Historia di Bida

Nos A Pone Jehova na Prueba

SEGUN E RELATO DI PAUL SCRIBNER

“Bon dia, señora Stackhouse. Awe mainta mi ta tumando pedido pa bolo di Pascu di Resureccion i mi tin sigur cu lo bo kier bestèl unu pa bo famia.” Tabata principio di lente na 1938, i mi tabata na Atco, New Jersey, Merca, papiando cu un di mi mihó clientenan di mi ruta di benta pa General Baking Company. Pa mi sorpresa, señora Stackhouse a rechasá mi oferta.

“MI NO ta kere cu lo mi ta interesá,” el a bisa. “Nos no ta celebrá Pascu di Resureccion.”

Awor mi no tabata sa mas kico pa pensa. E no ta celebrá Pascu di Resureccion? Claro cu e regla principal di benta ta cu e cliente semper tin rason. Pero kico mi mester haci awor? Mi a purba tog: “Wel, e ta un bolo delicioso i mi sa cu señora gusta nos productonan. Señora no ta kere cu e famia lo disfrutá di dje aunke boso no ta, amm, celebrá Pascu di Resureccion?”

“Mi no ta kere,” el a ripití, “pero masha dia mi kier a papia cu bo tocante un asuntu, meneer Scribner, i kisas esaki ta e momento oportuno pa hacié.” E combersacion ei a cambia mi bida completamente! Señora Stackhouse, miembro di e Compania (of, congregacion) di Testigonan di Jehova na Berlin, New Jersey, a splicá mi di unda e celebracion di Pascu di Resureccion a originá i el a duna mi tres foyeto chikitu. Nan título tabata Siguridad, Descubrí i Proteccion. Mi a bai cas cu e foyetonan, i mi tabata curioso pero tog un tiki nervioso. Loke señora Stackhouse a bisa a zona mi conocí, algu for di mi infancia.

Promé Contacto cu Studiantenan di Bijbel

Mi a nace dia 31 di januari 1907, i na 1915 ora mi tabatin ocho aña mi tata a muri di cancer.  Esei a pone cu ami cu Mama a bai biba cerca Mama su mayornan den un cas grandi na Malden, Massachusetts. Benjamin Ransom, mi tio part’i mama, cu su casá tambe tabata biba einan na tercer piso. Promé cu siglo 20 a cuminsá, tio Ben tabata asociá cu e Studiantenan Internacional di Bijbel, manera Testigonan di Jehova tabata conocí e tempu ei. Mi tabata gusta tio Ben hopi, pero e resto dje famia di Mama, kendenan tabata metodista, a pensa cu e ta straño. Añanan despues, promé cu su casá a divorciá for di dje, e casá a logra cu nan a intern’é pa un periodo di tempu corticu den un institucion pa hende cu problema mental, pa motibu di su creencianan religioso! Ya cu e dokternan den e hospital a saca afó masha rápido cu tio Ben su mente no tabata falta nada, nan a pidié masha despensa i a lagu’é bai.

Tio Ben tabata hiba mi cuné n’e reunionnan di e Studiantenan Internacional di Bijbel na Boston, foral ora tabatin oradornan di bishita of na ocasionnan special. Un biaha e orador di bishita tabata e conocido Charles Taze Russell, kende a supervisá e trabou di predicá den e tempu ei. Na un otro ocasion special nan a pasa e “Foto-Drama di Creacion.” Aunke esei tabata for di 1915, te awe mi ta corda bon cla e slide di Abraham ta bai cu Isaac riba e ceru pa ofrec’é como sacrificio. (Génesis, capítulo 22) Ainda mi por mira Abraham cu Isaac ta forsa subi e ceru cu un lote di palu, como cu Abraham tabatin pleno confiansa den Jehova. Dor cu mi no tabatin tata, e relato ei a impresioná mi mashá.

Despues, tio Ben i su casá a muda bai Maine, i Mama a bolbe casa i nos a muda bai New Jersey. P’esei, pa hopi tempu mi no a mira tio Ben mashá. Tempu mi tabata tiener na New Jersey, mi a topa cu Marion Neff, un yu muher di un famia presbiteriano di ocho yu cu mi tabata gusta bishitá. Mi a pasa asina hopi diadomingo anochi huntu cu e famia ei i cu e grupo pa hóben di nan iglesia, cu finalmente mi mes a bira presbiteriano. Tog, tabatin cosnan cu mi a siña n’e reunionnan di Studiantenan di Bijbel cu mi a keda corda. Ami cu Marion a casa na 1928, i nos yu muhernan Doris i Louise a nace na 1935 i 1938. Cu un peuter i un baby recien nací den famia, nos tur dos a sinti e necesidad di guia spiritual pa lanta nos famia.

Nos Ta Haña e Berdad den e Foyetonan Chikitu

Ami cu Marion tabata busca un iglesia pa nos afiliá na dje i nos a traha un plan. Tur diadomingo, beurt pa beurt, un di nos tabata keda cas huntu cu e muchanan miéntras cu e otro a bishitá un prospectivo iglesia. Un diadomingo cu tabata Marion su turno pa keda cas, mi a ofrecé pa ami keda baby-sit pa asina mi por a lesa e foyeto Siguridad, e promé di e tres foyetonan cu señora Stackhouse a duna mi. Una bes cu mi a cuminsá les’é, mi no por a stop! Mi a bira mas i mas convencí cu mi a haña algu cu ningun iglesia no por a ofrecé. E siguiente siman e mésun cos a sosodé i mi tabata dispuesto pa keda baby-sit miéntras mi a lesa e segundo foyeto, Descubrí. Loke mi tabata lesa a parce  mi un poco conocí. Ta esaki tio Ben tabata kere? Nos famia a kere cu su religion tabata co’i loco. Kico Marion lo pensa? Mi no tabatin nodi preocupá. Un par di dia despues cu mi a lesa Descubrí, Marion a sorprendé mi ora mi a yega cas for di trabou, bisando: “Mi a lesa e foyetonan cu bo a bini cas cuné. Nan ta hopi interesante.” Esta un alivio esei tabata!

Patras dje foyetonan tabatin informacion dje buki Enemigunan, cu a ser publicá recientemente. E tabata un descripcion skerpi di religion falsu. Nos a dicidí di manda busk’é. Sin embargo, promé cu nos por a post nos peticion, un Testigo a bini na nos porta i a ofrecé nos net e buki ei. I e buki a yuda nos tuma nos decision! Nos a stop di bishitá otro iglesia i a cuminsá bai e reunionnan di e compania di Testigonan di Jehova na Camden, New Jersey. Djis un par di luna despues, riba diadomingo 31 di juli 1938, nos grupo di mas o ménos 50 persona a reuní riba yerba na cas di ruman Stackhouse—e cas caminda mi a purba di bende bolo di Pascu di Resureccion—i a scucha un grabacion di un discurso di bautismo duná pa hues Rutherford. Despues nos a cambia paña den cas i nos 19 a bautisá den un riu eibanda.

 Decididu pa Bira Pionero

Djis un poco tempu despues di mi bautismo, un ruman muher den e compania a conta mi di hende cu nan ta yama pionero i cu a haci e ministerio público nan actividad principal. Mesora mi curiosidad a lanta i mi a cera conocí cu henter un famia di pionero. Ruman Konig, un homber di edad, su casá i nan yu muher adulto tabata traha pionero den un congregacion bisiña. Como tata di un famia hóben, mi a keda impresioná cu e goso profundo cu famia Konig tabatin den e ministerio. Hopi bes mi tabata pasa cerca nan, parkeer mi truck di panaderia, i bai un ratu cu nan den e ministerio di cas pa cas. No a dura mashá cu mi mes kier a bira pionero. Pero con? Ami cu Marion tabatin dos yu chikitu, i mi trabou tabata exigí hopi di mi. De echo, ora cu Segundo Guera Mundial a cuminsá na Europa i mas i mas hóben a djoin servicio militar na Merca, trabou a sigui bira hopi pa nos cu a keda cu trabounan civil. Mi a ser urgí pa tuma mas ruta di benta, i mi tabata sa cu nunca lo mi por traha pionero cu un schedule asina.

Ora mi a papia cu ruman Konig tocante mi deseo pa traha pionero, el a bisa: “Djis sigui traha duru den e sirbishi di Jehova, i sigui papia cuné di bo meta den oracion. Lo e yuda bo alcans’é.” Mi a sigui haci esei pa mas cu un aña. Hopi bes mi tabata refleccioná riba textonan di Bijbel manera Mateo 6:8, cu ta sigurá nos cu Jehova sa kico nos mester promé cu nos pidié. I mi a sigui purba aplicá e conseho di Mateo 6:33, esta, sigui busca promé e Reino di Dios i Su husticia. Ruman Melvin Winchester, un sirbidó di zona (awor yamá superintendente di circuito) tambe a animá mi.

Mi a papia cu Marion tocante mi metanan. Nos a papia tocante e palabranan di Malakías 3:10, cu ta animá nos pa pone Jehova na prueba i wak si e no ta basha bendicion riba nos. Su reaccion a animá mi: “Si bo kier traha pionero, no tene bo mes atras pa mi causa. Mi por cuida nos yu muhernan miéntras abo ta traha pionero. Tog nos no tin mester di hopi cos material.” Despues di 12 aña casá mi tabata sa caba cu Marion tabata un ama di cas prudente i cauteloso. Atrabes di e añanan, e tabata un partner di pionero maraviyoso, i un di e secretonan pa nos éxito den casi 60 aña di sirbishi di tempu completo ta su abilidad di ta satisfecho cu poco cos material i laga esaki parce como si fuera hopi.

Pa zomer di 1941, despues di hopi luna di planeamentu cu oracion, ami cu Marion a spar poco placa, i nos a cumpra un trailer móbil di 5,5 meter den cua nos famia por a biba. Mi a kita for di trabou i a bira pionero regular na juli 1941, i for dje tempu ei mi a keda den e sirbishi di tempu completo. Mi promé asignacion tabata dies parada di bus riba Ruta 50 entre New Jersey i St. Louis, Missouri, caminda nos congreso lo mester a tuma lugá na principio di augustus. Mi a haña nomber i adres di rumannan cu tabata riba mi ruta, i mi a skirbi nan di antemano pa nan sa ki dia nan por verwagt mi. Na congreso mi mester a bai n’e departamento pa pionero pa mi haña un otro asignacion.

“Mi Ta Bai Pone Jehova na Prueba”

Nos a yena nos trailer chikitu cu literatura i a bai nos último reunion na Camden pa yama e rumannan ayó. Dor cu nos tabatin dos yu muher basta chikitu pa cuida i cu fuera dje congreso nos no tabatin un destinacion fiho, nos plannan lo mester a parce irealístico pa algun ruman, i vários di nan a bisa: “Un djis akí boso lo bini bek.” Mi ta corda cu mi a bisa nan: “Wel, mi no ta bisa cu lo mi no bini bek. Jehova a bisa cu lo e percurá pa mi, i mi ta bai pone Jehova na prueba.”

Despues di a traha pionero pa seis década den 20 stad for di Massachusetts te na Mississippi, nos por bisa cu Jehova a haci mas cu cumpli cu su promesa. E bendicionnan cu el a basha riba ami cu Marion i nos dos yu muhernan ta hopi mas cu cualkier cos cu mi por a spera aya na 1941. Entre otro, nos a logra cu nos yu muhernan ta sirbi como pionero fiel den e congregacionnan den cercania, i (segun último conteo) nos tin aproximadamente shen yu spiritual plamá den henter e costa oost di Merca. Mi a studia  cu 52 persona cu a dedicá nan mes na Jehova Dios i Marion a studia cu 48.

Na augustus 1941 nos a yega St. Louis, i einan mi a topa cu ruman T. J. Sullivan di Betel. E tabatin mi carta di ordenacion como minister religioso, esaki tabata necesario debí cu guera tabata menasá i nan por a reclutá mi pa servicio militar. Mi a bisa ruman Sullivan cu mi casá tabata traha mes tantu tempu cu mi den e ministerio i cu e tabatin gana di traha pionero huntu cu mi. Aunke n’e congreso no tabatin e departamento pa pionero ainda, mesora ruman Sullivan a inscribí Marion como pionero i a puntra nos: “Unda boso ta bai traha como pionero despues di e congreso?” Nos no tabata sa. “Awel, no wori,” el a bisa: “N’e congreso boso lo topa un hende cu ta bini di un área cu tin mester di pionero, i boso problema ta solucioná. Djis skirbi nos i bisa nos unda boso ta, i nos lo asigná boso.” Esei ta loke a sosodé. A resultá cu ruman Jack DeWitt, un ex-sirbidó di zona, tabata conocé algun persona na New Market, Virginia, cu tabatin un cas di pionero cu tabatin mester di algun pionero mas. Pues despues di e congreso, nos a coge rumbo pa New Market.

Na New Market nos a haña un sorpresa agradabel. Esun cu mester a bini for di Filadelfia pa djoin nos den e trabou di pionero, no tabata nada mas ni nada ménos cu Benjamin Ransom! Sí, tio Ben. Esta un goso tabata pa traha huntu cuné den e ministerio di cas pa cas despues di mas cu 25 aña cu el a implantá e simia di berdad den mi curason na Boston! Maske pa añanan largu e mester a enfrentá indiferencia, mofa i asta persecucion di parti di su famia, tio Ben nunca a perde su amor pa Jehova i pa e ministerio.

Nos a disfrutá di un estadia di ocho luna n’e cas di pionero na New Market. Durante e tempu ei nos a siña, entre otro cosnan, con pa cambia galiña i webu pa literatura. Despues ami cu tio Ben i Marion huntu cu tres otro ruman a ser asigná pa sirbi como pionero special na Hanover, Pennsylvania. Esei tabata e promé di seis asignacion cu nos lo a bai haña na Pennsylvania di 1942 pa 1945.

Pionero Special Durante Segundo Guera Mundial

Tabatin ocasionnan durante Segundo Guera Mundial cu nos a haña nos confrontá cu hostilidad debí na nos posicion neutral, pero semper Jehova a apoyá nos. Un biaha nos Buick bieu a daña na Provincetown, Massachusetts, i mi mester a cana vários kilometer dor di un área católico masha hostil pa mi bai haci un rebishita. Mi a pasa un grupo di hóben bagamundu cu a reconocé mi i nan a cuminsá grita. Mi a cana bai lihé miéntras cu piedra tabata skeiru banda di mi orea, sperando cu e hóbennan no a sigui mi. Mi a logra yega cas dje persona interesá sin cu nan a heridá mi. Pero e doño di cas, un miembro respetá di Legion Americano, a disculpá su mes, bisando: “Mi no por atendé bo awenochi pasobra mi a lubidá cu nos tin cu bai cine den stad.” Ora mi a corda riba e tiradónan di piedra na skina cu tabata warda mi bolbe, mi a cuminsá haña miedu. Sin embargo, mi a haña ánimo atrobe ora e cabayero a agregá: “Di con bo no ta djis cana huntu cu nos? Nos por papia na caminda.” Asina mi a haña chens di dun’é testimonio i pasa e sitio di peliger safe.

Balansá Asuntunan di Famia i e Ministerio

Despues di guera nos tabatin vários asignacion na Virginia, incluso un estadia di ocho aña como pionero special i regular na Charlottesville. Pa 1956, nos yu muhernan tabata grandi i a casa, i ami cu Marion tabata den movecion atrobe sirbiendo como pionero na Harrisonburg, Virginia, i como pionero special na Lincolnton, Nort Carolina.

Na 1966, mi a ser asigná na e trabou di circuito, biahando di un congregacion pa otro i animando e rumannan, mescos cu ruman Winchester a animá mi den añanan ’30 na New Jersey. Mi a sirbi un circuito di congregacionnan na Tennessee pa dos aña largu. Despues Sociedad a pidi ami cu Marion pa bolbe bek na nos amor di mas grandi: e trabou di pionero special. Di 1968 pa 1977, nos a sirbi como pionero special den e parti zuid di Merca, for di Georgia te Mississippi.

 Na Eastman, Georgia, mi a ser asigná como superintendente di congregacion (awor e yama superintendente presidente) na lugá di Powell Kirkland, un ruman homber di edad masha lief, cu a sirbi hopi aña como superintendente di circuito pero cu awor tabata sufri kebranto di salú. E tabata mashá gradicidu i a apoyá mi. Su apoyo tabata di vital importancia pasobra tabatin algun desacuerdo den e congregacion cu a enbolbé algun persona prominente. E situacion a escalá, i mi a haci hopi oracion na Jehova. Mi a corda riba textonan manera Proverbionan 3:5 i 6: “Confia den Jehova cu tur bo curason i no lèn riba bo mes comprendimentu. Den tur bo camindanan tuma nota di dje, i e mes lo haci bo camindanan stret.” Dor di traha duru pa mantené e comunicacion habrí, nos por a uni e congregacion cu bon resultado pa tur hende.

Pa 1977 nos a cuminsá sinti e efectonan di edad un poco, i nos a ser reasigná n’e área di Charlottesville caminda nos dos yu muhernan tabata biba huntu cu nan famia. Pa e último 23 añanan, nos tabatin e goso di traha den e área aki, i a yuda establecé e congregacion di Ruckersville, Virginia, i mira yu i nietu di nos studiantenan anterior di Bijbel crece i bira ancianonan di congregacion, pionero i betelita. Ainda ami cu Marion por cumpli cu un bon  programa di sirbishi di veld, i mi tin e privilegio di sirbi activamente como anciano den e congregacion East di Charlottesville, i ta conducí un studio di buki i duna discurso público.

Mescos cu tur hende, atrabes di añanan nos tambe a experenciá problema. Por ehempel, apesar di nos esfuersonan, durante su último añanan di tiener, Doris a bira swak spiritualmente i a casa cu un homber cu no tabata Testigo. Pero nunca el a perde su amor pa Jehova completamente, i su yu homber Bill tin 15 aña ta sirbi na Betel na Wallkill, New York. Tantu Doris como Louise ta biuda actualmente, pero cu goso nan ta sirbi como pionero regular den cercania.

Lesnan Cu Nos A Siña Atrabes di Añanan

Mi a siña aplicá un par di regla simpel pa logra éxito den sirbi Jehova: Mantené bo bida simpel. Sea un ehempel den tur bo tratonan, asta den bo bida privá. Aplicá instruccion di “e esclabo fiel i discreto” den tur cos.—Mateo 24:45.

Marion a traha un lista corticu pero eficas di sugerencia pa logra éxito den e trabou di pionero miéntras bo ta lanta yunan: Traha un programa práctico i mantené bo na dje. Haci bo ministerio di pionero un berdadero carera. Come salú. Sosegá suficiente. No recreá demasiado. Haci e berdad, incluso tur e rasgonan di e ministerio, un experencia placentero pa bo yunan. Laga e ministerio ta semper un experencia interesante pa nan.

Awor nos ta den nos 90 i picu aña. Ya a pasa 62 aña desde e dia cu nos a tende nos discurso di bautismo riba e yerba di e residencia Stackhouse, i nos a pasa 60 aña den sirbishi di tempu completo. Ami cu Marion por bisa onestamente cu nos ta completamente i profundamente satisfecho cu e manera cu nos bida a bai. Mi ta masha gradicidu p’e animacion cu mi a ricibí pa como tata hóben mi pone metanan spiritual promé i sigui traha pa logra nan, i mi ta gradicidu na mi casá stimá Marion, i na mi yu muhernan pa nan apoyo atrabes di añanan. Maske nos no ta ricu materialmente, hopi bes mi ta aplicá Eclesiástes 2:25 na mi mes: “Ken ta come i ken ta bebe mihó cu ami?”

Den nos caso realmente Jehova a cumpli sobreabundantemente cu su promesa registrá na Malakías 3:10. Di berdad el a ‘basha riba nos un bendicion te ora cu no tin mas necesidad’!

[Kuadro/Plachi na página 29]

RECUERDONAN DI AÑANAN DI GUERA

Casi 60 aña despues di e guera, ainda henter e famia tin recuerdonan bibu di e añanan ei.

“Na Pennsylvania por haci hopi friu,” Doris ta corda, “tabatin un anochi cu e temperatura tabata 35 grado Celsius bou di sero.” Louise ta agregá: “Ami cu Doris tabata sinta riba pia di otro riba e stul patras den nos Buick bieu pa nos pianan no bira friu.”

Doris ta bisa: “Nunca nos no a sinti cu nos ta pober of cu nos falta algu. Nos tabata sa cu nos a muda mas cu mayoria hende, pero semper nos a come bon, i nos tabatin bon paña cu nos tabata haña for di algun amigu di Ohio kendenan tabatin yu muher djis un tiki mas grandi cu nos.”

“Mama cu Tata semper a laga nos sinti cu nan ta stima nos i apreciá nos,” Louise ta indicá, “i nos tabatin chens di pasa hopi tempu huntu cu nan den e ministerio. Esei a laga nos sinti nos masha special i hopi cerá cu nan.”

Paul ta corda: “Mi tabatin un Buick Special di 1936, i e autonan aki tabata conocí p’e echo cu nan as ta kibra. Mi ta pensa cu e motor tabata muchu fuerte pa e resto dje auto. A parce cu semper esaki tabata sosodé riba e anochi mas friu di luna, i e ora ei ata mi rumbo pa santana di auto en busca di un otro as. Mi a bira un experto den cambia as.”

“I no lubidá e bònnan pa tuma provision di cuminda of artículonan di uso,” Marion ta bisa. “Tur cos tabata pa un dia, kier men bo por a haña solamente un cantidad limitá: carni, gasolin, tayer pa auto, tur cos. Cada bes cu nos a yega na un asignacion nobo, nos mester a presentá dilanti autoridadnan local pa aplicá pa haña e bòn pa provision. Por a pasa lunanan promé cu bo haña unu, i tabata parce cu cada bes ora cu por fin nos haña nos bòn, Sociedad ta manda nos n’e siguiente asignacion i nos tin cu bolbe cuminsá di nobo. Pero semper Jehova a percurá pa nos.”

[Plachi]

Ami cu Marion huntu cu Doris (man robes) i Louise, 2000

[Plachi na página 25]

Huntu cu mi mama na 1918, tempu mi tabatin 11 aña

[Plachi na página 26]

Huntu cu Louise, Marion i Doris na 1948 ora e muchanan a bautisá

[Plachi na página 26]

Potret di nos casamentu na october 1928

[Plachi na página 26]

Ami i mi yu muhernan (te na banda robes i banda drechi), na Yankee Stadium, 1955