Historia di Bida

Sigui Padilanti den e Caminda di Jehova Ta Duna Nos Forsa i Goso

SEGUN E RELATO DI LUIGGI D. VALENTINO

Jehova ta consehá: “Esaki ta e caminda. Cana den dje.” (Isaías 30:21) For di tempu cu mi a bautisá 60 aña pasá, mi meta tabata pa sigui e conseho aki. E ehempel di mi mayornan a pone e meta aki mi dilanti for di chikitu. Nan tabata imigrante for di Italia cu a establecé nan mes na Cleveland, Ohio, Merca na 1921. Einan, nan a lanta tres yu: mi ruman homber mayó Mike, mi ruman muher mas chikitu Lydia i ami.

MI MAYORNAN a examiná vários religion, pero cu tempu nan a entregá debí cu nan a keda decepcioná. Anto riba un dia na 1932, Tata tabata scucha un programa italiano na radio. Testigonan di Jehova tabata transmití e programa i Tata a gusta loke el a tende. El a skirbi pidi mas informacion, i un Testigo italiano dje sede di Testigonan di Jehova na Brooklyn, New York, a bin bishitá nos. Despues di un combersacion animá cu a dura te mainta, mi mayornan tabata convencí cu nan a haña e religion berdadero.

Tata cu Mama a cuminsá asistí na reunionnan cristian i a habri nan cas pa superintendentenan biahero. Aunke mi tabata solamente un mucha chikitu, e ruman hombernan aki a laga mi compañá nan den e trabou di predicá i a pone mi cuminsá pensa riba e trabou di sirbi Jehova di tempu completo. Un dje bishitantenan ei tabata Carey W. Barber, kende awor ta un miembro  dje Cuerpo Gobernante di Testigonan di Jehova. No a dura mashá cu na februari 1941, mi a bautisá cu 14 aña di edad, i na 1944 mi a cuminsá sirbi como pionero na Cleveland. Mike cu Lydia tambe a cuminsá cana riba e caminda di berdad bíblico. Mike a sirbi Jehova te na su morto, i Lydia a compañá su esposo Harold Weidner pa 28 aña largu den e ministerio biahero. Awe nan ta sirbi como minister special di tempu completo.

Prizon Ta Haci Mi Determinacion pa Sigui Padilanti Mas Fuerte

Na principio di 1945, mi a cai cerá den Prizon Federal di Chillicothe na Ohio debí cu mi concenshi bíblicamente entrená a motivá mi pa actua na armonia cu Isaías 2:4 cu ta papia di bati spada haci ploeg. Na un tempu, autoridadnan di prizon a permití prezunan Testigo pa nan tin solamente un cantidad limitá di literatura bíblico publicá dor di Testigonan di Jehova. Sin embargo, Testigonan di un congregacion den cercania a yuda. Na algun ocasion nan tabata pone un par di publicacion riba e terenonan cerca dje prizon. E siguiente mainta, ora tabata hiba e prezunan na nan lugánan di trabou, nan tabata busca e publicacionnan aki i tabata logra drenta cu nan den prizon. P’e tempu cu ami a drenta prizon, nos tabatin mag di tin mas literatura. Asina mes, mi a siña apreciá mashá e cuminda spiritual cu Jehova ta percurá—un les cu ainda mi ta corda tur biaha cu mi ricibí un edicion nobo di E Toren di Vigilancia of Spierta!

Maske nan a permití nos tene reunionnan di congregacion den prizon, no a permití hende no-Testigo asistí. Tog, algun funcionario di prizon i detenido tabata asistí den secreto, i algun di nan a asta aceptá e berdad. (Echonan 16:30-34) E bishitanan di ruman A. H. Macmillan tabata un fuente sobresaliente di consuelo. Semper el a sigurá nos cu e tempu cu nos a pasa den prizon no tabata en bano pasobra esaki a entrená nos pa asignacionnan den futuro. E kerido ruman di edad ei a conmové mi curason i a haci mi determinacion pa cana den e caminda di Jehova mas fuerte.

Mi Ta Haña un Compañera

Segundo Guera Mundial a terminá, portanan di prizon a habri, i mi a cuminsá bek cu mi trabou di pionero, e ministerio di tempu completo. Pero na 1947, mi tata a muri. Pa sostené e famia mi a cuminsá traha seglarmente i tambe mi a siña duna masashi médico. Un abilidad cu lo a bai yuda mi durante un periodo difícil cu ami cu mi casá a enfrentá un 30 aña despues. Pero mi no ta contando e cosnan den volgorde cu nan a sosodé. Promé, laga mi conta boso di mi casá.

Un atardi na 1949 cu mi tabata den Salon di Reino, telefon a ring. Mi a contestá i a tende un stem lief bisa: “Mi nomber ta Christine Genchur. Mi ta un Testigo di Jehova. Mi a muda bin Cleveland pa busca trabou, i mi kier asociá cu un congregacion.” Nos Salon di Reino tabata leu for dje área caminda e tabata biba, pero dor cu mi a gusta su stem, mi a bis’é con pa yega nos salon i a anim’é pa bin reunion e diadomingo ei, dia cu mi mester a duna e discurso público. Diadomingo, mi tabata promé hende na Salon di Reino, pero niun ruman muher desconocí no a presentá. Durante mi discurso, mi a sigui tira bista riba e entrada, pero niun hende no a drenta. E siguiente dia mi a bel e, i el a bisa mi cu e no conocé e sistema di bus bon ainda. Mi a ofrecé pa topa cuné i splik’é e cosnan mihó.

Mi a haña sa cu su mayornan, imigrantenan di Checoslovakia, a cuminsá asociá cu Studiantenan di Bijbel despues cu nan a lesa e foyeto chikitu Unda e Mortonan Ta? Su mayornan a bautisá na 1935. Na 1938, Christine su tata a bira sirbidó di compania (awor superintendente presidente) dje congregacion di Testigonan di Jehova na Clymer, Pennsylvania, Merca, i na 1947, Christine a bautisá na edad di 16 aña. No a tuma masha tempu pa mi namorá di e ruman muher bunita i spiritual aki. Nos a casa dia 24 di juni 1950, i for di e tempu ei Christine ta mi partner fiel, semper dispuesto pa pone interesnan dje Reino di Dios na promé lugá. Mi ta gradicidu na Jehova cu e compañera capas aki a bai di acuerdo pa djoin su bida na esun di mi.—Proverbionan 31:10.

 Un Sorpresa Grandi

Dia 1 di november 1951, nos a cuminsá traha pionero huntu. Dos aña despues na un congreso na Toledo, Ohio, rumannan Hugo Riemer i Albert Schroeder a papia cu un grupo di pionero cu tabata interesá den e sirbishi di misionero. Nos tabata entre nan. Nos a ser animá pa sigui traha pionero na Cleveland, pero e siguiente luna mes, nos a ricibí un sorpresa grandi: un invitacion pa asistí n’e di 23 klas dje Scol Bíblico di Galad di Watchtower, cu lo a cuminsá na februari 1954!

Ora nos tabata den auto bayendo e Scol di Galad, cu e tempu ei tabata na South Lansing, New York, Christine tabata asina nervioso cu constant e tabata bisa mi: “Core mas poco-poco!” Mi a contestá: “Christine, si mi core un tiki mas poco-poco, nos lo ta pará.” Pero despues ora nos a yega n’e campus, nos a sinti nos mas trankil. Ruman Nathan Knorr a yama e grupo di studiante bon biní i a duna nos un tour. Tambe el a splica con nos por a spar awa cu lus, enfatisando cu e cualidad di ta económico ta un birtud ora di cuida interesnan di Reino. E conseho ei a keda pegá den nos mente. Ainda nos ta siguié.

Biahando pa Rio

Pronto nos a gradua, i dia 10 di december 1954, den friu nos a subi avion na New York City, entusiasmá cu e prospecto di bula pa nos asignacion nobo yen di solo, Rio de Janeiro, Brazil. Peter cu Billie Carrbello, compañeronan misionero, a biaha huntu cu nos. E vuelo mester a tuma nos 24 ora, incluyendo pasa di tránsito na Puerto Rico, Venezuela i Belém na nort Brazil. Sin embargo, debí na problema cu motor, a pasa 36 ora promé cu nos a mira Rio de Janeiro bou di nos. Esta un bista maraviyoso! E lusnan dje stad a briya manera diamanta riba un tapijt di felpa pretu, i e lus plateá di luna tabata duna briyo n’e awanan di bahia Guanabara.

Vários miembro dje famia di Betel tabata warda nos na aeropuerto. Despues cu nan a duna nos un caluroso bon biní, nan a hiba nos n’e oficina di sucursal, i mas o ménos 3’or di mardugá nos a bai drumi. Un par di ora despues, e bel di mainta a corda nos cu nos promé dia como misionero a cuminsá!

Un Promé Les

No a dura mashá cu nos a siña un les importante. Nos a pasa un anochi di bishita na cas di un famia Testigo. Ora nos kier a cana bai bek sucursal, e anfitrion no tabata kier: “No, boso no por bai; awa ta cai,” i el a purba insistí pa nos keda drumi. Mi a minimisá su palabranan cu un smile, bisando: “Na nos pais tambe awa sa cai.” I sin mas discusion, nos a bai.

Dor cu Rio ta rondoná cu ceru, rápidamente awa di yobe ta acumulá i ta core drenta e stad i hopi bes ta causa inundacion. Un djis despues nos tabata cana dor di awa cu tabata yega te na nos rudia. Cerca di sucursal, e cayanan a bira riunan brutu, cu awa cu a yega te na nos pechu. Ora cu finalmente nos a yega Betel, nos tabata papa muhá. E siguiente dia, Christine a sintié hopi malu, i el a haña keintura di tífus cu a lagu’é swak pa hopi tempu. No tin nodi bisa cu como misionero nobo, nos mester a haci caso di e conseho di Testigonan local experenciá.

Promé Pasonan den e Trabou di Misionero i Biahero

Despues di e principio un tiki laf aki, nos a cuminsá ansioso den nos ministerio di veld. Nos tabata lesa un presentacion na portugues pa tur hende cu nos a topa, i a parce cu nos progreso den papia portugues tabata cana pareu. Mustrando riba mi un doño di cas tabata bisa Christine: “Mi ta comprendé abo, pero e sí mi no ta comprendé.” Un otro doño di cas tabata  bisa ami: “Mi ta comprendé abo, pero e sí no.” Apesar di esei, nos tabata hopi contentu cu durante e promé simannan ei, nos a haña mas cu 100 abonament riba e Toren di Vigilancia. De facto, vários di nos studiantenan di Bijbel a bautisá durante nos promé aña na Brazil, dunando nos un muestra di con fructífero nos asignacion di misionero lo a bai ta.

Meimei di añanan ’50, hopi congregacion na Brazil no a haña bishita regular di superintendente di circuito debí cu tabatin un scarcedad di ruman cualificá. P’esei, aunke mi tabata siñando e idioma ainda i no a yega di duna un discurso público na portugues, tog nan a asigná mi p’e trabou di circuito den e estado São Paulo na 1956.

Ya cu e promé congregacion cu nos a bishitá tabatin dos aña sin haña bishita di superintendente di circuito, tur hende tabatin expectativanan haltu pa cu e discurso público. Pa prepará e discurso ei, mi a corta paragrafnan for di artículonan di Toren di Vigilancia na portugues i pega nan riba vel di papel. E diadomingo ei Salon di Reino tabata yenyen. Tabatin hende sintá asta riba plataforma, nan tur tabata spera riba e gran evento. E discurso, of mas bien e lesamentu, a cuminsá. De bes en cuando mi tabata djis hisa mi cabes i wak, i pa mi sorpresa ningun hende no tabata move, ni sikiera e muchanan. Tur tabata sinta wak mi cu wowo hanchu habrí. Mi a pensa: ‘Homber, Valentino, esta bon bo portugues a bira! E hendenan aki ta prestando atencion.’ Añanan despues, ora mi a bishitá e congregacion ei atrobe, un ruman homber cu tabata presente durante e promé bishita ei a bisa: “Bo ta corda e discurso público aya cu bo a duna? Nos no a comprendé niun palabra di dje.” Mi a confesá cu mi tampoco no a comprendé mashá dje discurso ei.

Hopi bes durante e promé aña ei den e trabou di circuito, mi a lesa Zacarías 4:6. E palabranan, ‘no pa medio di poder, sino pa medio di mi spiritu,’ a recordá mi cu Jehova su spiritu ta e único motibu pakico e trabou di Reino a progresá. I el a progresá, apesar di nos limitacionnan obvio.

Desafio i Bendicionnan a lo Largu di Caminda

Traha e trabou di circuito a nificá biaha dor di henter e pais lastrando tikmashin, caha di literatura, maleta i tas di sirbishi. Sabiamente Christine a numerá nos ekipahe pa asina nos no pasa niun por alto ora di core baha for di un bus i drenta otro. Biaha den bus pa 15 ora largu riba caminda di tera promé cu nos yega nos siguiente destinacion, no tabata algu straño pa nos. Tin biaha nos tabata bira hopi nervioso, foral ora dos bus cu ta bai den direccion contrali crusa otro riba un brug instabil, i ta pasa asina cerca di otro cu casi nan ta mishi cu otro. Tambe nos a biaha cu trein, boto i riba cabai.

Na 1961 nos a cuminsá sirbi den e trabou di distrito, biahando di circuito pa circuito en bes di congregacion pa congregacion. Vários anochi pa siman nos a pasa película cu e organisacion di Jehova a producí, i cada bes na un sitio diferente. Hopi bes nos mester a actua lihé pa ta mas sabí cu clero local cu kier a stroba e shownan aki. Den un pueblo, e sacerdote a intimidá un doño di un sala i a obligu’é cancelá e contract cu el a cera cu nos. Despues di a busca dianan largu nos a haña un otro lugá, pero nos no a bisa ningun hende i a sigui invitá tur hende p’e sitio original. Promé cu e programa a cuminsá, Christine a bai na e sala ei i discretamente el a dirigí esnan cu kier a wak e film, na e localidad nobo. E anochi ei, 150 hende a wak e película cu tabatin e título apropiado E Sociedad di Mundu Nobo den Accion.

Aunke e trabou biahero den áreanan isolá tabata duru de bes en cuando, e rumannan humilde cu a biba einan a apreciá nos bishitanan asina tantu i tabata asina hospitalario pa compartí nan casnan humilde cu nos, cu semper nos a gradicí Jehova cu nos por tabata huntu cu nan. Cera amistad cu nan a resultá den bendicionnan dushi pa nos. (Proverbionan 19:17; Ageo 2:7) P’esei, esta tristu nos tabata ora cu despues di a sirbi pa mas cu 21 aña na Brazil, nos dianan como misionero a yega na un fin!

 Durante un Crísis, Jehova A Mustra Nos e Caminda

Na 1975, Christine a haci un operacion. Nos a reanudá nos trabou biahero, pero Christine su salú a empeorá. A parce cu ta mihó nos bolbe Merca p’e por a haña cuido médico. Na april 1976, nos a yega Long Beach, California, i a keda cerca mi mama. Despues di a biba den estranheria pa dos década, nos no tabata sa con pa trata cu e situacion aki. Mi a cuminsá duna masashi, i loke mi a gana cu e trabou ei a sostené nos. Gobiernu di California a paga pa Christine drenta hospital, pero einan e tabata sinti su mes mas swak tur dia, pasobra e dokternan a nenga di trat’é sin sanger. Desesperá, nos a roga Jehova pa guia.

Un atardi cu mi tabata den sirbishi, mi a mira un oficina di dokter, i di ripiente mi a dicidí di bai paden. Maske e dokter tabata bayendo cas, el a laga mi drenta den su oficina i nos a papia dos ora largu. Despues el a bisa: “Mi ta apreciá boso trabou como misionero, i lo mi trata bo casá pornada i sin transfusion di sanger.” Mi no por a kere mi oreanan.

E dokter amabel aki cu a resultá di ta un specialista respetá, a transferí Christine na un hospital caminda e tabata traha. I bou di su cuido profesional, no a dura mashá cu Christine su condicion a mehorá. Esta gradicidu nos tabata cu Jehova a mustra nos e caminda durante e periodo difícil ei!

Asignacionnan Nobo

Segun cu Christine a recobrá forsa, nos a sirbi como pionero i tabatin e goso di yuda diferente hende na Long Beach bira adoradó di Jehova. Na 1982, Sociedad a pidi nos pa haci e trabou di circuito na Merca. Tur dia nos tabata gradicí Jehova cu el a usa nos atrobe den e trabou biahero, e tipo di ministerio cu nos a stima. Nos a sirbi na California i despues na New England, caminda e circuito a encerá algun congregacion di abla portugues. Despues el a incluí Bermuda tambe.

Despues di cuater aña refrescante nos a ricibí un otro asignacion. Nos a ser invitá pa sirbi como pionero special caminda cu nos kier. Maske nos tabata tristu pasobra nos mester a bandoná e trabou biahero, nos tabata determiná pa sigui padilanti den nos asignacion nobo. Pero unda? Den mi trabou biahero, mi a ripará cu e congregacion di abla portugues na New Bedford, Massachusetts tabatin mester di yudansa. Pues, nos a coge rumbo pa New Bedford.

Ora nos a yega, e congregacion a organisá un grandioso fiesta di bon biní pa nos. Esei sí a laga nos sinti cu nos ta bon biní! El a pone nos wowo yena cu awa. Un pareha hóben cu dos yu chikitu bondadosamente a tuma nos den nan cas te ora nos a haña nos propio apartamento. Sin duda, Jehova a bendicioná e asignacion aki di pionero special mas cu nos a verwagt. Desde 1986 nos a yuda mas o ménos 40 persona den e stad aki bira Testigo. Nan ta nos famia spiritual. Ademas, mi tabatin e goso di observá cincu ruman homber local crece bira wardadó bondadoso dje tou. Tabata manera sirbi den un asignacion di misionero fructífero.

Ora nos wak atras, nos ta alegrá cu nos a sirbi Jehova desde nos hubentud padilanti i a haci e berdad nos caminda di bida. Ta cierto cu edad i enfermedad ta afectá nos actualmente, pero sigui padilanti den e caminda di Jehova ainda ta duna nos forsa i goso.

[Plachi na página 26]

Recien yegá na Rio de Janeiro

[Plachi na página 28]

Nos famia spiritual na New Bedford, Massachusetts