gradicidu p’e. Laga nos bisa cu un cabes di famia a perde trabou. Ta natural pa e preocupá. E kier percurá pa esnan cu e ta stima. Sin embargo, si e ta físicamente fuerte i cu bon salú, e por ta gradicidu p’esei. Si e haña trabou lo e por traha duru. Di otro banda, laga nos bisa cu un hende muher cristian a haña un malesa debilitador. Apesar di esei e por keda gradicidu p’e apoyo cu e ta ricibí di amigu i famianan amoroso cu ta yud’é enfrentá su malesa cu dignidad i curashi. I tur cristian berdadero, sin importá den ki circunstancia nan ta, por alegrá cu nan tin e privilegio di conocé Jehova, “e Dios felis,” i Jesucristo, “e felis i único Mandatario.” (1 Timoteo 1:11; 6:15) Sí, Jehova Dios i Jesucristo ta sumamente felis. Nan a mantené nan goso apesar dje echo cu situacion riba tera ta leu for di loke Jehova tabata kier na cuminsamentu. Nan ehempel por siña nos hopi tocante con pa mantené nos goso.

 Nunca Nan No A Perde Nan Goso

4, 5. (a) Con Jehova a reaccioná ora e promé hendenan a rebelá? (b) Con Jehova a mantené un actitud positivo relacioná cu humanidad?

⁴ Den e hofi di Eden, Adam cu Eva a gosa di salú radiante, i nan mente tabata perfecto. Nan tabatin trabou productivo pa haci, i un ambiente ideal pa nan traha aden. I e mihó cos ta cu nan tabatin e privilegio di por comunicá regularmente cu Jehova. Dios su propósito tabata pa nan a gosa di un futuro felis. Pero nos promé mayornan no a keda satisfecho cu tur e bon regalonan aki; nan a horta e fruta prohibí for dje “palu di conocimentu di bon i malu.” E acto di desobedencia aki tabata e fundeshi di tur e infelicidad cu nos como nan desendientenan ta experimentá awe.—Génesis 2:15-17; 3:6; Romanonan 5:12.

⁵ Sin embargo, Jehova no a permití p’e actitud malagradecí di Adam cu Eva kita su goso. E tabatin confiansa cu curason di por lo ménos algun di nan desendientenan lo ser motivá pa sirbié. De echo, e tabatin asina un confiansa, cu el a anunciá su propósito pa rescatá e desendientenan obediente di Adam cu Eva asta promé cu nan a producí nan promé yu! (Génesis 1:31; 3:15) Den e siglonan cu a sigui, mayoria hende a sigui e pasonan di Adam cu Eva, pero Jehova no a bira lomba p’e famia humano pa motibu di tal desobedencia reinante. Mas bien el a concentrá su atencion riba hende homber i muher cu a ‘alegrá su curason,’ esnan cu a haci un berdadero esfuerso pa complac’é dor cu nan ta stim’é.—Proverbionan 27:11; Hebreonan 6:10.

6, 7. Ki factornan a yuda Jesus keda gososo?

⁶ Kico di Jesus? Con é a mantené su goso? Como criatura spiritual poderoso den shelu, Jesus tabatin tur oportunidad di observá actividad di homber i muhernan riba tera. Nan imperfeccionnan tabata bisto, pero apesar di esei Jesus a stima nan. (Proverbionan 8:31) Despues, ora el a bini na tera i a biba mes “meimei” di hende, su punto di bista tocante humanidad no a cambia. (Juan 1:14) Kico a permití e Yu perfecto di Dios mantené un actitud positivo asina dje famia humano pecaminoso?

⁷ Na promé lugá, Jesus tabata razonabel den loke el a spera tantu di su mes como di otro hende. E tabata sa cu lo e no combertí mundu henter. (Mateo 10:32-39) P’esei e tabatin goso asta ora un solo hende sincero a reaccioná faborablemente na e mensahe di Reino. Apesar cu tin biaha e conducta i actitud di su disipelnan a laga hopi di deseá, Jesus tabata sa cu den nan curason, nan tabata kier haci e boluntad di Dios, i el a stima nan pa esei. (Lucas 9:46; 22:24, 28-32, 60-62) Ta interesante cu un biaha ora Jesus a haci oracion na su Tata celestial, el a resumí e proceder positivo di su disipelnan te na e momento ei, asin’akí: “Nan a warda bo palabra.”—Juan 17:6.

8. Mencioná algun manera cu nos por imitá Jehova i Jesus den loke ta toca mantené nos goso.

⁸ Sin duda, nos tur por beneficiá si nos refleccioná riba e ehempel cu Jehova Dios i Cristo Jesus a pone riba e tereno aki. Nos lo por imitá Jehova mas plenamente, kisas dor di no preocupá di mas ora cos no sali manera nos a spera? Nos por sigui e pasonan di Jesus cu mas cuidou i atencion dor di keda cu un punto di bista positivo di nos circunstancia actual, i tambe dor di ta razonabel den loke nos ta spera di nos mes i otronan? Laga nos wak con nos lo por aplicá algun dje principionan aki na un manera práctico, den un asuntu cu ta precioso pa cristiannan celoso tur caminda: e ministerio di veld.

Keda cu un Punto di Bista Positivo dje Ministerio

9. Con Jeremías su goso a lanta bek, i con su ehempel por yuda nos?

⁹ Jehova kier pa nos tin goso den su sirbishi. Nos goso no mester dependé dje resultadonan cu nos obtené. (Lucas 10:17, 20) Profeta Jeremías a predicá pa hopi aña den un  teritorio improductivo. Ora el a enfocá riba e reaccion negativo dje pueblo, el a perde su goso. (Jeremías 20:8) Pero ora cu el a meditá riba e bunitesa mes dje mensahe, su goso a lanta bek. Jeremías a bisa Jehova: “Bo palabranan a ser hañá i mi a come nan; i bo palabra ta bira pa mi e hubilacion i alegria di mi curason; pasobra bo nomber a ser yamá riba mi, o Jehova.” (Jeremías 15:16) Sí, Jeremías tabatin goso den su privilegio di predicá e palabra di Dios. Nos tambe por.

10. Con nos por mantené nos goso den e ministerio asta si nos teritorio no ta productivo actualmente?

¹⁰ Asta si mayoria hende nenga di reaccioná faborabel n’e bon nobo, nos tin tur motibu pa ta gososo ora nos participá den e ministerio di veld. Corda cu Jehova a mustra bon cla su confiansa di cu algun hende lo ser motivá pa sirbié. Mescos cu Jehova, nos tampoco no mester perde speransa nunca cu, cu tempu, por lo ménos algun hende lo comprendé loke ta den wega i aceptá e mensahe di Reino. Nos no mester lubidá cu hende su circunstancia ta cambia. Asta e hende di mas satisfecho cu su mes lo por cuminsá pensa seriamente riba e nificacion di bida ora e enfrentá un pérdida of crísis repentino. Abo lo t’ei pa yuda un hende asina ora e bira ‘conciente di su necesidad spiritual’? (Mateo 5:3) Ken sa cu no tin un hende den bo teritorio cla pa scucha e bon nobo na bo siguiente bishita mes!

11, 12. Kico a tuma lugá den un cierto pueblo, i kico nos por siña di dje?

¹¹ E composicion di nos teritorio por cambia tambe. Considerá un ehempel. Tabatin un grupo di pareha hóben casá cu yu, masha cerá cu otro ta biba den un pueblo chikitu. Ora Testigonan di Jehova tabata yama na nan cas, semper nan tabata haña e mésun contesta na tur porta: “Nos no ta interesá!” Asta ora un di nan a mustra interes den e mensahe di Reino, e bisiñanan no tabata perde tempu pa desanim’é di sigui tene contacto cu e Testigonan. Di mes, predicá den e pueblo ei tabata un reto. Sin embargo, e Testigonan no a entregá; nan a sigui predicá bai. Cu ki resultado?

¹² Cu tempu, hopi yu den e pueblo ei a crece, casa i cuminsá biba riba nan mes einan. Ora nan a realisá cu nan bida no a resultá den berdadero felicidad, algun dje hóben adultonan aki a cuminsá busca e berdad. Nan a hañ’é ora nan a reaccioná faborablemente na e bon nobo cu e Testigonan ta proclamá. Asina ta cu despues di hopi aña, e congregacion chikitu a cuminsá crece. Imaginá bo e goso dje publicadónan di Reino cu no a entregá! Ohalá nos persistencia den compartí e mensahe glorioso dje Reino trece goso pa nos tambe!

Compañeronan di Creencia Lo Apoyá Bo

13. Na ken nos por acudí ora nos ta descurashá?

¹³ Ora cu preshon aumentá, of bida dal bo  un sla duru, na unda bo por acudí pa consuelo? Miyones di Jehova su sirbidónan dedicá ta acudí promé na Jehova den oracion, i despues na nan rumannan cristian. Tempu e tabata riba tera, Jesus mes a balorá e apoyo di su disipelnan. Riba e anochi promé cu su morto, el a papia di nan como “esnan cu a permanecé cu mi henter ora durante mi pruebanan.” (Lucas 22:28) Claro cu e disipelnan ei tabata imperfecto, pero nan lealtad tabata un consuelo pa e Yu di Dios. Nos tambe por saca fortalesa di nos compañeronan di adoracion.

14, 15. Kico a yuda un pareha enfrentá e morto di nan yu, i kico bo ta siña di nan experencia?

¹⁴ Un pareha cristian cu yama Michel cu Diane a siña con balioso e apoyo di nan rumannan por ta. Nan yu homber di 20 aña, Jonathan, un cristian yen di bida i futuro, a ser diagnosticá cu un tumor celebral. Dokternan a lucha duru pa scap’é, pero Jonathan su condicion a bai atras te cu un atardi el a drumi den morto. Michel cu Diane tabata sumamente kibrá. Nan a realisá cu e Reunion di Sirbishi programá p’e anochi ei tabata cerca di caba. Apesar di esei, dor cu nan tabatin mester di consuelo desesperadamente, nan a pidi e anciano cu tabata cerca nan p’e bai Salon di Reino cu nan. Nan a yega net ora cu e congregacion a ricibí e anuncio di Jonathan su morto. Despues dje reunion, e mayornan cu lágrima na wowo a keda rondoná pa nan rumannan cu a brasa nan i ofrecé nan palabra di consuelo. Diane ta corda: “Nos tabata sinti nos bashí ora nos a yega salon, pero esta un consuelo nos a ricibí cerca e rumannan; cuantu nan a animá nos! Maske nan no por a kita nos dolor, nan a yuda nos soportá e preshon!”—Romanonan 1:11, 12; 1 Corintionan 12:21-26.

¹⁵ Adversidad a hala Michel cu Diane mas cerca di nan rumannan. El a hala nan mas cerca di otro tambe. Segun Michel: “Mi a siña apreciá mi esposa stimá mas ainda. Ora nos ta descurashá, nos ta papia cu otro tocante berdadnan bíblico, i tocante con Jehova ta sosteniendo nos.” Diane ta agregá: “E speransa di Reino tin asta mas nificacion pa nos awor.”

16. Pakico ta importante pa nos tuma iniciativa i laga nos rumannan sa di nos necesidadnan?

¹⁶ Sí, nos rumannan cristian por sirbi como “un yudansa fortalecedor” pa nos na momentonan difícil den bida, i asina yuda nos preservá nos goso. (Colosensenan 4:11) Claro cu nan no por lesa nos mente. P’esei, ora nos tin mester di apoyo, ta bon pa nos laga nan sa. Anto nos lo por expresá aprecio sincero p’e consuelo cu nos rumannan por duna nos, considerando cu ta di Jehova e ta bini.—Proverbionan 12:25; 17:17.

Tira un Bista den Bo Congregacion

17. Ki retonan un mama soltero ta enfrentá, i con nos ta considerá hende manera e?

¹⁷ Mas djacerca bo mira bo compañeronan di creencia, mas lo bo siña apreciá nan i haña goso den asociá cu nan. Tira un bista den bo congregacion. Kico bo ta mira? Tin un mayor soltero cu ta haciendo su esfuerso pa lanta su yunan den e caminda dje berdad? Bo a paga bon tinu na su ehempel excelente? Purba imaginá un par dje problemanan cu e ta enfrentá. Un mama soltero cu yama Jeanine ta mencioná algun: soledad, avancenan romántico indeseá di hende homber na su trabou, i un presupuesto sumamente limitá. Pero e ta bisa cu e reto di mas grandi ta di yena e necesidadnan emocional di su yunan, ya cu cada yu ta diferente. Jeanine ta mencioná un otro problema: “Ta un berdadero reto pa bringa e tendencia di haci bo yu homber e cabes di famia, pa compensá p’e ausencia di un esposo. Mi tin un yu muher, i ta difícil pa mi keda corda cu mi no mester cargu’é di mas emocionalmente dor di hacié e persona cu mi ta confia tur mi problemanan íntimo.” Mescos cu miles di mayor soltero temeroso di Dios, Jeanine ta traha full-time i ta cuida su cas.  Tambe e ta studia Bijbel cu su yunan, entrená nan pa sirbishi di veld, i bai reunionnan di congregacion cu nan. (Efesionan 6:4) Esta contentu Jehova mester ta di mira tur dia con e famia aki ta haci esfuerso pa mantené integridad! Nos curason no ta sinti goso di tin hende asina entre nos? Sigur-sigur.

18, 19. Ilustrá con nos por aumentá nos aprecio pa miembronan dje congregacion.

¹⁸ Bolbe tira un bista den bo congregacion. Kisas lo bo mira biuda of biudo cu ‘nunca no ta falta’ na reunion. (Lucas 2:37) Nan ta sinti nan solitario ratu-ratu? Claro. Nan ta sinti masha falta di nan compañero! Pero nan ta keda ocupá den Jehova su sirbishi i ta mustra interes personal den otro hende. Nan actitud positivo i stabil ta aumentá e goso dje congregacion! Un cristian cu a sirbi den e ministerio di tempu completo pa mas cu 30 aña a remarcá: “Un di mi gosonan di mas grandi ta di mira rumannan di edad cu a pasa den hopi prueba, cu ketu bai ta sirbi Jehova fielmente!” Sí, cristiannan di mas edad entre nos ta un gran animacion pa esnan mas hóben.

¹⁹ Kico di esnan nobo cu a caba di cuminsá asociá cu e congregacion? Ora nan expresá nan fe na reunion, esei no ta un estímulo pa nos? Pensa riba cuantu progreso nan a haci for di dia cu nan a cuminsá studia Bijbel. Jehova mester ta masha contentu cu nan.  Kico di nos? Nos ta expresá nos aprobacion dor di elogiá nan esfuerso?

20. Pakico por bisa cu cada miembro di congregacion ta hunga un papel importante den e congregacion?

²⁰ Bo ta casá, soltero, of un mayor soltero? Bo ta un mucha sin tata (of mama), un biuda of biudo? Bo tin hopi tempu ta asociá cu e congregacion, of bo a caba di cuminsá asociá? Bo por tin sigur cu bo ehempel di fieldad ta animá nos tur. I ora cu bo canta un cantica di Reino cu nos, ora cu bo duna un comentario of cumpli cu un asignacion den e Scol di Ministerio Teocrático, bo contribucion ta aumentá nos goso. Mas importante ainda, e ta trece goso na Jehova su curason.

21. Nos tin hopi motibu pa haci kico, pero ki preguntanan ta lanta?

²¹ Sí, asta den e tempu trabahoso aki, nos por adorá nos Dios felis cu goso. Nos tin hopi motibu pa cumpli cu Pablo su animacion: ‘Sigui alegrá, i e Dios di amor i di pas lo ta cu boso.’ (2 Corintionan 13:11) Pero kico si nos haña nos confrontá cu un desaster natural, persecucion of problema económico pisá? Ta posibel pa nos mantené nos goso asta den situacionnan asina? Dicidí pa bo mes ora bo considerá e siguiente artículo.

[Nota]

Bo Por Contestá?

• Con goso ta ser describí?

• Con mantené un actitud positivo por yuda nos keda gososo?

• Kico por yuda nos tin un punto di bista positivo dje teritorio di nos congregacion?

• Di con bo ta apreciá e rumannan di bo congregacion?

[Preguntanan di Estudio]

[Plachinan na página 10]

Hende den nos teritorio por cambia

[Plachi na página 12]

Ki reto esnan den bo congregacion ta enfrentá?