No Laga Duda Destruí Bo Fe
No Laga Duda Destruí Bo Fe
Awe bo ta pensa cu bo ta bon di salú. Mañan bo ta sinti bo malu. Di ripiente, bo no tin forsa ni vitalidad. Bo cabes ta morde i bo curpa ta yen di dolor. Kico a pasa? Bacterianan peligroso a pasa dor di e sistema di defensa di bo curpa i a atacá órganonan importante. Si bo no trata e situacion, e organismonan invasor aki por destruí bo salú permanentemente, i nan por asta mata bo.
CLARO cu bo ta asta mas vulnerabel si bo haña un infeccion ora bo curpa no ta den bon condicion. Por ehempel, si bo curpa ta swak debí nan malnutricion, bo resistencia “ta baha asina hopi cu e mínimo infeccion por ta fatal,” segun Peter Wingate, un autor médico.
Siendo cu esei ta e caso, ken lo scoge pa biba cu hamber? Ta muy probabel cu bo ta haci loke sea ta na bo alcanse pa bo come bon i keda salú. Probablemente tambe bo ta haci tur loke bo por pa evitá di contraé infeccion dor di un vírus of bacteria. Sin embargo, bo ta tene e mésun cuidou pa keda “saludabel den fe”? (Tito 2:2) Bo ta alerto pa por ehempel, e peliger cu dudanan sutil ta trece cuné? Nan por invadí bo mente i curason masha fácil, i haci daño na bo fe i na bo relacion cu Jehova. Ta parce cu tin hende no ta conciente di e peliger aki. Nan ta permití nan mes bira vulnerabel pa duda dor cu nan ta keda sin alimentá nan mes spiritualmente. Esei por ta e caso cu bo?
Duda Semper Ta Malu?
Claro cu no ta tur duda ta malu. Tin bes bo tin cu warda te ora bo ta sigur di e echonan pa bo kere algu. Apelacionnan religioso cu ta implicá cu bo mester djis kere tur cos i no duda den nada, ta peligroso i engañoso. Ta cierto cu Bijbel ta bisa cu amor “ta kere tur cos.” (1 Corintionan 13:7) Un cristian amoroso sigur ta cla pa kere hende cu a resultá di ta digno di confiansa den pasado. Sin embargo, e Palabra di Dios ta spierta tambe pa no “pone fe den tur palabra.” (Proverbionan 14:15) Sa sosodé cu un persona su pasado ta duna motibu válido pa duda den dje. “Maske [e papiadó engañoso] haci su stem cariñoso,” Bijbel ta spierta, “no ker’é.”—Proverbionan 26:24, 25.
Apostel Juan tambe ta spierta cristiannan pa no kere tur cos ciegamente. El a skirbi: “No kere tur expresion inspirá.” Mas bien, “pone e expresionnan inspirá na prueba pa mira si nan ta originá di Dios.” (1 Juan 4:1) Un “expresion,” un siñansa of opinion, kisas ta parce di bini for di Dios. Pero realmente e ta bini for di dje? Duda un tiki of no kere mesora por ta un berdadero proteccion pasobra, manera apostel Juan ta bisa: “Hopi gañadó a sali den mundu.”—2 Juan 7.
Duda Infundá
Sí, hopi bes ta necesario pa haci un examinacion onesto i humilde di echonan. Sin embargo, esaki no ta mescos cu permití duda infundá i perhudicial desaroyá den nos mente i curason, esta, duda cu por destruí nos relacion i creencianan cu ta firmemente establecí. Ta definí e clase di duda aki como “ser insigur di un creencia of opinion te cu hopi bes esei ta afectá tumamentu di decision.” Bo ta corda con Satanas a hinca duda tocante Jehova den mente di Eva? El a puntra: “Di berdad ta asina cu Dios a bisa cu boso no mag come di tur palu dje hofi?” (Génesis 3:1) E duda cu e pregunta ei—cu a zona inocente—a lanta, a afectá Eva su decision. Esaki ta algu típico dje métodonan di Satanas. Manera un skirbidó di carta calumnioso, e ta masha ábil den usa insinuacion, mitar berdad i mentira. Satanas a destruí masha hopi relacion di confiansa dor di usa e cosnan ei pa lanta duda sutil.—Galationan 5:7-9.
Disipel Santiago a comprendé bon cla ki efecto perhudicial e clase di duda aki tin. E ta skirbi tocante e maraviyoso privilegio cu nos tin di por acercá Dios libremente pa yudansa durante prueba. Pero sí Santiago ta spierta cu ora bo ta resa na Dios, bo tin cu “sigui pidi cu fe, sin duda nada.” Si nos tin duda den nos relacion cu Dios, nos ta “manera un ola di laman cu ta ser hibá pa bientu i bentá di un lugá pa otro.” Nos ta bira manera “un homber indeciso, inconstante den tur su camindanan.” (Santiago 1:6, 8) Nos ta bira insigur di loke nos mester kere i esei ta haci nos indeciso. E ora ei, mescos cu a sosodé cu Eva, nos ta bira vulnerabel pa tur sorto di siñansa i filosofia di demoño.
Mantené Bon Salú Spiritual
Con anto nos por protehá nos mes di duda perhudicial? E contesta ta ègt hopi simpel: dor di rechasá propaganda satánico firmemente i probechá plenamente di e cuminda spiritual cu Dios ta percurá pa haci nos “sólido den fe.”—1 Pedro 5:8-10.
Un bon programa di alimentá nos mes spiritualmente riba un base personal ta masha esencial. E autor Wingate, mencioná anteriormente, ta splica: “Asta ora e curpa ta sosegá e tin mester di un suministro continuo di energia pa procesonan kímico i p’e funcionamentu di su órganonan vital; i e substancianan di vários tehido mester ser remplasá constantemente.” Esaki ta e caso tambe cu nos salú spiritual. Si nos no alimentá nos mes spiritualmente riba un base regular, nos fe, mescos cu un curpa cu no ta haña alimento, lo bai atras progresivamente i cu tempu lo e muri. Jesucristo a enfatisá esaki ora el a bisa: “Hende tin cu biba, no di pan so, sino di tur expresion cu ta sali for dje boca di Jehova.”—Mateo 4:4.
Pensa riba esei. Con nos a edificá un fe fuerte na principio? Apostel Pablo ta skirbi: “Fe ta sigui loke a tende.” (Romanonan 10:17) E kier men cu na principio nos a edificá nos fe i confiansa den Jehova, den su promesanan i su organisacion dor di a alimentá nos mes cu e Palabra di Dios. Claro cu nos no a djis kere ciegamente tur loke nos a tende. Nos a haci manera e habitantenan di Berea. Cuidadosamente nos a ‘examiná e Scritura diariamente en cuanto si e cosnan aki tabata asina.’ (Echonan 17:11) Nos a ‘proba pa nos mes loke ta e bon i aceptabel i perfecto boluntad di Dios’ i a haci sigur cu loke nos a tende tabata berdad. (Romanonan 12:2; 1 Tesalonicensenan 5:21) Desde e tempu ei padilanti, nos probablemente a fortificá nos fe segun cu nos tabata mira mas i mas cla cu Dios su Palabra i promesanan no ta faya nunca.—Hosué 23:14; Isaías 55:10, 11.
Evitá Malnutricion Spiritual
Awor e reto ta pa mantené nos fe i evitá cualkier duda den loke nos ta kere, duda cu por debilitá nos confiansa den Jehova i su organisacion. Pa logra esaki nos mester sigui examiná e Scritura diariamente. Apostel Pablo ta spierta cu “den periodo di tempu despues algun [cu kisas na principio a parce di tin un fe fuerte] lo cai for dje fe, prestando atencion na expresionnan inspirá engañoso i siñansanan di demoño.” (1 Timoteo 4:1) E expresion i siñansanan engañoso aki ta crea duda den mente di algun i ta alehá nan for di Dios. Kico ta protehá nos? Sigui “alimentá cu e palabranan di fe i e siñansa excelente cu [nos] a sigui cu sumo cuidou i atencion.”—1 Timoteo 4:6.
Pero ta di lamentá cu awe algun a scoge pa no ser “alimentá cu e palabranan di fe,” ni sikiera ora e alimento aki ta disponibel libremente. Manera un di e escritornan dje buki di Proverbionan ta indicá, ta posibel pa ta rondoná di bon cuminda spiritual, un bankete spiritual na moda di papia, i tog realmente no come i digerí e cuminda.—Proverbionan 19:24; 26:15.
Esei ta peligroso. Autor Wingate ta bisa: “Asina cu e curpa cuminsá usa su mes proteina, e salú ta cuminsá bai atras.” Ora bo ta malnutrí, bo curpa ta cuminsá usa e reserva di combustibel cu ta ser conserbá den tur parti dje curpa. Ora cu e fuentenan aki agotá, e curpa ta cuminsá consumí su propio proteina cu ta esencial pa percurá crecementu i restoracion continuo di tehido. Órganonan vital ta stop di funcioná. E ora ei bo salú ta bai atras masha lihé.
Esei ta loke a sosodé den sentido spiritual cu algun hende den e congregacion cristian di promé. Nan a purba biba di nan reservanan spiritual. Probablemente nan a neglishá nan studio personal, i nan a bira spiritualmente swak. (Hebreonan 5:12) Apostel Pablo a splica e peliger cu tin den e práctica aki, ora el a skirbi e cristiannan hebreo: “Ta necesario pa nos presta mas cu e atencion acustumbrá n’e cosnan cu nos a tende, pa nos nunca drif bai.” E tabata sa con fácil lo ta pa drif bai den mal custumber si nos “a neglishá un salbacion di tal grandesa.”—Hebreonan 2:1, 3.
Ta interesante pa tuma nota cu un persona cu ta sufri di malnutricion no necesariamente ta mustra malu of flacu. Asina tambe, kisas no ta keda bisto mesora cu un persona ta sufri di malnutricion spiritual. Asta ora bo no ta nutri bo mes bon, bo por parce di ta salú spiritualmente, pero esei lo no dura mashá! Sin falta lo bo bira spiritualmente swak, vulnerabel pa dudanan infundá i incapas pa hiba un lucha duru pa e fe. (Hudas 3) Maske ningun otro hende no sa, abo sí sa te na ki grado bo ta alimentá bo mes spiritualmente riba un base personal.
P’esei, sigui cu bo studio personal. Combatí duda vigorosamente. Ignorá loke ta parce un infeccion insignificante, esta, neglishá dudanan cu ta causa ansiedad, lo por tin consecuencianan desastroso. (2 Corintionan 11:3) ‘Nos ta bibando realmente den e último dianan? Bo por kere tur loke Bijbel ta bisa? Di berdad esaki ta e organisacion di Jehova?’ Satanas lo tin masha gana di lanta e tipo di dudanan aki den bo mente. No sea negligente den alimentá bo mes spiritualmente i asina bira un víctima fácil di su siñansanan engañoso. (Colosensenan 2:4-7) Sigui e siguiente conseho cu Timoteo a haña. Sea un bon studiante di “e scrituranan santu” pa bo por “sigui den e cosnan cu bo a siña i a keda persuadí pa kere.”—2 Timoteo 3:13-15.
Podisé bo tin mester di yudansa pa hacié. E escritor citá anteriormente ta sigui bisa: “Dor di malnutricion severo e órganonan digestivo por ser afectá asina tantu dor di falta di vitamina i otro necesidadnan cu nan no por absorbá cuminda normal mas si duna nan esei. Pa un temporada, hende den e estado aki lo por tin mester di cuminda cu ta rekerí tiki digestion.” Pa remediá e efectonan cu malnutricion tin riba e curpa, cuido special ta necesario. Asina tambe, un persona cu obviamente a neglishá su studio personal di Bijbel lo tin mester di hopi yudansa i animacion pa bolbe recuperá su apetit spiritual. Si esei ta e caso cu bo, busca yudansa i aceptá cu goso cualkier yudansa cu ta ser ofrecé na bo pa reedificá bo salú i fortalesa spiritual.—Santiago 5:14, 15.
No “Vacilá den un Falta di Fe”
Considerando e circunstancianan di e patriarca Abraham, algun persona por sinti cu e tabatin motibunan válido pa duda. Kisas ta parce basta razonabel pa concluí cu e ‘no tabatin speransa pa bira tata di hopi nacion,’ apesar di e promesa di Dios. Di con? Wel, desde e punto di bista puramente humano, cosnan no a parce masha alentador. Segun e registro di Bijbel: ‘El a considerá su mes curpa, ya casi morto caba, i tambe e matris morto di Sara.’ Tog, Abraham a nenga redondamente di permití duda den Dios i su promesanan saca rais den su mente i curason. Apostel Pablo ta skirbi: “E no a bira swak den fe,” ni a “vacilá den un falta di fe.” Abraham a keda “plenamente convencí cu loke [Dios] a primintí e por a haci tambe.” (Romanonan 4:18-21) Atrabes di hopi aña el a edificá un relacion personal fuerte i di confiansa cu Jehova. El a rechasá cualkier duda cu lo por a debilitá e relacion ei.
Abo por haci mescos si bo “sigui retené e patronchi di palabranan saludabel,” si bo alimentá bo mes bon spiritualmente. (2 Timoteo 1:13) Tuma e peliger cu duda ta trece cuné na serio. Nos por bisa cu Satanas ta usa bacteria spiritual den su guera. Si bo no come bon spiritualmente mediante studio personal di Bijbel i asistencia na reunionnan cristian, bo ta habri bo mes completamente pa e atakenan ei di Satanas. Haci bon uso di e suministro abundante i oportuno di cuminda spiritual cu “e esclabo fiel i discreto” ta percurá. (Mateo 24:45) Sigui “aceptá palabranan saludabel” i keda “saludabel den fe.” (1 Timoteo 6:3; Tito 2:2) No laga duda destruí bo fe.
[Plachinan na página 21]
Con bon bo ta alimentá bo mes spiritualmente?