Para Completo i cu Conviccion Firme

‘Mira! E Multitud Grandi!’

ESEI tabata un tópico cu pa décadanan largu a confundí sirbidónan di Jehova. Pa hopi tempu nan a haci un esfuerso pa resolv’é bíblicamente. E tópico a lanta hopi discusion. Pero finalmente nan a haña e contesta bíblico, i na aña 1935 esaki a emocioná un auditorio di e congreso na Washington, D.C., mashá.

Tras di henter e discusion tabatin un pregunta comun: Kico ta e identidad di e “multitud grandi,” mencioná na Revelacion 7:9? E grupo di creyente aki lo a bai biba den shelu?

Un Pregunta di Hopi Tempu

Desde e tempu di apostel Juan te den nos dia, cristiannan tabata confundí tocante e identidad di e “multitud grandi.” E Studiantenan di Bijbel a considerá e multitud grandi como un clase celestial secundario, un grupo cu tabatin conocimentu di berdadnan bíblico pero cu no tabata haci mashá pa compartié.

Tog e cristiannan ungí tabatin cierto personanan ta asociá cu nan cu a bira masha celoso den e trabou di predicá. Nan no tabata aspirá pa bai shelu. Realmente, nan speransa tabata na armonia cu e discurso público “Miyones na Bida Awor Lo No Muri Nunca,” presentá dor di e pueblo di Jehova entre 1918 pa 1922. E personanan ei lo a ser bendicioná cu bida eterno riba tera.

E Toren di Vigilancia (na ingles) di 15 di october 1923, a trata Jesus su comparacion di carné i cabritu i a bisa: “Carné ta representá tur hende dje nacionnan, cu no ta engendrá pa spiritu pero cu ta incliná na husticia, kende mentalmente ta reconocé Jesucristo como Señor i cu ta busca i ta spera un mihó tempu bou di su reinado.”—Mateo 25:31-46.

Mas Rayo di Lus

Na aña 1931, e buki Vindicacion, Volúmen Unu, a trata Ezekiel capítulo 9 i a identificá esnan marcá riba nan frenta pa scapa na fin di mundu como e carnénan di e comparacion di Jesus. Vindicacion, Volúmen Tres (publicá na 1932), a describí e actitud recto di curason dje homber no-israelita Jehónadab, cu a drenta den e garoshi di guera di Jehú, e rey ungí di Israel, i a bai cuné pa mira e celo di Jehú ehecutando adoradónan falsu. (2 Reynan 10:15-28) E buki a bisa: “Jehónadab a representá of prefigurá e clase di hende riba tera awor [cu] no ta na armonia cu e organisacion di Satanas, cu ta tuma nan posicion na fabor di husticia, i ta esnan cu Señor lo conserbá durante e tempu di Armagedon, protehando nan durante e tempu di dificultad ei, i dunando nan bida eterno riba tera. Esakinan ta componé e clase di ‘carné.’”

Na 1934, E Toren di Vigilancia a aclará cu e cristiannan cu speransa terenal mester haci un dedicacion na Jehova i bautisá. E lus relacioná cu e clase terenal aki realmente a bira cada bes mas briyante!—Proverbio 4:18.

Un Rayo Briyante di Comprendimentu

E comprendimentu di Revelacion 7:9-17 tabata a punto di briya cu rayonan masha cla. (Salmo 97:11) E Toren di Vigilancia a expresá e speransa cu un congreso programá pa dia 30 di mei te cu 3 di juni 1935, na Washington, D.C., Merca, lo ta “beneficioso i un berdadero consuelo” pa esnan cu Jehónadab a prefigurá. I tabata asina mes!

Den un discurso emocionante tocante “E Multitud Grandi,” duná na mas o ménos 20.000 hende presente, J. F. Rutherford a duna prueba bíblico cu e ‘otro  carnénan’ di tempu moderno ta idéntico cu e “multitud grandi” di Revelacion 7:9. (Juan 10:16) N’e momento culminante di e discurso aki, e orador a puntra: “Tur esnan cu tin e speransa di biba pa semper riba tera, lo por lanta para por fabor?” Ora cu un gran parti di e auditorio a lanta para, Rutherford a declará: “Mira! E multitud grandi!” Tabatin un momento di silencio, siguí pa un aplauso fuerte. E siguiente dia, 840 Testigo di Jehova nobo a bautisá, i mayoria di nan a profesá di forma parti di e multitud grandi.

Un Presencia Remarcabel

Promé cu 1935, mas i mas hende cu tabata respondé na e mensahe bíblico i mustra celo den predicá e bon nobo, a manifestá un interes pa biba pa semper riba e tera paradísico. Nan no tabatin ningun deseo pa bai shelu, ya cu Dios no a duna nan e speransa di bida celestial. Identificando nan mes cu e multitud grandi di otro carné, a indicá cu pa 1935 e yamada di e 144.000 cristian ungí tabata casi completá.—Revelacion 7:4.

Ora Segundo Guera Mundial a cuminsá, Satanas e Diabel a haci un esfuerso intensivo pa para e recogementu di esnan cu lo a forma parti di e multitud grandi. E trabou di predicá e Reino tabata restringí den hopi pais. Durante e periodo scur ei, i poco promé cu su morto na januari 1942, J. F. Rutherford a remarcá: “Ta parce cu al fin i al cabo e ‘multitud grandi’ no ta bai ta asina grandi tog.”

Pero pa motibu di bendicion divino, cos a resultá diferente. ‘Parando completo i cu conviccion firme,’ e ungínan i nan compañeronan, e otro carnénan, a bin ta cumpli cu e comision di haci disipel. (Colosensenan 4:12; Mateo 24:14; 28:19, 20) Pa 1946 e cantidad di Testigonan di Jehova cu a predicá mundialmente tabata 176.456, i mayoria di nan tabata di e multitud grandi. Na aña 2000, mas cu 6.000.000 Testigo tabata sirbi Jehova fielmente den 235 pais—en berdad un multitud grandi! I e cantidad ta sigui aumentá.