Sigui Padilanti den e Trabou di Cosecha!

“Esnan cu ta sembra simia cu lágrima lo cosechá asta cu un gritu gososo.”—SALMO 126:5.

1. Pakico “roga e Doño dje cosecha pa manda trahadó” awe?

DESPUES cu Jesucristo a haci su di tres recorido di predicacion na Galilea, el a bisa su disipelnan: “E cosecha ta grandi, pero e trahadónan ta poco.” (Mateo 9:37) Na Hudea e situacion tabata idéntico. (Lucas 10:2) Asina cosnan tabata casi 2.000 aña pasá. Pero kico di awe? Wel, durante e último aña di sirbishi, mas cu 6.000.000 Testigo di Jehova a sigui padilanti den e cosecha figurativo cu ta tumando lugá den e 6.000.000.000 hendenan na mundu, di cua hopi ta “soyá i plamá manera carné sin wardadó.” P’esei e animacion cu Jesus a duna su disipelnan pa “roga e Doño dje cosecha pa manda trahadó na su cosecha” ta mes válido awe cu siglonan pasá.—Mateo 9:36, 38.

2. Kico ta hala atencion di hende riba nos?

² Jehova Dios, e Doño dje cosecha, a contestá e súplica pa manda mas trahadó. I ta ki un goso pa participá den e cosecha aki cu Dios ta dirigí! Aunke nos ta poco na cantidad compará cu e nacionnan, nos participacion celoso den e predicacion di Reino i e actividad di haci disipel ta hala mundu su atencion. Den hopi pais nan ta mencioná nos cu frecuencia den medionan di comunicacion. Si bel di porta zona den un programa di television esei ta pone nan bisa mesora cu ta Testigonan di Jehova ta na porta. Sí, nos actividad cristian como cosechadó figurativo ta bon conocí den siglo 21.

3. (a) Con nos por sa cu hende a tuma nota dje actividad di predicá e Reino den promé siglo? (b) Pakico nos por bisa cu e angelnan ta apoyá nos ministerio?

 ³ Asina tambe mundu a tuma nota dje actividadnan di predicá e Reino den promé siglo i a persiguí proclamadónan dje bon nobo. Di manera cu apostel Pablo a skirbi: “Ta parce mi cu Dios a pone nos, e apostelnan, último na exhibicion como hende nombrá pa muri, pasobra nos [e apostelnan] a bira un exhibicion teatral pa e mundu, i pa angel, i pa hende.” (1 Corintionan 4:9) Mescos tambe, nos perseverancia como proclamadó di Reino apesar di persecucion ta hala atencion di mundu riba nos i ta importante p’e angelnan. Revelacion 14:6 ta bisa: “Mi [apostel Juan] a mira un otro angel bula meimei di shelu, i e tabatin bon nobo eterno pa declará como noticia alegre na esnan cu ta biba riba tera, i na tur nacion i tribu i lenga i pueblo.” Sí, nos tin apoyo dje angelnan den nos ministerio—nos trabou di cosecha!—Hebreonan 1:13, 14.

“Obheto di Odio”

4, 5. (a) Ki spiertamentu Jesus a duna su disipelnan? (b) Di con e sirbidónan di Dios djawe ta “obheto di odio”?

⁴ Ora Jesus a manda su apostelnan como cosechadó, nan a obedecé su instruccion pa ta “cauteloso manera colebra i tog inocente manera palomba.” Jesus a agregá: “Boso vigilá contra hende; pasobra nan lo entregá boso na e cortenan local, i nan lo suta boso den nan snoanan. Sí, nan lo hiba boso dilanti gobernadónan i reynan pa mi causa, como testimonio pa nan i pa e nacionnan. . . . I boso lo ta obheto di odio di parti di tur hende pa causa di mi nomber; pero esun cu a perseverá te na fin ta esun cu lo ser salbá.”—Mateo 10:16-22.

⁵ Awe nos ta “obheto di odio” pasobra “henter mundu ta drumí den poder dje malbado,” Satanas e Diabel, kende ta e enemigu principal di Dios i Su pueblo. (1 Juan 5:19) Nos enemigunan ta observá nos prosperidad spiritual pero nan ta nenga di atribuí esei na Jehova. Opositornan ta mira nos caranan felis i sonriente ora nos ta participá gososamente den e trabou di cosecha. Nos unidad ta laga nan keda asombrá! De echo, nan lo ta reconocé esei contra nan boluntad ora nan biaha bai un otro pais i mira e Testigonan di Jehova djei ta haci exactamente e mésun trabou cu nan a tuma nota di dje na nan mes pais. Claro cu nos sa cu na su debido tempu, Jehova, nos respaldo i e fuente di nos unidad, lo bira conocí asta pa nos enemigunan.—Ezekiel 38:10-12, 23.

6. Ki garantia nos tin miéntras nos ta participá den e trabou di cosecha, pero ki pregunta ta lanta?

⁶ E Doño dje cosecha a duna su Yu Jesucristo “tur autoridad . . . den shelu i riba tera.” (Mateo 28:18) Pues Jehova ta usa Jesus pa dirigí e trabou di cosecha mediante e angelnan celestial i e “esclabo fiel i discreto” ungí, aki riba tera. (Mateo 24:45-47; Revelacion 14:6, 7) Pero con nos por enfrentá oposicion di enemigu i tog mantené nos goso miéntras nos ta sigui padilanti den e trabou di cosecha?

7. Ki disposicion nos mester purba tin ora nos ta ser oponé of persiguí?

 ⁷ Ora nos topa cu oposicion of asta persecucion abierto, laga nos busca e yudansa di Dios pa nos por tin e mésun disposicion cu Pablo tabatin. El a skirbi: “Ora nos ta ser zundrá, nos ta bendicioná; ora nos ta ser persiguí, nos ta soportá; ora nos ta ser difamá, nos ta roga.” (1 Corintionan 4:12, 13) E spiritu aki, combiná cu nos ministerio público efectuá cu tacto, tin bes ta cambia actitud di nos opositornan.

8. Ki garantia trankilisante bo ta saca for dje palabranan di Jesus na Mateo 10:28?

⁸ Ni menasa di morto no ta mengua nos celo como cosechadó. Sin miedu nos ta proclamá e mensahe di Reino na un manera mas franco posibel. I nos ta haña un garantia trankilisante den Jesus su palabranan: “No haña temor di esnan cu ta mata curpa pero no por mata alma; sino mas bien teme esun cu por destruí tantu alma como curpa den Gehena.” (Mateo 10:28) Nos sa cu nos Tata celestial ta e Dunador di bida. E ta recompensá esnan cu ta keda íntegro na dje i cu ta sigui padilanti fielmente den e trabou di cosecha.

Un Mensahe Salbador di Bida

9. Con algun persona a reaccioná riba e palabranan di Ezekiel, i con algu similar ta sosodiendo awe?

⁹ Ora profeta Ezekiel cu curashi a declará Jehova su mensahenan n’e “nacionnan rebelde”—e reinonan di Israel i Huda—algun persona a keda contentu di tende loke e tabata bisa. (Ezekiel 2:3) Jehova a bisa: “Mira!, pa nan bo ta manera un cantica di amor sensual, manera un persona cu tin bunita stem i cu ta bon tocadó di un instrumento di cuerde.” (Ezekiel 33:32) Aunke nan a gusta Ezekiel su palabranan, nan no a actua riba nan. Kico ta sosodiendo awe? Ora e resto ungí i nan compañeronan ta declará yen di curashi e mensahenan di Jehova, algun hende ta gusta tende dje bendicionnan di Reino, pero nan no ta respondé cu aprecio, bira disipel i djoin nos den e trabou di cosecha.

10, 11. Den e promé mitar di siglo 20, kico e rumannan a haci pa publicá nos mensahe salbador di bida, i cu ki resultado?

¹⁰ Di otro banda, hopi hende a respondé faborablemente n’e trabou di cosecha i a participá den e trabou di declará e mensahenan di Dios. Por ehempel, durante un seri di congreso cristian di 1922 pa 1928, mensahe di huicio contra Satanas su mal sistema di cosnan a  zona bon cla. Radioemisoranan a transmití e denuncianan aki presentá n’e asambleanan ei. Despues di esei, e pueblo di Dios a repartí miyones di ehemplar imprimí cu e denuncianan aki.

¹¹ Na cabamentu di añanan ’30 di siglo 20, a cuminsá cu un otro forma di duna testimonio: marcha di informacion. Na principio, e pueblo di Jehova tabata cana cu borchi cu a anunciá discursonan público. Mas despues, nan tabata cana cu borchi cu lemanan manera “Religion ta un trampa i un fraude” i “Sirbi Dios i Cristo e Rey.” Ora nan tabata marcha dor dje cayanan, nan tabata hala atencion di hende cu a cana pasa. ‘Esaki a contribuí hopi na pone Testigonan di Jehova den spotlight i pa duna nan curashi,’ segun un ruman cu a participá regularmente den e trabou aki den e cayanan druk di Londen, Inglatera.

12. Ademas di Dios su mensahenan di huicio, kico nos a presentá den nos ministerio, i ken ta uní awor den predicá e bon nobo?

¹² Ora nos ta declará Dios su mensahenan di huicio, nos ta presentá tambe e aspectonan positivo dje mensahe di Reino. E echo cu nos ta duna testimonio cu curashi riba e esena di mundu ta yuda nos busca esnan merecedor. (Mateo 10:11) Mayoria dje último miembronan dje clase ungí a respondé n’e yamada di cosecha cla i potente durante añanan ’20 i ’30 di siglo pasá. Anto, na un congreso na 1935, a bini e noticia maraviyoso di un futuro bendicioná pa “un multitud grandi” di “otro carné” riba un tera paradísico. (Revelacion 7:9; Juan 10:16) Esakinan a haci caso di Dios su mensahenan di huicio i a djoin e ungínan den predicá e bon nobo salbador di bida.

13, 14. (a) Ki consuelo nos por saca for di Salmo 126:5 i 6? (b) Kico lo sosodé si nos sigui sembra i muha?

¹³ E palabranan di Salmo 126:5 i 6 ta un gran consuelo pa Dios su cosechadónan, i foral pa esnan cu ta pasa persecucion: “Esnan cu ta sembra simia cu lágrima lo cosechá asta cu un gritu gososo. Esun cu sin falta ta bai, maske ta na yoramentu, hibando cuné un sacu yen di simia, sin falta lo drenta cu un gritu gososo, cargando su tapushinan di maishi.” E palabranan dje salmista tocante sembra i cosechá ta ilustrá con Jehova a cuida i bendicioná e resto cu a bolbe bek for di cautiverio den Babilonia di  antigwedad. Nan tabata masha contentu di por a sali liber, pero nan lo mester a yora ora nan a sembra simia riba e tereno bandoná cu no a ser cultivá durante nan exilio di 70 aña. Sin embargo, esnan cu a dal bai cu nan trabou di sembra i construí a disfrutá di e fruta i satisfaccion di nan labor.

¹⁴ Kisas nos tambe ta drama lágrima ora nos ta bou di prueba of ora nos compañeronan creyente ta sufri pa causa di husticia. (1 Pedro 3:14) Den nos trabou di cosecha, kisas na promé instante no ta fácil pa nos pasobra aparentemente nos no tin nada pa mustra ariba pa tur e esfuerso cu nos ta haci den e ministerio. Pero si nos sigui sembra i muha, Dios lo haci cosnan crece, hopi bes mas ayá di nos expectativanan. (1 Corintionan 3:6) E resultadonan di nos trabou di repartí Bijbel i publicacionnan bíblico ta ilustrá esaki bon cla.

15. Duna un ehempel con útil publicacionnan cristian por ta den e trabou di cosecha.

¹⁵ Tuma e ehempel di un homber cu yama Jim. Ora su mama a muri, el a haña entre su pertenencianan un ehemplar dje buki Bida—Con El A Presentá? Dor di Evolucion of Creacion? * El a les’é cu masha interes. Den un combersacion cu e tabatin cu un Testigo cu a acerk’é riba caya, Jim a bai di acuerdo pa ricibié na su cas i esaki a hiba na un studio di Bijbel. Jim a progresá lihé den sentido spiritual, a dedicá su bida na Jehova i a bautisá. El a conta otro miembronan di su famia loke el a siña. Como resultado, tantu su ruman muher como su ruman homber a bira Testigo di Jehova i mas despues Jim a haña e privilegio di sirbi como boluntario di tempu completo na Betel di Londen.

Persiguí, i tog Gososo

16. (a) Pakico nos trabou di cosecha a duna bon resultado? (b) Ki advertencia Jesus a duna relacioná cu e efecto cu e bon nobo tin riba hende, pero cu ki actitud nos ta acercá nan?

¹⁶ Pakico e trabou di cosecha a gosa di asina tantu éxito? Esei ta pasobra cristiannan ungí i nan compañeronan a haci caso di Jesus su instruccionnan: “Loke mi ta bisa boso den scuridad, bis’é den claridad; i loke boso ta tende di fluister, predik’é for di daknan di cas.” (Mateo 10:27) Sin embargo, nos por spera contratempu, pasobra Jesus a advertí: “Ruman lo entregá ruman na morto, i tata su yu, i yunan lo lanta contra mayornan i lo laga mata nan.” Jesus a bisa mas aleu: “No pensa cu mi a bini pa pone pas riba tera; mi no a bini pa pone pas, sino un spada.” (Mateo 10:21, 34) No ta intencionalmente Jesus a dividí famia. Pero, tin bes e bon nobo tabatin e efecto ei. Mescos ta e caso cu sirbidó di Dios awe. Ora nos ta bishitá famianan, no ta nos intencion pa bai causa division den nan. Nos ta deseá pa tur hende aceptá e bon nobo. P’esei, nos ta purba acercá tur miembro di un famia na un manera bondadoso i amabel. Anto esei ta haci nos mensahe atractivo pa esnan cu ta “corectamente dispuesto pa bida eterno.”—Echonan 13:48.

17. Con esnan cu ta sostené e soberania di Dios ta resaltá como distinto, i ki ehempel nos tin di esaki?

¹⁷ E mensahe di Reino a distinguí esnan cu ta sostené e soberania di Dios for di otro hende. Por ehempel, wak con nos compañeronan di adoracion a resaltá como diferente pasobra nan a “paga bek e cosnan di César na César, pero e cosnan di Dios na Dios” den e tempu di Socialismo Nacional na Alemania. (Lucas 20:25) Na contraste cu lidernan religioso i hende cristian pa nomber cu ta miembro dje iglesianan di cristiandad, Jehova su sirbidónan a para firme i a nenga di violá principionan bíblico. (Isaías 2:4; Mateo 4:10; Juan 17:16) Profesor Christine King, autor dje buki The Nazi State and the New Religions (Estado Nazi i Religion Nobo), a remarcá: “Ta contra e Testigonan so gobiernu [nazi] no tabatin éxito, pasobra aunke nan a mata miles di nan, e trabou a sigui i na mei 1945 ainda e movementu di Testigonan di Jehova tabata activo, miéntras cu Socialismo Nacional sí no mas.”

18. Ki actitud Jehova su pueblo ta manifestá apesar di persecucion?

 ¹⁸ E actitud cu e pueblo di Jehova ta manifestá ora nan haña nan cu persecucion di berdad ta importante. Tal bes nos fe ta impresioná autoridadnan seglar, pero nan ta keda mas asombrá ainda p’e echo cu nos no ta carga rencor. Por ehempel, cu frecuencia Testigonan cu a sobrebibí e Holocausto sa expresá goso i satisfaccion ora nan wak bek riba nan experencianan. Nan sa cu Jehova a duna nan “poder mas ayá di loke ta normal.” (2 Corintionan 4:7) Esnan entre nos cu ta ungí tin e garantia cu nan “nomber a ser inscribí den shelu.” (Lucas 10:20) Nan awante ta producí un speransa cu no ta hiba na desilusion, i cosechadónan fiel cu tin speransa terenal, tin e mésun conviccion.—Romanonan 5:4, 5.

Perseverá den e Trabou di Cosecha

19. Ki métodonan eficas a ser usá den e ministerio cristian?

¹⁹ Ainda nos tin cu mira pa cuantu tempu mas Jehova lo permití nos participá den e cosecha figurativo. Miéntras tantu, nos mester tene na mente cu cosechadónan tin métodonan specífico pa haci nan trabou. Mescos tambe, nos por ta sigur cu si nos sigui predicá fielmente den e maneranan cu a duna bon resultado caba, nos tambe lo tin éxito. Pablo a bisa su compañeronan cristian: “Mi ta suplicá boso pa bira imitadó di mi.” (1 Corintionan 4:16) Ora Pablo a reuní cu e ancianonan di Efeso na Mileto, el a corda nan cu e no a laga di siña nan “públicamente i di cas pa cas.” (Echonan 20:20, 21) Pablo su compañero Timoteo a siña kico e métodonan dje apostel tabata i p’esei e por a siña e corintionan esakinan. (1 Corintionan 4:17) Dios a bendicioná Pablo su métodonan di siñansa, mescos cu lo e bendicioná nos perseverancia den predicá e bon nobo públicamente di cas pa cas, na rebishita, na studio di Bijbel i tur otro caminda cu nos por haña hende.—Echonan 17:17.

20. Con Jesus a indicá cu lo tabatin un cosecha spiritual abundante pa futuro, i con esaki a resultá di ta e caso den añanan recien?

²⁰ Despues cu Jesus a duna testimonio na un muher samaritano cerca di Sícar na aña 30 E.C., el a papia dje cosecha spiritual. El a bisa su disipelnan: “Hisa boso wowo i wak e cunucunan, cu nan ta blancu pa cosechá. Ya caba e cosechadó ta ricibiendo pago i ta recogiendo fruta pa bida eterno, di manera cu e sembradó i e cosechadó por alegrá huntu.” (Juan 4:34-36) Kisas Jesus a mira caba ki efecto su encuentro cu e muher samaritano tabatin, pasobra hopi tabata pone fe den Jesus pa causa di e muher su testimonio. (Juan 4:39) Den añanan recien, vários pais a kita e restriccionnan cu tabatin riba Testigonan di Jehova of a duna nan reconocimentu legal. Esei a habri camponan nobo pa cosechá. E resultado ta cu awor akí tin un cosecha spiritual abundante ta andando. En realidad, na tur parti di mundu tin hende ta gosa di bendicion ricu segun cu nos ta participá gososamente den e cosecha spiritual.

21. Pakico nos tin motibu pa sigui padilanti como cosechadó gososo?

²¹ Ora cosecha ta hechu i cla pa recogé, trahadónan mester actua cu urgencia. Nan tin cu dal bai sin tarda. Awe, nos tin cu traha diligentemente i cu un sentido di urgencia pasobra nos ta bibando den “e tempu di fin.” (Daniel 12:4) Sí, nos ta haña nos cu prueba, pero e cosecha di adoradónan di Jehova ta mas grandi cu nunca. P’esei esaki ta un dia di alegria. (Isaías 9:3) Pues anto, como trahadónan gososo, laga nos sigui padilanti den e trabou di cosecha!

[Nota]

Con Lo Bo Contestá?

• Con e Doño dje cosecha a contestá e súplica pa mas trahadó?

• Aunke nos ta “obheto di odio,” ki disposicion nos mester tin?

• Con bin nos ta gososo apesar cu nos ta ser persiguí?

• Pakico nos mester perseverá den e trabou di cosecha cu un sentido di urgencia?

[Preguntanan di Estudio]

[Plachinan na página 16, 17]

Esnan cu ta participá den e cosecha spiritual tin apoyo dje angelnan

[Plachi na página 18]

Marcha di informacion a hala atencion di hopi hende n’e mensahe di Reino

[Plachi na página 18]

Nos ta planta i muha, pero ta Dios ta pon’é crece