Yudansa pa Comprendé Bijbel

BIJBEL ta un buki único. Su skirbidónan ta bisa cu ta Dios a inspirá nan, i e contenido di Bijbel ta duna evidencia amplio di cu en berdad ta asina. (2 Timoteo 3:16) Entre otro, Bijbel ta mustra di unda nos a bini, pakico nos ta aki i unda nos ta bai. Sigur-sigur anto, e buki aki merecé nos atencion!

Kisas bo a yega di purba lesa Bijbel, pero bo a hañ’é difícil pa comprendé. Tal bes bo no sa unda pa busca contesta pa bo preguntanan. Si ta asina, anto bo no ta bo so. Bo situacion ta manera di un homber cu a biba den promé siglo. E tabata biahando den un garoshi for di Jerusalem pa su tera natal, Etiopia. E funcionario di Etiopia aki tabata lesa na bos haltu for dje buki bíblico profético di Isaías, skirbí mas cu sheteshen aña promé.

Di ripiente, un homber cu tabata core na banda dje garoshi a yam’é. Tabata Felipe, un disipel di Jesus, i el a puntra e etiopio: “Berdaderamente bo sa loke bo ta lesando?” E etiopio a contestá: “Realmente, con lo mi por haci esei a ménos cu un hende guia mi?” E ora ei el a invitá Felipe p’e subi e garoshi. Felipe a splica e nificacion dje pasashi cu e homber tabata lesando, anto el a declará “e bon nobo tocante Jesus” na dje.—Echonan 8:30-35.

Mescos cu Felipe a yuda e etiopio ei comprendé e Palabra  di Dios hopi tempu atras, awe Testigonan di Jehova ta yuda hende comprendé Bijbel. Nan lo keda masha contentu di por yuda bo tambe. Hopi bes ta mihó pa studia Bijbel na un manera sistemático, cuminsando cu siñansanan bíblico básico. (Hebreonan 6:1) Segun cu bo progresá, lo bo bira capas pa tuma loke apostel Pablo a yama “cuminda sólido,” esta, berdadnan bíblico mas profundo. (Hebreonan 5:14) Aunke ta Bijbel bo ta studia, otro publicacionnan—yudansanan pa studia Bijbel—por yuda bo localisá i comprendé pasashinan di Bijbel cu ta trata un variedad di tema.

Normalmente lo por haci areglo pa bo studia Bijbel na un ora i un lugá cu ta cumbiniente pa bo. Algun hende ta asta studia via telefon. E studio no ta bai manera den un klas; e ta un areglo privá adaptá na bo circunstancianan personal, incluso bo antecedencia i bo nivel di educacion. Bo no tin nodi paga pa un studio di Bijbel asina. (Mateo 10:8) No tin cu pasa examen, i niun hende lo no pone bo sinti incómodo. Nan lo contestá bo preguntanan, i lo bo siña con pa hala cerca Dios. Pero, pakico bo mester studia Bijbel? Wak algun motibu di con un studio di Bijbel por haci bo bida mas gososo.