“Si Dios Ta pa Nos, Ken Lo Ta Contra Nos?”
“Si Dios Ta pa Nos, Ken Lo Ta Contra Nos?”
“Kico, anto, nos lo bisa tocante e cosnan aki? Si Dios ta pa nos, ken lo ta contra nos?”—ROMANONAN 8:31.
1. Ken a bandoná Egipto huntu cu e israelitanan, i kico a motivá nan pa haci esei?
ORA e israelitanan a sali for di Egipto pa bai biba como un pueblo liber despues cu nan a pasa 215 aña einan, di cua gran parti tabata den sclabitud, “un inmenso multitud mixto tambe a subi huntu cu nan.” (Éxodo 12:38) E no-israelitanan aki a experimentá e dies plaganan inspirador di temor cu a devastá Egipto i ridiculisá su diosnan falsu. Na mes momento nan a mira Jehova su abilidad pa protehá su pueblo, specialmente dje di cuater plaga padilanti. (Éxodo 8:23, 24) Apesar cu nan conocimentu di Jehova su propósito tabata limitá, nan tabata sigur di un cos: E diosnan di Egipto no por a protehá e egipcionan, miéntras cu Jehova sí a mustra su forsa na fabor dje israelitanan.
2. Di con Rahab a apoyá e spionnan israelita, i di con su confiansa den nan Dios no tabata en bano?
2 Cuarenta aña despues, net promé cu e israelitanan a drenta e Tera Primintí, Hosué, sucesor di Moises, a manda dos hende pa spioná e tera. Ei nan a topa Rahab, un habitante di Jérico. Di loke Rahab a tende tocante Jehova su echonan poderoso pa protehá e israelitanan durante e 40 añanan desde cu nan a sali for di Egipto, e tabata sa cu si e kier a haña Dios su bendicion, e mester a apoyá su pueblo. Debí na su decision sabí, e cu su hendenan di cas no a ser destruí ora e israelitanan a capturá e stad. E manera milagroso cu nan a scapa riba su mes tabata evidencia irefutabel di cu Dios tabata cu nan. Pues, Rahab su confiansa den e Dios dje israelitanan no tabata en bano.—Hosué 2:1, 9-13; 6:15-17, 25.
3. (a) Ki milager Jesus a efectuá cerca dje stad reconstruí di Jérico, i con e clero hudiu a reaccioná? (b) Kico algun hudiu, i despues hopi hende no-hudiu, a bin realisá?
3 Diescincu siglo despues, Jesucristo a cura un limosnero ciegu cerca dje stad reconstruí di Jérico. (Marco 10: 46-52; Lucas 18:35-43) E homber aki a roga Jesus pa mustr’é misericordia, demostrando asina cu el a reconocé cu Jesus tabatin apoyo di Dios. Di otro banda, mayoria dje lidernan religioso hudiu i nan siguidónan a nenga di aceptá e milagernan cu Jesus tabata efectuá como prueba di cu e tabata haciendo e obra di Dios. En bes di esei nan a critik’é. (Marco 2:15, 16; 3:1-6; Lucas 7:31-35) Asta ora nan a haña nan confrontá cu e echo cu Jesus a resucitá despues cu nan a mat’é, nan no kier a admití cu ta Dios a obra dje manera ei. Mas bien nan a hiba delantera den persiguí Jesus su siguidónan pa purba stroba nan trabou di ‘declará e bon nobo di Señor Jesus.’ Pero algun hudiu, i despues hopi hende no-hudiu tambe, a observá e sosodementunan aki i a evaluá nan corectamente. Pa nan, tabata bisto cu Dios a rechasá e lidernan hudiu hustu den nan propio bista, i cu e tabata apoyá e siguidónan humilde di Jesucristo.—Echonan 11:19-21.
Ken Awe Tin Apoyo di Dios?
4, 5. (a) Con algun hende ta sinti tocante scoge un religion? (b) Ora di identificá e religion berdadero, cua ta e pregunta cardinal?
4 Tocante e asuntu di religion berdadero, un miembro di clero a bisa den un entrevista recien na television: “Ami ta bisa, cu un religion ta berdadero si e ta haci un hende cu ta biba di acuerdo cuné, un mihó persona.” En berdad, religion berdadero ta haci hende un mihó persona. Pero riba su mes, e echo cu un religion ta producí mihó hende ta proba cu e tin apoyo di Dios? Esei ta e único base pa determiná si un religion ta berdadero?
5 Tur hende ta apreciá di por tuma decisionnan personal, incluso scoge cua religion nan ta afiliá na dje. Pero e simpel echo cu un hende tin e libertad di scoge, no ta un garantia cu lo e scoge bon. Por ehempel, tin hende ta scoge un religion a base di su cantidad di miembro, su rikesa, su desplieguenan ceremonial, of a base di relacionnan familiar. Niun dje cosnan aki ta importante pa determiná si un religion ta berdadero of no. E pregunta cardinal ta: Cua religion ta urgi su siguidónan pa nan haci e boluntad di Dios i tin evidencia cla cu Dios ta apoy’é, di manera cu hende dje religion ei por bisa cu confiansa: “Dios ta pa nos”?
6. Ki palabranan di Jesus ta tira lus riba e asuntu di religion berdadero i falsu?
6 Jesus a establecé e regla pa distinguí adoracion berdadero for di adoracion falsu ora el a bisa: “Vigilá contra e profetanan falsu cu ta bini cerca boso den bistí di carné, pero cu di paden ta lobo feros. Na nan frutanan boso lo reconocé nan.” (Mateo 7:15, 16; Malakías 3:18) Laga nos repasá algun dje “frutanan” di religion berdadero, esta, rasgonan cu ta identifik’é, ya asina nos por determiná cu tur frankesa ta ken tin apoyo divino awe.
Rasgonan Cu Ta Identificá Esnan Cu Tin Apoyo di Dios
7. Kico ta encerá siña únicamente siñansanan basá riba Bijbel?
7 Nan ta basa nan siñansanan riba Bijbel. Juan 7:16, 17; 8:47) Ta lógico cu si nos kier gosa di Dios su apoyo, nos tin cu siña únicamente loke Dios ta revelá den su Palabra, i rechasá siñansanan basá riba sabiduria of tradicion di hende.—Isaías 29:13; Mateo 15:3-9; Colosensenan 2:8.
Jesus a bisa: “Loke mi ta siña no ta di mi, sino ta pertenecé na esun cu a manda mi. Si un hende ta deseá di haci Su boluntad, lo e sa tocante e siñansa si e ta for di Dios of si mi ta papia di parti di mi mes.” Ademas el a bisa: “Esun cu ta bini for di Dios ta scucha e dichonan di Dios.” (8. Di con ta importante pa usa e nomber di Dios den adoracion?
8 Nan ta usa i duna di conocé e nomber di Dios, Jehova. Isaías a profetisá: “Riba e dia ei lo bo bisa sigur: ‘Yama danki na Jehova! Inbocá su nomber. Duna di conocé entre pueblonan su manera di trata. Haci mencion cu su nomber ta poné na haltu. Alabá Jehova cu melodia, pasobra el a obra di manera sobresaliente. Ta haci esaki conocí den henter e tera.’” (Isaías 12:4, 5) Jesus a siña su siguidónan pidi den oracion: “Nos Tata cu ta den shelu, laga bo nomber sea santificá.” (Mateo 6:9) P’esei, sea cu nan tabata hudiu of no-hudiu, cristiannan mester a sirbi como “un pueblo pa [Dios] su nomber.” (Echonan 15:14) Obviamente Dios ta contentu di apoyá esnan cu ta orguyoso di ta “un pueblo pa su nomber.”
9. (a) Pakico goso ta caracterisá miembronan dje religion berdadero? (b) Con Isaías ta haci un contraste entre religion berdadero i religion falsu?
9 Nan ta reflehá Dios su personalidad gososo. Como e autor dje “bon nobo,” Jehova ta “e Dios felis.” (1 Timoteo 1:11) Con lo por ta posibel anto pa su pueblo ta infelis of persistentemente pesimista? Apesar di angustia rond mundu i problema personal, cristiannan berdadero ta keda cu un spiritu gososo debí cu regularmente nan ta come cuminda spiritual na abundancia. Isaías ta haci un contraste entre nan i hende cu ta practicá religion falsu: “Esaki ta loke Señor Soberano Jehova a bisa: ‘Mira! Mi propio sirbidónan lo come, pero boso mes lo padecé di hamber. Mira! Mi propio sirbidónan lo bebe, pero boso mes lo padecé di sed. Mira! Mi propio sirbidónan lo alegrá, pero boso mes lo pasa bergwensa. Mira! Mi propio sirbidónan lo sclama di goso debí na e bon condicion di curason, pero boso mes lo sclama debí na e dolor di curason i boso lo grita yora debí na puru spiritu kibrá.’”—Isaías 65:13, 14.
10. Con esnan cu tin e religion berdadero ta evitá di mester siña for di nan fayonan?
10 Nan ta basa nan conducta i nan decisionnan riba principionan bíblico. E escritor di Proverbionan ta consehá nos: “Confia den Jehova cu tur bo curason i no lèn riba bo mes comprendimentu. Den tur bo camindanan tuma nota di dje, i e mes lo haci bo camindanan stret.” (Proverbionan 3:5, 6) Dios ta apoyá esnan cu ta acudí na dje p’e guia nan, en bes di acudí na e teorianan contradictorio di hende cu ta ignorá sabiduria divino. Te na e grado cu un hende ta dispuesto di forma su bida di acuerdo cu e Palabra di Dios, lo e evitá di mester siña for di su fayonan.—Salmo 119:33; 1 Corintionan 1:19-21.
11. (a) Pakico miembronan dje religion berdadero no por ta partí den clero i laico? (b) Ki ehempel esnan cu ta hiba delantera den Dios su pueblo mester pone pa e tou?
11 Nan ta organisá n’e mes manera cu e congregacion cristian di promé siglo. Jesus a establecé e principio aki: “No laga hende yama boso Rabi, pasobra un so ta boso maestro, miéntras cu boso tur ta ruman. Ademas, no yama ningun hende boso tata riba tera, pasobra un so ta boso Tata, Esun celestial. Tampoco sea yamá ‘lider,’ pasobra un so ta boso Lider, e Cristo. Pero esun mayor den boso mester ta boso sirbidó.” (Mateo 23:8-11) Den un congregacion di ruman no por tin un grupo di clero arogante cu ta onra nan mes cu título grandioso i halsa nan mes riba e laiconan. (Job 32:21, 22) Bijbel ta manda esnan cu ta pastoreá e tou di Dios pa nan no hacié “obligá, sino di buena gana; tampoco pa amor pa ganashi desonesto, sino cu empeño; tampoco como dominando riba esnan cu ta herencia di Dios, sino birando ehempel p’e tou.” (1 Pedro 5:2, 3) Berdadero wardadónan cristian ta evitá di purba manda riba fe di otronan. Nan ta simplemente haci nan best pa pone un excelente ehempel como compañeronan di trabou den Dios su sirbishi.—2 Corintionan 1:24.
12. Ki punto di bista balansá tocante gobiernu humano Dios ta spera di parti di esnan cu ta deseá su apoyo?
12 Nan ta sumiso na gobiernunan humano, i tog nan ta keda neutral. Esun cu no ta “sumiso na autoridadnan superior” no por spera Dios su apoyo. Pakico no? Pasobra “e autoridadnan cu ta existí, Dios a pone nan den nan posicion relativo. Pues, esun cu oponé autoridad a pone su mes contra e areglo di Dios.” (Romanonan 13:1, 2) Sin embargo, Jesus a reconocé cu lo por tin un conflicto di interes, ora el a bisa: “Paga bek e cosnan di César na César, pero e cosnan di Dios na Dios.” (Marco 12:17) Esnan cu ta deseá di tin Dios su apoyo mester “sigui busca . . . promé e reino [di Dios] i Su husticia,” miéntras cu na mes momento nan ta obedecé e leynan dje pais cu ta na armonia cu e responsabilidadnan superior cu nan tin cu Dios. (Mateo 6:33; Echonan 5:29) Jesus a enfatisá e importancia di neutralidad ora el a bisa di su disipelnan: “Nan no ta parti di mundu, mescos cu ami no ta parti di mundu.” Mas despues el a agregá: “Mi reino no ta parti dje mundu aki.”—Juan 17:16; 18:36.
13. Ki papel amor ta hunga den identificá ken ta e pueblo di Dios?
13 Nan ta imparcial i ta “obra loke ta bon pa cu tur.” (Galationan 6:10) Amor cristian no conocé parcialidad. E ta aceptá tur hende sin importá nan color di cueru, posicion económico of social, nacionalidad of idioma. E echo cu nan ta obra loke ta bon cu tur hende, i specialmente cu esnan cu ta relacioná cu nan den fe, ta yuda identificá esnan cu tin e apoyo di Dios. Jesus a bisa: “Na esaki tur lo sa cu boso ta mi disipelnan, si boso tin amor entre boso.”—Juan 13:35; Echonan 10:34, 35.
14. E pueblo cu tin Dios su aprobacion lo gosa di aceptacion di hende en general automáticamente? Splica.
14 Nan ta dispuesto di sufri persecucion pasobra nan ta haci e boluntad di Dios. Jesus a avisá su siguidónan di antemano: “Si nan a persiguí mi, nan lo persiguí boso tambe; si nan a observá mi palabra, nan lo observá di boso tambe.” (Juan 15:20; Mateo 5:11, 12; 2 Timoteo 3:12) Semper esnan cu tin Dios su apoyo tabata impopular, mescos cu tabata e caso cu Noe, kende a condená mundu pa medio di su fe. (Hebreonan 11:7) Awe, esnan cu ta deseá di tin Dios su apoyo no ta tribi di swak e palabra di Dios ni comprometé principionan divino pa evitá persecucion. Tanten cu nan sirbi Dios fielmente, nan sa cu hende lo keda ‘confundí i sigui papia malu’ di nan.—1 Pedro 2:12; 3:16; 4:4.
Ora pa Evaluá e Echonan
15, 16. (a) Ki preguntanan lo yuda nos identificá e grupo religioso cu ta gosa dje apoyo di Dios? (b) Na cua conclusion miyones di hende a yega, i di con?
15 Puntra bo mes: ‘Cua grupo religioso ta conocí pa pega cuidadosamente na e Palabra di Dios, asta caminda loke e ta siña ta diferente for di loke mayoria hende ta kere? Ken ta enfatisá e importancia di Dios su nomber personal, i asta ta us’é pa identificá nan mes? Ken ta dirigí atencion cu optimismo na e Reino di Dios como e único solucion pa tur problema di humanidad? Ken ta sostené e normanan bíblico di conducta, asta si esei mester pone hende mira nan como ouderwets? Di cua grupo ta conocí cu e no tin un clero cu salario, i cu tur su miembronan ta predicadó? Ken ta ricibí elogio debí cu nan ta ciudadanonan cu ta respetá ley, apesar cu nan ta keda sin participá den política? Ken ta usa nan tempu i placa amorosamente pa yuda otro hende siña tocante Dios i su propósito? I apesar di tur e cosnan positivo aki, ken ta ser despreciá, ridiculisá i persiguí?’
16 Miyones di hende rond mundu a evaluá e echonan i a keda convencí cu ta Testigonan di Jehova so ta practicá e religion berdadero. Nan a yega na e conclusion aki a base di loke Testigonan di Jehova ta siña, a base di nan conducta, i tambe a base dje beneficionan cu nan religion a producí. (Isaías 48:17) De echo, miyones di hende ta bisando, manera a ser predicí na Zacarías 8:23: “Nos lo bai cu boso, pasobra nos a tende cu Dios ta cu boso.”
17. Pakico no ta arogante di parti di Testigonan di Jehova pa mustra cu ta nan tin e religion berdadero?
17 Ta arogante di parti di Testigonan di Jehova pa mustra cu ta nan so tin apoyo di Dios? Si bo wak bon, nan ta mescos cu e israelitanan na Egipto ora nan a afirmá di tin Dios su apoyo apesar di loke e egipcionan tabata kere aden, of e cristiannan di promé siglo ora nan a afirmá cu ta nan tin Dios su apoyo, i no e religiosonan hudiu. E echonan aki ta papia pa nan mes. Den 235 pais, Testigonan di Jehova ta efectuando e trabou cu Jesus a profetisá cu su siguidónan lo ta haciendo den e tempu di Mateo 24:14.
fin: “E bon nobo aki dje reino lo ser predicá den tur e tera habitá como testimonio pa tur nacion; i e ora ei e fin lo yega.”—18, 19. (a) Di con no tin niun motibu pa Testigonan di Jehova stop di efectuá nan trabou di predicá, maske hende ta oponé nan? (b) Con Salmo 41:11 ta apoyá e echo cu Testigonan tin Dios su apoyo?
18 Testigonan di Jehova lo sigui cumpli cu e comision aki, sin nunca permití persecucion of oposicion stroba nan actividad. E trabou di Jehova mester ser hací, i lo e ser hací tambe. Tur intento cu otro hende a haci durante e siglo anterior pa stroba e Testigonan di cumpli cu e trabou di Dios a caba den fracaso total, pasobra Jehova a primintí: “Ki arma cu forma contra bo, lo no tin éxito, i ki lenga cu lanta contra bo den huicio, lo bo condená. Esaki ta e posesion hereditario dje sirbidónan di Jehova, i nan husticia ta bini di mi.”—Isaías 54:17.
19 E echo cu awe Testigonan di Jehova ta mas fuerte i mas activo cu nunca, i esei apesar di persecucion rond mundu, ta prueba di cu Jehova ta contentu cu loke nan ta haciendo. Rey David a bisa: “Debí na esaki mi sa cu bo a haña deleite den mi, debí cu mi enemigu no ta grita triunfo riba mi.” (Salmo 41:11; 56:9, 11) Nunca enemigunan di Dios lo no por grita triunfo riba e pueblo di Jehova, pasobra nan Lider Jesucristo ta avansando na victoria final!
Bo Por Contestá?
• Cua ta algun ehempel antiguo di hende cu tabatin Dios su apoyo?
• Cua ta algun rasgo cu ta identificá religion berdadero?
• Pakico abo personalmente ta convencí cu Testigonan di Jehova tin e apoyo di Dios?
[Preguntanan di Estudio]
[Plachi na página 13]
Esnan cu ta deseá Dios su apoyo mester basa nan siñansanan únicamente riba su Palabra
[Plachi na página 15]
Ancianonan cristian ta sirbi como ehempel pa e tou