Bo Ta Realmente Tolerante?

BO A yega di sinti bo sumamente indigná debí na e mal comportacion di un persona? Bo ta actua unbes ora influencianan corupto ta afectá bo compañeronan íntimo seriamente?

Tin biaha accion rápido i firme ta necesario pa stop picá serio di plama. Por ehempel, ora cu malecho escandaloso a menasá di contaminá e israelitanan den siglo 15 P.E.C., Fínehas, nietu di Aron, a tuma accion decisivo pa eliminá loke tabata malu. Jehova Dios a aprobá loke el a haci, bisando: “Fínehas, . . . a bira mi rabia for di riba e yunan di Israel dor cu e no a tolerá ningun rivalidad pa cu mi meimei di nan.”—Númeronan 25:1-11.

Fínehas a tuma accion apropiado pa stop e contaminacion di plama. Pero ke tal di indignacion descontrolá pa e simpel fayonan humano di otro hende? Si nos mester actua descabeyá of sin un motibu válido, nos lo no ta un defensor di husticia sino mas bien un persona intolerante, un persona cu no ta tene cuenta cu imperfeccion di otro hende. Kico por yuda nos evitá e trampa aki?

‘Jehova Ta Pordoná Tur Bo Erornan’

Jehova ta “un Dios yalurs (celoso); un Dios cu no ta tolerá rivalidad.” (Éxodo 20:5, nota na pia di página) Siendo e Creador, e tin derecho di exigí nos debocion exclusivo. (Revelacion 4:11) No obstante, Jehova ta tolerá debilidad humano. P’esei e salmista David a canta relacioná cuné: “Jehova ta misericordioso i compasivo, ta tarda pa rabia i abundante den bondad amoroso. Lo e no sigui señalá falta pa semper . . . E no a haci cu nos ni conforme cu nos picánan; ni conforme cu nos erornan e no a trece riba nos loke nos merecé.” Sí, si nos repentí, Dios ‘ta pordoná tur nos eror.’—Salmo 103:3, 8-10.

Debí cu Jehova ta comprendé e naturalesa pecaminoso di hende, e no ta “sigui señalá falta” cerca malechornan cu repentí. (Salmo 51:5; Romanonan 5:12) De echo, su propósito ta pa eliminá picá i imperfeccion. Tanten cu esei no ser efectuá completamente, Dios compasivamente ta extendé pordon a base di Jesucristo su sacrificio di rescate, en bes di trece riba nos “loke nos merecé.” Si Jehova no mustra misericordia ora ta apropiado, ningun di nos lo ser husgá digno di sobrebibí. (Salmo 130:3) Esta gradicidu nos por ta cu nos Tata celestial, cu tin derecho di exigí debocion exclusivo, ta un Dios misericordioso!

Balansa Ta Necesario

Ya cu e Señor Soberano di universo mes ta desplegá tolerancia den su trato cu hende imperfecto, nos tambe no mester haci mescos? Tolerancia a ser definí como e disposicion di tene pacenshi cu e opinion of prácticanan di otro hende. Nos personalmente tin tal disposicion, esta, ta incliná na tene pacenshi i soportá ora otro hende ta bisa of haci cosnan cu no ta escandalosamente pecaminoso, pero cu kisas ta inapropiado?

Claro cu nos tin cu evitá di ser demasiado tolerante. Por ehempel, ora autoridadnan religioso ta tolerá pastornan abusador cu persistentemente ta abusá di mucha sexualmente, esei ta causa daño teribel. Un reportero na Irlanda a comentá: “Considerando loke a pasa cu e muchanan como djis incidentenan di picá, autoridadnan di iglesia simplemente a transferí e pastor criminal [pa un otro sitio].”

 Djis transferí un homber asina ta un bon ehempel di tolerancia? Sigur cu no! Suponé cu un cuerpo médico a permití un ciruhano iresponsabel sigui operá, i ta traslad’é di un hospital pa otro, maske e tabata mata of manca su pashentnan. Un sentido ekibocá di lealtad profesional lo por producí tal “tolerancia.” Pero ke tal dje víctimanan cu a perde nan bida of cu a ser afectá debí na prácticanan negligente of asta criminal?

Tambe ta existí e peliger di mustra muchu tiki tolerancia. Tempu Jesus tabata riba tera tabatin algun hudiu conocí como zelote (fanático), cu ekibocadamente a purba usa e ehempel di Fínehas den un intento pa hustificá nan propio actividadnan. Un accion extremo di cierto zelotenan tabata di “mescla entre multitudnan den Jerusalem durante fiestanan i ocasionnan similar anto di ripiente hinca hende cu nan no tabata gusta cu cuchú.”

Como cristian, nunca nos lo bai asina leu i físicamente atacá hende cu nos no ta gusta, manera e zelotenan a haci. Pero acaso un cierto grado di intolerancia ta pone nos usa otro maneranan pa atacá hende cu nos no ta gusta, kisas dor di papia malu di nan? Si di berdad nos ta tolerante, nos lo no usa tal abla perhudicial.

E fariseonan di promé siglo tabata un otro grupo intolerante. Constant nan tabata condená otro hende i no a tene cuenta cu imperfeccion humano. E fariseonan orguyoso a despreciá e pueblo comun, i a yama nan “hende maldicioná.” (Juan 7:49) Cu bon motibu Jesus a denunciá e hombernan ei, hustu den nan propio bista, bisando: “Ai di boso, escriba i fariseonan, hipócritanan! pasobra boso ta duna e décimo dje yerba buena i dje eneldo i dje comino, pero boso a pasa por haltu dje asuntunan di mas peso dje Ley, esta, husticia i misericordia i fieldad. Ta esaki ta e cosnan cu tabata obligatorio pa haci, tog sin pasa por haltu dje otro cosnan.”—Mateo 23:23.

Ora Jesus a declará esaki, e no tabata minimisá e importancia di warda e Ley di Moises. Simplemente, el a mustra cu tabata necesario aplicá e cosnan “di mas peso,” esta e aspectonan mas importante dje Ley, cu razonabilidad i misericordia. Jesus i su disipelnan a destacá hopi for dje fariseo i zelotenan intolerante.

Jehova Dios ni Jesucristo no ta pasa por haltu di maldad. Pronto, nan lo “trece vengansa riba esnan cu no conocé Dios i esnan cu no ta obedecé e bon nobo.” (2 Tesalonicensenan 1:6-10) Pero den su celo pa husticia, Jesus nunca ta keda sin reflehá e pacenshi, misericordia i interes amoroso di su Tata celestial pa tur cu kier haci loke ta corecto. (Isaías 42:1-3; Mateo 11:28-30; 12:18-21) Esta un ehempel excelente Jesus a pone pa nos!

Soportá Otro cu Pacenshi

Aunke kisas nos tin gran celo pa loke ta recto, laga nos aplicá e conseho aki di apostel Pablo: “Sigui soportá otro i pordoná otro libremente si un hende tin un motibu pa keha contra otro. Mescos cu Jehova a pordoná boso libremente, asina boso tambe haci mescos.” (Colosensenan 3:13; Mateo 6:14, 15) Tolerancia ta rekerí pa nos soportá falta i erornan di otro den e mundu imperfecto aki. Nos mester ta razonabel den loke nos ta verwagt di otro hende.—Filipensenan 4:5.

Ser tolerante di ningun manera ta implicá aprobá malecho of ser ciegu pa eror. Podisé un aspecto dje forma di pensa of conducta di un compañero di creencia no ta completamente na armonia cu e normanan di Jehova. Aunke e desviacion kisas ainda no ta asina serio pa pone Dios rechas’é, e por ta un señal di alarma cu ta indicá cu mester haci algun ahuste. (Génesis 4:6, 7) Esta un muestra  di amor ora esnan cu tin cualidadnan spiritual ta purba reahustá esun cu a faya, cu un spiritu di suavedad! (Galationan 6:1) Pero pa por tin éxito den esaki, ta necesario pa nos motivacion ta interes den e persona i no un spiritu crítico.

“Cu un Genio Suave i Respet Profundo”

Ke tal di tene pacenshi cu hende cu tin un punto di bista religioso distinto for di esun di nos? Un “Les General” cu nan a pega na tur Scol Nacional establecé na Irlanda na aña 1831 a bisa: “Jesucristo su intencion no tabata pa hende forsa su religion riba otronan usando medionan violento. . . . Pleita cu nos próhimo i insultá nan no ta e manera pa convencé nan cu nos tin rason i cu nan ta robes. Ta mas probabel cu esei lo convencé nan cu nos no tin un spiritu cristian.”

Jesus a instruí i actua den un manera cu a atraé hende na e Palabra di Dios, i asina nos tambe mester haci. (Marco 6:34; Lucas 4:22, 32; 1 Pedro 2:21) Como un hende perfecto cu tabatin un perspicacia special cu Dios a dun’é, e por a lesa curason. P’esei ora tabata necesario, Jesus por a usa palabranan skerpi pa denunciá e enemigunan di Jehova. (Mateo 23:13-33) Esaki no a reflehá intolerancia di su parti.

Pero distinto for di Jesus, nos no tin e abilidad di lesa curason. P’esei nos tin cu sigui e conseho di apostel Pedro: “Santificá Cristo como Señor den boso curason, semper cla pa presentá un defensa dilanti tur hende cu ta exigí di boso un motibu p’e speransa den boso, pero haci esei huntu cu un genio suave i respet profundo.” (1 Pedro 3:15) Como sirbidó di Jehova, nos mester defendé loke nos ta kere pasobra e ta basá firmemente riba e Palabra di Dios. Pero nos tin cu haci esaki den un manera cu ta demostrá respet pa otro hende i pa loke nan sinceramente ta kere aden. Pablo a skirbi: “Laga boso expresion semper sea cu gracia, sasoná cu salu, pa boso por sa con boso mester duna un contesta na cada un.”—Colosensenan 4:6.

Den su famoso Sermon Riba Ceru, Jesus a bisa: “Tur loke boso kier pa hende haci na boso, boso tambe di igual manera tin cu haci na nan.” (Mateo 7:12) Pues anto, laga nos soportá otro cu pacenshi i mustra respet na esnan na ken nos ta predicá e bon nobo. Dor di balansá nos celo pa husticia cu tolerancia basá riba Bijbel, nos lo agradá Jehova i nos lo ta realmente tolerante.

[Plachi na página 23]

Evitá e actitud intolerante dje fariseonan

[Plachi na página 23]

Jesus a reflehá e spiritu tolerante di su Tata. Abo tambe?