Sea Cosechadónan Gososo!

“E cosecha ta grandi, pero e trahadónan ta poco. P’esei, roga e Doño dje cosecha pa manda trahadó na su cosecha.”—MATEO 9:37, 38.

1. Kico ta yuda nos sigui padilanti den haci e boluntad di Dios?

ORA nos corda riba e dia cu nos a bautisá como un sirbidó di Jehova, sea cu esei tabata un par di aña pasá of hopi aña pasá, ta parce manera ta ayera. Alabá Jehova a bira e punto focal di nos bida dedicá. Segun cu nos a cumpra e tempu oportuno pa yuda otro hende tende i posiblemente aceptá e mensahe di Reino, sirbishi gososo na Jehova tabata nos interes principal. (Efesionan 5:15, 16) Te ainda nos ta haña cu tempu ta bula ora nos ta druk cu “hopi di haci den e trabou di Señor.” (1 Corintionan 15:58) Aunke nos ta haña nos cu problema, nos goso den haci e boluntad di Jehova ta animá nos pa sigui dal bai.—Nehemías 8:10.

2. Kico ta contribuí n’e goso cu nos ta haña den e trabou di cosecha figurativo?

² Como cristian, nos ta participando den un trabou di cosecha figurativo. Jesucristo a compará e recogementu di hende individual pa bida eterno cu un cosecha. (Juan 4:35-38) Siendo cu nos ta participando den un trabou asina, lo ta un animacion pa analisá e goso cu e cosechadónan cristian den promé siglo tabatin. Nos lo repasá tres factor cu ta contribuí n’e goso cu nos ta haña den e trabou di cosecha djawe. Nan ta (1) nos mensahe di speransa, (2) e éxito di nos búskeda i (3) nos actitud di promové pas como cosechadó.

Mandá Como Cosechadó

3. Den ki sentido Jesus su siguidónan di promé siglo a haña goso?

³ Ora e promé cosechadónan—specialmente e 11 fiel apostelnan di Jesus—a subi un ceru na Galilea pa topa e Cristo resucitá na aña 33 E.C., esei a producí un cambio grandi den nan bida. (Mateo 28:16) Probablemente tabatin “mas cu cincushen ruman” n’e ocasion ei. (1 Corintionan 15:6) E comision cu Jesus a duna nan a keda resoná den nan orea. El a bisa nan: “Bai . . . i haci disipel di hende di tur nacion, bautisando nan den e nomber dje Tata i dje Yu i dje spiritu santu, siñando nan pa warda tur loke mi a manda boso.” (Mateo 28:19, 20) Apesar di persecucion amargo, nan a haña hopi goso den e trabou di cosecha segun cu nan a mira con congregacionnan di siguidónan di Cristo tabata lanta den un lugá tras di otro. Cu tempu, ‘e bon nobo a ser predicá den tur creacion bou di shelu.’—Colosensenan 1:23; Echonan 1:8; 16:5.

4. Bou di ki circunstancia Cristo a manda su disipelnan como cosechadó?

⁴ Un poco mas promé den Jesus su ministerio na Galilea, el a reuní e 12 apostelnan i a manda nan specialmente pa declará: “E reino  di shelu a yega cerca.” (Mateo 10:1-7) E mes a “haci un gira den tur e stad i pueblonan [di Galilea], siñando den nan snoanan i predicando e bon nobo di reino i curando tur sorto di malesa i tur sorto di enfermedad.” Jesus a sinti duele dje multitudnan “pasobra nan tabata soyá i plamá manera carné sin wardadó.” (Mateo 9:35, 36) Profundamente conmoví, el a bisa su disipelnan e ora ei: “Sí, e cosecha ta grandi, pero e trahadónan ta poco. P’esei, roga e Doño dje cosecha [Jehova Dios] pa manda trahadó na su cosecha.” (Mateo 9:37, 38) Ora tabata falta apénas seis luna pa Jesus su ministerio terenal terminá, el a calculá cu na Hudea tambe tabatin mester di hopi cosechadó. (Lucas 10:2) Na ámbos ocasion, el a manda su siguidónan como cosechadó.—Mateo 10:5; Lucas 10:3.

Nos Mensahe di Speransa

5. Ki clase di mensahe nos ta declará?

⁵ Como Jehova su sirbidónan dje tempu actual, nos ta respondé gososamente n’e yamada pa mas cosechadó. Un factor cu ta contribuí hopi na nos goso ta cu nos ta hiba un mensahe di speransa na esnan abatí i deprimí. Mescos cu Jesus su disipelnan di promé siglo, nos tin e privilegio grandi di declará e bon nobo—un berdadero mensahe di speransa—na esnan “soyá i plamá manera carné sin wardadó”!

6. Den ki actividad e apostelnan a participá den promé siglo?

⁶ Pa rond di añanan ’50 di promé siglo, apostel Pablo tabata hopi activo declarando e bon nobo. I sigur su trabou di cosecha tabata eficas, pasobra ora el a skirbi e cristiannan na Corinto rond di 55 E.C., el a bisa: “Mi ta duna boso di conocé, rumannan, e bon nobo cu mi a declará na boso, cu boso tambe a ricibí, den cua boso tambe ta firme.” (1 Corintionan 15:1) E apostelnan i otro cristiannan di promé siglo tabata cosechadónan diligente. Aunke Bijbel no ta bisa nos cuantu apostel a sobrebibí e sucesonan importante cu a culminá den e destruccion di Jerusalem na aña 70 E.C., nos sa sí cu ainda apostel Juan tabata predicá un 25 aña despues.—Revelacion 1:9.

7, 8. Ki mensahe di speransa Jehova su sirbidónan ta declarando cu mas urgencia cu nunca promé?

⁷ Despues a sigui siglonan durante cua clero di cristiandad, esta, e “homber [apóstata] di maldad,” a dominá. (2 Tesalonicensenan 2:3) Sin embargo, pa fin di siglo 19, esnan cu a haci esfuerso pa armonisá nan bida cu e siñansanan di cristianismo original, a cuminsá proclamá e Reino i asina a sigui cu e mensahe di speransa. De facto, for di su promé edicion (juli 1879), e título dje revista aki tabatin e palabranan “Anunciante dje Presencia di Cristo,” “Anunciante dje Reino di Cristo” of “Anunciando e Reino di Jehova Dios.”

⁸ Jehova a establecé su Reino celestial den man di Jesucristo na 1914, i awor nos ta proclamando e mensahe di speransa cu mas urgencia cu nunca promé. Pakico? Pasobra un dje bendicionnan cu e gobernacion di Reino lo trece ta e inminente fin dje mal sistema actual. (Daniel 2:44) Por tin un mihó mensahe? I nos por tin un goso mas grandi cu participá den e trabou di anunciá e Reino promé cu e “tribulacion grandi” dal aden?—Mateo 24:21; Marco 13:10.

Un Búskeda Exitoso

9. Ki instruccion Jesus a duna su disipelnan, i con hende a reaccioná riba e mensahe di Reino?

⁹ Un otro factor cu ta contribuí na nos goso como cosechadó ta e éxito den nos trabou di busca esnan cu ta bira disipel i djoin nos den e trabou di cosecha. Aya den e añanan 31 pa 32 E.C., Jesus a instruí su disipelnan: “Den cualkier stad of pueblo cu boso drenta, busca te ora boso haña ken den dje ta merecedor.” (Mateo 10:11) No ta tur hende tabata merecedor, manera a keda demostrá na nan reaccion riba e mensahe di Reino. Tog, Jesus su disipelnan a predicá e bon nobo celosamente unda cu nan por a haña hende.

10. Con Pablo a dedicá su mes na busca esnan merecedor?

 ¹⁰ Despues di Jesus su morto i resureccion, e buscamentu di esnan merecedor a sigui cu vigor. Pablo a razoná cu e hudiunan den nan snoa i cu hende cu tabata presente den e plasa na Aténas. Ora el a duna un testimonio riba e ceru Areópago den e stad griego ei, “algun homber a uni nan mes cuné i a bira creyente, entre ken tabatin tambe Dionisio, hues dje tribunal di Areópago, i un muher yamá Dámaris, i otronan ademas di nan.” Unda cu Pablo a bai, e tabata ehemplar tambe den predicá “públicamente i di cas pa cas.”—Echonan 17:17, 34; 20:20.

11. Ki métodonan pa efectuá e ministerio e rumannan tabata aplicá hopi aña pasá?

¹¹ Durante e último décadanan di siglo 19, cristiannan ungí a participá cu curashi den e trabou di busca esnan merecedor. Den un artículo titulá “Ungí pa Predicá,” Zion’s Watch Tower di juli/augustus 1881 a bisa: “E predicacion dje bon nobo . . . ta bayendo cerca ‘e mansunan’—esnan cu kier i por tende, afin di forma for di entre nan e curpa di Cristo, e co-herederonan.” Hopi bes Dios su cosechadónan tabata topa hende ora esakinan tabata sali for di misa i a duna nan tratado cu ta contené mensahenan bíblico pa stimulá un reaccion faborabel den esnan merecedor. Despues di a reevaluá e eficacia dje método aki di duna testimonio, e Toren di Vigilancia [na ingles] di 15 di mei 1903, a urgi cosechadónan pa repartí e tratadonan “di cas pa cas, riba diadomingo mainta.”

12. Den ki manera nos a aumentá e eficacia di nos trabou di predicá? Ilustrá esei.

¹² Den añanan recien, nos a expandé nos ministerio dor di busca contacto cu hende na otro lugánan cu no ta nan cas. Esaki a resultá di ta masha eficas den paisnan caminda condicionnan económico i e buscamentu di recreo ta pone cu hende no sa ta na cas ora nos tin custumber di pasa. Na Inglatera, ora un Testigo i su compañero a ripará cu regularmente bishitantenan ta bai cas cu bus despues di a pasa dia cant’i laman, nan a tuma un curashi pa subi e busnan i presentá ehemplar di E Toren di Vigilancia i Spierta! n’e pasaheronan. Den un solo luna, nan a repartí 229 ehemplar. Nan ta informá: “Nos no tin miedu di duna testimonio cant’i laman, den teritorio di negoshi ni di ningun otro dificultad cu nos por haña nos confrontá cuné pasobra nos sa cu semper Jehova ta cu nos.” Nan a establecé un ruta di revista, a cuminsá un studio di Bijbel, i tur dos a participá den e sirbishi di pionero auxiliar.

13. Ki ahuste den nos ministerio ta necesario awor na algun lugá?

¹³ Segun cu nos ta sigui busca esnan merecedor, na algun lugá kisas nos tin cu haci un reevaluacion cuidadoso di nos manera di predicá. Aunke hopi Testigo tin e custumber di participá den e trabou di cas pa cas riba diadomingo mainta, den cierto área nan ta haña  cu no tin muchu sentido pa yama trempan na cas di hende pasobra e habitantenan ta drumí. Dor di ahustá nan orario, hopi Testigo ta dedicá nan mes awor na busca hende mas lat den dia, tal bes despues dje reunionnan cristian. I en berdad e búskeda aki a duna resultado. Aña pasá e cantidad di proclamadó di Reino rond mundu a aumentá cu 2,3 porciento. Esaki ta onra e Doño dje cosecha i ta alegrá nos curason.

Mantené Pas den e Trabou di Cosecha

14. Cu ki actitud nos ta presentá nos mensahe, i pakico?

¹⁴ Un otro motibu pa nos goso ta relacioná cu e actitud di promové pas cu nos ta manifestá den e trabou di cosecha. “Ora di drenta e cas,” Jesus a bisa, “cumindá e famia; i si e cas ta merecedor, laga e pas cu boso ta deseá p’e bini riba dje.” (Mateo 10:12, 13) Tantu e saludo hebreo como e término corespondiente den e griego di Bijbel ta transmití e pensamentu di: ‘Tur cos bon.’ Ta cu e actitud aki nos tin cu acercá hende ora nos ta predicá e bon nobo. Nos speransa ta cu nan lo respondé faborablemente n’e mensahe di Reino. Esnan cu haci esei lo por reconciliá cu Dios segun cu nan ta repentí di nan picánan, combertí i haci su boluntad. En buelta, pas cu Dios ta hiba na bida eterno.—Juan 17:3; Echonan 3:19; 13:38, 48; 2 Corintionan 5:18-20.

15. Con nos por mantené un actitud pacífico ora nos topa un reaccion negativo den nos trabou di predicá?

¹⁵ Con nos por mantené nos pas ora e reaccion cu nos topa ta negativo? Jesus a manda: “Si e [cas] no ta merecedor, laga e pas di boso bolbe riba boso.” (Mateo 10:13) Segun Lucas su relato, ora Jesus a manda 70 disipel, el a agregá: “Si tin un amigu di pas ei, boso pas lo keda riba dje. Pero si no tin, lo e bolbe bek cerca boso.” (Lucas 10:6) Ora nos ta acercá hende cu e bon nobo, nos ta haci esei apropiadamente den un forma placentero i na un manera pacífico. E único cos cu un reaccion indiferente, un keho of un comentario no muchu bondadoso ta logra, ta cu nos mensahe pacífico ta ‘bolbe bek cerca nos.’ Pero nada di esaki ta kita nos pas, cu ta un fruta di Jehova su spiritu santu.—Galationan 5:22, 23.

Un Meta Excelente pa Cosechadónan

16, 17. (a) Kico ta nos meta ora di haci rebishita? (b) Con nos por yuda esnan cu tin pregunta tocante Bijbel?

¹⁶ Como cosechadó nos ta contentu di por  yuda den e recogementu di hende pa bida eterno. I ta ki un goso ora un persona na ken nos a predicá respondé faborablemente, kier siña mas i resultá di ta “un amigu di pas”! Tal bes e tin hopi pregunta tocante Bijbel i nos ta haña cu ta imposibel pa contestá nan tur durante un solo bishita. Siendo cu lo ta inapropiado pa keda muchu largu na nos promé bishita, kico nos por haci? Nos por pone un meta manera esun cu a ser recomendá un 60 aña pasá.

¹⁷ “Tur testigo di Jehova mester ta prepará pa conducí studionan modelo den Bijbel.” E declaracion ei a sali den e di tres di un seri di foyeto di instruccion Studio Modelo publicá di 1937 pa 1941. E foyeto a sigui bisa: “Tur publicadó [di Reino] mester ta diligente den yuda den tur manera posibel hende di bon boluntad cu ta mustra interes den e mensahe di Reino. Mester rebishitá e personanan aki, contestá vários pregunta . . . , i despues cuminsá un studio modelo . . . mas pronto posibel.” Sí, nos meta ora di haci rebishita mester ta pa cuminsá un studio di Bijbel i conducié regularmente. * Un actitud amigabel i interes amoroso den e persona interesá ta motivá nos pa prepará bon i conducí e studio eficasmente.

18. Con nos por yuda esnan nobo bira disipel di Jesucristo?

¹⁸ Cu yudansa dje buki Conocimentu cu Ta Hiba na Bida Eterno i foyetonan manera Kico Dios Ta Rekerí di Nos?, nos por conducí studio di Bijbel eficas i participá asina den e trabou di yuda esnan recien interesá bira disipel. Segun cu nos ta trata na imitá e Gran Maestro Jesucristo, probablemente e studiantenan di Bijbel ei tambe lo siña for di nos manera pacífico i gososo, nos sinceridad i nos respet pa Jehova su norma i instruccionnan. Ora nos contestá e preguntanan di esnan nobo, laga nos haci tambe tur loke ta na nos alcanse pa siña nan con nan awor por contestá esnan cu ta haci nan pregunta. (2 Timoteo 2:1, 2; 1 Pedro 2:21) Como cosechadónan figurativo, siguramente nos por ta contentu cu rond mundu rumannan a conducí un promedio di 4.766.631 studio bíblico e aña di sirbishi cu a pasa. Nos ta specialmente gososo ora nos personalmente ta entre e cosechadónan cu ta participá den e actividad di studio di Bijbel.

Sigui Alegrá den e Cosecha

19. Pakico tabatin bon motibu pa alegrá den e cosecha durante Jesus su ministerio i djis despues di esei?

¹⁹ Tabatin bon motibu pa alegrá den e cosecha durante Jesus su ministerio i djis despues di esei. E tempu ei hopi hende a respondé faborablemente n’e bon nobo. E alegria tabata hopi grandi na Pentecoste di aña 33 E.C., pasobra rond di 3.000 persona a aceptá e instruccion di Pedro, a ricibí Jehova su spiritu santu i a bira parti di Dios su nacion di Israel spiritual. Sí, nan cantidad a sigui aumentá i goso a abundá segun cu “Jehova a sigui uni na nan diariamente esnan cu tabata ser salbá.”—Echonan 2:37-41, 46, 47; Galationan 6:16; 1 Pedro 2:9.

20. Kico ta duna nos un goso abundante den nos trabou di cosecha?

²⁰ N’e tempu ei, e profecia di Isaías tabata cumpliendo: “Bo [Jehova] a laga e nacion multiplicá; p’e bo a haci e alegria grandi. Nan  a alegrá dilanti bo manera cu e alegria di tempu di cosecha, manera esnan cu ta gososo ora nan ta parti botin.” (Isaías 9:3) Aunke nos ta mira awor cu e “nacion multiplicá” ei di personanan ungí ta prácticamente completo, nos goso ta abundante ya cu nos ta observá e cantidad di otro cosechadó aumentá aña tras aña.—Salmo 4:7; Zacarías 8:23; Juan 10:16.

21. Kico nos lo trata den e siguiente artículo?

²¹ Sigur nos tin motibunan sólido pa sigui alegrá den e trabou di cosecha. Nos mensahe di speransa, nos buscamentu di esnan merecedor, i nos actitud cu ta promové pas—tur e factornan aki ta duna nos goso como cosechadó. Sin embargo, nan ta causa un reaccion negativo cerca hopi hende. Apostel Juan a experimentá esaki. Nan a encarcel’é riba e isla di Pátmos pa motibu cu el “a papia tocante Dios i a duna testimonio di Jesus.” (Revelacion 1:9) Con anto, nos por mantené nos goso ora nos topa cu persecucion i oposicion? Kico lo yuda nos soportá e actitud cada bes mas negativo di hopi hende na ken nos ta predicá awe? Nos siguiente artículo ta ofrecé yudansa bíblico pa contestá e preguntanan aki.

[Nota]

Con Lo Bo Contestá?

• Kico ta e trabou di cosecha figurativo?

• Ki clase di mensahe nos ta declará?

• Pakico nos tin éxito den buscamentu di disipel?

• Con nos ta mantené pas den e trabou di cosecha?

• Di con nos ta sigui alegrá den e cosecha?

[Preguntanan di Estudio]

[Plachinan na página 12, 13]

E trabou di predicá den siglo 1 i den siglo 20

[Plachinan na página 13]

Mescos cu Pablo, cosechadónan djawe ta purba alcansá hende tur caminda

[Plachi na página 13]

Proclamá e bon nobo den un forma placentero