“Di Berdad Dios Ta Condená Hende pa Kima den Fiernu?”

“Boso ta tumando les di teologia?”

E pregunta aki a sorprendé Joel cu Carl. E dos yoncumannan aki, cu ta traha como boluntario na e sede di Testigonan di Jehova na Brooklyn, New York, tabata wak buki den un libreria den cercania. Miéntras Joel a examiná concordancianan bíblico, Carl tabata cont’é di un bon combersacion cu e tabatin den e ministerio. Un homber pará eibanda a tende parti dje combersacion i esei a impuls’é pa acercá nan.

Sin embargo, e homber tabatin un preocupacion mas personal cu djis sa si e dos yoncumannan tabata tumando les di teologia. El a splica: “Mi ta hudiu, i algun di mi amigunan cristian a bisa mi cu lo mi bai kima den fiernu pasobra e hudiunan a rechasá Jesus. Esaki ta molestiá mi hopi. Un castigu asina for di un Dios di amor no ta parce mi hustu. Di berdad Dios ta condená hende pa kima den fiernu?”

Joel cu Carl a bisa e homber sincero aki cu nan tabata studiantenan serio di Bijbel. Nan a mustr’é for dje Scritura cu hende morto ta inconciente i ta gewoon na soño den morto sperando un resureccion. Pues, nan no ta ser tormentá ni ta kima den un fiernu di candela. (Salmo 146:3, 4; Eclesiástes 9:5, 10; Daniel 12:13; Juan 11:11-14, 23-26) Ora nan a caba di combersá pa 45 minuut, e homber a duna Joel cu Carl su adres i a pidi mas informacion riba e tema.

Si fiernu ta un lugá di tormento den candela, un hende lo pidi pa mand’é einan? Sin embargo, patriarca Job kende kier a scapa di su situacion penoso, a haci e peticion aki: “Ken lo otorgá mi esaki, cu bo por protehá mi den fiernu, i sconde mi te ora cu bo rabia pasa?” (Job 14:13; Douay Version) Ta bisto cu Job no a kere cu fiernu ta un lugá di tormento. Mas bien, el a purba haña proteccion einan. Morto ta un condicion di inexistencia, i e fiernu cu Bijbel ta papia di dje ta e graf comun di humanidad.

Si bo kier mas informacion tocante kico ta pasa cu nos ora nos muri i ki speransa por tin despues di esei, nos ta invitá bo calurosamente pa reaccioná riba e siguiente oferta.