Avansando na Victoria Final!
Avansando na Victoria Final!
“Mira! un cabai blancu; i esun sintá riba dje tabatin un boog; i un corona a ser duná na dje, i el a sali venciendo i pa completá su victoria.”—REVELACION 6:2.
1. Ki sosodementu di futuro Juan a mira den vision?
PA MEDIO di inspiracion divino, apostel Juan por a mira rond di 1800 aña den futuro i describí e entronisacion di Cristo como Rey. Juan tabatin mester di fe pa e por a kere loke el a mira den vision. Nos awe tin evidencia cla di cu e entronisacion profetisá aki a tuma lugá na 1914. Cu wowo di fe, nos ta mira Jesucristo “sali venciendo i pa completá su victoria.”
2. Con Diabel a reaccioná ora e Reino a nace, i di kico esaki ta duna evidencia?
2 Despues cu e Reino a nace, Satanas a ser expulsá for di shelu. Esei a pone cu el a bringa mas duru i cu mas tantu furia, maske esaki no a aumentá su chens di tin éxito niun tiki. (Revelacion 12:7-12) Su rabia a pone condicionnan mundial bira asta mas crítico. Ta parce cu sociedad humano ta desintegrando. Pa Testigonan di Jehova esaki ta evidencia cla di cu nan Rey ta avansando pa “completá su victoria.”
Un Sociedad di Mundu Nobo Ta Ser Formá
3, 4. (a) Ki cambionan organisacional a ser hací den e congregacion cristian for di tempu cu e Reino a nace, i di con nan tabata necesario? (b) Manera Isaías a profetisá, ki beneficio e cambionan aki a trece?
3 Una bes cu e Reino a keda establecí, tabata tempu pa trece e congregacion cristian restorá—cu e ora ei a haña mas tantu responsabilidad di Reino—mas na armonia cu e patronchi dje congregacion cristian di promé siglo. Pues, den e edicionnan di 1 i 15 di juni 1938, E Toren di Vigilancia (na ingles) a examiná con e organisacion cristian lo mester funcioná. Despues, e edicion di 15 di december 1971 a identificá e Cuerpo Gobernante di tempu moderno cu mas claridad den e artículo “E Diferencia Entre e Cuerpo Gobernante i un Corporacion Legal.” Na 1972 a nombra cuerponan di anciano pa duna yudansa i guia na congregacionnan local.
4 Restoracion dje sistema di supervision apropiado a fortalecé e congregacion cristian mashá. Loke tambe a contribuí na fortalecé e congregacion ta e percuracionnan cu e Cuerpo Gobernante a haci pa instruí ancianonan tocante nan debernan, i entrená nan den asuntunan hudicial. Isaías 60:17 a profetisá e desaroyonan gradual di Dios su areglo organisacional riba tera, i nan resultadonan positivo: “En bes di koper lo mi trece oro, i en bes di heru lo mi trece plata, i en bes di palu, koper, i en bes di piedra, heru; i lo mi nombra pas como bo superintendentenan i husticia como esnan cu ta asigná bo tarea.” E mehoransanan aki a reflehá e bendicion di Dios, i nan a duna evidencia cu Dios ta aprobá esnan cu a sali cu celo pa apoyá su Reino.
5. (a) Con Satanas a reaccioná riba e echo cu Jehova a bendicioná Su pueblo? (b) Na armonia cu Filipensenan 1:7, con Jehova su pueblo a reaccioná riba e rabia di Satanas?
5 E atencion i guia amoroso cu Dios a duna su pueblo despues cu e Reino a nace, no a keda sin hala atencion di Satanas. Por ehempel, na 1931 e grupito di cristian aki a declará públicamente cu nan tabata mas cu djis Studiantenan di Bijbel. Na armonia cu Isaías 43:10, nan tabata Testigonan di Jehova! Sea ta coincidencia of no, Diabel a los un ola di persecucion sin precedente rond mundu. Asta na paisnan cu normalmente ta conocí pa nan libertad religioso, manera Merca, Cánada i Alemania, Testigonan a haña nan ta bringa batayanan legal bes tras bes pa nan por a keda cu nan libertad di adoracion. Pa 1988, ya Corte Supremo na Merca a examiná 71 caso cu a enbolbé Testigonan di Jehova, i a dicta fayo na nan fabor den dos terecera parti dje casonan aki. Awe, rond mundu e batayanan legal ta continuá, di manera cu por “defendé i establecé e bon nobo legalmente,” mescos cu den promé siglo.—Filipensenan 1:7.
6. Prohibicion i restriccion a stroba Jehova su pueblo di avansá? Ilustrá esaki.
6 Durante añanan 30 di siglo 20, den e tempu net promé cu Segundo Guera Mundial, gobiernunan dictatorial a prohibí of restringí e trabou di Testigonan di Jehova na Alemania, Spaña i Hapon, djis pa mencioná tres so. Pero na aña 2000, den e paisnan aki so tabatin casi 500.000 proclamadó activo dje Reino di Dios. Esei ta casi dies biaha e cantidad di Testigo rond mundu na 1936! Claramente, prohibicion i restriccion no por stroba Jehova su pueblo di avansá bou di nan Lider victorioso Jesucristo.
7. Ki evento sobresaliente a tuma lugá na 1958, i ki cambionan dramático a sosodé entre tantu?
7 Na 1958 tabatin un manifestacion grandioso dje avance aki na New York City. Ei, nan a tene e congreso di mas grandi cu Testigonan di Jehova a yega di tin, e Asamblea Internacional Boluntad Divino, cu un asistencia máximo di 253.922 persona. Pa 1970 ya no tabatin prohibicion mas contra e obra den e tres paisnan mencioná anteriormente, cu excepcion di loke e tempu ei tabata yama Alemania Oriental. Pero e Testigonan cu tabata biba den e inmenso Union Soviético i e paisnan aliado cuné den e Pacto di Varsovia, tabata bou di prohibicion ainda. Awe tin hopi mas cu 500.000 Testigo activo den e paisnan anteriormente comunista aki.
8. Kico tabata e resultado di Jehova su bendicion riba su pueblo, i kico E Toren di Vigilancia tabatin di bisa tocante esaki na 1950?
8 Testigonan di Jehova a ser bendicioná cu crecementu debí cu nan a sigui “busca promé e reino i [Dios] Su husticia.” (Mateo 6:33) E profecia di Isaías a cumpli den un sentido literal caba: “E chikitu mes lo bira mil, i esun menor un nacion poderoso. Ami mes, Jehova, lo aceler’é na su debido tempu.” (Isaías 60:22) Anto e crecementu no ta stop. Durante e último década so, e cantidad di apoyadó activo dje gobernacion di Reino a crece cu mas cu 1.750.000 persona. Boluntariamente nan a bira parti di un grupo di cua un Toren di Vigilancia di 1950 a haci e siguiente observacion: “Actualmente Dios ta preparando un sociedad di mundu nobo. . . . E núcleo aki lo pasa Armagedon, . . . e proménan riba e esena dje ‘tera nobo’ . . . organisá teocráticamente, cu conocimentu di proceduranan organisacional.” E artículo a concluí: “P’esei, padilanti, cu firmesa, nos tur huntu, como un sociedad di mundu nobo!”
9. Con e cosnan cu Testigonan di Jehova a siña atrabes di añanan a resultá beneficioso?
9 Entre tantu e sociedad di mundu nobo aki cu ta sigui crece, a adkerí experencia práctico cu ta resultando sumamente balioso awe, i cu kisas lo ta masha útil asta den e trabou di restoracion despues di Armagedon. Por ehempel, Testigonan a siña organisá congreso grandi, ofrecé auxilio di emergencia lihé i construí edificio den poco tempu. E actividad aki a pone hopi hende haña admiracion i respet pa Testigonan di Jehova.
Corigí Impresionnan Robes
10, 11. Ilustrá con puntonan di bista robes tocante Testigonan di Jehova a keda corigí.
10 Sin embargo, tin hende cu ta acusá Testigonan di Jehova di no ta funcioná na armonia cu sociedad humano. E motibu principal pa esaki ta e posicion bíblico di Testigonan riba asuntunan manera transfusion di sanger, neutralidad, humamentu i moralidad. Pero mas i mas, público ta cuminsá admití cu e puntonan di bista di Testigonan ta digno di consideracion. Por ehempel, un dokter na Polonia a yama e oficina administrativo di Testigonan di Jehova i bisa cu e i su coleganan na hospital tabatin vários ora ta debatí riba e asuntu di transfusion di sanger. Loke a lanta e discusion ta un artículo cu a sali e dia ei den e diario polaco Dziennik Zachodni. E dokter a admití: “Personalmente mi ta lamentá cu ta usa sanger di mas den e área di medicina. Mester bini un cambio, i mi ta contentu cu un hende a cuminsá e diálogo. Mi tin gana di ricibí mas informacion.”
11 Durante un conferencia aña pasá, autoridadnan médico di Cánada, Europa, Israel i Merca a trata material diseñá pa yuda dokternan trata pashent sin usa sanger. Den e reunion aki na Suisa, nan a mustra cu contrali di loke mayoria hende ta kere, e cantidad di morto bou di pashentnan cu a ricibí sanger ta, de echo, mas haltu cu di pashentnan cu no a ricibí sanger. Generalmente pashentnan Testigo por a sali for di hospital mas lihé cu esnan tratá cu sanger, loke na su turno hopi bes ta baha e gastu di tratamentu.
12. Duna un ehempel cu ta mustra con personanan prominente a yega di elogiá e posicion cu Testigonan di Jehova ta tuma den loke ta trata neutralidad político.
12 Tambe hende a haci hopi comentario positivo tocante e posicion neutral cu Testigonan di Jehova a asumí promé i durante Segundo Guera Mundial, ora nan mester a soportá atake dje nazinan. E video Testigonan di Jehova Ta Para Firme Contra Atake Nazi, producí dor di Testigonan di Jehova, i cu apropiadamente a keda estrená na e campo di concentracion di Ravensbrück na Alemania dia 6 di november 1996, a producí hopi comentario faborabel. Na apertura di un presentacion similar na e campo di concentracion notorio na Bergen-Belsen dia 18 di april 1998, director dje Centro pa Educacion Político di Lower Saxony, Dr. Wolfgang Scheel, a admití: “Un di e berdadnan bergonsoso di historia ta cu Testigonan di Jehova a rechasá Socialismo Nacional cu hopi mas determinacion cu e iglesianan cristian. . . . Ni maske kico nos ta pensa tocante e siñansanan i e celo religioso di Testigonan di Jehova, nan firmesa durante e régimen nazi ta exigí respet.”
13, 14. (a) Ki observacion sabí na fabor dje promé cristiannan a sali di un fuente inesperá? (b) Duna ehempel di comentarionan faborabel hací na fabor di Dios su pueblo awe.
13 Ora personanan prominente of decisionnan di corte sali na fabor di Testigonan di Jehova riba asuntunan controversial, esei por mengua prehuicio i pone hende mira Testigonan den un lus mas positivo. Hopi bes esaki ta habri caminda pa nan por papia cu hende cu nunca promé no tabata dispuesto di scucha. P’esei, ta bon ora cos asina tuma lugá, i Testigonan di Jehova ta apreciá tal gestonan sinceramente. Esaki ta corda nos loke a pasa durante promé siglo na Jerusalem. Ora Sanedrin, e corte supremo hudiu, kier a mata e cristiannan debí na nan predicacion celoso, Gamaliel, “un maestro di Ley i respetá pa tur e pueblo,” a advertí nan bisando: “Hombernan di Israel, presta atencion na boso mes en cuanto loke boso tin pensá di haci tocante e hendenan aki. . . . No mete cu e hendenan aki, ma laga nan; (pasobra, si e proyecto of e trabou aki ta di hende, lo e caba na nada; pero si e ta di Dios, boso lo no por caba cu nan;) sino, kisas lo resultá cu boso ta lucha realmente contra Dios.”—Echonan 5:33-39.
14 Mescos cu Gamaliel, recientemente hende prominente a papia na fabor di libertad religioso pa Testigonan di Jehova. Por ehempel, e ex-presidente di Academia Internacional pa Libertad di Religion i Creencia a declará: “No mester nenga e derechonan religioso di un religion simplemente pasobra sociedad ta haña cu su conviccionnan ta inaceptabel of poco convencional.” I un profesor di estudio científico di religion n’e universidad di Leipzig a haci un bon pregunta relacioná cu un comision di gobiernu aleman establecí pa investigá e asina yamá sectanan religioso: “Pakico ta minorianan religioso so mester ser investigá, i no e dos iglesianan grandi [Iglesia Católico Romano i Iglesia Luterano]?” Nos no tin nodi busca leu pa sa e contesta. Un ex-oficial aleman a skirbi: “No por tin duda cu tras di pantaya, ta fanáticonan religioso a dicta e rumbo político cu e comision di gobiernu a tuma.”
Na Ken Nos Ta Acudí pa Alivio?
15, 16. (a) Pakico loke Gamaliel a haci tabatin un efecto limitá? (b) Den ki manera tres otro persona cu influencia no por a haci mashá na fabor di Jesus?
15 Loke Gamaliel a bisa ta simplemente resaltá e echo cu ta imposibel pa un obra cu tin apoyo divino faya. Sin duda, e promé cristiannan a beneficiá di loke el a bisa Sanedrin, pero nan no a lubidá cu loke Jesus a bisa, esta, cu su siguidónan lo ser persiguí, tambe tabata berdad. Loke Gamaliel a haci a para e plan dje lidernan religioso pa mata nan, pero e no a eliminá persecucion completamente, pasobra nos ta lesa: “E ora ei nan a presta atencion na dje, i nan a manda yama e apostelnan, a suta nan, i a ordená nan pa stop di papia riba base dje nomber di Jesus, i a laga nan bai.”—Echonan 5:40.
16 Durante e huicio di Jesus, Poncio Pilato a purba lagu’é sali liber pasobra e no a haña ningun falta den dje. Pero e no a logra. (Juan 18:38, 39; 19:4, 6, 12-16) Asta dos miembro di Sanedrin cu tabata na fabor di Jesus, Nicodemo cu José di Arimatea, no por a haci mashá pa stroba e corte di tuma accion contra Jesus. (Lucas 23:50-52; Juan 7:45-52; 19:38-40) E alivio cu hende ta logra duna ora nan sali na defensa di Jehova su pueblo, sea cua sea nan motivacion, ta por lo ménos limitá. Mundu lo sigui odia e siguidónan berdadero di Cristo mescos cu nan a odia é mes. Ta di Jehova so alivio completo por bini.—Echonan 2:24.
17. Ki punto di bista realístico Testigonan di Jehova tin, pero di con nan decision di sigui predicá e bon nobo no ta debilitá?
17 Testigonan di Jehova ta realístico, i nan ta verwagt cu persecucion ta sigui. Oposicion lo para únicamente ora e sistema di Satanas a disparcé den un derota final. Pero apesar cu e ta desagradabel, e persecucion aki no ta kita Testigonan di cumpli cu nan comision di predicá e Reino. Con e por stroba nan si nan tin apoyo divino? Nan ta mira na nan Lider yen di curashi, Jesucristo, como e ehempel apropiado.—Echonan 5:17-21, 27-32.
18. Ki dificultad Jehova su pueblo tin cu bai enfrentá ainda, pero ki resultado nan ta convencí di dje?
18 For di cuminsamentu, religion berdadero a hañ’é enfrentá cu oposicion pisá. Aki poco tempu lo e bira blanco di un atake total di Gog, esta, Satanas den su estado rebahá desde su expulsion for di shelu. Pero religion berdadero lo sobrebibí. (Ezekiel 38:14-16) “E reynan di henter e tera habitá,” bou di guia di Satanas, “lo batayá contra e Lamchi, pero, dor cu e ta Señor di señornan i Rey di reynan, e Lamchi lo vence nan.” (Revelacion 16:14; 17:14) Sí, nos Rey ta avansando na su victoria final, i pronto lo e “completá su victoria.” Esta un privilegio nos tin di ta moviendo huntu cuné, sabiendo cu pronto nunca mas niun hende lo contradicí adoradónan di Jehova ora nan bisa: “Dios ta pa nos”!—Romanonan 8:31; Filipensenan 1:27, 28.
Bo Por Splica?
• Kico Jehova a haci pa fortalecé e congregacion cristian desde cu e Reino a nace?
• Kico Satanas a haci pa purba stop Cristo di completá su victoria, i cu ki resultado?
• Ki punto di bista balansá nos mester tin tocante accionnan faborabel di parti di hende cu no ta Testigo?
• Kico Satanas lo haci pronto, i cu ki resultado?
[Preguntanan di Estudio]
[Plachi na página 18]
Congresonan ta un manifestacion dje avance di Jehova su pueblo
[Plachinan na página 20]
Ainda e neutralidad di Testigonan durante Segundo Guera Mundial ta sigui duna Jehova alabansa