Pregunta di Lector

Na ki tempu a ungi “e Santu di Santunan,” manera a ser profetisá na Daniel 9:24?

Daniel 9:24-27 ta un profecia relacioná cu e aparicion di “Mesías e Lider,” kende ta Cristo. Pues anto, e ungimentu profetisá di “e Santu di Santunan,” no ta referí n’e ungimentu dje Santísimo dje tempel na Jerusalem. Mas bien, e expresion “Santu di Santunan” ta referí na e santuario celestial di Dios—e Santísimo celestial—den e gran tempel spiritual di Jehova. *—Hebreonan 8:1-5; 9:2-10, 23.

Na ki tempu e tempel spiritual di Dios a cuminsá funcioná? Wel, considerá loke a sosodé ora Jesus a presentá su mes pa ser bautisá na aña 29 E.C. Desde e dia ei padilanti, Jesus a cumpli cu e palabranan di Salmo 40:6-8. Mas despues, Pablo a indicá cu Jesus a haci oracion na Dios: “Sacrificio i ofrenda bo no tabata kier, pero bo a prepará un curpa pa mi.” (Hebreonan 10:5) Jesus tabata sa cu Dios “no tabata kier” pa hende sigui ofrecé sacrificio di bestia na e tempel na Jerusalem. En bes di esei, Jehova a prepará un curpa humano perfecto pa Jesus ofrecé como sacrificio. Expresando su deseo sincero, Jesus a sigui bisa: “Mira! Mi a bini (den e rol dje buki ta pará skirbí tocante mi) pa haci bo boluntad, o Dios.” (Hebreonan 10:7) I con Jehova a contestá? E Evangelio di Mateo ta declará: “Despues cu Jesus a ser bautisá, el a subi unbes for di awa; i mira! shelu a habri, i el a mira e spiritu di Dios baha manera un palomba, biniendo riba dje. Mira! Tambe tabatin un bos for di shelu cu a bisa: ‘Esaki ta mi Yu, esun stimá, kende mi a aprobá.’”—Mateo 3:16, 17.

E echo cu Jehova Dios a aceptá e presentacion di e curpa di Jesus pa sacrificio a nificá cu un altar mas grandi cu e altar literal dje tempel di Jerusalem a bini na existencia. Esaki tabata un altar di Dios su “boluntad,” esta, Dios su areglo pa aceptá Jesus su bida humano como sacrificio. (Hebreonan 10:10) E ungimentu di Jesus cu spiritu santu a nificá cu awor Dios su areglo di tempel spiritual a drenta na vigor. * Pues anto, n’e tempu di Jesus su bautismo, Dios su cas celestial a ser ungí, esta apartá, como “e Santu di Santunan” den e gran areglo di tempel spiritual.

[Nota]

[Plachi na página 27]

“E Santu di Santunan” tabata ungí ora Jesus a bautisá