Alabá Jehova pa Su Obranan Grandi!

“Mi alma ta engrandecé Jehova . . . pasobra e Poderoso a haci obranan grandi pa mi.”—LUCAS 1:46-49.

1. Pa ki obranan grandi nos ta alabá Jehova corectamente?

JEHOVA merecé alabansa pa su obranan grandi. Ora profeta Moises a conta con Israel a ser liberá di Egipto, el a declará: “Ta boso wowonan a mira tur e hazañanan grandi di Jehova.” (Deuteronomio 11:1-7) Di igual manera, ora angel Gabriel a anunciá e binidero nacementu di Jesus na e mucha muher bírgen, Maria, el a bisa: “Mi alma ta engrandecé Jehova . . . pasobra e Poderoso a haci obranan grandi pa mi.” (Lucas 1:46-49) Como Testigonan di Jehova, nos ta alab’é pa e obranan grandi ei manera e liberacion di Israel for di sclabitud na Egipto i e concepcion milagroso di su Yu stimá.

2. (a) Kico e “propósito eterno” di Dios ta nificá pa humanidad obediente? (b) Kico Juan a experenciá riba e isla di Pátmos?

² Hopi di Jehova su obranan grandi tabata relacioná cu su “propósito eterno” pa bendicioná humanidad obediente mediante e Mesías i su gobernacion di Reino. (Efesionan 3:8-13) E propósito ei tabata desaroyá progresivamente ora cu a permití apostel Juan, cu ya tabata grandi caba, pa wak via un vision dor di un porta habrí den shelu. El a tende un bos manera trompet bisa: “Subi bin aki riba, i lo mi mustra bo loke mester sosodé.” (Revelacion 4:1) Ora e gobiernu di Roma a mand’é den exilio riba e isla di Pátmos ‘pasobra el a papia tocante Dios i a duna testimonio di Jesus,’ Juan a ricibí “un revelacion via Jesucristo.” Loke e apostel a mira i tende a revelá hopi tocante e propósito eterno di Dios, i asina a percurá lus spiritual i animacion na ora pa tur cristian berdadero.—Revelacion 1:1, 9, 10.

3. Ken e 24 ancianonan cu Juan a mira den vision ta representá?

³ Dor dje porta habrí ei den shelu, Juan a mira 24 anciano, entronisá i coroná manera rey. Nan a cai abou dilanti Dios, i a bisa: “Bo ta digno, Jehova, asta nos Dios, pa ricibí e gloria i e onor i e poder, pasobra abo a crea tur cos, i pa causa di bo boluntad nan a existí i a ser creá.” (Revelacion 4:11) E ancianonan ei ta representá tur cristian ungí resucitá den e posicion haltu cu Dios a primintí nan. Nan ta ser conmoví pa alabá Jehova dor di su obranan grandi relacioná cu creacion. Nos tambe ta keda asombrá di e evidencia di Jehova su “poder eterno i Divinidad.” (Romanonan 1:20) I mas nos siña tocante Jehova, mas motibu nos tin pa alab’é pa su obranan grandi.

 Declará Jehova Su Obranan Digno di Alabansa!

4, 5. Duna ehempel di e maneranan cu David a alabá Jehova.

⁴ E salmista David a alabá Dios pa Su obranan grandi. Por ehempel, David a canta: “Alabá Jehova cu melodia, kende ta biba na Síon; anunciá entre e pueblonan su obranan. Mustra mi fabor, o Jehova; mira mi afliccion causá pa esnan cu ta odia mi, o abo cu ta hisa mi di e portanan di morto, pa mi por declará tur bo obranan digno di alabansa den e portanan di e yu muher di Síon.” (Salmo 9:11, 13, 14) Despues cu David a duna Sálomon e mapa di e tempel, David a bendicioná i alabá Dios, bisando: “Di bo, o Jehova, ta e grandesa i poder i bunitesa i excelencia i dignidad . . . Di bo e reino ta, o Jehova, Esun cu tambe bo a halsa como cabes riba tur. . . . I awor, o nos Dios, nos ta gradicí bo i ta alabá bo bunita nomber.”—1 Crónicanan 29:10-13.

⁵ E Scritura bes tras bes ta invitá—sí, urgi—nos pa alabá Dios, mescos cu David a haci. E buki di Salmo tin hopi expresion di alabansa na Dios, i mas o ménos mitar di e canticanan aki ta ser atribuí na David. Constantemente e tabata alabá i gradicí Jehova. (Salmo 69:30) Ademas, for di den pasado a usa composicionnan divinamente inspirá tantu di David como di otro hende, pa alabá Jehova.

6. Con útil e Salmonan inspirá ta proba di ta pa nos?

⁶ Esta balioso e Salmonan ta pa Jehova su adoradónan! Ora nos kier gradicí Dios pa tur su obranan grandi na nos fabor, ta bon pa nos pensa riba e palabranan bunita den e Salmonan. Por ehempel, ora nos lanta for di soño riba un dia nobo, kisas nos ta ser conmoví pa haci expresionnan similar cu esakinan: “Ta bon pa duna gradicimentu na Jehova i pa alabá bo nomber cu melodia, o Haltísimo; pa anunciá mainta tocante bo bondad amoroso i durante anochi tocante bo fieldad, . . . pasobra bo a haci mi alegrá, o Jehova, pa motibu di bo actividad; pa motibu di e obranan di bo man mi ta sclama gososamente.” (Salmo 92:1-4) Ora nos vence un obstáculo cu ta stroba nos di progresá spiritualmente, kisas nos por sinti nos incliná pa expresá nos goso i gratitud den oracion, mescos cu e salmista a haci ora el a canta: “O bini, laga nos sclama gososamente na Jehova! Laga nos grita den triunfo na nos Baranca di salbacion. Laga nos yega dilanti su persona cu gradicimentu; laga nos grita cu melodia den triunfo na dje.”—Salmo 95:1, 2.

7. (a) Kico ta remarcabel tocante hopi cantica cu cristiannan ta canta? (b) Cua ta un motibu pa yega trempan na reunion i keda te final?

⁷ Hopi bes nos ta hisa nos bos den cantica di alabansa na Jehova na reunion di congregacion, asamblea i congresonan. Ta remarcabel cu hopi di e canticanan aki ta basá riba pensamentunan inspirá for di e buki di Salmo. Ki felis nos ta cu nos tin un coleccion moderno di cantica di alabansa na Jehova cu ta masha alentador! Un bon motibu pa yega trempan na nos reunionnan i keda te final ta pa canta cantica di alabansa na Dios, i asina huntu cu compañeronan di adoracion alabá Jehova den cantica i oracion.

 “Alabá Jah!”

8. Kico e palabra “Aleluya” ta implicá, i con e ta ser traducí hopi bes?

⁸ E palabra “Aleluya” ta implicá alabá Jehova, e ta un transliteracion dje expresion hebreo cu casi semper ta ser traducí como: “Alabá Jah.” Por ehempel, na Salmo 135:1-3, nos ta haña e invitacion caluroso i enfático aki: “Alabá Jah! Alabá e nomber di Jehova, ofrecé alabansa, o sirbidónan di Jehova, boso cu ta pará den e cas di Jehova, den e pationan di e cas di nos Dios. Alabá Jah, pasobra Jehova ta bon. Alabá su nomber cu melodia, pasobra e ta agradabel.”

9. Kico ta motivá nos pa alabá Jehova?

⁹ Segun cu nos ta contemplá Dios su obranan maraviyoso di creacion huntu cu tur e obranan cu e ta haciendo pa nos, aprecio sincero ta conmové nos pa alab’é. Ora nos meditá riba e cosnan milagroso cu Jehova a haci pa su pueblo den pasado, nos curason ta motivá nos pa alab’é. I segun cu nos ta meditá riba e promesanan di cosnan maraviyoso cu Jehova lo haci ainda, nos ta busca maneranan pa expresá alabansa i gratitud.

10, 11. Con e echo cu nos ta na bida mes ta duna nos motibu pa alabá Dios?

¹⁰ E echo cu nos ta na bida so ta un motibu válido pa alabá Jah. David a canta: “Lo mi alabá bo [Jehova] pasobra di un manera cu ta inspirá temor mi ta trahá maraviyosamente. Bo obranan ta maraviyoso, manera mi alma sa masha bon.” (Salmo 139:14) Sí, nos ta “trahá maraviyosamente” i nos tin e donnan precioso manera bista, oido i abilidad di pensa. P’esei mes, nos lo no mester biba di tal manera cu nos ta alabá nos Creador? Pablo a expresá e mésun idea ora el a skirbi: “Sea cu boso ta comiendo of bebiendo of haciendo cualkier otro cos, haci tur cos pa e gloria di Dios.”—1 Corintionan 10:31.

¹¹ Nos lo haci tur cos pa e gloria di Jehova si di berdad nos ta stim’é. Jesus a bisa cu e promé mandamentu ta: “Bo tin cu stima Jehova bo Dios cu henter bo curason i cu henter bo alma i cu henter bo mente i cu henter bo forsa.” (Marco 12:30; Deuteronomio 6:5) En berdad nos mester stima Jehova i alab’é como nos Creador i e Dunador di “tur bon don i tur regalo perfecto.” (Santiago 1:17; Isaías 51:13; Echonan 17:28) Al fin i al cabo, nos facultad di razoná, nos capacidad spiritual i nos forsa físico—tur nos atributo i abilidadnan—ta bini di Jehova. Como nos Creador, e ta merecé nos amor i alabansa.

12. Kico bo ta sinti relacioná cu Jehova su obranan grandi i e palabranan di Salmo 40:5?

¹² E obranan grandi di Jehova ta duna nos motibunan incontabel pa stim’é i alab’é! “Hopi cos bo mes a haci, o Jehova mi Dios, asta bo obranan maraviyoso i bo pensamentunan pa cu nos,” David a canta. “No tin ningun cu por ser compará cu bo. Si mi incliná mi mes pa anunciá i papia di nan, nan a bira mas numeroso di loke mi por relatá.” (Salmo 40:5) David no por a relatá tur Jehova su obranan maraviyoso, ni nos tampoco no por. Pero laga nos alabá Dios ki ora cu un di su obranan maraviyoso hala nos atencion.

Obranan Conectá cu Dios Su Propósito Eterno

13. Con nos speransa ta estrechamente relacioná cu Dios su obranan grandi?

¹³ Nos speransa pa futuro ta estrechamente relacioná cu e obranan grandi i digno di alabansa conectá cu Dios su propósito eterno. Despues di e rebelion den Eden, Jehova a duna e promé profecia cu tabata yen di speransa. Dios a dicta sentencia riba e colebra, bisando: “Lo mi pone enemistad entre abo i e muher i entre bo simia i su simia. Lo e machicá bo den cabes i abo lo machik’é den hilchi.” (Génesis 3:15) Speransa den e Simia primintí di e muher a sigui biba den curason di hende fiel despues cu Jehova a haci un obra grandi ora el a protehá Noe i su famia durante e Diluvio mundial cu a eliminá un mundu malbado. (2 Pedro 2:5) Promesanan profético na  hombernan di fe manera Abraham i David a duna mas perspicacia den loke Jehova lo logra mediante e Simia ei.—Génesis 22:15-18; 2 Samuel 7:12.

14. Cua ta e ehempel máximo di Jehova su obranan grandi na fabor di humanidad?

¹⁴ E despliegue máximo di Jehova como esun cu ta haci obranan grandi na fabor di humanidad a tuma lugá ora el a duna su Yu unigénito, e Simia primintí, Jesucristo, como un sacrificio di rescate. (Juan 3: 16; Echonan 2:29-36) E rescate a proveé e base pa reconciliacion cu Dios. (Mateo 20:28; Romanonan 5:11) Jehova a reuní e proménan cu a ser reconciliá huntu den e congregacion cristian, establecí na Pentecoste aña 33 E.C. Cu yudansa di e spiritu santu, nan a predicá e bon nobo tur caminda, mustrando con e morto i resureccion di Jesus ta habri caminda pa humanidad obediente experenciá bendicionnan eterno bou di e gobernacion di e Reino celestial di Dios.

15. Con Jehova a actua den un manera maraviyoso den nos dia?

¹⁵ Den nos dia, Jehova a actua den un manera maraviyoso pa reuní e último ungínan cristian. E tin e bientunan di destruccion wantá pa permití e resto di e 144.000 ser seyá, kendenan lo goberná cu Cristo den shelu. (Revelacion 7:1-4; 20:6) Dios a haci sigur cu e cristiannan ungí a ser liberá for di sclabitud spiritual na “Babilonia e Grandi,” e imperio mundial di religion falsu. (Revelacion 17:1-5) Kico e liberacion aki na 1919 i e proteccion divino cu nan a experenciá desde e tempu ei a permití e resto ungí haci? Nan a logra laga nan lus briya dunando un testimonio final promé cu Jehova pone un fin na Satanas su sistema di cosnan malbado durante e “tribulacion grandi” cu ta acercando rápidamente.— Mateo 24:21; Daniel 12:3; Revelacion 7:14.

16. Kico ta tumando lugá awendia como resultado di e trabou mundial di predicá e Reino?

¹⁶ Jehova su Testigonan ungí, cu celo a hiba delantera den e trabou mundial di predicá e Reino. Esaki a resultá den un aumento den e cantidad di “otro carné” cu awor ta bira adoradó di Jehova. (Juan 10:16) Nos ta alegrá cu ainda tin oportunidad pa e mansunan di tera uni cu nos den alabá Jehova. Esnan cu ta respondé na e invitacion pa “bini” ta den fila pa ricibí proteccion atrabes dje tribulacion grandi, cu e prospecto di rindi alabansa na Jehova pa henter eternidad.—Revelacion 22:17.

Miles di Hende Ta Basha Bai na Adoracion Berdadero

17. (a) Con Jehova ta haciendo obranan grandi en coneccion cu nos actividad di predicá? (b) Con Zacarías 8:23 ta cumpli?

¹⁷ Awor Jehova ta haciendo obranan grandi i digno di alabansa en coneccion cu nos actividad di predicá. (Marco 13:10) Den añanan reciente el a ‘habri portanan grandi cu ta hiba na actividad.’ (1 Corintionan 16:9) Esaki a habri caminda pa e bon nobo ser proclamá den teritorionan inmenso caminda ántes enemigunan di e berdad tabata stroba. Hopi hende cu un tempu a biba den scuridad spiritual ta respondé awor na e invitacion pa alabá Jehova. Nan ta cumpli cu e palabranan profético aki: “Esaki ta loke Jehova di ehércitonan a bisa: ‘Den e dianan ei lo sosodé cu dies homber di tur e idiomanan dje nacionnan lo gara, sí, nan realmente lo gara e saya di un homber  cu ta un hudiu, bisando: “Nos lo bai cu boso, pasobra nos a tende cu Dios ta cu boso.”’” (Zacarías 8:23) Esnan cu e ‘dies hombernan’ ta dirigí nan mes na dje ta hudiu spiritual, e actual resto di cristian ungí. Ya cu dies por representá loke ta completo relacioná cu cosnan terenal, e ‘dies hombernan’ ta simbolisá e “multitud grandi” cu a ser uní cu “e Israel di Dios,” cu kende nan ta forma “un solo tou.” (Revelacion 7:9, 10; Galationan 6:16) Ki un goso ta pa mira asina hopi hende awor ta rindi sirbishi sagrado huntu como adoradó di Jehova Dios!

18, 19. Ki evidencia tin cu Jehova ta bendicioná e trabou di predicá?

¹⁸ Nos ta keda emocioná pa mira cu decenas, sí, cientos di miles di hende awor ta aceptá adoracion berdadero den paisnan cu tabata asina dominá pa religion falsu, cu tabata parce cu e hendenan nunca lo aceptá e bon nobo. Djis mira den un Anuario di Testigonan di Jehova recien i conta e cantidad di pais cu awor ta raportá for di 100.000 te casi 1.000.000 publicadó di Reino. Esaki ta un prueba poderoso cu Jehova ta bendicioná e trabou di predicá e Reino.—Proverbionan 10:22.

¹⁹ Como e pueblo di Jehova, nos ta alabá i gradicí nos Tata celestial cu el a duna nos un berdadero propósito den bida, trabou recompensador den su sirbishi i un prospecto briyante pa futuro. Nos ta biba den expectativa ansioso di e cumplimentu di tur promesa divino i ta determiná pa ‘mantené nos den e amor di Dios, cu bida eterno na bista.’ (Hudas 20, 21) Esta contentu nos ta pa mira cu e multitud grandi cu ta alabando Dios awor ta casi 6.000.000 hende! Cu Jehova su bendicion cu ta masha bisto, e resto ungí huntu cu nan compañeronan otro carné, ta organisá den rond di 91.000 congregacion den 235 pais. Nos tur ta spiritualmente bon alimentá dor di e esfuersonan incansabel di “e esclabo fiel i discreto.” (Mateo 24:45) Un organisacion teocrático progresivo cu ta ehercé supervision amoroso ta administrá e actividad di Reino via 110 sucursal di Testigonan di Jehova. Nos ta gradicidu cu Jehova a impulsá e curason di su pueblo pa ‘onr’é cu nan cosnan balioso.’ (Proverbionan 3:9, 10) Como resultado, nos trabou mundial di predicá ta sigui, i segun necesidad ta construí facilidadnan di imprenta, casnan di Betel i di misionero, Salonnan di Reino i Salonnan di Asamblea.

20. Ora nos ta refleccioná riba Jehova su obranan grandi i digno di alabansa, con esei mester influenciá nos?

²⁰ Ta imposibel pa nos mencioná tur e obranan grandi i digno di alabansa di nos Tata celestial. Pero cualkier hende di curason recto lo por keda sin uni cu e multitud grandi di adoradó di Jehova? Claro cu no! P’esei laga tur cu ta stima Dios sclama cu alegria: “Alabá Jah! Alabá Jehova for di shelu, alab’é den haltura. Alab’é, boso tur su angelnan . . . , boso, hóbennan i tambe boso, bírgennan, boso, bieunan huntu cu hobencitonan. Laga nan alabá e nomber di Jehova, pasobra su nomber so ta inalcansablemente haltu. Su dignidad ta riba tera i shelu.” (Salmo 148:1, 2, 12, 13) Sí, laga nos alabá Jehova tantu awor como pa semper, pa su obranan grandi!

Con Lo Bo Contestá?

• Cua ta algun obra di Jehova digno di alabansa?

• Di con bo ta sinti bo motivá pa alabá Jehova?

• Con nos speransa ta conectá cu Dios su obranan grandi?

• Con Jehova ta haciendo obranan digno di alabansa en coneccion cu e trabou di predicá e Reino?

[Preguntanan di Estudio]

[Plachi na página 10]

Bo ta uni den cantamentu di canticanan di alabansa na Jehova cu henter bo curason?

[Plachinan na página 13]

Nos ta alegrá cu ainda tin oportunidad pa hende mansu uni cu nos den alabá Jehova