Fortalecé Bo Confiansa den Jehova

Tin un plan asesino na caminda. Tur e oficialnan haltu dje pais a consultá cu otro i a bini cu un proposicion di ley nobo. Nan kier pa pasa un ley pa cualkier hende cu adorá na un manera cu Estado no ta aprobá, haña castigu di morto.

ESAKI ta zona conocí? Historia ta yen di hende cu a recurí na trama maldad pa medio di ley. E caso mencioná anteriormente a tuma lugá den e imperio perso, den tempu di profeta Daniel. E ley, cu de echo rey Dario a pone na vigor, a stipulá: ‘Mester tira den cueba di leon ken cu haci un peticion na cualkier dios of hende durante trinta dia excepto na rey.’—Daniel 6:7-9.

Kico Daniel lo haci bou di menasa di morto? Lo e sigui confia den su Dios Jehova, of lo e comprometé i haci loke e rey a dicta? E relato ta bisa nos: “Daniel, asina cu el a haña sa cu a firma loke ta skirbí, a drenta den su cas, i, cu e bentananan di su kamber riba dak habrí den direccion di Jerusalem, asta tres bes pa dia e tabata cai na rudia i haci oracion i ofrecé alabansa dilanti su Dios, manera e tabata haci regularmente promé cu esaki.” (Daniel 6:10) Resto dje relato ta bon conocí. Nan a tira Daniel den cueba di leon pa motibu di su fe, pero Jehova a “cera boca dje leonnan” i rescatá su sirbidó leal.—Hebreonan 11:33; Daniel 6:16-22.

 Tempu pa Examiná Nos Mes

Awe Jehova su sirbidónan ta biba den un mundu hostil, i nan ta enfrentá hopi peliger cu ta menasá nan bienestar físico i spiritual. Por ehempel, hopi Testigo a ser matá den e explosion brutal di odio racial na cierto paisnan. Otro caminda Jehova su sirbidónan a enfrentá scarcedad di cuminda, dificultad económico, desaster natural, malesa grave i otro situacionnan cu ta pone bida na peliger. Ademas, nan mester a soportá persecucion, preshon na trabou i vários tipo di tentacion pa haci loke ta malu, i tur esaki por pone nan spiritualidad na peliger. Sí, e gran Adversario, Satanas, ta determiná pa destruí Jehova su sirbidónan via cualkier medio cu e por logra.—1 Pedro 5:8.

Kico nos por haci ora nos ta enfrentá circunstancianan asina? Maske ta natural pa sinti miedu ora nos bida ta na peliger, nos por tene e palabranan trankilisante aki di apostel Pablo na mente: “[Jehova] a bisa: ‘Lo mi no bandoná bo di ningun manera ni desampará bo di ningun manera.’ Di manera cu nos por tin bon ánimo i bisa: ‘Jehova ta mi yudante; lo mi no tin miedu. Kico hende por haci mi?’” (Hebreonan 13:5, 6) Nos por tin confiansa cu Jehova ta sinti mescos tocante su sirbidónan awe. Pero conocé Jehova su promesa ta un cos; keda convencí cu lo e actua na nos fabor ta henteramente un otro cos. P’esei ta vitalmente importante pa nos examiná e base cu nos tin pa confia Jehova, i haci tur loke nos por pa fortalecé e confiansa ei i manten’é. Si nos haci asina, “e pas di Dios cu ta surpasá tur pensamentu lo warda [nos] curason i [nos] facultad mental pa medio di Cristo Jesus.” (Filipensenan 4:7) Anto ora nos haña nos cu prueba, nos lo ta capas pa pensa cla i enfrentá nan na un manera sabí.

Base pa Confia Jehova

Sigur-sigur nos tin hopi motibu pa confia nos Creador Jehova. Esun principal ta e echo cu Jehova ta un Dios amoroso cu interes genuino den su sirbidónan. Den Bijbel tin un cantidad innumerabel di caso cu ta demostrá Jehova su interes amoroso den su sirbidónan. Describiendo e manera cu Jehova a trata cu su pueblo scogí Israel, Moises a skirbi: “El a bin hañ’é den un tera di desierto, i den un desierto desolá i cu ta yora. El a cuminsá rondon’é, cuid’é, proteh’é manera su pret’i wowo.” (Deuteronomio 32:10) Den tempu moderno Jehova ta sigui cuida su sirbidónan bon, como grupo i como hende individual. Por ehempel, ora algun Testigo a pasa den scarcedad di cuminda extremo durante e guera civil na Bosnia, Jehova a percurá pa nan ricibí e suministronan cu nan tabatin tantu mester di dje, pa medio dje esfuerso balente di nan rumannan di Croacia i Austria, cu a risca nan bida biahando atrabes di teritorio sumamente peligroso pa hiba suministro di auxilio pa nan rumannan. *

Ya cu Jehova Dios ta e Todopoderoso, sigur-sigur e ta capas pa protehá su sirbidónan den cualkier circunstancia. (Isaías 33:22; Revelacion 4:8) Pero asta ora Jehova permití algun di su sirbidónan proba nan mes fiel te na morto, ainda e ta sostené nan i yuda nan mantené nan integridad, pa nan por keda firme, gososo i calmu te na fin. P’esei, nos por tin e mésun confiansa cu e salmista tabatin: “Dios ta pa nos un refugio i fortalesa, un yudansa cu por ser hañá fácilmente durante angustia. P’esei nos lo no tene miedu, aunke e tera ta sufri cambio i aunke ceru tambaleá i cai den e curason di laman grandi.”—Salmo 46:1, 2.

Tambe Bijbel ta revelá cu Jehova ta un Dios di berdad. Esei kier men cu semper e ta fiel na su promesanan. De echo, Bijbel ta describié como un Dios “kende no por gaña.” (Tito 1:2) Ya cu Jehova a ripití bes tras bes cu e ta deseá di protehá i salba su sirbidónan, nos por ta completamente sigur cu e no ta solamente capas pa cumpli cu su promesanan, sino e ta dispuesto tambe pa hacié.—Job 42:2.

 Maneranan pa Fortalecé Nos Confiansa

Maske nos tin tur motibu pa pone confiansa den Jehova, nos no mester pensa cu semper e confiansa ei lo bini di mes. Pasobra mundu en general tin poco fe den Dios, i e actitud ei por swak nos confiansa den Jehova fácilmente. P’esei nos mester haci hopi esfuerso pa fortalecé i mantené e confiansa ei. Jehova ta bon conciente di esaki, i el a percurá e medionan pa nos logra haci esei.

Di promé, el a percurá su Palabra skirbí, Bijbel, cu tin registro di hopi acto poderoso cu Jehova a yega di haci na fabor di su sirbidónan. Djis pensa un ratu, cuantu confiansa lo bo tin den un hende si tur loke bo sa di dje ta su nomber? Si bo tin confiansa mes, probablemente lo ta masha poco. Bo mester conocé su manera di procedé i su echonan pa bo tin confiansa den dje, no ta asina? Segun cu nos ta lesa i meditá riba relatonan bíblico asina, nos ta profundisá nos conocimentu di Jehova i su maraviyoso manera di actua, i mas i mas nos ta bin apreciá con digno di confiansa e ta. Asina nos confiansa den dje ta ser fortalecí. E salmista a pone un excelente ehempel ora cu den un oracion ferviente na Dios, el a bisa: “Lo mi corda e prácticanan di Jah; pasobra siguramente lo mi corda bo obranan maraviyoso di hopi tempu atras. I siguramente lo mi meditá riba tur bo actividad, i den bo tratonan lo mi interesá mi mes intensamente.”—Salmo 77:11, 12.

Ademas di Bijbel nos tin un fuente abundante di cuminda spiritual den forma di publicacionnan bíblico cu Jehova su organisacion ta producí. Entre otro, hopi bes e publicacionnan aki ta contené relatonan conmovedor di sirbidónan di Dios den tempu moderno, cu ta mustra con Jehova por a percurá yudansa i alivio pa nan ora nan a haña nan mes den situacionnan sin salida. Por ehempel, Martin Poetzinger cu despues a bira miembro di Cuerpo Gobernante di Testigonan di Jehova, a bira gravemente malu tempu e tabata sirbi como pionero den áreanan di Europa leu for di su tera natal. E no tabatin cen, i niun dokter no kier a trat’é. Pero Jehova no a bandon’é. Finalmente, a tuma contacto cu e dokter principal dje hospital local. Dor cu e bon homber aki tabata kere firmemente den Bijbel, el a cuida ruman Poetzinger manera un yu, anto sin cobr’é. Sigur-sigur nos por fortalecé nos confiansa den nos Tata celestial dor di lesa relatonan personal asina.

Otro yudansa masha balioso cu Jehova ta percurá pa fortalecé nos confiansa den dje ta e privilegio precioso di oracion. Amorosamente apostel Pablo ta bisa nos: “No sea ansioso riba nada, sino den tur cos mediante oracion i súplica huntu cu gradicimentu, laga boso peticionnan bira conocí na Dios.” (Filipensenan 4:6) “Tur cos” por incluí nos sintimentu, necesidad, temor i ansiedadnan. Mas frecuente i sincero nos oracionnan ta, mas fuerte nos confiansa den Jehova lo ta.

Tempu cu Jesucristo tabata riba tera, tabatin bes cu el a bai un lugá solitario su so pa e haci oracion trankil. (Mateo 14:23; Marco 1:35) Promé cu el a tuma decisionnan di hopi peso, el a asta pasa henter anochi haciendo oracion na su Tata. (Lucas 6:12, 13) Nada straño cu Jesus su confiansa den Jehova tabata asina fuerte cu e por a soportá e prueba di mas horibel cu cualkier hende por enfrentá. Su último palabranan riba e staca di tormento tabata: “Tata, den bo man mi ta confia mi spiritu.” E expresion di confiansa ei a mustra cu su confiansa den su Tata a keda intacto te na fin, apesar cu Jehova no a intervení pa scap’é.—Lucas 23:46.

 Un otro manera pa fortalecé nos confiansa den Jehova ta asociacion regular cu hende cu ta confia den dje di henter nan curason. Jehova a manda su pueblo congregá regularmente pa nan siña mas tocante dje i pa nan animá otro. (Deuteronomio 31:12; Hebreonan 10:24, 25) Tal asociacion a fortalecé nan confiansa den Jehova, loke a capacitá nan pa enfrentá pruebanan crucial di fe. Den un pais africano caminda e trabou di predicá tabata prohibí, hende a nenga di duna Testigonan di Jehova proteccion di polis, documento di biahe, certificado di matrimonio, tratamentu den hospital i trabou. Ora guera civil a lanta den un cierto área, 39 miembro di un congregacion di cercania, incluso mucha, a biba rond di cuater luna bou di un brug den desierto pa nan a scapa dje bombardeonan cu tabata tuma lugá den nan pueblo. Den e adversidad asina extremo cu nan a haña nan aden, nan consideracion diario di un texto bíblico, i otro reunionnan, a duna nan hopi fortalesa. Asina nan por a wanta e calvario ei sin cu nan spiritualidad a ser afectá. E experencia aki ta mustra bon cla con importante ta pa nos reuní regularmente cu Jehova su pueblo.

Finalmente, pa fortalecé nos confiansa den Jehova nos mester keda activo den e trabou di predicá e Reino, semper cla pa compartí e bon nobo cu otro hende. Un experencia conmovedor di un hóben publicadó celoso na Cánada cu tabata malu pa muri di leukemia, a demostrá esei. Apesar di su malesa serio, e kier a bira pionero regular, esta, un minister di tempu completo. Durante un temporada breve cu su condicion a mehorá, el a sinti suficiente bon p’e dedicá un luna den e ministerio como pionero auxiliar. Despues su condicion a bai atras, i el a muri un par di luna despues. Tog el a keda spiritualmente fuerte te na fin, i su confiansa den Jehova no a tambaleá ni un ratu so. Su mama ta corda: “Te na fin e tabata mas preocupá pa otro hende cu pa su mes. E tabata animá nan pa studia Bijbel dor di bisa nan: ‘Nos lo ta huntu den Paradijs.’”

Demostrá Nos Confiansa den Jehova

“Mescos cu e curpa sin spiritu ta morto, asina tambe fe sin obra ta morto.” (Santiago 2:26) Loke Santiago a bisa tocante fe den Dios por ser bisá tocante nos confiansa den Dje tambe. Ni maske cuantu nos bisa cu nos ta confia den Dios, e no kier men nada si nos accionnan no ta demostrá tal confiansa. Abraham a confia completamente den Jehova, i el a demostrá su confiansa dor di obedecé Dios su mandamentunan sin pensa dos bes, asta te na e punto di ta dispuesto di sacrificá su yu, Isaac. Debí na tal confiansa i obedencia remarcabel, Abraham a bira conocí como Jehova su amigu.—Hebreonan 11:8-10, 17-19; Santiago 2:23.

Nos no tin nodi warda te ora nos enfrentá un prueba pisá pa nos demostrá nos confiansa den Jehova. Jesus a bisa su disipelnan: “E persona fiel den loke ta mínimo ta fiel tambe den loke ta hopi, i e persona inhustu den lo mínimo ta inhustu tambe den loke ta hopi.” (Lucas 16:10) Nos mester siña confia Jehova den tur nos actividadnan diario, i obedec’é asta den asuntunan cu por parce insignificante. Ora nos mira e beneficionan cu ta bini como resultado di nos obedencia, nos confiansa den nos Tata celestial ta bira mas fuerte, i esei lo yuda nos enfrentá prueba mas grandi of mas difícil.

Segun cu mundu ta acercá su fin catastrófico, ta sigur cu Jehova su pueblo lo experimentá mas prueba i peliger. (Echonan 14:22; 2 Timoteo 3:12) Si nos forma un confiansa fuerte i completo den Jehova awor, nos por spera di sobrebibí i drenta den e mundu nobo primintí, sea dor di biba pasa dor di e tribulacion grandi, of dor di ricibí un resureccion. (2 Pedro 3:13) Laga nos nunca permití ningun falta di confiansa di nos banda daña nos relacion precioso cu Jehova. E ora ei, loke a ser bisá di Daniel despues cu Dios a scap’é dje cueba di leon, lo por ser bisá di nos tambe: “No a haña ningun daño na dje, pasobra el a confia den su Dios.”—Daniel 6:23.

[Nota]

[Plachi na página 9]

Lesa relato di sirbidónan fiel di Jehova, manera Martin Poetzinger, ta fortalecé fe