Bo Tin un Spiritu Inmortal?

“TUR Scritura ta inspirá di Dios i probechoso pa siña, pa reprendé, pa rectificá cosnan, pa disipliná den husticia,” segun apostel Pablo. (2 Timoteo 3:16) Sí, Bijbel ta un buki cu ta contené e berdad cu ta bini for dje Dios berdadero, Jehova.—Salmo 83:18.

Siendo cu Jehova ta e Creador di tur cos, i tambe di hende, e sa bon-bon kico ta sosodé cu nos ora nos muri. (Hebreonan 3:4; Revelacion 4:11) I den su Palabra inspirá, Bijbel, el a duna contesta verídico i satisfaciente riba preguntanan tocante bida despues di morto.

Kico Ta e Spiritu?

Den Bijbel, e palabranan traducí como “spiritu” básicamente ta nificá “rosea.” Pero esaki ta encerá hopi mas cu e halamentu di rosea. Por ehempel, un dje escritornan di Bijbel, Santiago, ta declará: “Curpa sin spiritu ta morto.” (Santiago 2:26) P’esei, e spiritu ta loke ta duna bida n’e curpa.

E forsa di bida aki no por ta simplemente e rosea, of aire, cu ta pasa dor di nos pulmonnan. Pakico no? Pasobra despues cu e curpa stop di hala rosea, ta keda bida den e celnan di curpa pa un ratu—“pa vários minuut,” segun The World Book Encyclopedia. P’e motibu aki esfuersonan pa reanimá e curpa por duna resultado. Pero una bes e forsa di bida invisibel caba na nada den cel di curpa, tur esfuerso pa restorá bida ta en bano. No tin rosea, of aire, na mundu cu por rebibá ni sikiera un cel. Pues anto, e spiritu ta e forsa di bida invisibel—e chispa di bida cu ta tene e celnan i e persona na bida. Halamentu di rosea ta sostené e forsa di bida aki.—Job 34:14, 15.

Ta den hende so e spiritu ei ta activo? Bijbel ta yuda nos yega na un conclusion corecto den e asuntu aki. Rey sabí Sálomon a reconocé cu hende i bestia “tur tin un solo spiritu,” i el a puntra: “Ken sa si e spiritu dje yunan di humanidad ta subi bai ariba; i si e spiritu di bestia ta baha bai abou na tera?” (Eclesiástes 3:19-21) Pues, Bijbel ta mustra cu tantu hende como bestia tin un spiritu. Con por ta?

 Bo por compará e spiritu, of forsa di bida, cu e coriente eléctrico cu ta pasa dor di un mashin of un aparato. E electricidad invisibel por efectuá vários funcion, dependiendo dje tipo di aparato cu e ta duna coriente. Por ehempel, e por pone un stoof eléctrico generá cayente, un computer procesá informacion i un television producí imágen i zonido. Pero nunca e coriente mes no ta haci e trabou dje aparato cu e ta activá. E ta keda un simpel forsa. Di manera similar, e forsa di bida no ta asumí ningun dje característicanan dje criaturanan cu e ta duna bida. E no tin personalidad ni abilidad di pensa. Hende i bestia “tin un solo spiritu.” (Eclesiástes 3:19) P’esei, ora un persona muri, su spiritu no ta sigui existí den un otro region como criatura spiritual.

Kico anto, ta e condicion dje mortonan? I kico ta sosodé cu e spiritu ora e persona muri?

“Na Stof Lo Bo Bolbe”

Ora e promé homber, Adam, a desobedecé e mandamentu di Dios deliberadamente, Dios a bis’é: “Cu sodó di bo cara lo bo come pan te ora bo bolbe na suela, pasobra bo a ser tumá for di dje. Pasobra stof bo ta i na stof lo bo bolbe.” (Génesis 3:19) Unda Adam tabata promé cu Jehova a cre’é for di stof? Wel, e no tabata ningun caminda! Simplemente e no a existí. Pues ora Jehova Dios a bisa cu Adam lo “bolbe na suela,” e tabata kier men cu Adam lo muri i regresá n’e elementonan den tera. Adam lo no a pasa pa e region di spiritu. Ora Adam a muri lo el a bolbe stop di existí. Su castigu tabata morto—ausencia di bida—no un transferencia pa un otro region.—Romanonan 6:23.

Kico di otro hende cu a muri? Eclesiástes 9:5 i 10 ta splica claramente kico ta e condicion dje mortonan. Ei nos ta lesa: “Mortonan no sa nada mas . . . Den e graf kaminda bo ta bai no tin trahamentu, ni planiamentu, ni konosementu, ni sabiduria.” (Beibel na papiamentu koriente) P’esei, morto ta un condicion di inexistencia. E salmista a skirbi cu ora un persona muri, “su spiritu ta sali, e ta bolbe na su suela; den e dia ei su pensamentunan en berdad ta perecé.”—Salmo 146:4.

Ta claro anto cu hende morto ta stop di existí. Nan no por sa nada. Nan no por mira bo, tende bo ni papia cu bo. Nan no por yuda bo ni haci bo daño. Sigur bo no tin nodi tene miedu dje mortonan. Pero den ki sentido e spiritu ta “sali” for di un persona ora e muri?

E Spiritu “Ta Bolbe na e Dios Berdadero”

Bijbel ta bisa cu ora un persona muri, “e spiritu mes ta bolbe na e Dios berdadero cu  a dun’é.” (Eclesiástes 12:7) Esaki ta nificá cu un spiritu ta sali for dje curpa i biaha literalmente dor di espacio bai den e presencia di Dios? No! E manera den cua Bijbel ta usa e palabra “bolbe” no ta nificá necesariamente cu un cos ta ègt move di un lugá pa otro. Por ehempel, Malakías a bisa e israelitanan infiel: “‘Bolbe na mi, i ami lo bolbe na boso,’ Jehova di ehércitonan a bisa.” (Malakías 3:7) Israel su ‘bolbementu’ na Jehova a nificá bira for di un curso incorecto i biba atrobe na armonia cu Dios su caminda hustu. I Jehova a “bolbe” na Israel den sentido cu atrobe el a dirigí su atencion faborabel na su pueblo. Den ámbos caso e ‘bolbementu’ a encerá un actitud, no literalmente move di un sitio geográfico pa otro.

Mescos tambe, e spiritu no ta “bolbe” na Dios den e sentido cu ora e persona muri algu ta sali for di tera bai n’e region celestial. Una bes cu e forsa di bida bandoná un persona, ta Dios so tin e abilidad di restorá esei na dje. Pues e spiritu “ta bolbe n’e Dios berdadero” den e sentido cu cualkier speransa pa un futuro bida p’e persona ei awor ta completamente den man di Dios.

Tuma por ehempel, loke e Scritura ta bisa tocante e morto di Jesucristo. Lucas, un dje escritornan di Evangelio ta conta: “Jesus a sclama cu bos fuerte i a bisa: ‘Tata, den bo man mi ta confia mi spiritu.’ Ora el a bisa esei, el a muri.” (Lucas 23:46) Ora e spiritu di Jesus a sali for di dje, e no a bai shelu literalmente. Ta te n’e di tres dia Jesus a ser resucitá for di morto, i ta 40 dia despues el a subi na shelu. (Echonan 1:3, 9) Sin embargo, ora Jesus a muri, el a laga su spiritu den man di su Tata, cu e pleno confiansa cu Jehova por trec’é bek na bida.

Sí, Dios por trece un persona bek na bida. (Salmo 104:30) Ki un prospecto magnífico esei ta habri nos dilanti!

Un Speransa Sigur

Bijbel ta bisa: “E ora ta bini den cua tur esnan cu ta den grafnan conmemorativo lo tende [Jesus] su bos i lo sali.” (Juan 5:28, 29) Sí, Jesucristo a primintí cu tur esnan cu ta den memoria di Jehova lo ser resucitá, of trecé bek na bida. Entre nan lo tin indudablemente esnan cu a sigui un curso di bida hustu como sirbidó di Jehova. Pero miyones di otro hende a muri sin demostrá si nan lo a cumpli cu e normanan hustu di Dios. Sea nan no tabata sa dje rekisitonan di Jehova of nan no a haña suficiente tempu pa haci e cambionan necesario. E tipo di personanan aki tambe ta den e memoria di Dios i lo ser resucitá, pasobra Bijbel ta bisa: “Lo bai tin un resureccion di tantu e hustunan como e inhustunan.”—Echonan 24:15.

Awe, mundu ta yen di odio i conflicto, violencia i dramamentu di sanger, polucion i enfermedad. Si e mortonan mester bini bek den un mundu asina, sigur e felicidad cu esei por trece lo no dura mashá. Pero e Creador a primintí cu pronto lo e trece un fin na mundu su sociedad actual cu ta bou di dominio di Satanas e Diabel. (Proverbionan 2:21, 22; Daniel 2:44; 1 Juan 5:19) N’e tempu ei, un sociedad humano hustu—“un tera nobo”—lo ta un realidad maraviyoso.—2 Pedro 3:13.

N’e tempu ei “ningun residente lo bisa: ‘Mi ta malu.’” (Isaías 33:24) Asta e angustia di morto lo ser eliminá, pasobra Dios lo “seca tur lágrima di nan wowo, i lo no tin morto mas, ni lo no tin lamento ni sclamacion ni dolor mas. E cosnan anterior a pasa bai.” (Revelacion 21:4) Ki un gran prospecto esaki ta pa esnan cu ta “den grafnan conmemorativo”!

Ora Jehova eliminá maldad for di riba tera, lo e no destruí e hustunan huntu cu e malbadonan. (Salmo 37:10, 11; 145:10) De facto, “un multitud grandi” di hende “for di tur nacion i tribu i pueblo i lenga” lo sobrebibí e  “tribulacion grandi,” cu ta bai destruí e mundu malbado djawe. (Revelacion 7:9-14) P’esei, lo tin un multitud grandi riba tera pa ricibí e mortonan bek.

Abo ta anhelá pa mira bo sernan kerí atrobe? Bo kier biba pa semper den Paradijs riba tera? Anto bo tin cu gana conocimentu exacto dje boluntad i propósito di Dios. (Juan 17:3) Ta Jehova su boluntad pa “tur clase di hende ser salbá i yega na un conocimentu exacto dje berdad.”—1 Timoteo 2:3, 4.

[Plachi na página 4]

“Stof bo ta i na stof lo bo bolbe”

[Plachi na página 5]

Por compará e spiritu cu electricidad

[Plachi na página 7]

E resureccion lo trece goso duradero