Historia di Bida

Gososo i Gradicidu Apesar di un Pérdida Doloroso

SEGUN E RELATO DI NANCY E. PORTER

Dia 5 di juni 1947, tabata un anochi cayente na Bahámas, algun isla na un distancia dje costa zuidoost di Merca. Un funcionario di imigracion a bin haci ami cu mi esposo George un bishita inesperá. El a entregá nos un carta cu a bisa cu nos presencia riba e isla no tabata apreciá mas i cu nos mester a “bandoná e colonia inmediatamente!”

AMI cu George tabata e promé misioneronan Testigo di Jehova cu a bini Nassau, e stad mas grandi na Bahámas. Nos a ser asigná pa bini aki, despues cu nos a gradua den e di ocho klas di Galad, un scol di misionero den e parti nort dje estado di New York. Kico nos a haci pa provocá un reaccion asina fuerte despues cu nos tabatin solamente tres luna einan? I ta con bini mi ta aki ainda despues di mas cu 50 aña?

Entrenamentu pa e Ministerio

Mi tata, Harry Kilner, tabatin un influencia fuerte riba e manera cu mi a hiba mi bida. El a haci hopi sacrificio pa bira Testigo di Jehova, poniendo asina un excelente ehempel pa mi. Maske e no tabata masha bon di salú, tog e tabata bai predicá casi tur fin di siman, poniendo celosamente e interesnan di Reino na promé lugá. (Mateo 6:33) Nos medionan  financiero tabata hopi limitá, pero su sapateria tabata un centro di actividad spiritual na Lethbridge na Alberta, Cánada, durante añanan ’30 di siglo 20. Mi promé recuerdonan ta di ministernan di tempu completo di Testigonan di Jehova, cu ta ser yamá pionero, cu ta bishitá nos cas i conta experencia.

Na 1943, mi a cuminsá den e sirbishi di pionero den becindario di Fort Macleod i Claresholm, Alberta. P’e tempu ei, nos trabou di predicá tabata prohibí na Cánada debí na informacion falsu cu oponentenan a plama durante Segundo Guera Mundial. Di un punta pa otro, nos teritorio tabata midi 50 kilometer, pero dor cu nos tabata yong i yen di energia nos no tabata wori cu nos mester a core baiskel of cana na pia pa alcansá e comunidadnan chikitu i haciendanan den e área. Durante e periodo aki mi tabatin oportunidad di combersá cu algun graduado di Galad, i nan experencianan a lanta den mi e deseo pa bira misionero.

Na 1945, mi a casa cu George Porter, kende tabata di Saskatchewan, Cánada. Desde 1916, su mayornan tabata Testigonan celoso, i e tambe a scoge e ministerio di tempu completo como su carera. Nos promé asignacion tabata e suburbio bunita Lynn Valley na nort Vancouver, Cánada. No muchu tempu despues nos a haña invitacion pa bai Galad.

Atrabes di añanan mi a papia cu graduadonan di vários seminario teológico i mi a mira con nan entrenamentu teológico a destruí nan fe den Dios i su Palabra, Bijbel. Contrario cu esei, loke nos a siña na Galad a haci nos abilidad di pensa mas skerpi i riba tur cos el a fortalecé nos fe den Jehova Dios i su Palabra. Nos compañeronan di klas a ser asigná na China, Singapur, India, paisnan na África, Sur América i otro caminda. Ainda mi por corda e emocion cu nos a sinti ora nos a haña sa cu nos asignacion tabata e islanan tropical di Bahámas.

Con Bini Nos Por A Keda

Compará cu e biahenan cu nos compañeronan di klas mester a haci, nos biahe pa Bahámas tabata corticu. No a dura mashá cu nos tabata disfrutá di un weer cayente, shelu blou, awa blou-berde, edificionan di vários color suave i un cantidad sin fin di baiskel. Sin embargo, loke a impresioná mi mas tantu desde principio, tabata e grupo di cincu Testigo cu a spera nos ora nos boto a yega. Djis despues nos a comprendé cu e cultura aki tabata hopi diferente for di loke nos a custumbrá cuné. Por ehempel, nan a pidi mi esposo pa stop di yama mi dushi den público, ya cu por lo general tabata usa e expresion ei pa referí na un relacion pafó di matrimonio.

 No a dura mashá cu e cleronan, cu a sinti nan menasá dor cu nos tabata move liber entre e pueblo, a acusá nos falsamente di ta comunista. Resultado di esei tabata cu nos a haña ordu pa sali for dje pais. Pero e Testigonan cu e tempu ei tabata ménos cu 20 riba e islanan, a obtené mesora miles di firma bou di un peticion pa permití nos keda. Pues, e ordu pa expulsion a keda revocá.

Bayendo un Teritorio Nobo

Berdad bíblico a plama rápidamente den curason di hende cu a stima Dios, p’esei a manda mas misionero di Galad na Bahámas. Anto na 1950 a establecé un oficina di sucursal. Dies aña despues, Milton Henschel, un miembro di staf dje sede na Brooklyn, New York, a bishitá Bahámas i a puntra e misioneronan si cualkier di nan ta dispuesto pa bai riba un otro isla di Bahámas i iniciá e trabou di predicá einan. Ami cu George a ofrecé nos mes, i a cuminsá loke a bira un estadia di 11 aña na Long Island.

E isla aki, un di e hopinan cu ta forma Bahámas, ta midi 140 kilometer largu i 6 kilometer hanchu, i e tempu ei no tabatin ègt stad einan. E capital Clarence Town tabatin rond di 50 cas. Bida tabata bastante primitivo: no tabatin coriente, infrastructura di awa, facilidadnan pa cushiná, ni tuberia den cas. Pues nos tabatin cu ahustá nos n’e estilo di bida riba un isla remoto. Riba e isla aki e tópico di combersacion faborito dje pueblo tabata salú di hende. Nos a siña pa den nos saludo no incluí e pregunta, “Con ta cu bo awe?” pasobra e contesta lo ta un relato largu di henter e persona su historia médico.

Mayoria di nos trabou di duna testimonio tabata di cushina pa cushina, pasobra generalmente bo por a haña hende den nan cushina pafó di cas. E cushinanan tabatin un dak di pal’i maishi i cu candela di palu ta kima bou di dje. Mayoria dje comunidadnan a consistí di cunukero of piscadó pober, pero masha bondadoso. Mayoria di nan no tabata solamente religioso sino tambe masha supersticioso. Hopi bes nan tabata interpretá sucesonan inusual como señal.

Cleronan no tabatin problema pa cana drenta cas di hende sin ser invitá i kibra literatura bíblico cu nos a laga einan. Asina nan tabata temorisá personanan tímido, pero no ta tur hende a cobardiá nan dilanti. Por ehempel, un señora di 70 aña yen di bida no a laga nan intimid’é. E mes kier a comprendé Bijbel, i cu tempu el a bira Testigo huntu cu hopi otro hende. Segun cu nos tabata haña mas hende interesá den e pueblo, tabatin cierto diadomingo cu George mester a core 300 kilometer cu auto pa yuda e hendenan ei asistí na reunion.

Durante e promé lunanan cu no tabatin otro Testigo einan, ami cu George a mantené nos spiritualidad dor di tene tur e reunionnan cristian regular. Ademas, tur dialuna anochi nos a sigui un programa diligente pa studia e les di e revista Toren di Vigilancia i haci nos lesamentu di Bijbel. Tambe nos tabata lesa tur  e edicionnan di E Toren di Vigilancia i Spierta! asina cu nos a ricibí nan.

Mi tata a muri ora nos tabata na Long Island. E siguiente zomer na 1963, nos a haci areglo pa Mama bini i biba den nos cercania. Aunke e tabata di edad avansá, el adaptá su mes bastante bon i a biba na Long Island te na su morto na 1971. Awe Long Island tin un congregacion i un Salon di Reino nobo-nobo.

Un Desafio Doloroso

Na 1980, George a ripará cu su salú a cuminsá bai atras. Asina un di e experencianan di mas doloroso den mi bida a cuminsá, esta, mira mi casá, co-trahadó i compañero stimá, sucumbí na e malesa di Alzheimer. Henter su personalidad a cambia. E parti final i mas devastador a dura mas o ménos cuater aña promé cu su morto na 1987. Te n’e grado cu e tabata por, el a compañá mi den e ministerio i n’e reunionnan, aunke hopi bes e esfuersonan cu e tabata haci a pone mi yora. E amor abundante cu nos rumannan ta desplegá na mi ta realmente un consuelo pa mi, pero ainda mi ta sinti su falta masha hopi.

Un dje aspectonan di mas precioso di mi matrimonio cu George tabata nos comunicacion frecuente i placentero. Awor cu George a muri, mi ta mas gradicidu cu nunca cu Jehova ta invitá su sirbidónan pa “haci oracion sin stop,” pa “perseverá den oracion,” i pa haci uso di “tur forma di oracion.” (1 Tesalonicensenan 5:17; Romanonan 12:12; Efesionan 6:18) Ta realmente un consuelo pa sa cu Jehova ta interesá den nos bienestar. Di berdad mi ta sinti manera e salmista cu a canta: “Bendicioná sea Jehova, kende diariamente ta hiba e carga pa nos.” (Salmo 68:19) Preocupá cu un dia ala bes, aceptá mi limitacionnan i ser gradicidu pa e bendicionnan di cada dia, net manera Jesus a consehá, sigur ta e mihó manera pa biba.—Mateo 6:34.

Recompensanan Gososo di e Ministerio

Keda ocupá den e ministerio cristian a yuda mi pa no biba excesivamente den pasado. P’esei, mi por vence e tipo di emocionnan cu por hiba na depresion. Siña otro hende berdad di Bijbel ta un fuente special di goso. E ta percurá un rutina spiritual ordená cu a duna mi bida structura i stabilidad.—Filipensenan 3:16.

Un dia, mi a haña un yamada di un señora cu ken mi a compartí e mensahe di Reino mas o ménos 47 aña mas promé. E tabata yu muher di un dje promé studiantenan di Bijbel cu nos tabatin ora nos a yega Bahámas na 1947.  Su mama, tata i tur su rumannan a bira Testigo di Jehova i tambe mayoria di nan yu i nietunan. De echo, mas cu 60 miembro dje famia di e señora ta Testigo. Pero e mes nunca no a aceptá e berdad di Bijbel. Pero awor, por fin e tabata cla pa bira un sirbidó di Jehova Dios. Ta ki un goso tabata pa mira un man yen di Testigo, cu tabatin na Bahámas ora ami cu George a yega, aumentá bira mas cu 1.400!

Tin bes hende ta puntra mi si mi no ta sinti falta di tin mi mes yunan. Claro cu haña yu por ta un bendicion. Sin embargo, e amor cu constantemente mi yunan, nietunan i bisanietunan spiritual ta demostrá na mi ta algu cu probablemente no ta tur mayor biológico ta experenciá. Sí, esnan cu “obra loke ta bon” i cu “ta ricu den obranan excelente” ta e hendenan di mas felis. (1 Timoteo 6:18) P’esei, te n’e grado cu mi salú ta permití, mi ta keda ocupá den e ministerio.

Un dia cu mi tabata na dentista un mucha muher a acercá mi i a bisa: “Bo no conocé mi, pero ami sí conocé bo, i mi kier djis laga bo sa cu mi stimá bo.” Despues el a contá mi con el a conocé e berdad di Bijbel i con gradicidu e ta cu nos, e misioneronan, a bini Bahámas.

Na un otro ocasion ora mi a bolbe bek di vakansi, mi a haña un rosa na mi porta caminda mi ta biba awor n’e oficina di sucursal di Testigonan di Jehova na Nassau. E tabatin un nota cu a bisa: “Nos ta contentu cu bo ta na cas bek.” Mi curason ta basha over di gratitud, i ora mi mira ki clase di hende su Palabra, organisacion i spiritu ta producí, cuantu esei ta laga mi stima Jehova! En berdad, hopi bes Jehova ta extendé su man sostenedor pa medio di esnan rond di nos.

Hopi Gradicidu

Mi bida no tabata semper fácil, i awe tambe tin algun cos den mi bida cu no ta fácil. Pero mi tin asina hopi cos pa ta gradicidu: e gosonan di e ministerio, e amor i cariño di masha hopi ruman cristian, e cuido amoroso di Jehova su organisacion, e bunita berdadnan di Bijbel, e speransa di ta huntu cu sernan kerí ora nan resucitá i mi recuerdonan di 42 aña di matrimonio cu un sirbidó fiel di Jehova. Promé cu mi a casa mi a resa pidi pa semper mi por tabata un yudansa pa mi esposo keda den e ministerio di tempu completo, un sirbishi cu el a stima mashá. Jehova a contestá e oracion ei bondadosamente. P’esei, mi kier expresá mi gratitud na Jehova dor di semper keda fiel na dje.

E islanan di Bahámas ta un destinacion popular pa turista cu ta gasta miles di dollar pa bini i disfrutá dje placernan tropical. Dor cu mi a scoge pa sirbi Jehova unda cu su organisacion manda, mi tabatin e experencia gososo di biaha di un punta dje grupo di isla aki p’e otro, proclamando e bon nobo di e Reino di Dios. Mas importante ainda, mi a siña conocé i atesorá e amor di e excelente habitantenan di Bahámas.

Mi ta masha gradicidu na esnan cu a trece e berdad na mi mayornan, kendenan na nan turno a implantá den mi mente i curason hóben un deseo intenso pa busca e Reino di Dios promé. Awe, hóbennan sirbidó di Jehova tambe por ricibí hopi bendicion si nan drenta e “porta grandi” cu ta hiba na gran oportunidadnan pa un ministerio extenso. (1 Corintionan 16:9) Bo tambe lo basha over cu gratitud si bo usa bo bida pa onra “e Dios di diosnan,” Jehova.—Deuteronomio 10:17; Daniel 2:47.

[Plachi na página 24]

Predicando riba caya na Victoria, B.C., na 1944

[Plachi na página 24]

Ami cu George a asistí n’e Scol di Galad na 1946

[Plachi na página 25]

Huntu cu George dilanti e cas di misionero na Nassau, Bahámas, na 1955

[Plachi na página 26]

E cas di misionero na Deadman’s Cay, caminda nos a sirbi di 1961 pa 1972