Pakico Studia Bijbel?

BILL tabata hóben, atlético, educá i financieramente stabil. Tog e no a sintié satisfecho. Su bida no tabatin rumbo, i esei a molesti’é profundamente. El a examiná vários religion den su búskeda pa haña un propósito den bida, pero e no a haña loke e tabata busca. Na 1991 el a topa un Testigo di Jehova cu a lagu’é cu un buki cu a trata loke Bijbel ta bisa tocante e nificacion di bida. Nan a haci areglo pa studia Bijbel, pa Bill por a trata e tema aki i otronan mas.

Bill ta corda: “Nos a tene nos promé studio, i debí cu nos a referí asina tantu na Bijbel, mi tabata sa cu ta esaki mi tabata busca. E contestanan den Bijbel tabata hopi emocionante. Despues dje promé studio ei mi a drenta mi truck, core bai den ceru, sali for dje truck anto grita di contentu. Mi a keda profundamente emocioná cu por fin mi tabata hañando contesta pa mi preguntanan.”

Claro cu no ta tur hende cu haña e berdad  di Bijbel ta grita literalmente di contentu. Pero tog pa hopi hende, haña sa e contesta p’e preguntanan importante di bida ta un experencia gososo. Nan ta sinti manera e homber den e comparacion di Jesus cu a descubrí un tesoro scondí den un cunucu. Jesus a bisa: “P’e goso cu e tin e ta bai i ta bende tur loke e tin i ta cumpra e cunucu ei.”—Mateo 13:44.

E Clave pa un Bida cu Nificacion

Bill a yega di meditá riba e pregunta básico: Kico ta e propósito di bida? Filósofo, teólogo i científiconan a lucha cu e pregunta ei pa miles di aña. Hende a yega di skirbi un cantidad incontabel di buki pa duna un contesta. Nan esfuersonan tabata en bano, i hopi a yega na e conclusion cu no tin contesta p’e pregunta ei. I sin embargo, tin un contesta. Aunke e ta profundo, e no ta complicá. E ta ser splicá den Bijbel. E clave pa un bida felis i cu nificacion ta esaki: Nos mester tin un bon relacion cu Jehova, nos Creador i Tata celestial. Con nos por logra esei?

Hala cerca Dios tin dos aspecto aparentemente contradictorio. Esnan cu hala cerca Dios ta tem’é, i nan ta stim’é tambe. Laga nos considerá dos pasashi di Bijbel cu ta apoyá e declaracion aki. Hopi tempu atras, Sálomon e rey sabí a studia humanidad cuidadosamente, anto el a registrá e resultado di su estudio den e buki bíblico di Eclesiástes. Resumiendo su observacionnan, el a skirbi: “E conclusion dje asuntu, despues di a tende tur cos, ta: Teme e Dios berdadero i warda su mandamentunan. Pasobra esaki ta henter e obligacion di hende.” (Eclesiástes 12:13) Siglonan despues, ora nan a puntra Jesus cua ta e mandamentu di mas grandi den e Ley cu Dios a duna Moises, el a contestá: “Bo tin cu stima Jehova bo Dios cu henter bo curason i cu henter bo alma i cu henter bo mente.” (Mateo 22:37) Ta parce bo straño cu bo mester teme Dios, anto stim’é tambe? Laga nos examiná con importante temor i amor ta, i con nan ta traha huntu pa producí un relacion satisfaciente cu Dios.

Loke Temor di Dios Ta Nificá

Un temor respetuoso ta fundamental si nos kier adorá Dios na un manera aceptabel. Bijbel ta bisa: “E temor di Jehova ta e principio di sabiduria.” (Salmo 111:10) Apostel Pablo a skirbi: “Laga nos sigui tin bondad inmerecí, mediante cua nos por rindi na Dios sirbishi sagrado aceptablemente cu temor di Dios i respet profundo.” (Hebreonan 12:28) Di manera similar, un angel meimei di shelu den un vision cu apostel Juan a ricibí, a cuminsá su proclamacion di bon nobo cu e palabranan: “Teme Dios i dun’é gloria.”—Revelacion 14:6, 7.

E temor di Dios aki, cu ta asina esencial pa un bida cu nificacion, no ta un miedu spantoso. Si un bestia cruel i peligroso menasá nos, nos lo por sinti miedu. Pero temor di Dios ta un respet profundo p’e Creador. Tambe e ta encerá un miedu saludabel di desagradá Dios, pasobra é ta e Hues Supremo i e Todopoderoso, cu tin tantu e poder como e autoridad pa castigá esnan cu desobedecé.

Temor cu Amor Ta Traha Huntu

Sin embargo, Jehova no kier pa hende sirbié únicamente debí cu e ta impresioná nan. Mas cu tur otro cos, Jehova ta un Dios di amor. Apostel Juan a ser motivá pa skirbi: “Dios ta amor.” (1 Juan 4:8) Jehova Dios a trata cu humanidad na un manera mashá amoroso, i e ta deseá pa hende respondé dor di stim’é bek. Pero con un amor asina por combiná cu temor di Dios? De echo, nan dos ta  mará na otro. E salmista a skirbi: “Intimidad cu Jehova ta pertenecé na esnan cu ta tem’é.”—Salmo 25:14.

Djis pensa riba e sintimentu di respet i admiracion cu un yu tin pa un tata fuerte i sabí. Na mes momento, un yu asina lo respondé na e tata su amor. E yu lo confia e tata i acudí na dje pa guia, cu confiansa cu e guia aki lo duna beneficio. Na un manera similar, si nos ta stima i teme Jehova, nos lo obedecé su guia, i esei lo beneficiá nos. Wak kico Jehova a bisa tocante e israelitanan: “Si solamente nan desaroyá e curason aki di nan p’e teme mi i semper warda tur mi mandamentunan, afin cu por bai bon cu nan i nan yunan te na tempu indefiní!”—Deuteronomio 5:29.

Sí, temor di Dios no ta haci nos catibu, sino liber, e no ta hiba na tristesa, sino na goso. Isaías a profetisá esaki tocante Jesus: “Lo e tin delicia den e temor di Jehova.” (Isaías 11:3) I e salmista a skirbi: “Felis ta e homber cu ta teme Jehova, den kende su mandamentunan el a deleitá masha tantu.”—Salmo 112:1.

Ta obvio cu nos no por teme Dios ni stim’é si nos no conoc’é. Ta p’esei ta asina importante pa nos studia Bijbel. Un studio asina ta yuda nos comprendé Dios su personalidad i apreciá cu ta sabí pa nos sigui su guia. Mas nos hala cerca Dios, mas nos ta deseá di haci su boluntad, i nos ta sinti nos motivá pa cumpli cu su mandamentunan dor cu nos sa cu nan lo ta di beneficio pa nos.—1 Juan 5:3.

Ta un goso pa sa cu bo ta riba e bon caminda den bida. Esei ta e caso cu Bill, cu nos a mencioná na cuminsamentu. Recientemente el a bisa: “Den e nuebe añanan cu a pasa for di dia di mi promé studio di Bijbel, mi relacion cu Jehova a crece. E brote di goso cu mi a sinti na cuminsamentu a desaroyá bira un manera di biba berdaderamente felis. Semper mi ta mira bida na un manera optimista. Mi dianan ta yen di actividad significativo, i no un búskeda di placer cu no ta hiba niun caminda. Jehova a bira un persona real pa mi, i mi sa cu e tin mi bienestar na pechu.”

Den e siguiente artículo nos lo considerá mas aleu con conocimentu di Jehova ta trece goso i beneficio na esnan cu aplik’é den nan bida.

[Komentario na página 5]

Hala cerca Dios ta nificá cu nos ta stim’é i tem’é

[Plachi na página 6]

Jesus tabatin goso den e temor di Jehova