Cuida Huérfano i Biuda den Nan Tribulacion

No ta difícil pa reconocé cu nos ta biba den un mundu sin amor. Refiriendo na e clase di hende cu lo tin durante “e último dianan,” apostel Pablo a skirbi: “Lo presentá tempu crítico, duru pa trata cuné. Pasobra hende lo ta stimadó di nan mes, . . . sin cariño natural.” (2 Timoteo 3:1-3) Esta cierto e palabranan ei ta!

E AMBIENTE moral di nos tempu a contribuí na un falta di compasion den curason di hopi hende. Hende ta cada biaha ménos interesá den bienestar di otronan, den algun caso asta den bienestar di miembronan di nan propio famia.

Esaki ta perhudicá hopi hende cu, dor di vários circunstancia, ta bira pober. E cantidad di huérfano i biuda ta creciendo constant debí na guera, desasternan natural i mudansa forsá di hende en busca di refugio. (Eclesiástes 3:19) Un informe di Fondo di Nacionnan Uní pa Mucha ta declará: “Mas cu 1 miyon [mucha] a bira huérfano of a ser separá for di nan famia debí na guera.” Tambe bo sa dje cantidad grandi di mama soltero, bandoná of divorciá, cu tin e tarea difícil di sobrebibí i cria nan famia sin apoyo di un casá. E situacion ta bira pió dor dje echo cu algun pais ta confrontá un crísis económico serio, loke ta hiba hopi di nan ciudadanonan na pobresa extremo.

En bista di esaki, tin un speransa pa esnan cu ta pasa den tribulacion? Con por aliviá e sufrimentu di biuda i huérfano? E problema aki lo ser eliminá un dia?

Cuido Amoroso den Tempu Bíblico

Percurá pa e necesidadnan físico i spiritual di biuda i huérfano semper tabata un parti integral di adoracion na Dios. Ora di cosechá nan grano of frutanan, e israelitanan no tabatin mag di bai bek pa piki sobrá cu a keda atras den nan cunucu. Mester a laga esei “pa e residente stranhero, pa e huérfano di tata i pa e biuda.” (Deuteronomio 24:19-21) E Ley di Moises a specificá: “Boso no mester afligí ningun biuda ni huérfano di tata.” (Éxodo 22:22, 23) E biuda i huérfanonan cu Bijbel  ta papia di dje apropiadamente a representá e hendenan mas pober, ya cu ora e esposo i tata a muri of ámbos mayor, e miembronan di famia cu a keda atras kisas a keda nan so i den pobresa. E patriarca Job a declará: “Mi tabata rescatá esun afligí cu tabata sclama pa yudansa, i e huérfano di tata i ken cu no tabatin yudante.”—Job 29:12.

Na principio dje congregacion cristian, un rasgo distintivo di adoracion berdadero tabata cu nan a percurá pa esnan afligí i cu realmente tabata den necesidad dor di morto di mayornan of di un esposo. Cu profundo interes den e bienestar di hende asina, disipel Santiago a skirbi: “E forma di adoracion cu ta limpi i incontaminá desde e punto di bista di nos Dios i Tata ta esaki: cuida huérfano i biuda den nan tribulacion, i mantené bo mes sin mancha di mundu.”—Santiago 1:27.

Fuera di mencioná huérfano i biuda, Santiago a mustra profundo interes tambe pa otro hende cu tabata pober i desampará. (Santiago 2:5, 6, 15, 16) Apostel Pablo a desplegá e mésun consideracion. Ora e cu Barnabas a ricibí nan asignacion di predicá, un dje instruccionnan tabata pa “corda riba hende pober.” I cu un bon concenshi Pablo por a bisa: “Esaki mes tambe mi a forsa sinceramente pa haci.” (Galationan 2:9, 10) E relato dje actividadnan dje congregacion cristian djis despues di a ser establecí, a bisa: “Niun hende den nan no tabatin necesidad . . . Anto nan tabata distribuí na cada un segun su necesidad.” (Echonan 4:34, 35) Sí, e areglo establecí den antiguo Israel pa cuida huérfano, biuda i esnan desampará, a sigui na vigor den e congregacion cristian.

 Ta claro sí cu e yudansa percurá tabata moderá i na armonia cu e medionan dje congregacionnan individual. Nan no a malgastá placa, i esnan cu nan a yuda tabata realmente den necesidad. Niun cristian no a probechá inhustamente dje areglo aki, i nan no a pone ningun carga innecesario riba e congregacion. Esaki tabata claramente bisto den e instruccionnan di Pablo describí na 1 Timoteo 5:3-16. Ei nos ta lesa cu si e famianan di esnan den necesidad por a yuda nan, ta nan mester a carga e responsabilidad ei. Biudanan pober mester a cumpli cu cierto rekisito pa cualificá pa ricibí yudansa. Tur esaki ta reflehá e areglo sabí cu Jehova ta usa pa cuida esnan den necesidad. Pero tambe esei ta mustra cu mester ehercé ekilibrio, ya asina niun hende no ta abusá dje bondad mustrá.—2 Tesalonicensenan 3:10-12.

Percurando pa Huérfano i Biuda Awe

E principionan cu siguidónan di Dios a sigui den pasado ta aplicá ainda den e congregacionnan di Testigonan di Jehova pa loke ta trata mustra interes na esnan cu ta sufri tribulacion i duna nan yudansa. Amor fraternal ta un rasgo principal, manera Jesus a declará: “Na esaki tur lo sa cu boso ta mi disipelnan, si boso tin amor entre boso.” (Juan 13:35) Si tin ruman ta den necesidad of a bira víctima di un desaster of dje efectonan di guera of di conflicto civil, e resto dje hermandad internacional ta ansioso pa haña maneranan pa yuda nan den sentido spiritual i material. Laga nos tuma nota di algun experencia actual cu ta mustra kico ta ser hací relacioná cu esaki.

Pedro no ta corda mashá di su mama cu a muri ora e tabatin un aña i mei so di edad. Ora Pedro tabatin cincu aña, su tata tambe a muri. Pues Pedro a keda su so cu su rumannan. Testigonan di Jehova tabata bishitá su tata caba, pues Pedro cu su ruman grandinan tur a cuminsá haña un studio di Bijbel na cas.

Pedro ta conta: “E siguiente siman mes, nos a cuminsá asistí na reunion. Segun cu nos a asociá cu e rumannan, nos por a sinti e amor cu nan a expresá pa nos. E congregacion tabata un refugio pa mi pasobra e rumannan a mustra mi amor i cariño, como si fuera nan tabata mi mayornan.” Pedro ta corda cu un dje ancianonan cristian tabata invit’é na su cas. Ei Pedro a combersá i relahá huntu cu e famia. “Esakinan ta recuerdonan precioso pa mi,” segun Pedro, kende a cuminsá predicá tocante su fe na edad di 11 aña i a bautisá cu 15 aña. Cu yudansa dje congregacion, su ruman grandinan tambe a haci hopi progreso den sentido spiritual.

Tambe tin e caso di David. E cu su ruman muher ohochi a ser bandoná ora nan mayornan a separá. Nan welonan i un tanta a cria nan. David ta conta: “Ora nos a bira mas grandi i a realisá e situacion cu nos tabata aden, un sintimentu di insiguridad i tristesa a poderá di nos. Nos tabatin mester di algu pa apoyá ariba. Mi tanta a bira Testigo di Jehova, i gracias na esaki nos a ser instruí den e berdad di Bijbel. E rumannan a duna nos nan cariño i amistad. Nan tabata gusta nos mashá i nan a animá nos pa alcansá meta i sigui traha pa Jehova. Tempu mi tabatin rond di dies aña, un sirbidó ministerial tabata bin busca mi pa sali den e ministerio di veld. Un otro ruman homber tabata paga mi gastunan ora mi asistí na congreso. Un ruman a yuda mi asta pa mi por a duna contribucion na Salon di Reino.”

 David a bautisá cu 17 aña, i despues el a cuminsá sirbi na e oficina di sucursal di Testigonan di Jehova na México. Awe ainda e ta reconocé: “Tin vários anciano cu ta contribuí na mi educacion i ta duna mi conseho útil. Dje manera aki mi ta venciendo e sintimentu di insiguridad i soledad.”

Abel, un anciano den un congregacion na México caminda tin vários biuda cu tin mester di yudansa, ta conta: “Mi ta convencí cu e cos cu biudanan tin mas mester di dje ta apoyo emocional. Tin biaha nan ta pasa dor di periodonan di depresion; nan ta sinti nan mes so. P’esei ta masha importante pa apoyá nan i scucha nan. Nos [e ancianonan di congregacion] ta bishitá nan cu frecuencia. Ta bon pa tuma tempu pa presta atencion na nan problemanan. Esaki ta yuda nan sinti nan mes consolá spiritualmente.” Sin embargo, tin biaha mester duna yudansa económico tambe. Poco tempu pasá Abel a conta: “Awor nos ta construyendo un cas pa un ruman cu ta biuda. Nos ta dedicá algun diasabra i algun atardi durante siman na traha riba su cas.”

Un otro anciano ta bisa en cuanto su propio experencia den yuda huérfano i biuda: “Ami ta kere cu huérfanonan tin asta mas mester di amor cristian cu e biudanan. Mi a ripará cu ta mas probabel cu nan ta sinti nan mes rechasá compará cu otro mucha i adolesente cu tin ámbos mayor. Nan tin mester di hopi expresion di cariño fraternal. Ta bon pa busca nan drechi despues di reunion pa haña sa con ta bai cu nan. Tin un ruman homber casá cu a bira huérfano tempu e tabata chikitu. Semper mi ta cumind’é calurosamente na reunion, i e ta brasa mi ora e mira mi. Esaki ta fortalecé e lasonan di berdadero amor fraternal.”

Jehova Lo “Libra Esun Pober”

Confia den Jehova ta fundamental pa trata cu e situacion di biuda i huérfano cu éxito. Bijbel ta bisa di dje: “Jehova ta protehá e residente stranhero; e ta duna alivio na e huérfano di tata i e biuda.” (Salmo 146:9) E solucion completo pa e tipo di problemanan aki lo bini solamente mediante e Reino di Dios den man di Jesucristo. Describiendo proféticamente e gobernacion ei dje Mesías, e salmista a skirbi: “Lo e libra esun pober cu ta sclama pa yudansa, tambe esun afligí i ken cu no tin yudante. Lo e sinti duele di esun di condicion humilde i esun pober, i e alma di esnan pober lo e salba.”—Salmo 72:12, 13.

Segun cu e fin dje sistema di cosnan actual ta yegando mas cerca, e preshonnan cu cristian en general ta confrontá lo aumentá sigur. (Mateo 24:9-13) Ta necesario pa cada dia cristiannan desplegá mas interes den otro i “tene amor intenso pa otro.” (1 Pedro 4:7-10) Hombernan cristian, foral anciano, mester desplegá interes i compasion na esnan cu ta huérfano. I muhernan maduro den congregacion por duna hopi apoyo na biuda i ser un fuente di consuelo. (Tito 2:3-5) De echo, tur hende por contribuí dor di demostrá un interes den esnan cu ta pasando den tribulacion.

Cristiannan berdadero no ta ‘cera e porta di nan tierno compasion’ ora nan ‘mira nan ruman den necesidad.’ Nan ta bon conciente dje spiertamentu di apostel Juan: “Yu chikitunan, laga nos stima, no cu palabra ni cu lenga, sino cu echo i berdad.” (1 Juan 3:17, 18) Pues laga nos “cuida huérfano i biuda den nan tribulacion.”—Santiago 1:27.

[Komentario na página 11]

“Laga nos stima, no cu palabra ni cu lenga, sino cu echo i berdad.”—1 Juan 3:18

[Plachinan na página 10]

Cristiannan berdadero ta percurá pa huérfano i biuda materialmente, spiritualmente i emocionalmente