Spiritismo i e Búskeda pa Berdadero Spiritualidad

NOS tur tin necesidadnan spiritual i tambe material. P’esei hopi hende ta haci preguntanan manera: Ki propósito bida tin, di con hende ta sufri i kico ta sosodé cu nos ora nos muri? Hopi hende sincero ta busca contesta pa e preguntanan aki i pa otronan similar na sesionnan spiritista caminda nan ta consultá cu medium, cu e speransa di comunicá cu spiritu di hende morto. E práctica aki yama spiritismo.

Den hopi pais bo ta haña hende cu ta kere den spiritismo, i nan ta reuní den congregacion i iglesianan. Na Brazil por ehempel, ta ser calculá cu 4.000.000 spiritista ta sigui e siñansanan formulá dor di Hyppolyte Léon Denizard Rivail, un educadó i filósofo frances di siglo 19 cu a skirbi bou dje nomber Allan Kardec. Kardec a cuminsá interesá den asuntunan di spiritismo na 1854. Despues el a haci pregunta na mediumnan di hopi lugá i a registrá e contestanan den e buki cu yama E Buki di Spiritu, publicá na 1857. Dos otro obra cu el a skirbi ta E Buki di Medium i E Evangelio Segun Spiritismo.

Hende a conectá spiritismo cu prácticanan religioso manera vudu, bruheria, magia of satanismo. Sin embargo, hende cu ta sigui siñansanan di Allan Kardec ta bisa cu nan creencianan ta diferente. Hopi bes nan publicacionnan ta cita Bijbel, i nan ta referí na Jesus como “e guia i ehempel pa henter humanidad.” Nan ta bisa cu e siñansanan di Jesus ta “e expresionnan mas puru di ley divino.” Allan Kardec a considerá loke spiritistanan a skirbi como e di tres revelacion dje ley di Dios na humanidad, i cu e siñansanan di Moises i di Jesus ta e promé dosnan.

Spiritismo ta atraé hopi hende pasobra e ta enfatisá amor pa próhimo i obranan caritativo. Un creencia spiritista ta: “Sin caridad no tin salbacion.” Hopi spiritista ta activo den trabou social, promoviendo hospital, scol i otro institucionnan. E esfuersonan ei ta di encomendá. Sin embargo, con e siñansanan di spiritista ta na comparacion cu e siñansanan di Jesus registrá den Bijbel? Laga nos tuma dos ehempel: e speransa pa e mortonan i e causa di sufrimentu.

Ki Speransa Tin pa e Mortonan?

Hopi spiritista ta kere den reencarnacion. Un publicacion spiritista ta declará: “Reencarnacion ta e único doctrina cu ta cumpli cu nos idea di husticia divino; e ta e único doctrina cu por splica e futuro i fortalecé nos speransanan.” Spiritistanan ta splica cu ora un persona muri, e alma of “spiritu encarná” ta bandoná e curpa, mescos cu un barbulètè ta sali for di su pop. Nan ta kere cu despues, e spiritunan aki ta reencarná como hende pa limpia picánan cu e persona a cometé den un bida anterior. Pero e persona no por corda e picánan aki cu el a cometé den su bida anterior. E Evangelio Segun Spiritismo ta bisa: “Dios a haña ta bon pa un velo tapa e pasado.”

Allan Kardec a skirbi cu “nenga reencarnacion ta mescos cu nenga e palabranan di Cristo.” Sin embargo, nunca Jesus a pronunciá e palabra “reencarnacion” ni nunca el a mencioná tal concepto. (Mira “Bijbel Ta Siña Reencarnacion?” na página 22.) En bes di esei, Jesus a siña di resureccion dje mortonan. Durante su ministerio terenal el a resucitá tres hende: e yu homber di un biuda na Nain, e yu muher dje presidente di un snoa i su amigu  íntimo Lázaro. (Marco 5:22-24, 35-43; Lucas 7:11-15; Juan 11:1-44) Laga nos considerá un di e sucesonan remarcabel aki i mira kico Jesus tabata kier men cu “resureccion.”

E Resureccion di Lázaro

Jesus a tende cu su amigu Lázaro tabata malu. Dos dia despues el a bisa su disipelnan: “Lázaro nos amigu a bai sosegá, pero mi ta bai ei pa lant’é for di soño.” E disipelnan no a comprendé loke Jesus tabata kier men, p’esei el a bisa nan francamente: “Lázaro a muri.” Ora cu por fin Jesus a yega n’e graf di Lázaro, e homber tabatin cuater dia morto. Tog Jesus a manda pa kita e piedra cu tabata cera entrada dje graf. Anto el a grita: “Lázaro, sali!” N’e momento ei, algu maraviyoso a sosodé. “E homber cu tabata morto a sali pafó cu su pia i mannan lorá den benda, i su cara tabata mará cu un paña. Jesus a bisa nan: ‘Los e i lagu’é bai.’”—Juan 11:5, 6, 11-14, 43, 44.

Ta claro cu esaki no tabata reencarnacion. Jesus a bisa cu Lázaro tabata drumí, inconciente. Manera Bijbel ta expres’é, ‘su pensamentunan a perecé.’ E ‘no tabata conciente di nada en absoluto.’ (Salmo 146:4; Eclesiástes 9:5) Lázaro resucitá no tabata un persona diferente cu un spiritu reencarná. E tabatin e mésun personalidad, e mésun edad i e mésun recuerdonan. El a reanudá su bida caminda el a lagu’é prematuramente, i a regresá cerca su sernan kerí cu a lamentá su morto.—Juan 12:1, 2.

Despues, Lázaro a muri atrobe. Ki propósito su resureccion tabatin anto? Esaki, huntu cu e otro resureccionnan cu Jesus a efectuá, ta reforsá nos confiansa den Dios su promesa cu Su fiel sirbidónan lo ser lantá for di morto na Su debido tempu. E milagernan aki di Jesus ta duna hopi mas peso na su palabranan: “Ami ta e resureccion i e bida. Esun cu ehercé fe den mi, asta si e muri, lo biba.”—Juan 11:25.

Relacioná cu e futuro resureccion ei, Jesus a bisa: “E ora ta bini den cua tur esnan cu ta den grafnan conmemorativo lo tende [mi] bos i lo sali, esnan cu a haci bon cosnan pa un resureccion di bida, esnan cu a practicá cosnan baho pa un resureccion di huicio.” (Juan 5:28, 29) Mescos cu tabata e caso cu Lázaro, esei lo ta un resureccion di hende morto. Esei lo no ta un reunimentu di spiritunan conciente cu curpanan resucitá cu a descomponé i cu podisé asta a bira parti di otro organismonan bibu. E Creador di shelu i tera, kende tin sabiduria i poder infinito, tin e capacidad pa resucitá e mortonan.

E doctrina di resureccion cu Jesucristo a siña no ta revelá Dios su amor profundo pa hende individual? Pero kico dje di dos pregunta mencioná anteriormente?

Kico Ta e Causa di Sufrimentu?

Hopi sufrimentu humano ta resultado di cosnan cu hende imprudente, sin experencia of asta malbado ta haci. Pero, kico di sucesonan trágico cu bo no por tene hende directamente responsabel p’e? Por ehempel, di con accidente i desasternan natural ta sosodé? Di con algun mucha ta nace cu defecto? Allan Kardec a considerá e cosnan ei como castigu. El a skirbi: “Si nos ta haña castigu ta pasobra nos mester a haci malu. Si e malu ei no ta dje bida actual, e mester ta bini di un existencia den pasado.” Spiritistanan a ser siñá pa resa:  “Señor, Bo ta husticia completo. E malesa cu Bo a scoge pa manda pa mi mester ta loke mi merecé . . . Mi ta acept’é como expiacion di mi pasado i como un test di mi fe i sumision na Bo boluntad bendicioná.”—E Evangelio Segun Spiritismo.

Jesus a siña un cos asina? No. Jesus tabata bon conocí cu e declaracion bíblico: “Tempu i suceso imprevisto ta cai riba nan tur.” (Eclesiástes 9:11) E tabata sa cu tin biaha cos malu ta sosodé. Nan no mester ta castigu pa picá.

Considerá e suceso aki den bida di Jesus: “Ora [Jesus] tabata pasando den e caminda el a mira un homber ciegu for di nacementu. I su disipelnan a puntr’é: ‘Rabi, ken a peca, e homber ei of su mayornan, di manera cu el a nace ciegu?’” E contesta cu Jesus a duna tabata masha instructivo: “Ni e homber aki ni su mayornan no a peca, sino tabata p’e obranan di Dios ser manifestá den su caso. Despues di a bisa e cosnan aki, el a scupi riba suela i a traha klei cu e scupi, i a pone e klei riba e wowonan dje homber i a bis’é: ‘Bai laba den e tanki di Siloam.’ . . . I pues el a bai i a laba, i a bolbe bek mirando.”—Juan 9:1-3, 6, 7.

Jesus su palabranan a mustra cu ni e homber ni su mayornan no tabata responsabel p’e echo cu el a nace ciegu. Pues, Jesus no a apoyá e concepto cu hende ta haña castigu pa picá cu nan a cometé den un bida anterior. Ta cierto cu Jesus tabata sa cu tur hende a heredá picá. Pero nan a heredá e picá di Adam, no picá cu nan a cometé promé cu nan a nace. Debí n’e picá di Adam, tur hende a nace físicamente imperfecto, sometí na malesa i morto. (Job 14:4; Salmo 51:5; Romanonan 5:12; 9:11) De facto, ta pa remediá e situacion ei, Jehova a manda Jesus. Juan Bautista a bisa cu Jesus tabata “e Lamchi di Dios cu ta kita picá di mundu!”—Juan 1:29. *

Tuma nota tambe cu Jesus no a bisa cu  deliberadamente Dios a laga e homber nace ciegu pa asina Jesus por a pasa i cur’é un dia. Ki un acto cruel i cínico esei lo tabata! Esei lo a trece alabansa pa Dios? No. Mas bien, e curacion milagroso dje homber ciegu a sirbi pa ‘manifestá e obranan di Dios.’ Mescos cu den caso di e hopi otro curacionnan cu Jesus a efectuá, esaki a reflehá Dios su amor sincero pa humanidad cu ta sufri, i a confirmá cu Su promesa pa trece un fin na tur enfermedad i sufrimentu humano na Su debido tempu ta digno di confiansa.—Isaías 33:24.

No ta un consuelo pa haña sa cu en bes di causa sufrimentu, nos Tata celestial ta “duna bon cosnan na esnan cu pidié”? (Mateo 7:11) Ta ki un gloria e Haltísimo lo ricibí ora cu wowo dje ciegunan i tambe orea dje surdunan habri i e lam por cana, bula i core!—Isaías 35:5, 6.

Satisfaciendo Nos Necesidadnan Spiritual

Jesus a declará: “Hende tin cu biba, no di pan so, sino di tur expresion cu ta sali for dje boca di Jehova.” (Mateo 4:4) Sí, nos necesidadnan spiritual ta ser satisfacé ora nos lesa e Palabra di Dios, Bijbel, i hiba nos bida na armonia cuné. Consultá mediumnan spiritista realmente no ta satisfacé nos necesidadnan spiritual. De echo, loke Allan Kardec a referí na dje como e promé revelacion di e ley di Dios, ta condená e práctica ei bon cla.—Deuteronomio 18:10-13.

Hopi hende, incluso spiritista, ta reconocé cu Dios ta e Ser Supremo, eterno, infinitamente perfecto, bondadoso, bon i hustu. Pero Bijbel ta revelá hopi mas. E ta saca na cla cu Dios tin un nomber personal, esta, Jehova, cu nos tin cu onra mescos cu Jesus a haci. (Mateo 6:9; Juan 17:6) E ta describí Dios como un persona real cu ken hende por tin un relacion íntimo. (Romanonan 8:38, 39) Dor di lesa Bijbel, nos ta haña sa cu Dios ta misericordioso i cu e “no a haci cu nos ni conforme cu nos picánan; ni conforme cu nos erornan e no a trece riba nos loke nos merecé.” (Salmo 103:10) Mediante su Palabra skirbí, e Señor Soberano Jehova ta revelá su amor, su supremacia i razonabilidad. E ta Esun cu ta guia i protehá humanidad obediente. Siña conocé Jehova i su Yu Jesucristo “ta nificá bida eterno.”—Juan 17:3.

Bijbel ta proveé tur informacion cu nos tin mester tocante Dios su propósito, i e ta conta nos loke nos tin cu haci si nos ta deseá di agrad’é. Un examinacion cuidadoso di Bijbel ta duna contesta cierto i satisfaciente pa nos preguntanan. Tambe Bijbel ta duna nos guia den loke ta bon i malu, i e ta duna un speransa sólido. E ta sigurá nos cu den futuro cercano, Dios lo “seca tur lágrima di [humanidad su] wowo, i lo no tin morto mas, ni lo no tin lamento ni sclamacion ni dolor mas. E cosnan anterior a pasa bai.” (Revelacion 21:3, 4) Mediante Jesucristo, Jehova lo libra humanidad for di nan picá heredá i imperfeccion, i hende obediente lo heredá bida eterno riba un tera paradísico. N’e tempu ei, tantu nan necesidadnan físico como esnan spiritual lo ser completamente satisfacé.—Salmo 37:10, 11, 29; Proverbionan 2:21, 22; Mateo 5:5.

[Nota]

[Kuadro na página 22]

BIJBEL TA SIÑA REENCARNACION?

Tin texto di Bijbel cu ta apoyá e doctrina di reencarnacion? Considerá algun dje textonan cu e hendenan cu ta kere den e doctrina aki a usa:

“Pasobra tur, e Profetanan i e Ley, a profetisá te cu Juan . . . E mes ta ‘Elías cu ta destiná pa bini.’”—Mateo 11:13, 14.

Ta Elías a bolbe nace den e persona di Juan Bautista? Ora a puntr’é: “Bo ta Elías?” Juan a contestá bon cla: “Mi no ta.” (Juan 1:21) Sin embargo, Bijbel a profetisá sí cu Juan lo a bai dilanti di e Mesías “cu e spiritu i poder di Elías.” (Lucas 1:17; Malakías 4:5, 6) Cu otro palabra, Juan Bautista tabata Elías den e sentido cu el a cumpli cu un trabou comparabel cu esun di Elías.

“A ménos cu un hende nace di nobo, e no por mira e reino di Dios. No straña pasobra mi a bisa bo: Boso tin cu nace di nobo.”—Juan 3:3, 7.

Despues un dje apostelnan a skirbi: “Bendishoná sea e Dios i Tata di nos Señor Jesu-Cristo, Kende, segun Su gran miserikòrdia, a hasi nos nase di nobo den un speransa bibu pa medio di e resurekshon di Jesu-Cristo for di e mortonan.” (1 Pedro 1:3, 4, Beibel Santu; Juan 1:12, 13) Ta bisto anto, cu e nacementu di nobo cu Jesus a referí na dje tabata un experencia spiritual cu lo a tuma lugá miéntras su siguidónan tabata na bida ainda, i no un futuro reencarnacion.

“Ora un hende ta morto, e ta biba pa semper: ora mi dianan di existencia riba Tera yega na un fin, lo mi spera, ya cu lo mi bolbe atrobe.”—Un “traduccion griego” di Job 14:14 citá den E Evangelio Segun Spiritismo.

Beibel Santu ta traducí e versículo ei asin’akí: “Si un hende muri, lo e bolbe biba? Tur e dianan di mi lucha lo mi spera, te ora mi liberashon bin.” Lesa e contexto di e versículo ei. Lo bo mira cu e mortonan ta warda den graf pa nan “liberashon.” (Versículo 13) Miéntras nan ta warda, nan no ta existí. “Un hende cu muri ta disparcé completamente; i ora un hende mortal cai, e no ta existí mas.”—Job 14:10, version Bagster di Septuaginta.

[Plachi na página 21]

E speransa di resureccion ta revelá Dios su interes profundo den nos como hende individual

[Plachinan na página 23]

Dios lo trece un fin na tur sufrimentu humano