Yudando Biudanan Pasa dor di Nan Pruebanan

UN DJE relatonan mihó conocí tocante biuda ta e relato bíblico di Rut i su suegra Noemí. Tur dos tabata biuda. Pero Noemí no a perde su esposo so, ma su dos yu hombernan tambe. Un di nan tabata casá cu Rut. Dor cu nan a forma parti di un sociedad cu a biba di agricultura cu a dependé hopi di hende homber, nan situacion tabata berdaderamente trágico.—Rut 1:1-5, 20, 21.

Sin embargo, Noemí su suegra Rut tabata un gran amiga i consoladó p’e. Rut a nenga di bandon’é. Cu tempu Rut a resultá di ta “mihó cu shete yu homber” pa Noemí, no djis dor dje amor profundo cu e tabatin pa Noemí, sino tambe dor dje amor cu e tabatin pa Dios. (Rut 4:15) Ora Noemí a recomendá Rut p’e bai bek cerca su famia i amigunan moabita, Rut a contestá cu un dje expresionnan di lealtad mas conmovedor cu a yega di ser registrá: “Unda cu bo bai lo mi bai, i unda cu bo pasa anochi lo mi pasa anochi. Bo pueblo lo ta mi pueblo, i bo Dios mi Dios. Caminda bo muri  lo mi muri, i ei nan lo dera mi. Jehova haci asina i mas cu mi si cualkier cos fuera di morto causa un separacion entre ami cu bo.”—Rut 1:16, 17.

Rut su actitud no a keda sin hala atencion di Jehova Dios. El a bendicioná e famia chikitu di Noemí cu Rut, i cu tempu Rut a casa cu e israelita Boaz. Noemí a cuida nan yu, cu a bira antepasado di Jesucristo, manera su propio yu. E relato aki ta un ehempel di cuantu Jehova ta apreciá biudanan cu ta hala pega na dje i confi’é. Ademas Bijbel ta bisa nos cu e ta balorá hende cu ta yuda biudanan amorosamente den nan pruebanan. Pues, con nos awe por yuda e biudanan entre nos?—Rut 4:13, 16-22; Salmo 68:5.

Yudansa Concreto, Pero Sin Ser Dominante

Ora nos ofrecé un biuda yudansa, ta mihó si nos hacié na un manera cla i concreto, pero sin ser dominante. Evitá di bisa cos vago manera: “Laga mi sa si bo mester di ki-cu-ta.” Esei por nificá mescos cu bisa un hende cu tin friu i hamber: “Tene bo curpa cayente i bon alimentá,” anto sin haci nada pa yud’é. (Santiago 2:16) Mayoria hende no ta pidi yudansa ora nan tin mester di algu. Na lugá di esei nan ta sufri den silencio. Yuda hende asina ta exigí dicernimentu, esta, capta kico nan necesidadnan ta. Di otro banda, si bo tuma demasiado iniciativa, esta, tuma control riba bida di e biuda, esei lo por hiba na conflicto of cu un di boso ta sinti ofendí. P’esei Bijbel ta enfatisá e importancia di ta balansá den nos trato cu otro hende. Maske Bijbel ta animá nos pa mustra interes personal inegoista den hende, e ta recordá nos pa no mete den asuntu di otro hende.—Filipensenan 2:4; 1 Pedro 4:15.

Rut a desplegá un actitud balansá asina cu Noemí. Maske el a keda lealmente na banda di su suegra, Rut no a pone preshon ni no a domin’é. El a tuma iniciativa sabí, por ehempel pa obtené cuminda p’e cu Noemí, pero el a sigui instruccion di Noemí tambe.—Rut 2:2, 22, 23; 3:1-6.

Claro cu necesidadnan por varia hopi di un hende pa otro. Sandra, mencioná anteriormente, ta bisa: “Mi tabatin loke mi tabatin mester den mi afliccion: amigunan masha stimá i amoroso cu a rondoná mi.” Di otro banda, Elaine, mencioná anteriormente, tabatin mester di privacidad. P’esei, yuda kier men dicerní i haña un balansa entre respetá privacidad dje hende i ser disponibel pa yuda ora ta necesario.

Apoyo di Famia

Si e biuda tin un famia caluroso i amoroso, nan por yud’é hopi p’e sinti e confiansa cu lo e ta capas pa enfrentá e situacion cu éxito. Apesar cu algun miembro dje famia lo por ta den posicion pa ofrecé mas yudansa cu otronan, nan tur por contribuí cu yudansa. “Si cualkier biuda tin yu of nietu, laga esakinan siña promé pa practicá debocion na Dios den nan mes famia di cas i sigui paga un debido compensacion na nan mayornan i welonan, pasobra esaki ta aceptabel den bista di Dios.”—1 Timoteo 5:4.

Den hopi caso, apoyo financiero of “compensacion” lo no ta necesario. Algun biuda tin suficiente cen pa percurá pa nan mes, i algun otro ta bini na remarke pa ricibí penshon di gobiernu, manera tin den algun pais. Pero si e biuda ta den necesidad, e famianan tin  cu yuda. Si un biuda no tin famia cercano pa ofrec’é yudansa, of si su famianan no por, e Scritura ta animá su compañeronan di creencia pa sali na su yudansa: “E forma di adoracion cu ta limpi i incontaminá desde e punto di bista di nos Dios i Tata ta esaki: cuida huérfanonan i biudanan den nan tribulacion.”—Santiago 1:27.

Esnan cu ta cumpli cu e principionan bíblico aki, di berdad ta “onra biudanan.” (1 Timoteo 5:3) Onra un persona kier men básicamente, mustra respet p’e. Hende cu ta ser onrá ta sinti nan mes balorá, apreciá, digno. Nan no ta sinti cu hende ta yuda nan djis pa cumpli cu nan deber. Maske Rut mes tabata biuda pa un temporada, el a onra Noemí di berdad dor di haci sigur, boluntariamente i cu amor, cu Noemí tabatin loke e tabatin mester den sentido físico i emocional. De echo, Rut su actitud a pone cu den poco tempu el a haña un excelente reputacion, di manera cu su futuro esposo a bis’é: “Tur hende den e stad di mi pueblo ta conciente cu bo ta un excelente muher.” (Rut 3:11, nota na pia di página) Na mes momento, Noemí su amor pa Dios, su caracter razonabel i fácil pa trata cuné, i su aprecio profundo pa e esfuersonan cu Rut tabata haci p’e, sin duda a pone cu yuda Noemí tabata un placer pa Rut. Esta un ehempel excelente Noemí ta pa biudanan djawe!

Bira Íntimo cu Dios

Claro cu miembronan di famia no por yena e bashí cu ta keda atras despues cu bo compañero muri. P’e motibu ei ta importante pa e persona cu keda atras bira íntimo principalmente cu “e Tata di tierno misericordia i e Dios di tur consuelo, cu ta consolá nos den tur nos tribulacion.” (2 Corintionan 1:3, 4) Wak e caso di Ana, un biuda deboto cu tabatin 84 aña tempu cu Jesus a nace.

Ora Ana su casá a muri despues cu nan tabatin apénas 7 aña casá, el a acudí na Jehova pa haña consuelo. “Nunca [e] no tabata falta den e tempel, rindiendo sirbishi sagrado anochi i di dia cu yunamentu i súplica.” (Lucas 2:36, 37) Jehova a respondé na Ana su debocion na Dios? Sí. Jehova a demostrá su amor p’e na un manera masha special dor di permitié mira e baby cu lo a crece bira e Salbador di mundu. Esaki a emocioná i consolá Ana mashá! Claramente, el a experimentá e berdad di Salmo 37:4: “Haña deleite exkisito den Jehova, i lo e duna bo e peticionnan di bo curason.”

Dios Ta Obra pa Medio di Compañeronan Cristian

Elaine ta bisa: “Pa hopi tempu despues cu David a muri, mi tabatin un dolor manera ta un cuchú ta troce den mi pechu. Mi a kere cu ta indigestion. Un dia e dolor a bira asina fuerte cu mi a kere cu lo mi mester bai dokter. Un ruman muher amiga cu dicernimentu a sugerí cu kisas duele tabata hunga un rol, i el a animá mi pidi Jehova yudansa i consuelo. Mi a sigui su conseho e momento ei mes, haciendo un oracion silencioso pero sincero, pa pidi Jehova sostené mi den mi duele. I el a hacié!” Elaine a cuminsá sinti mihó, i poco tempu despues asta su dolor a bai.

Specialmente ancianonan di congregacion por ofrecé biudanan den duelo nan amistad den un manera bondadoso. Dor di duna nan apoyo i consuelo spiritual regular, cu tacto i dicernimentu, ancianonan por yuda nan keda íntimo cu Jehova apesar di nan pruebanan. Ora ta necesario, ancianonan por yuda regla apoyo material tambe. Ancianonan asina, compasivo i cu dicernimentu, di berdad ta bira “un lugá di sconde for di bientu.”—Isaías 32:2; Echonan 6:1-3.

Consuelo Permanente di e Rey Nobo di Tera

Awor, esun cu e anciana Ana a alegrá di mira rond di dos mil aña pasá, a bira e Rey Mesiánico di Dios su Reino celestial. Pronto e  gobiernu aki lo eliminá tur causa di duele, incluso morto. Relacioná cu esaki, Revelacion 21:3 i 4 ta bisa: “Mira! E tent di Dios ta cu humanidad . . . I lo e seca tur lágrima di nan wowo, i lo no tin morto mas, ni lo no tin lamento ni sclamacion ni dolor mas. E cosnan anterior a pasa bai.” Bo a nota cu e pasashi aki ta referí na “humanidad”? Sí, hende ta bai ser librá di morto i tur e lamentacion i sclamacion cu e ta trece cuné.

Pero tin mas bon noticia ainda! Bijbel ta primintí un resureccion di hende morto tambe. “E ora ta bini den cua tur esnan cu ta den grafnan conmemorativo lo tende [Jesus] su bos i lo sali.” (Juan 5:28, 29) Mescos cu Lázaro, cu Jesus a lanta for di morto, nan lo sali como ser humano, no como criatura spiritual. (Juan 11:43, 44) Esnan cu ‘haci bon cos’ despues di resucitá lo ser hibá na perfeccion humano, i nan lo experimentá Jehova su cuido paternal personalmente ora e ‘habri su man i satisfacé e deseo di tur cos bibu.’—Salmo 145:16.

Esnan cu a perde un ser kerí den morto i cu ta pone fe den e speransa sigur aki ta haña cu e ta un gran fuente di consuelo. (1 Tesalonicensenan 4:13) Pues, si bo ta un biuda, soru “haci oracion sin stop” pa haña e consuelo i yudansa diario cu bo tin mester pa por hiba bo diferente carganan. (1 Tesalonicensenan 5:17; 1 Pedro 5:7) I tuma tempu tur dia pa lesa e Palabra di Dios, pa Dios su pensamentunan por consolá bo. Si bo haci asina, bo mes lo mira con apesar di tur prueba i reto cu bo ta enfrentá como biuda, di berdad Jehova por yuda bo haña pas.

[Komentario na página 5]

Yuda ta nificá haña un balansa entre respetá un otro hende su privacidad, i t’ei disponibel ora e tin mester di bo

[Plachi na página 7]

Dios a bendicioná Ana, e biuda di edad