Informe di Proclamadónan di Reino

Su Necesidadnan Spiritual A Ser Satisfacé

CHIPRE ta un isla n’e skina nortoost di laman Mediteráneo. Den tempu bíblico, Chipre tabata famoso pa motibu di su koper i palu excelente. Durante nan promé biahe como misionero, Pablo cu Barnabas a proclamá e bon nobo di Reino einan. (Echonan 13:4-12) Awendia, ainda e bon nobo tin un efecto positivo riba bida di hopi habitante di Chipre. Esaki sigur ta e caso cu Lucas, un homber di 40 i picu aña. E ta relatá:

“Mi a nace den un famia di shete yu na un hacienda di baca. Desde mi infancia mi tabata gusta lesa. Mi buki faborito tabata un edicion tamaño di sacu di e Scritura Griego Cristian. Ora mi tabatin 10 aña di edad, ami cu algun di mi amigunan a forma un grupo chikitu di studio di Bijbel. Sin embargo, e no a dura mashá pasobra algun hende di mas edad den e pueblo a yama nos herehe.

Despues, miéntras mi tabata bai scol na Merca, mi a topa hende di vários religion. Esei a bolbe lanta mi deseo pa cosnan spiritual. Mi a pasa hopi dia den e biblioteca di universidad ta studia vários religion. Tambe mi a bishitá un cantidad di misa, pero apesar di mi esfuersonan, tog mi no tabata satisfecho spiritualmente.

Despues cu mi a caba mi estudio, mi a bolbe Chipre i a aceptá un trabou como director di un laboratorio médico. Un homber di edad, Testigo di Jehova, cu yama Antonis tabata bishitá mi na trabou. Sin embargo, su bishitanan no a scapa atencion di Iglesia Griego Ortodox.

No a dura mashá cu un teólogo a bini cerca mi i a consehá mi pa no papia cu Testigonan di Jehova. Dor cu desde infancia nan a siña mi cu ta Iglesia Griego Ortodox tin e berdad, mi a bai di acuerdo i a stop e bishitanan di Antonis i a cuminsá combersá di Bijbel cu e teólogo. Tambe mi a bishitá hopi monasterio na Chipre. Asta mi a biaha bai Grecia i a bishitá ceru Atos cu e mundu di cristian ortodox ta considerá e ceru santísimo. Tog, mi preguntanan tocante Bijbel no a haña contesta.

E ora ei mi a resa pidi Dios yuda mi haña e berdad. Djis despues di esei, atrobe Antonis a bin bishitá mi na trabou i mi a sinti cu esaki ta contesta pa mi oracion. Pues, mi a stop di bai cerca e teólogo i a cuminsá studia Bijbel cu Antonis. Mi a sigui haci progreso, i na october 1997 mi a simbolisá mi dedicacion na Jehova mediante bautismo bou di awa.

Na principio, mi casá i mi dos yu muhernan mas grandi cu e tempu ei tabatin 14 i 10 aña tabata contra. Pero debí na mi bon conducta, mi casá a dicidí di asistí na un reunion na Salon di Reino. El a keda mashá impresioná cu e amabilidad di e Testigonan i e interes personal cu nan a mustra den dje. El a keda impresioná foral cu e manera cu nan ta usa Bijbel. Esei tabatin como resultado cu mi casá i e dos yu muhernan mas grandi a aceptá pa studia Bijbel cu Testigonan di Jehova. Imaginá bo e goso cu mi a sinti ora nan tur tres a bautisá n’e Congreso di Distrito “Dios Su Palabra Profético” na 1999!

Sí, mi búskeda pa e berdad a ser satisfacé. Awor henter nos famia, incluso mi casá i cuater yunan, ta uní den e adoracion puru di Jehova.”