Sigui Firme Como si Fuera Mirando Esun Cu Ta Invisibel!

“[Moises] a sigui firme como si fuera el a mira Esun cu ta invisibel.”—HEBREONAN 11:27.

1. Ki declaracion remarcabel Jesus a haci tocante Dios den su Sermon Riba Ceru?

JEHOVA ta e Dios invisibel. Ora Moises a pidi pa wak Su gloria, Jehova a respondé: “Bo no por mira mi cara, pasobra ningun hende no por mira mi i tog biba.” (Éxodo 33:20) I apostel Juan a skirbi: “Ningun hende no a mira Dios nunca.” (Juan 1:18) Ni Jesucristo, ora e tabata un hende riba tera, no por a mira Dios. Pero den su Sermon Riba Ceru Jesus a bisa: “Felis ta esnan di curason puru, ya cu nan lo mira Dios.” (Mateo 5:8) Kico Jesus tabata kier men?

2. Di con nos no por mira Dios cu nos wowo literal?

² E Scritura ta identificá Jehova como un Spiritu invisibel. (Juan 4:24; Colosensenan 1:15; 1 Timoteo 1:17) Pues, Jesus no tabata kier men cu nos como hende realmente lo  por mira Jehova cu nos wowo literal. Ta cierto sí cu cristiannan ungí lo mira Jehova Dios den shelu despues cu nan ser resucitá como criaturanan spiritual. Pero hende cu ta “di curason puru” i cu tin e speransa di biba pa semper riba tera tambe por “mira” Dios. Con esaki ta posibel?

3. Con hende por percibí algun dje cualidadnan di Dios?

³ Nos ta siña algu tocante Jehova dor di observá cuidadosamente e cosnan cu el a crea. Podisé asina nos ta keda impresioná cu su poder i ser impulsá pa reconoc’é como Dios e Creador. (Hebreonan 11:3; Revelacion 4:11) Apostel Pablo a skirbi relacioná cu esaki: “[Dios] su cualidadnan invisibel ta ser mirá claramente desde creacion di mundu padilanti, pasobra nan ta ser percibí den e cosnan trahá, asta su poder eterno i Divinidad.” (Romanonan 1:20) Pues Jesus su palabranan tocante mira Dios ta encerá e abilidad di percibí algun dje cualidadnan di Jehova. Mira Dios den e sentido ei ta basá riba conocimentu exacto i ta ser percibí spiritualmente cu ‘e wowo di curason.’ (Efesionan 1:18) Jesus su palabra i accionnan tambe ta revelá hopi cos di Dios. P’esei Jesus a bisa: “Ken cu a mira mi a mira e Tata tambe.” (Juan 14:9) Jesus a reflehá Jehova su personalidad perfectamente. Pues, un conocimentu dje bida i siñansanan di Jesus por yuda nos mira, esta percibí, algun dje cualidadnan di Dios.

Ta Vital pa Comprendé i Apreciá Cosnan Spiritual

4. Con hopi hende ta desplegá falta di spiritualidad awe?

⁴ Awe, fe i berdadero spiritualidad, esta comprendimentu i aprecio pa cosnan spiritual, ta masha scars. Segun Pablo: “No ta tur hende tin fe.” (2 Tesalonicensenan 3:2) Hopi hende ta completamente absorbá den nan empeñonan personal i no tin fe den Dios. Nan conducta pecaminoso i falta di spiritualidad ta stroba nan di mira Dios cu wowo di comprendimentu, pasobra apostel Juan a skirbi: “Esun cu ta haci malu no a mira Dios.” (3 Juan 11) Como cu tal personanan no ta mira Dios cu nan wowo literal, nan ta actua como si fuera Dios no ta mira loke nan ta haciendo. (Ezekiel 9:9) Nan ta despreciá cosnan spiritual, p’esei nan no por adkerí “e conocimentu mes di Dios.” (Proverbionan 2:5) Apropiadamente anto Pablo a skirbi: “Un hende físico no ta ricibí e cosnan dje spiritu di Dios, pasobra nan ta bobedad p’e; i e no por yega di conocé nan, pasobra nan ta ser examiná spiritualmente.”—1 Corintionan 2:14.

5. Hende cu ta enfocá riba cos spiritual ta conciente di kico?

⁵ Sin embargo, si nos ta enfocá riba cos spiritual, nos lo ta constantemente conciente dje echo cu maske Jehova no ta un Dios cu ta piki pieu, e sa ki ora nos ta actua riba mal pensamentu i deseonan. Sí, “e camindanan di un homber ta dilanti wowo di Jehova, i e ta contemplá tur su pasonan.” (Proverbionan 5:21) Si picá mester vence nos, nos ta ser impulsá pa repentí i busca Jehova su pordon pasobra nos stim’é i no kier hacié dolor.—Salmo 78:41; 130:3.

Kico Ta Haci Nos Firme?

6. Kico kier men ser firme?

⁶ Aunke Jehova ta invisibel pa nos wowonan, laga nos corda semper cu e sí ta mira nos. Ser conciente di su existencia i convencí cu e ta cerca di tur esnan cu ta inbok’é, lo yuda haci nos firme: constante i inmovibel den nos fieldad na dje. (Salmo 145:18) Nos por ta manera Moises, di ken Pablo a skirbi: “Pa medio di fe el a bandoná Egipto, pero sin tin miedu dje rabia dje rey, pasobra el a sigui firme como si fuera el a mira Esun cu ta invisibel.”—Hebreonan 11:27.

7, 8. Con bini Moises tabatin curashi dilanti fárao?

⁷ Pa Moises a cumpli cu e comision cu Dios a dun’é pa saca e israelitanan for di sclabitud na Egipto, el a presentá hopi bes dilanti e  fárao tiránico den un corte real yen-yen di magnate religioso i militar. Probablemente tabatin fila di ídolo cantu di tur e murayanan dje palacio. Aunke invisibel, Jehova tabata real pa Moises, distinto di tur e ídolonan cu a representá e diosnan sin bida di Egipto. No ta straño anto cu fárao no a logra intimidá Moises!

⁸ Kico a duna Moises e curashi pa presentá bes tras bes dilanti fárao? E Scritura ta bisa nos cu “e homber Moises tabata hopi mas mansu cu tur hende cu tabata riba e superficie dje suela.” (Númeronan 12:3) Claramente, su spiritualidad fuerte i e conviccion cu Dios tabata cuné, a duna Moises e fortalesa necesario pa representá ‘Esun invisibel’ dilanti e rey cruel di Egipto. Cua ta algun manera cu esnan cu ta “mira” e Dios invisibel ta desplegá nan fe den dje awe?

9. Cua ta un manera cu nos por sigui firme?

⁹ Un manera pa desplegá fe i sigui firme como si fuera mirando Esun cu ta invisibel ta dor di predicá cu curashi apesar di persecucion. Jesus a spierta su disipelnan: “Boso lo ta obheto di odio di parti di tur hende pa causa di mi nomber.” (Lucas 21:17) Tambe el a bisa nan: “Un esclabo no ta mayor cu su doño. Si nan a persiguí mi, nan lo persiguí boso tambe.” (Juan 15:20) I manera Jesus a predicí, djis despues di su morto su siguidónan a sufri persecucion den forma di menasa, aresto i sota. (Echonan 4:1-3, 18-21; 5:17, 18, 40) Aunke tabatin un ola di persecucion, e apostelnan di Jesus i otro disipelnan a sigui predicá e bon nobo cu curashi.—Echonan 4:29-31.

10. Con e confiansa cu nos tin den Jehova su cuido protectivo ta yuda nos den e ministerio?

¹⁰ Mescos cu Moises, e promé siguidónan di Jesus no a ser intimidá dor di nan hopi enemigunan visibel. E disipelnan di Jesus tabatin fe den Dios, i como resultado, nan por a wanta e persecucion severo cu nan a pasa aden. Sí, nan a sigui firme como si fuera nan a mira Esun cu ta invisibel. Awe, e echo cu nos ta constantemente conciente di Jehova su cuido protectivo ta duna nos confiansa, nos ta haña un curashi i ta sin miedu den nos trabou di predicá e Reino. E Palabra di Dios ta bisa cu “temblamentu pa motibu di hende, esei ta pone un trampa, pero esun cu ta confia den Jehova lo ser protehá.” (Proverbionan 29:25) Consecuentemente, nos no ta hala atras debí na miedu di persecucion; ni nos no tin bergwensa di nos ministerio. Nos fe ta motivá nos pa duna testimonio cu curashi na bisiña, colega, compañero di scol i otro hende.—Romanonan 1:14-16.

Esun Invisibel Ta Dirigí Su Pueblo

11. Segun Pedro i Hudas, con algun persona cu tabata asociá cu e congregacion cristian a demostrá un falta di spiritualidad?

¹¹ Fe ta yuda nos mira Jehova como esun cu ta dirigí su organisacion terenal. P’esei nos ta evitá di tin un actitud crítico pa cu esnan cu ta carga responsabilidad den congregacion. Tantu apostel Pedro como Hudas mitar ruman di Jesus, a spierta contra cierto hende cu tabata asina sin spiritualidad cu nan a papia malu di hombernan cu a hiba delantera entre e cristiannan. (2 Pedro 2:9-12; Hudas 8) E pikidónan di pieu ei lo a papia asina den presencia di Jehova si e tabata físicamente visibel pa nan? No! Pero pasobra Dios ta invisibel, e hombernan carnal ei a pensa cu nan no tin cu duna cuenta na Dios.

12. Ki actitud nos mester desplegá pa cu esnan cu ta hiba delantera den e congregacion?

¹² Ta cierto cu e congregacion cristian ta consistí di hende imperfecto. Esnan cu ta sirbi como anciano ta haci foutnan cu tin biaha ta afectá nos personalmente. No obstante, Jehova ta usando tal hombernan como wardadó di su tou. (1 Pedro 5:1, 2) Personanan cu ta enfocá riba cos spiritual ta reconocé cu esaki ta un medio cu Jehova ta usa pa dirigí su pueblo. P’esei, como cristian, nos ta evitá di tin un spiritu crítico i kehoso i nos ta mustra respet pa Dios su areglonan teocrático. Dor di ser obediente  na esnan cu ta hiba delantera den nos, nos ta mustra cu nos ta mira Esun cu ta invisibel.—Hebreonan 13:17.

Mira Dios Como Nos Magnífico Instructor

13, 14. Kico mira Jehova como e Magnífico Instructor ta nificá pa bo?

¹³ Tin un otro área cu ta rekerí percepcion spiritual. Isaías a profetisá: “Bo wowonan tin cu bira wowonan cu ta mira bo Magnífico Instructor.” (Isaías 30:20) Nos mester tin fe pa reconocé cu Jehova ta esun cu ta siña nos via su organisacion terenal. (Mateo 24:45-47) Mira Dios como nos Magnífico Instructor ta nificá mas cu mantené bon custumber di studia Bijbel i asistí regularmente na reunionnan cristian. E ta nificá haci pleno uso di Dios su percuracionnan spiritual. Por ehempel, nos tin cu presta mas cu e atencion acustumbrá na e guia cu Jehova ta percurá via Jesus, ya asina nos no ta drif bai den sentido spiritual.—Hebreonan 2:1.

¹⁴ Tin biaha nos mester haci un esfuerso special pa saca pleno beneficio dje cuminda spiritual. Por ehempel, kisas nos tin tendencia di pasa aríbariba di cierto relatonan bíblico cu nos ta haña difícil pa comprendé. Ora di lesa e revistanan E Toren di Vigilancia i Spierta! kisas nos ta asta salta cierto artículonan debí cu e tópico no ta interesá nos mashá. Of podisé nos ta laga nos mente dual durante reunionnan cristian. Sin embargo, nos por keda alerto si nos razoná cuidadosamente riba e puntonan cu ta ser considerá. Nos profundo aprecio pa e instruccion spiritual cu nos ta ricibí ta demostrá cu nos ta reconocé Jehova como nos Magnífico Instructor.

Nos Tin cu Rindi Cuenta

15. Con algun cristian a actua como si fuera nan tabata invisibel pa Jehova?

¹⁵ Fe den Esun cu ta invisibel ta vital, foral dor cu maldad ta prevalecé asina tantu den e ‘tempu aki di fin.’ (Daniel 12:4) Desonrades i  inmoralidad sexual ta plamá tur caminda. Naturalmente, ta sabí pa corda cu Jehova ta observá nos accionnan asta ora otro hende no por mira nos. Tin cristian ta lubidá esaki. Ora otro hende no ta mira nan, kisas nan ta participá den conducta no-bíblico. Por ehempel, algun no a resistí e tentacion pa wak entretenimentu perhudicial i pornografia riba Internet, na television, i via otro formanan di tecnologia moderno. Como cu un persona por participá den e cosnan ei den privá, algun cristian a actua como si fuera nan conducta ta invisibel pa Jehova.

16. Kico mester yuda nos cumpli cu Jehova su normanan haltu?

¹⁶ Ta bon pa tene na mente e palabranan di apostel Pablo: “Cada un di nos lo rindi cuenta pa su mes na Dios.” (Romanonan 14:12) Nos mester ta conciente cu cada biaha cu nos peca, nos ta peca contra Jehova. Sabiendo esaki lo yuda nos cumpli cu su normanan haltu i evitá conducta impuru. Bijbel ta recordá nos: “No tin un creacion cu no ta manifestá dilanti su bista, pero tur cos ta sunú i abiertamente exponé dilanti wowo di esun na ken nos tin cu rindi cuenta.” (Hebreonan 4:13) Ta berdad cu nos tin cu rindi cuenta na Dios, pero siguramente ta nos amor profundo pa Jehova ta e motibu principal pakico nos ta haci su boluntad i ta biba segun su normanan hustu. P’esei laga nos ser discreto den asuntunan manera e entretenimentu cu nos ta scoge i nos comportacion cu e sexo opuesto.

17. Cu ki clase di interes Jehova ta observá nos?

¹⁷ Jehova ta masha interesá den nos, pero esei no kier men cu e ta sinta warda nos haci fout p’e por castigá nos. Mas bien, e ta observá nos cu un interes motivá pa amor, mescos cu e interes di un tata cu kier recompensá su yunan obediente. Ta ki un consuelo pa sa cu nos Tata celestial ta contentu cu nos fe i ta “e recompensador di esnan cu ta busk’é cu empeño”! (Hebreonan 11:6) Laga nos ehercé fe absoluto den Jehova i “sirbié cu un curason completo.”—1 Crónicanan 28:9.

18. Ya cu Jehova ta observá nos i ta tuma nota di nos fieldad, ki siguransa nos ta ricibí for dje Scritura?

¹⁸ Proverbionan 15:3 ta bisa: “Wowo di Jehova ta na tur parti, vigilando mal hende i bon hende.” Sí, Dios ta vigilá mal hende i ta trata cu nan di acuerdo cu nan conducta. Sin embargo, si nos ta cai bou di “bon hende,” nos por tin sigur cu Jehova ta tuma nota di nos actonan di fieldad. E echo cu nos sa cu ‘nos labor no ta en bano en relacion cu Señor’ i cu esun cu ta invisibel lo no ‘lubidá nos trabou i e amor cu nos a mustra pa su nomber’ ta fortalecé nos fe mashá!—1 Corintionan 15:58; Hebreonan 6:10.

Invitá Jehova p’e Examiná Nos

19. Cua ta algun beneficio cu ta resultá di fe fuerte den Jehova?

¹⁹ Como fiel sirbidó di Jehova, nos ta precioso p’e. (Mateo 10:29-31) Aunke e ta invisibel, e por ta real pa nos, i nos por atesorá nos relacion precioso cuné. Si nos tin un actitud asina pa cu nos Tata celestial, esei por trece hopi beneficio pa nos. Nos fe fuerte lo yuda nos tin un curason limpi i un bon concenshi dilanti Jehova. Tambe fe sin hipocresia ta prevení nos di hiba un bida dòbel. (1 Timoteo 1:5, 18, 19) Nos fe inkebrantabel den Dios ta pone un bon ehempel pa hende rond di nos i por tin un efecto positivo riba nan. (1 Timoteo  4:12) Ademas, tal clase di fe ta promové conducta cu Dios ta aprobá, i esei ta alegrá Jehova su curason.—Proverbionan 27:11.

20, 21. (a) Di con nos mester deseá pa Jehova su bista alerto ta riba nos? (b) Con nos por aplicá Salmo 139:23 i 24 na nos mes?

²⁰ Si nos realmente ta sabí, nos lo ta contentu cu Jehova ta vigilá nos. Nos no solamente kier pa e mira nos, sino tambe nos ta deseá pa e haci un examinacion cabal di nos pensamentu i accionnan. Den oracion, lo ta bon pa nos invitá Jehova scudriñá nos i wak si nos tin cualkier mal inclinacion. Sigur e por yuda nos trata cu nos problemanan i haci cualkier ahuste necesario. Apropiadamente, e salmista David a canta: “Scudriñá mi completamente, o Dios, i conocé mi curason. Examiná mi, i conocé mi pensamentunan inkietante, i mira si tin den mi algun caminda doloroso, i guia mi den e caminda di tempu indefiní.”—Salmo 139:23, 24.

²¹ David a roga Jehova scudriñ’é pa wak si tabatin cualkier “caminda doloroso” den dje. Nos no ta anhelá mescos cu e salmista pa Dios scudriñá nos curason i wak si nos tin cualkier motivacion incorecto? Pues, cu fe laga nos pidi Jehova examiná nos. Pero kico si debí na un eror, ansiedad ta molestiá nos of si nos tin algu perhudicial den nos? E ora ei laga nos sigui resa sinceramente na nos amoroso Dios, Jehova, i someté nos mes humildemente na e guia di su spiritu santu i na e conseho di su Palabra. Nos por tin sigur cu lo e bini na nos yudansa i lo yuda nos sigui un proceder cu lo hiba na bida eterno.—Salmo 40:11-13.

22. Kico mester ta nos determinacion pa cu Esun cu ta invisibel?

²² Sí, Jehova lo bendicioná nos cu bida eterno si nos cumpli cu su rekisitonan. Claro cu nos tin cu reconocé su poder i autoridad, mescos cu apostel Pablo a haci ora el a skirbi: “N’e Rey di eternidad, incoruptibel, invisibel, e único Dios, sea onor i gloria pa semper hamas. Amen.” (1 Timoteo 1:17) Laga nos semper desplegá tal respet profundo i sincero pa Jehova. I pase loke pase, laga nos nunca vacilá den nos determinacion pa sigui firme como si fuera mirando Esun cu ta invisibel.

Con Lo Bo Contestá?

• Con ta posibel pa hende mira Dios?

• Si Jehova ta real pa nos, con nos lo actua ora nos ta ser persiguí?

• Kico ta nificá mira Jehova como nos Magnífico Instructor?

• Di con nos mester tin e deseo pa Jehova examiná nos?

[Preguntanan di Estudio]

[Plachi na página 18]

Moises, sin ser intimidá dor di fárao, a actua como si fuera e por a mira Jehova, e Dios invisibel

[Plachi na página 21]

Laga nos nunca actua como si fuera Jehova no por mira loke nos ta haci

[Plachi na página 23]

Cu empeño nos ta busca conocimentu di Dios pasobra nos ta mir’é como nos Magnífico Instructor