Bo Placa of Bo Bida?

Kisas bo a tende di bandidunan cu ta zwai nan scopet den cara di nan víctima, exigiendo: “Bo placa of bo bida!” Awe, e exigencia bon conocí aki ta ser reflehá den un dilema difícil cu nos tur ta confrontá, foral si nos ta biba den paisnan próspero. Sin embargo, e biaha aki no ta un bandidu ta bini cu e exigencia ei. Mas bien, ta e comunidad cu cada bes ta pone mas énfasis riba placa i éxito material.

TAL énfasis ta lanta henter un set nobo di cuestion i preocupacion. A costo di kico nos mester sigui tras di placa i cosnan material? Nos lo por ta satisfecho cu ménos? En realidad hende ta sacrificando “e berdadero bida” riba e altar di materialismo? Ta placa ta e medio pa yega na un bida felis?

Locura pa Placa

Entre e deseo i pasionnan humano—legítimo of no—amor pa placa ta lucha pa e promé lugá. Distinto di e deseo pa sex i cuminda, e locura pa placa por ta constante i sin fin. Aparentemente behes no ta plaki’é. De echo, den hopi caso segun cu un hende su edad ta subi, su interes den placa of preocupacion cu placa i loke placa por cumpra, ta aumentá.

Ta parce cu golosidad pa placa ta aumentá. E personahe principal den un película popular a bisa: “Golosidad ta producí. Golosidad ta bon.” Aunke hopi hende a referí na e añanan ’80 di siglo 20 como e Era di Golosidad, loke a tuma lugá promé i despues dje periodo ei ta mustra cu hende su reaccion riba placa no a cambia mashá den transcurso di añanan.

Loke probablemente ta nobo ta cu asina hopi hende ta mira oportunidadnan pa satisfacé instantáneamente nan deseo pa mas rikesa. Ta parce cu mayor parti di tempu mayoria hende na mundu ta dedicá mayor parti di nan energia na producí i adkerí mas i mas cos. Kisas bo ta di acuerdo cu poseé cos material i gasta placa a bira actividadnan pasioná—i hopi bes sumamente imaginativo—di bida moderno.

Pero, hende ta mas felis debí na esei? Contestando e pregunta aki, rey Sálomon, un homber sabí i masha ricu, a skirbi 3.000 aña pasá: “Un simpel stimadó di plata lo no ta satisfecho cu plata, ni ningun stimadó di rikesa cu entrada. Esei tambe ta banidad.” (Eclesiástes 5:10) Estudionan moderno di bida social a yega na conclusionnan similar interesante.

Placa i Felicidad

Un dje descubrimentunan mas sorprendente relacioná cu comportacion humano ta cu e acumulacion di placa i cosnan material no necesariamente ta percurá un aumento corespondiente di satisfaccion i felicidad. Loke hopi investigadó a bin realisá ta cu una bes un persona alcansá un cierto nivel di prosperidad, su sintimentu di bienestar no ta dependé mas di cuantu cos material e tin na su disposicion.

Pues, e corementu descontrolá tras di cosnan material i placa ta pone cu dado momento hopi hende ta puntra nan mes: ‘Ta parce cu nos  ta disfrutá di cada un dje cosnan nobo cu nos cumpra; pero di con, despues di tur cos, e placernan aki no ta duna nos un mayor sentido di satisfaccion?’

Den su buki Happy People (Hende Felis), e autor Jonathan Freedman ta remarcá: “Una bes bo alcansá un entrada mínimo, e cantidad di placa cu bo tin no ta haci masha diferencia pa loke ta bo felicidad. Pa hende riba e nivel di pobresa, e relacion entre entrada i felicidad ta remarcablemente chikitu.” Hopi hende a bin realisá cu loke realmente ta contribuí na felicidad individual ta ora bo tin posesion spiritual, actividad significativo den bida i balornan moral. Tambe ta importante pa nos tin relacionnan humano i ser liber di conflicto of di restriccionnan cu lo por stroba nos di disfrutá di loke nos tin.

Hopi hende ta pensa cu e causa básico di mayoria dje problemanan social djawendia ta e tendencia di purba usa prosperidad material pa solucioná loke ta realmente problemanan interno. Algun comentarista social ta papia di un ambiente general di pesimismo i malcontentu. Tambe nan ta mencioná e creciente tendencia cu hende den paisnan próspero tin di consultá terapista of busca e sentido di bida i armonia interno cerca lidernan prominente, culto i gruponan supuestamente terapéutico. Esaki ta confirmá cu cos material no por duna berdadero nificacion na bida.

Poder i Impotencia di Placa

Ta cierto cu placa tin poder. E por cumpra cas bunita, paña elegante i mueble i ekipo impresionante. Tambe e por cumpra hopi admiracion, labiamentu, i hende cu ta haci manera bo kier, i e ta asta producí un par di amigu temporal cu ta masha dispuesto pa haci fabor. Pero ta te ei e poder di placa ta yega. Loke mas nos tin mester, placa no por cumpra: amor di un berdadero amigu humano, pas mental, un poco consuelo sincero ora morto ta acercá. I pa esnan cu ta atesorá nan relacion cu e Creador, placa no por cumpra Dios su aprobacion.

Rey Sálomon, kende tabatin tur cos bon cu placa por a cumpra den su tempu, a reconocé cu confia den posesion material no ta hiba na felicidad duradero. (Eclesiástes 5:12-15) Bo por perde bo placa debí na inflacion of dor cu banco ta bati bankrut. Propiedad por ser destruí dor di tormenta severo. Maske pólisanan di seguro por remplasá algun pérdida material, nan no por compensá pérdida emocional. Accion i bono por perde tur nan balor di anochi pa mainta debí na un caida económico repentino. Asta un trabou bon pagá, por t’ei awe i disparcé mañan.

Con anto nos por mantené placa na su lugá? Ki papel placa of posesionnan material mester hunga den nos bida? Sea asina bon di examiná e asuntu mas aleu pa wak con bo por poseé algu cu realmente ta balioso: “e berdadero bida.”

[Plachinan na página 4]

Posesionnan material no ta trece berdadero felicidad