Alegrá den e Conocimentu di Jehova
Alegrá den e Conocimentu di Jehova
“Felis ta esnan cu ta tende e palabra di Dios i ta ward’é!”—LUCAS 11:28.
1. Ki ora Jehova a cuminsá comunicá cu hende?
JEHOVA ta stima hende, i e tin un interes profundo den nan bienestar. P’esei, no ta nada straño cu e ta comunicá cu nan. E comunicacion aki a cuminsá den hofi di Eden. Segun Génesis 3:8, na un ocasion “n’e parti di dia ora bientu ta supla,” Adam cu Eva “a tende e stem di Jehova Dios.” Segun algun hende, esaki por kier men cu Jehova tabatin custumber di comunicá cu Adam n’e ora aki, posiblemente tur dia. Sea cu ta asina of no, Bijbel ta mustra bon cla cu Dios a tuma tempu no solamente pa bisa e promé homber kico pa haci, sino tambe pa siñ’é loke e mester a sa pa e por a cumpli cu su responsabilidadnan.—Génesis 1:28-30.
2. Con e promé pareha a separá nan mes for di Jehova su guia, i cu ki resultado?
2 Jehova a duna Adam cu Eva bida, dominio riba bestia i autoridad riba henter tera. Un prohibicion so tabatin: nan no tabatin mag di come for dje palu di conocimentu di bon i malu. Bou di influencia di Satanas, Adam cu Eva a desobedecé e ordu di Dios. (Génesis 2:16, 17; 3:1-6) Nan a scoge pa actua independientemente i dicidí pa nan mes kico ta bon i kico ta malu. Asina, na un manera bobo, nan a separá nan mes for dje guia di nan Creador amoroso. E consecuencianan tabata desastroso pa nan i pa nan yunan cu no a nace ainda. Adam cu Eva a bira bieu, i cu tempu nan a muri sin speransa di haña resureccion. Nan desendientenan a heredá picá i su consecuencia, esta, morto.—Romanonan 5:12.
3. Pakico Jehova a comunicá cu Cain, i con Cain a reaccioná?
3 Apesar dje rebelion den Eden, Jehova a sigui comunicá cu su creacion humano. Picá a menasá di vence Cain, e primogénito di Adam cu Eva. Jehova a spiert’é cu e tabata buscando problema, i a conseh’é p’e ‘dirigí su mes pa haci loke ta bon.’ Cain a rechasá e conseho amoroso aki i a asesiná su ruman. (Génesis 4:3-8) Asina tur e tres promé hendenan riba tera a menospreciá e guia cla di esun cu a duna nan bida, e Dios cu ta duna su pueblo instruccion pa nan por beneficiá nan mes. (Isaías 48:17) Esta desapuntá Jehova lo mester a keda!
Jehova Ta Revelá Su Mes na Hende di Antigwedad
4. Kico Jehova tabatin sigur di dje relacioná cu e desendientenan di Adam, i cu esei na mente ki mensahe di speransa el a duna?
4 Apesar cu e tabatin tur motibu pa corta comunicacion cu hende, Jehova no a hacié. E tabatin sigur cu algun di Adam su desendientenan lo actua sabí i sigui Su guia. Por ehempel, ora Jehova a dicta sentencia di Adam cu Eva, el a profetisá binida di un “simia” cu lo oponé e Colebra, Satanas e Diabel. Cu tempu, Satanas lo ricibí un golpi mortal den cabes. (Génesis 3:15) E profecia aki tabata un mensahe gososo pa “esnan cu ta tende e palabra di Dios i ta ward’é.”—Lucas 11:28.
5, 6. Den ki maneranan Jehova a comunicá cu su pueblo promé cu siglo unu di nos era comun, i con esaki a beneficiá nan?
5 Jehova a comunicá su boluntad na patriarcanan fiel di antigwedad manera Noe, Abraham, Isaac, Jacob i Job. (Génesis 6:13; Éxodo 33:1; Job 38:1-3) Despues el a duna e nacion di Israel henter un código di ley pa medio di Moises. E Ley di Moises a beneficiá nan na vários manera. Dor di cumpli cuné, Israel a keda separá for di tur otro nacion como Dios su pueblo special. Dios a sigurá e israelitanan cu si nan a obedecé e Ley lo e bendicioná nan tantu den sentido material como spiritual, i haci nan un reino di sacerdote, un nacion santu. E Ley a asta percurá regla tocante cuminda i higiena cu a contribuí na bon salú. Pero Jehova a spierta nan tambe dje consecuencianan trágico cu lo bini si nan a desobedecé.—Éxodo 19:5, 6; Deuteronomio 28:1-68.
6 Cu tempu otro bukinan inspirá a ser agregá na e canon di Bijbel, esta, e lista di buki reconocí como inspirá. Relatonan histórico a conta con Jehova a trata cu nacionnan i pueblonan. Bukinan poético a describí su cualidadnan na un manera masha bunita. Bukinan profético a predicí con finalmente Jehova su boluntad lo bira realidad. Hende fiel di pasado cuidadosamente a studia i pone e skirbimentunan sagrado aki na práctica. Un di nan a skirbi: “Bo palabra ta un lampi pa mi pia, i un lus pa mi caminda.” (Salmo 119:105) Jehova a percurá educacion i iluminacion pa esnan dispuesto di scucha.
E Lus Ta Bira Mas Cla
7. Apesar cu Jesus a haci milager, kico e tabata principalmente conocí p’e, i di con?
7 Ya pa promé siglo, gruponan religioso hudiu a agregá tradicion di hende n’e Ley. Nan tabata aplicá e Ley robes, i na lugá di ta un fuente di iluminacion, e Ley a bira un carga pa motibu dje tradicionnan ei. (Mateo 23:2-4) Sin embargo, na aña 29 E.C., Jesus a aparecé como e Mesías. Su mision no tabata únicamente di duna su bida na fabor di humanidad, sino tambe di “duna testimonio di e berdad.” Maske el a haci milager, e tabata conocí principalmente como “e Maestro.” Su siñansa tabata manera un lus cu a briya den e scuridad spiritual cu a tapa mente dje hendenan. Jesus mes a bisa apropiadamente: “Ami ta e lus di mundu.”—Juan 8:12; 11:28; 18:37.
8. Ki bukinan inspirá a ser skirbí den promé siglo di nos era comun, i con e promé cristiannan a beneficiá di nan?
8 Despues e Evangelionan a bini acerca, cu ta cuater relato skirbí dje bida di Jesus, i tambe e buki di Echonan, un historia dje manera cu cristianismo a plama despues dje morto di Jesus. Tambe tabatin e cartanan inspirá cu Jesus su disipelnan a skirbi, i tambe e buki profético di Revelacion. E obranan aki, combiná cu e Scritura Hebreo, a completá e canon di Bijbel. Cu yudansa dje biblioteca inspirá aki, cristiannan por a “capta mentalmente cu tur e santunan loke ta e hanchura i largura i haltura i profundidad” dje berdad. (Efesionan 3:14-18) Nan por tabatin “e mente di Cristo.” (1 Corintionan 2:16) Sin embargo, e promé cristiannan ei no a comprendé tur aspecto di Jehova su propósito completamente. Apostel Pablo a skirbi su compañeronan di creencia: “Actualmente nos ta mira pa medio di un spiel di metal un forma vago.” (1 Corintionan 13:12) Un spiel asina tabata reflehá un forma vago, sin tur detaye. Ainda mester a bini un comprendimentu mas completo dje Palabra di Dios.
9. Ki iluminacion a tuma lugá durante “e último dianan”?
9 Awendia nos ta biba den un era cu ta ser yamá “e último dianan,” un era caracterisá pa “tempu crítico, duru pa trata cuné.” (2 Timoteo 3:1) Profeta Daniel a profetisá cu den e tempu aki “berdadero conocimentu lo bira abundante.” (Daniel 12:4) P’esei Jehova, e Gran Comunicador, a yuda hende di curason sincero capta e nificacion di su Palabra. Awor tin un gran cantidad di hende cu ta comprendé cu Cristo Jesus a ser entronisá den shelu invisibel na aña 1914. Tambe nan sa cu pronto e ta bai trece un fin na tur maldad i transformá henter tera den un paradijs. Awor nan ta predicá e aspecto importante aki dje bon nobo di Reino rond mundu.—Mateo 24:14.
10. Atrabes di siglonan, con hende a reaccioná na Jehova su conseho?
10 Sí, atrabes di henter historia Jehova a comunicá su boluntad i su propósito na hende riba tera. E registro bíblico ta describí hopi di esnan cu a scucha i aplicá sabiduria divino, i a haña bendicion dor di esei. E ta conta di otronan cu a rechasá Dios su conseho amoroso i a sigui e proceder desastroso di Adam cu Eva. Jesus a ilustrá e situacion aki ora el a papia di dos caminda simbólico. Unu ta hiba na destruccion. E ta hanchu i espacioso, i ta riba dje e gran cantidad di hende cu ta rechasá e Palabra di Dios ta cana. E otro caminda ta hiba na bida eterno. Apesar cu e ta pertá, ta esei t’e caminda dje poco hendenan cu ta aceptá e berdad di Bijbel pa loke e ta, esta, e Palabra di Dios, i ta biba na armonia cuné.—Mateo 7:13, 14.
Apreciá Loke Nos Tin
11. Nos conocimentu di Bijbel i nos fe den dje ta duna evidencia di kico?
11 Abo ta un di esnan cu a scoge e caminda cu ta hiba na bida? Si ta asina, sin duda lo bo kier keda riba dje. Con bo por haci esei? Meditá regularmente i cu aprecio riba e bendicionnan cu bo tin den bida dor cu bo conocé berdadnan bíblico. E simpel echo cu bo a reaccioná faborabel na e bon nobo ta un evidencia di Dios su bendicion. Jesus a indicá esaki cu loke el a bisa su Tata den oracion: “Mi ta alabá bo públicamente, Tata, Señor di shelu i di tera, pasobra bo a sconde e cosnan aki for di esnan sabí i intelectual i a revelá nan na mucha chikitu.” (Mateo 11:25) Piscadó i cobradónan di belasting a capta e sentido di Jesus su siñansa, mientras cu lidernan religioso bon studiá no a capt’é. Jesus a bisa tambe: “Ningun hende por bini cerca mi a ménos cu e Tata, kende a manda mi, ta atra’é.” (Juan 6:44) Si bo a yega na conocé Bijbel i bo ta kere den su siñansanan i ta sigui nan, esei ta evidencia di cu Jehova a atraé bo. Esei ta un motibu pa alegrá.
12. Den ki maneranan Bijbel ta iluminá nos?
12 E Palabra di Dios ta contené berdadnan cu ta haci hende liber, i e ta iluminá hende. Esnan cu biba na armonia cu conocimentu bíblico ta ser librá dje supersticionnan, e siñansanan falsu i e ignorancia cu ta dominá bida di miyones di hende. Por ehempel, ora nos conocé e berdad tocante alma, esei ta libra nos dje miedu di cu hende morto por haci nos daño, of di cu nos stimánan morto ta sufri. (Ezekiel 18:4) Conocé e berdad tocante angelnan malbado ta yuda nos evitá e peligernan di spiritismo. E siñansa di resureccion ta consolá esnan cu a perde nan sernan kerí den morto. (Juan 11:25) Profecianan di Bijbel ta mustra nos unda nos ta den e coriente di tempu, i nan ta duna nos confiansa den Dios su promesanan pa futuro. Tambe nan ta reforsá nos speransa di biba pa semper.
13. Con nos ta saca beneficio físico dor di haci caso di e Palabra di Dios?
13 E principionan divino den Bijbel ta siña nos biba di un manera cu ta beneficiá nos den sentido físico. Por ehempel, nos ta siña evitá prácticanan cu ta contaminá nos curpa, manera uso di tabaco i otro droga. Nos ta evitá abusu di alcohol. (2 Corintionan 7:1) Haci caso di Dios su leynan moral ta protehá nos di malesanan transmití sexualmente. (1 Corintionan 6:18) Aplicá e conseho di Dios cu ta bisa cu nos mester evitá di stima placa, ta pone cu nos no ta caba cu nos pas mental, manera hopi hende, dor di core tras di rikesa. (1 Timoteo 6:10) Den ki manera abo a beneficiá físicamente dor di aplicá e Palabra di Dios den bo bida?
14. Ki influencia spiritu santu tin riba nos bida?
14 Si nos biba na armonia cu e Palabra di Dios, nos ta ricibí Jehova su spiritu santu. Nos ta cultivá un personalidad manera di Cristo, caracterisá pa cualidadnan atractivo manera misericordia i compasion. (Efesionan 4:24, 32) Ademas e spiritu di Dios ta producí su fruta den nos: amor, goso, pas, gran pacenshi, amabilidad, bondad, fe, suavedad i dominio propio. (Galationan 5:22, 23) E cualidadnan aki ta contribuí na relacionnan felis i significativo cu otro hende, incluso cu nos miembronan di famia. Nos ta haña un forsa interior cu ta yuda nos enfrentá dificultad cu curashi. Bo ta mira con spiritu santu tabatin un influencia positivo riba bo bida?
15. Segun cu nos pone nos bida na armonia cu e boluntad di Dios, ki beneficio nos ta saca?
15 Segun cu nos ta pone nos bida na armonia cu e boluntad di Dios, nos relacion cu Jehova ta bira mas fuerte. Nos ta bira mas i mas convencí di cu e ta comprendé nos i stima nos. Experencia ta siña nos cu e ta sostené nos den tempu difícil. (Salmo 18:18) Nos ta dicerní cu di berdad e ta scucha nos oracionnan. (Salmo 65:2) Nos ta siña dependé riba su guia, sigur di cu esei lo beneficiá nos. I nos tin e speransa maraviyoso di cu un dia Dios lo hiba esnan cu ta fiel na dje na perfeccion, i otorgá na nan e don di bida eterno. (Romanonan 6:23) Disipel Santiago a skirbi: “Hala cerca Dios, i lo e hala cerca boso.” (Santiago 4:8) Abo a sinti cu bo relacion cu Jehova a bira mas fuerte segun cu bo a hala cerca dje?
Un Tesoro Incomparabel
16. Ki cambio algun cristian di promé siglo a haci?
16 Pablo a recordá e cristiannan ungí cu spiritu di promé siglo, cu algun di nan a yega di ta fornicadó, adúltero, homosexual, ladron, hende haragan, buraché, zundradó i practicadó di extorsion. (1 Corintionan 6:9-11) E berdad di Bijbel a pone nan haci cambio grandi; nan a ser “labá limpi.” Purba imaginá con bo bida lo tabata sin e berdadnan cu bo a siña di Bijbel, berdadnan cu a haci bo liber. Definitivamente, e berdad ta un tesoro incomparabel. Esta contentu nos ta cu Jehova ta comunicá cu nos!
17. Con Testigonan di Jehova a ser alimentá spiritualmente na reunionnan cristian?
17 Ademas, pensa riba e bendicion cu nos tin den forma di nos hermandad cu ta incluí tur rasa! E “esclabo fiel i discreto” ta percurá cuminda spiritual n’e debido tempu, entre otro den forma di Bijbel, revista i otro publicacionnan na un gran cantidad di idioma. (Mateo 24:45-47) Durante aña 2000, Testigonan di Jehova den hopi pais a repasá puntonan sobresaliente di ocho buki principal dje Scritura Hebreo na nan reunionnan di congregacion. Nan a meditá riba bida di 40 personahe bíblico tratá den Perspicacia pa Comprendé e Scritura. Nan a considerá un cuart dje buki E homber mas importante cu hamás a biba, i casi henter e buki Presta Atencion na e Profecia di Daniel! Nan a considerá 36 artículo secundario dje revista Toren di Vigilancia, ademas di 52 artículo di studio. Ademas, e pueblo di Jehova a ser alimentá cu 12 edicion di Nos Ministerio di Reino i cu discurso público semanal riba un variedad di tema bíblico. Esta un abundancia di conocimentu spiritual a ser hací disponibel!
18. Den ki maneranan nos ta ricibí yudansa den e congregacion cristian?
18 Rond mundu, mas cu 91.000 congregacion ta percurá apoyo i animacion pa medio di reunionnan i asociacion. Ademas nos ta conta cu e apoyo di compañeronan cristian maduro cu ta dispuesto di yuda nos den sentido spiritual. (Efesionan 4:11-13) Sí, nos a beneficiá masha tantu dor di siña conocé e berdad. Ta un goso pa conocé Jehova i sirbié. E palabranan dje salmista aki ta un gran berdad: “Felis ta e pueblo kende su Dios ta Jehova!”—Salmo 144:15.
Bo Ta Corda?
• Cu ken Jehova a comunicá den tempunan pre-cristian?
• Con lus spiritual a bira mas cla den promé siglo? i den tempu actual?
• Ki bendicionnan nos ta ricibí dor di biba na armonia cu e conocimentu di Jehova?
• Pakico nos ta alegrá cu nos conocimentu di Dios?
[Preguntanan di Estudio]
[Plachinan na página 8, 9]
Jehova a comunicá su boluntad na Moises, Noe i Abraham
[Plachi na página 9]
Den nos tempu Jehova a tira lus riba su Palabra
[Plachinan na página 10]
Pensa con bendicioná nos ta di tin un hermandad cu ta incluí tur rasa!