‘Bendicion Ta p’e Hustu’

“UN HOMBER hóben mi tabata, tambe mi a bira bieu, i tog nunca mi a mira un hende hustu bandoná henteramente, ni su yunan buscando pan,” e salmista David a declará den su behes. (Salmo 37:25) Jehova Dios stima hende hustu i ta percurá pa nan cu cariño. Den su Palabra, Bijbel, e ta urgi adoradó berdadero pa busca husticia.—Sofonías 2:3.

Ser hustu ta nificá biba na armonia cu Dios su normanan di loke ta bon i loke ta malu. Capítulo 10 dje buki bíblico di Proverbionan ta animá nos pa cumpli cu e boluntad di Dios, i ta indicá e bendicionnan spiritual ricu cu esnan cu haci esei ta gosa di dje. E bendicionnan aki ta entre otro, un suministro abundante di alimento spiritual nutritivo, trabou recompensador i satisfaciente, i un bon relacion cu Dios i cu hende. Pues, laga nos refleccioná riba Proverbionan 10:1-14.

Un Excelente Incentivo

E palabranan di introduccion dje capítulo no ta laga duda ta ken ta e escritor dje siguiente seccion dje buki di Proverbionan. Nan ta bisa: “Proverbionan di Sálomon.” Mencionando un excelente incentivo pa haci lo corecto, rey Sálomon di antiguo Israel ta bisa: “Un yu sabí ta esun cu ta haci un tata alegrá, i un yu estúpido ta e tristesa di su mama.”—Proverbionan 10:1.

Esta un tristesa mayornan ta sinti ora un di nan yunan bandoná e adoracion dje Dios bibu i berdadero! E rey sabí ta resaltá e tristesa dje mama, podisé pa indicá cu e ta sufri mas cu e tata. Esaki realmente tabata asina den e caso di Doris. * E ta conta: “Ora nos yu homber di 21 aña a bandoná e berdad, esei a kibra mi curason i tambe di mi casá, Frank. Ami tabatin un dolor emocional mas intenso cu Frank. E 12 añanan cu a pasa no a cura e herida.”

Yunan por afectá e felicidad di nan tata i por duna nan mama dolor di curason. Laga nos demostrá sabiduria i haci nos mayornan contentu. I riba tur cos, laga nos alegrá e curason di nos Tata celestial, Jehova.

‘Alma dje Hustu Ta Ser Satisfacé’

“E tesoronan dje malbado lo no ta di ningun probecho,” segun e rey, “pero husticia ta loke lo libra for di morto.” (Proverbionan 10:2) E palabranan aki ta realmente precioso pa cristiannan berdadero cu ta bibando leu den e tempu di fin. (Daniel 12:4) Destruccion dje mundu malbado ta cerca. Lo no tin ningun medio humano di siguridad—sea ta material, financiero of militar—cu lo percurá proteccion durante e binidero “tribulacion grandi.” (Revelacion 7:9, 10, 13, 14) Solamente “e rectonan ta esnan cu lo biba riba tera, i esnan sin culpa ta esnan cu lo keda riba dje.” (Proverbionan 2:21) Pues, laga nos sigui ‘busca promé e reino i Dios Su husticia.’—Mateo 6:33.

Sirbidónan di Jehova no tin cu warda te den e mundu nobo pa ricibí Dios su bendicion. “Jehova lo no laga e alma di esun hustu padecé di hamber, pero lo e rechasá e deseo intenso dje malbadonan.” (Proverbionan 10:3) Jehova a percurá un abundancia di alimento spiritual mediante “e esclabo fiel i discreto.” (Mateo 24:45) E hustu sigur tin motibu pa “sclama di goso debí na e bon condicion di curason.” (Isaías 65:14) Conocimentu ta agradabel pa su alma. E gusta busca tesoro spiritual. E malbado no conocé e placernan ei.

 ‘Traha cu Diligencia Ta Haci un Persona Ricu’

E hustu ta ser bendicioná den un otro manera mas. “Esun cu ta traha cu un man floho lo ta di poco recurso, pero e man di esun diligente ta loke lo haci un persona ricu. E yu cu ta actua cu perspicacia ta recogé durante zomer; e yu cu ta actua bergonsoso ta den un soño profundo durante cosecha.”—Proverbionan 10:4, 5.

E palabranan dje rey ta significativo foral pa hende cu ta traha durante cosecha. E temporada di cosecha no ta tempu pa drumi. E ta un tempu pa traha te lat i cu diligencia. Definitivamente, ta un tempu di urgencia.

Teniendo na mente e cosecha di hende, no di grano, Jesus a bisa su disipelnan: “E cosecha ta grandi, pero e trahadónan ta poco. P’esei, roga e Doño dje cosecha [Jehova Dios] pa manda trahadó na su cosecha.” (Mateo 9:35-38) Na aña 2000, mas cu 14 miyon hende a asistí na e Memorial dje morto di Jesus, esei ta mas cu dos biaha e cantidad di Testigonan di Jehova. Pues ken anto por nenga cu ‘e cunucunan ta blancu pa cosechá’? (Juan 4:35) Adoradónan berdadero ta pidi e Doño pa manda mas trahadó miéntras nan mes tambe—na armonia cu nan oracion—ta haci esfuerso vigoroso den e trabou di haci disipel. (Mateo 28:19, 20) I Jehova a bendicioná nan esfuerso ricamente! Durante e aña di sirbishi 2000, mas cu 280.000 sirbidó nobo a bautisá. Nan tambe ta haci esfuerso pa bira maestro dje Palabra di Dios. Nos por experenciá goso i satisfaccion den e temporada di cosecha aki dor di tin un pleno participacion den e trabou di haci disipel.

‘Bendicion Ta pa Su Cabes’

Sálomon ta sigui bisa: “Bendicion ta pa cabes di esun hustu, pero en cuanto e boca di esnan malbado, e ta tapa violencia.”—Proverbionan 10:6.

Esun cu ta di curason puru i hustu ta duna hopi evidencia di su husticia. Su abla ta bondadoso i edificante, su accionnan ta positivo i generoso. Otro hende ta gusta su compania. Un persona asina ta gana nan aprecio—nan bendicion—den e sentido di cu nan ta papia bon di dje.

Di otro banda, un persona malbado ta yen di odio i malicia, i básicamente kier haci otro hende daño. Su abla kisas ta dushi i podisé ta “tapa violencia” cu tin scondí den su curason, pero cu tempu tog e ta recurí na atakenan físico of verbal. (Mateo 12:34, 35) Of tambe ta posibel cu “violensia ta tapa boka di e malbado.” (Proverbionan 10:6, Beibel Santu) Esaki ta indicá cu e persona malbado por lo general ta ricibí di otro hende loke e mes ta desplegá, esta, violencia. Esaki, na moda di papia, ta cera su boca i ta silenci’é. Ki bendicion un persona asina por spera cerca otro hende?

“E recuerdo dje hustu ta spera un bendicion,” e rey di Israel ta skirbi, “pero e nomber mes  dje malbadonan lo putri.” (Proverbionan 10:7) Hende, i mas importante ainda Jehova Dios, ta corda riba e hustu cu aprobacion. Jesus, dor di keda fiel te na morto, “a heredá un nomber mas excelente” cu esun dje angelnan. (Hebreonan 1:3, 4) Cristiannan berdadero djawe ta corda homber i muhernan precristian como ehempelnan digno di imitacion. (Hebreonan 12:1, 2) Esta un diferencia esaki ta cu e nomber dje malbadonan, nan nomber ta bira manera algu repugnante cu ta hole malu! Sí, “mester scoge un nomber mas bien cu rikesa abundante; fabor ta mihó cu asta plata i oro.” (Proverbionan 22:1) Laga nos traha un bon nomber cerca Jehova i nos próhimo.

‘Un Homber di Integridad Lo Cana den Siguridad’

Haciendo un contraste entre e persona sabí i esun bobo, Sálomon ta declará: “Esun sabí di curason lo aceptá mandamentu, pero esun bobo cu su lip, lo ser trapá.” (Proverbionan 10:8) Un persona sabí sa bon cu “no ta pertenecé na hende cu ta cana pa ni sikiera dirigí su paso.” (Jeremías 10:23) E ta reconocé cu e mester busca guia di Jehova i ta aceptá Dios su mandamentunan di buena gana. Di otro banda, esun bobo cu su lip, no ta comprendé e echo fundamental aki. Su papiamentu pa loco ta hib’é na ruina.

Un persona hustu ta disfrutá tambe di un clase di siguridad cu hende malbado no conocé. “Esun cu ta cana den integridad lo cana den siguridad, pero esun cu ta haci su camindanan trocí lo haci su mes conocí. Esun cu ta kinipí wowo lo causa dolor, i esun bobo cu su lip, lo ser trapá.”—Proverbionan 10:9, 10.

Un homber di integridad ta onesto den su tratonan. E ta gana e respet i confiansa di otro hende. Un persona onesto ta un empleado balioso i hopi bes e ta ser confiá cu mayor responsabilidad. Su reputacion di ta un persona onesto ta soru p’e keda cu su trabou asta ora trabou ta scars. Ademas, su onestidad ta contribuí na un ambiente agradabel i di pas na cas. (Salmo 34:13, 14) E ta sintié protehá den su relacion cu miembronan di su famia. Siguridad realmente ta un fruta di integridad.

E situacion ta distinto pa e persona cu ta cometé desonestidad p’e haña ganashi egoista. Un persona tramposo kisas ta purba sconde su falsedad tras di abla trocí of dor di haci señal cu su curpa. (Proverbionan 6:12-14) E ta kinipí wowo cu mal intencion of cu engaño i esei por causa su víctimanan hopi angustia mental. Pero tardi of trempan, ta sali na cla con tramposo e ta. Apostel Pablo a skirbi: “E picánan di algun hende ta ser manifestá públicamente, hibando directamente na huicio, pero en cuanto otro hende nan picánan tambe ta ser manifestá mas despues. Di igual manera tambe e obranan excelente ta ser manifestá públicamente i esnan cu ta otro, no por keda scondí.” (1 Timoteo 5:24, 25) Sin importá ta ken—sea ta un mayor, un amigu, un casá of un conocí—desonestidad cu tempu ta sali na cla. Ken por confia un hende cu tin e reputacion di ta un persona desonesto?

‘Su Boca Ta un Fuente di Bida’

“Boca dje hustu ta un fuente di bida,” segun Sálomon, “pero pa loke ta boca  dje malbadonan, e ta tapa violencia.” (Proverbionan 10:11) Palabra cu ta sali for di boca por cura of heridá. Nan por refrescá i animá un persona, of nan por kibr’é.

Identificando e motivacion tras di palabranan papiá, e rey di Israel ta declará: “Odio ta loke ta instigá pleitu, pero amor ta tapa asta tur delitu.” (Proverbionan 10:12) Odio ta producí pleitu den sociedad humano, e ta instigá conflicto. Esnan cu ta stima Jehova tin cu eradicá odio for di nan bida. Con? Dor di remplas’é cu amor. “Amor ta tapa un multitud di picá.” (1 Pedro 4:8) Amor “ta soportá tur cos,” es decir “tur kos e ta tapa.” (1 Corintionan 13:7, Beibel Santu) Amor cu ta bini di Dios no ta verwagt perfeccion for di hende imperfecto. En bes cana papia di e foutnan di otro hende, tal amor ta yuda nos pasa nan eror por haltu, a ménos cu esei ta encerá malecho serio. Amor ta asta soportá maltrato den e ministerio di veld, na nos empleo of na scol.

E rey sabí ta sigui bisa: “Riba lip di e persona cu comprendimentu bo ta haña sabiduria, pero bara ta pa lomba di esun cu falta curason.” (Proverbionan 10:13) E sabiduria dje persona cu comprendimentu ta guia su pasonan. Palabranan edificante for di su lip ta yuda otro hende cana den e caminda di husticia. No mester usa e bara di castigu pa forsa ni e ni esnan cu ta scuch’é, pa nan cana den e caminda corecto.

“Warda Conocimentu Manera un Tesoro”

Kico por yuda nos palabranan ser ‘un riu cu ta brota sabiduria’ en bes di un rooi di palabranan insignificante? (Proverbionan 18:4) Sálomon ta contestá: “Esnan sabí ta esnan cu ta warda conocimentu manera un tesoro, pero e boca dje bobo ta cerca di ruina.”—Proverbionan 10:14.

E promé rekisito ta cu nos mente mester ser yená cu e conocimentu edificante di Dios. Tin un solo fuente dje conocimentu ei. Apostel Pablo a skirbi: “Tur Scritura ta inspirá di Dios i probechoso pa siña, pa reprendé, pa rectificá cosnan, pa disipliná den husticia, p’e hende di Dios por ta plenamente competente, completamente ekipá pa tur bon obra.” (2 Timoteo 3:16, 17) Nos tin cu warda conocimentu manera un tesoro, i coba den e Palabra di Dios como si fuera nos ta buscando un tesoro scondí. Ki un búskeda excitante i recompensador esei ta!

Pa hende por haña sabiduria riba nos lip, e conocimentu dje Scritura mester yega te den nos curason. Jesus a bisa su oyentenan: “Un bon hende ta producí loke ta bon for dje bon tesoro di su curason, pero un mal hende ta producí loke ta malu for di su mal tesoro; pasobra for di abundancia di curason su boca ta papia.” (Lucas 6:45) P’esei, nos mester tin e custumber di meditá riba loke nos ta siña. Ta berdad cu nos mester haci esfuerso pa studia i meditá, pero tal studio ta enrikesé nos spiritualmente! No tin motibu pa niun hende sigui e rumbo ruinoso di e persona cu ta djis papia pa loco.

Sí, un persona sabí ta haci loke ta corecto den bista di Dios i tin un bon influencia riba otro hende. E ta disfrutá di un abundancia di alimento spiritual i e tin hopi di haci den e trabou recompensador di Señor. (1 Corintionan 15:58) Siendo un homber di integridad, e ta cana den siguridad i tin e aprobacion di Dios. Sí, e hustu tin hopi bendicion. Laga nos sigui busca husticia dor di hiba nos bida na armonia cu Dios su norma di loke ta bon i loke ta malu.

[Nota]

[Plachi na página 25]

Onestidad ta contribuí na un bida di famia felis

[Plachi na página 26]

‘Esnan sabí ta warda conocimentu manera un tesoro’