Participá den e Goso di Duna!
Participá den e Goso di Duna!
“Tin mas felicidad den duna cu tin den ricibí.”—ECHONAN 20:35.
1. Con Jehova ta demostrá e goso di duna?
E GOSO di conocé e berdad i e bendicionnan cu e conocimentu ei ta trece cuné, ta regalonan precioso di Dios. Esnan cu a siña conocé Jehova tin hopi motibu pa alegrá. Pero mescos cu tin goso den ricibí un regalo, tin goso den duna regalo tambe. Jehova ta e Dunador di “tur bon don i tur regalo perfecto,” i e ta “e Dios felis.” (Santiago 1:17; 1 Timoteo 1:11) E ta duna siñansa sano na tur hende cu scucha, i e ta keda hopi contentu ora esnan cu e ta instruí ta obedec’é, mescos cu mayornan ta alegrá ora nan yunan actua di acuerdo cu nan instruccionnan amoroso.—Proverbionan 27:11.
2. (a) Kico Jesus a bisa tocante dunamentu? (b) Kico ta haci nos felis ora nos siña hende e berdad di Bijbel?
2 Asina tambe, ora Jesus tabata riba tera el a keda contentu di mira hende reaccioná positivo riba loke el a siña nan. Apostel Pablo a cita e palabranan aki di Jesus: “Tin mas felicidad den duna cu tin den ricibí.” (Echonan 20:35) E felicidad cu nos ta ricibí ora nos ta siña otro hende berdadnan bíblico no ta simplemente e satisfaccion di cu un hende a bai di acuerdo cu nos creencianan religioso. Nos ta alegrá pa un motibu muchu mas grandi, esta, di sa cu nos ta dunando nan algu cu ta di balor berdadero i eterno. Dor di duna den sentido spiritual, nos por yuda hende beneficiá nan mes awor i pa henter eternidad.—1 Timoteo 4:8.
Dunamentu Ta Haci Felis
3. (a) Con apostel Pablo i Juan a expresá e goso cu nan tabatin di yuda otro hende den sentido spiritual? (b) Di con duna nos yunan e berdad di Bijbel ta un muestra di amor?
3 Sí, mescos cu Jehova i Jesus, cristiannan tambe tin goso den duna regalo spiritual. Apostel Pablo a alegrá di sa cu el a yuda otro hende siña e berdad dje Palabra di Dios. El a skirbi e congregacion na Tesalónica: “Kico ta nos speransa of goso of corona di gran alegria—pues, de echo no ta boso?—dilanti nos Señor Jesus na su presencia? Boso siguramente ta nos gloria i goso.” (1 Tesalonicensenan 2:19, 20) Na un manera similar apostel Juan, papiando di su yunan spiritual, a skirbi: “Mi no tin un motibu mas grandi pa duna gradicimentu cu e cosnan aki, pa mi tende cu mi yunan ta sigui cana den e berdad.” (3 Juan 4) Ademas, pensa con gososo ta pa yuda nos propio yunan bira nos yunan spiritual! Cria yu den “e disiplina i reglamentu mental di Jehova” ta un muestra di amor di parti di mayornan. (Efesionan 6:4) Asina e mayornan ta mustra cu nan tin interes den e bienestar eterno di nan yunan. Ora e yunan reaccioná faborablemente, e mayornan ta sinti un goso i satisfaccion masha grandi.
4. Cua experencia ta demostrá e goso di duna den sentido spiritual?
4 Dell ta sirbi como un minister pionero di tempu completo, i ta mama di cincu yu. E ta bisa: “Mi por comprendé e sintimentu tras dje palabranan di apostel Juan bon-bon, pasobra mi ta masha gradicidu cu cuater di mi yunan ta ‘cana den e berdad.’ Mi sa cu ora un famia ta uní den adoracion berdadero, esei ta trece onra i gloria na Jehova. P’esei mi ta sinti un satisfaccion profundo di mira con el a bendicioná mi esfuerso pa inculcá e berdad den mi yunan. E prospecto precioso di bida eterno den Paradijs huntu cu mi famia ta yena mi cu speransa i ta motivá mi pa perseverá apesar di dificultad i obstáculo.” Lamentablemente, un yu muher di Dell a ser expulsá for dje congregacion debí cu el a sigui un proceder no-cristian. Apesar di esei, Dell ta traha duru p’e keda cu un actitud positivo. E ta bisa: “Mi ta spera cu un dia mi yu muher lo bolbe na Jehova cu humildad i sinceridad. Pero mi ta gradicí Dios cu mayoria di mi yunan ta sigui sirbié fielmente. E goso cu mi ta sinti ta un berdadero fuente di fortalesa pa mi.”—Nehemías 8:10.
Haña Amigu Eterno
5. Segun cu nos ta duna di nos mes den e trabou di haci disipel, e echo cu nos sa kico ta duna nos satisfaccion?
5 Jesus a bisa su siguidónan pa nan haci disipel cristian i siña nan tocante Jehova i su rekisitonan. (Mateo 28:19, 20) Tantu Jehova como Jesus a yuda hende di manera inegoista pa nan siña e caminda dje berdad. Pues, segun cu nos ta duna di nos mes den e trabou di haci disipel, nos tin e satisfaccion di sa cu nos ta imitando e ehempel di Jehova i di Jesus, mescos cu e promé cristiannan a haci. (1 Corintionan 11:1) Ora nos cooperá cu Dios Todopoderoso i su Yu stimá, nos bida ta haña berdadero nificacion. Forma parti di Dios su ‘colaboradónan’ ta un berdadero bendicion! (1 Corintionan 3:9) Anto no ta emocionante pa sa cu asta angel ta tuma parti den e actividad aki di predicá e bon nobo?—Revelacion 14:6, 7.
6. Segun cu nos ta participá den dunamentu spiritual, ken ta bira nos amigu?
6 De echo, dor di participá den e trabou aki di duna den sentido spiritual, nos por bira mas cu colaboradó di Dios: nos por asta cera un amistad eterno cuné. Debí na su fe, Abraham a ser yamá amigu di Jehova. (Santiago 2:23) Segun cu nos ta haci esfuerso pa cumpli cu Dios su boluntad, nos tambe por bira amigu di Dios. Si nos hacié, nos lo bira amigu di Jesus tambe. El a bisa su disipelnan: “Mi a yama boso amigu, pasobra tur e cosnan cu mi a tende for di mi Tata mi a duna di conocé na boso.” (Juan 15:15) Hopi hende ta gosa mashá di ser contá como amigu di hende cu influencia, of di funcionario haltu, pero nos por ser contá como amigu dje dos personahenan di mas haltu den universo!
7. (a) Con un señora a cera un berdadero amistad? (b) Abo tabatin un experencia similar?
7 Ademas, ora nos yuda hende siña conocé Dios, nan ta bira nos amigu tambe, i esei ta duna nos extra felicidad. Joan, cu ta biba na Merca, a cuminsá studia Bijbel cu un señora cu yama Thelma. Apesar cu Thelma su famia a oponé e echo cu e ta studia, el a perseverá i un aña despues el a bautisá. Joan a skirbi: “Nos asociacion no a caba ei; mas bien el a desaroyá bira un amistad di 35 aña caba. Hopi bes nos tabata bai sirbishi i congreso huntu. Despues mi a muda bai biba 800 kilometer leu. Pero Thelma ta sigui manda carta masha amoroso i conmovedor mes pa mi. E ta bisa mi cu e ta corda riba mi cu cariño; e ta gradicí mi cu mi ta su amiga i ehempel, i cu mi a siñ’é e berdad di Bijbel. Un amiga cerá i stimá asina ta un recompensa maraviyoso p’e esfuerso cu mi a haci pa yud’é siña tocante Jehova.”
8. Ki actitud positivo lo yuda nos den e ministerio?
8 E speransa di haña un hende cu sí kier siña e berdad por yuda nos perseverá asta ora hopi hende cu nos topa no ta mustra masha interes, of ningun interes mes, den Jehova su Palabra. Apatia asina por ta un reto pa nos fe i nos awante. Pero un actitud positivo por yuda nos. Fausto, cu ta bini di Guatemala, a bisa: “Ora mi ta duna hende testimonio, mi ta pensa con bon lo ta si e hende cu mi ta papia cuné mester bira mi ruman spiritual. Mi razonamentu ta cu por lo ménos un hende cu mi topa lo por aceptá e berdad dje Palabra di Dios un dia. E pensamentu ei ta yuda mi sigui padilanti, i e ta duna mi un berdadero goso.”
Acumulá Tesoro den Shelu
9. Kico Jesus a bisa tocante tesoro den shelu, i kico nos por siña di esaki?
9 No semper ta fácil pa haci disipel, sea cu ta trata di nos yunan of otro hende. E por exigí tempu, pacenshi i perseverancia. Pero corda cu hopi hende ta dispuesto di traha duru pa nan montoná un abundancia di cos material, cos cu hopi bes no ta duna nan goso i cu no ta dura pa semper. Jesus a bisa su oyentenan cu ta mihó pa traha pa cos spiritual. El a bisa: “Stop di acumulá tesoro pa bo mes riba tera, unda mòt i frus ta destruí, i unda ladron ta kibra drenta i horta. Mas bien acumulá tesoro pa bo mes den shelu, unda ni mòt ni frus ta destruí, i unda ladron no ta kibra drenta i horta.” (Mateo 6:19, 20) Si nos busca meta spiritual, entre otro participá den e trabou importante di haci disipel, nos por tin e satisfaccion di sa cu nos ta haci e boluntad di Dios, i cu lo e recompensá nos. Apostel Pablo a skirbi: “Dios no ta inhustu p’e lubidá boso trabou i e amor cu boso a mustra pa su nomber.”—Hebreonan 6:10.
10. (a) Con bini Jesus tabatin tesoro spiritual? (b) Con Jesus a duna di su mes, i ki gran beneficio otro hende a saca di esaki?
10 Si nos ta traha diligentemente pa haci disipel, nos ta acumulá “tesoro den shelu” pa nos mes, na armonia cu loke Jesus a bisa. Esaki ta duna nos e goso di ricibí. Si nos duna na un manera inegoista, na final ta nos mes ta ser enrikesé. Jesus mes a sirbi Jehova fielmente pa miles di miyones di aña. Pensa cuantu tesoro é a acumulá den shelu! Sin embargo, Jesus no a busca su propio interes. Apostel Pablo a skirbi: “[Jesus] a duna su mes pa nos picánan p’e por libra nos dje mal sistema di cosnan actual segun e boluntad di nos Dios i Tata.” (Galationan 1:4) Jesus no solamente a duna di su mes sin egoismo den e ministerio; el a duna asta su bida como rescate pa otro hende por tin e oportunidad di acumulá tesoro den shelu.
11. Di con regalo spiritual ta mihó cu regalo material?
11 Dor di siña hende tocante Dios, nos ta yuda nan mira con nan tambe por acumulá tesoro spiritual cu no por caba na nada. Bo por duna un regalo mas grandi cu esei? Si bo duna un amigu di bo un oloshi caru, un auto of un cas mes, probablemente e amigu ei lo keda gradicidu i contentu, i abo lo tin e goso di duna. Pero den ki condicion e regalo ei lo ta despues di 20 aña? Despues di 200 aña? Despues di 2.000 aña? Pero si bo duna di bo mes pa yuda un hende sirbi Jehova, e por sigui beneficiá dje regalo ei pa semper.
Busca Esnan Cu Kier e Berdad
12. Con hopi cristian a duna di nan mes pa yuda otro hende den sentido spiritual?
12 Jehova su pueblo a yega te n’e partinan mas lehano di tera pa nan por participá den e goso di duna den sentido spiritual. Miles di nan a bai laga cas i famia pa nan por sirbi como misionero na paisnan caminda nan mester a adaptá na idioma i cultura cu tabata nobo pa nan. Otronan a muda bai biba den áreanan di nan mes pais caminda tin un necesidad mas grandi di proclamadónan di Reino. Otronan a siña un idioma stranhero pa nan por tin oportunidad di predicá na gruponan di imigrante den nan mes localidad. Por ehempel, despues di cria dos yu cu awor ta sirbi n’e sede mundial di Testigonan di Jehova, un pareha na New Jersey, Merca, a cuminsá traha pionero i a siña chines. Den tres aña di tempu nan a conducí studio di Bijbel cu 74 hende di abla chines cu tabata bai un universidad den cercania. Abo por expandé bo ministerio den un of otro manera pa bo por tin mas goso den e trabou di haci disipel?
13. Kico bo por haci si bo kier pa bo ministerio ta mas fructífero?
13 Kisas bo ta anhelá pa conducí un studio di Bijbel, pero te awor bo no a logra. Na algun pais ta difícil pa haña hende interesá. Kisas e hendenan cu bo ta topa no ta mustra interes den Bijbel. Si ta asina, kisas bo por mencioná bo deseo cu mas regularidad den oracion, conciente cu tantu Jehova como Jesucristo tin mashá interes den e trabou, i cu nan por guia bo na un hende manera carné. Busca sugerencia cerca esnan den bo congregacion cu tin mas experencia, of esnan cu nan ministerio ta mas fructífero. Probechá dje entrenamentu i e sugerencianan cu ta ser duná na reunionnan cristian. Beneficiá dje conseho di superintendentenan biahero i nan esposanan. Principalmente, no entregá nunca. E homber sabí a skirbi: “Sembra bo simia mainta i te atardi no laga bo man sosegá; pasobra bo no sa unda esaki lo tin éxito.” (Eclesiástes 11:6) Miéntras tantu, corda riba hombernan fiel manera Noe i Jeremías. Apesar cu masha poco hende a reaccioná faborablemente na nan predicacion, nan ministerio tabata un éxito. I e mihó cos ta cu Jehova a keda contentu cu nan ministerio.
Haci Lo Mihó Cu Bo Por
14. Con Jehova ta mira esnan cu a bira bieu den su sirbishi?
14 Kisas bo circunstancia no ta permití bo haci mes tantu cu bo kier den e ministerio. Por ehempel, kisas edad avansá ta limitá loke bo por haci den Jehova su sirbishi. Sin embargo, corda kico e homber sabí a skirbi: “Cabei blancu ta un corona di bunitesa ora e ser hañá den e caminda di husticia.” (Proverbionan 16:31) Pa Jehova, un bida usá den su sirbishi ta un bunita cos. Ademas e Scritura ta bisa: “Asta te na un hende su behes mi [Jehova] ta e Mésun; i te na un hende su cabei blancu ami mes lo sigui sostené. Ami mes lo actua sigur, pa mi mes por carga i pa mi mes por sostené i percurá escape.” (Isaías 46:4) Nos Tata celestial amoroso ta primintí cu lo e sostené i apoyá su lealnan.
15. Bo ta kere cu Jehova tin comprension pa bo circunstancia? Di con?
15 Kisas bo ta lucha cu malesa, oposicion di un casá incrédulo, responsabilidad pisá di famia of un otro problema difícil. Jehova ta reconocé nos limitacionnan i nos circunstancianan, i e ta stima nos debí na nos esfuerso sincero pa sirbié. Esei ta e caso apesar cu kisas nos ta haci ménos cu otro cristiannan. (Galationan 6:4) Jehova sa cu nos ta imperfecto, i e ta realístico den loke e ta spera di nos. (Salmo 147:11) Si nos haci nos best, nos por keda sigur cu nos ta precioso den Dios su bista, i cu lo e no lubidá nos echonan di fe.—Lucas 21:1-4.
16. Den ki manera henter un congregacion ta participá den haci un disipel?
16 Corda tambe cu e trabou di haci disipel ta un esfuerso colectivo. Ningun hende individual so no ta haci un disipel, mescos cu un solo gota di yobida no ta nutri un mata. En berdad por ta asina cu ta un cierto Testigo a haña un hende interesá i conducí un studio di Bijbel cuné. Pero asina cu e hende nobo ei bini Salon di Reino, henter e congregacion ta yud’é reconocé e berdad. E calor dje hermandad ta evidencia dje influencia dje spiritu di Dios. (1 Corintionan 14:24, 25) Mucha i hóbennan ta duna comentario animante, loke ta mustra e hende nobo cu nos hóbennan ta diferente for di hóbennan di mundu. Rumannan enfermo, esnan físicamente swak i esnan di edad den e congregacion ta siña hende nobo kico kier men mustra awante. Sin importá ki edad of limitacion nos tin, nos tur ta hunga un papel importante den yuda hende nobo segun cu nan amor p’e berdad di Bijbel ta bira mas profundo, i nan ta progresá den direccion di bautismo. Cada ora cu nos pasa den sirbishi, cada rebishita cu nos haci, cada combersacion cu nos tene cu un persona interesá na Salon di Reino, lo por parce insignificante riba su mes, pero e ta parti di un obra poderoso cu Jehova ta logrando.
17, 18. (a) Ademas di tuma parti den e trabou di haci disipel, con mas nos por participá den e goso di duna? (b) Ken nos ta imitá dor di participá den e goso di duna?
17 Claro cu ademas di participá den e trabou importante di haci disipel, nos como cristian ta participá den e goso di duna den otro maneranan tambe. Nos por pone cen un banda pa contribuí pa apoyá adoracion berdadero i yuda esnan den necesidad. (Lucas 16:9; 1 Corintionan 16:1, 2) Nos por busca oportunidad pa mustra hospitalidad. (Romanonan 12:13) Nos por haci esfuerso pa “obra loke ta bon pa cu tur, pero specialmente pa cu esnan relacioná cu nos den e fe.” (Galationan 6:10) Ademas nos por duna den maneranan simpel pero importante: un carta, un yamada di telefon, un regalo, un yudansa of un palabra di animacion.
18 Ora nos duna, nos ta mustra cu nos ta imitá nos Tata celestial. Tambe nos ta demostrá nos amor di ruman, e característica cu ta identificá cristiannan berdadero. (Juan 13:35) Si nos corda e cosnan aki, esei por yuda nos participá den e goso di duna.
Bo Por Splica?
• Con Jehova i Jesus a pone ehempel den dunamentu spiritual?
• Con nos por haña amigu eterno?
• Ki pasonan nos por dal pa haci nos ministerio mas exitoso?
• Con tur hende den congregacion por participá den e goso di duna?
[Preguntanan di Estudio]
[Plachinan na página 13]
Ora yunan reaccioná faborablemente na entrenamentu, e mayornan ta sinti un goso i satisfaccion masha grandi
[Plachi na página 15]
Haciendo disipel nos por cera bon amistad
[Plachi na página 16]
Jehova ta sostené nos den nos behes
[Plachinan na página 17]
Nos ta haña goso den duna na maneranan simpel pero importante