Tin Bida Despues di Morto?

“SI UN homber físicamente capacitá muri, e por biba atrobe?” patriarca Job a puntra un 3.500 aña pasá. (Job 14:14) Pa miles di aña humanidad tin problema cu e pregunta aki. Atrabes di siglonan, hende di tur sociedad a pensa riba e tema aki i a bini cu vários teoria.

Hopi hende cu ta cristian pa nomber ta kere den shelu i fiernu. Hindú, di otro banda, ta kere den reencarnacion. Comentando riba e punto di bista moslim, Emir Muawiyah, asistente na un centro religioso islámico, ta bisa: “Nos ta kere cu lo tin un dia di huicio despues di morto, ora bo tin cu presentá dilanti Dios, Ala, loke lo ta mescos cu cana drenta corte.” Segun creencia islámico, e ora ei Ala lo evaluá cada persona su curso di bida i mand’é sea paradijs of candela di fiernu.

Na Sri Lanka, tantu budista como católico ta laga porta i bentana hanchu habrí ora morto cai den nan famia. Nan ta cende un lampi di zeta, i ta pone e caha di morto di manera cu e pianan dje defuntu ta den direccion dje porta dilanti. Nan ta kere cu e medidanan aki ta facilitá e salimentu dje spiritu dje defuntunan.

Segun Ronald M. Berndt dje Universidad di West Australia, aborígennan australiano ta kere cu “ser humano ta poseé un spiritu indestructibel.” Cierto tribu africano ta kere cu despues di morto hende gewoon ta bira fantasma, miéntras cu personanan prominente ta bira spiritu di antepasado cu pueblo lo onra como lider invisibel dje comunidad i na ken nan ta dirigí nan súplicanan.

Den algun pais, creencianan relacioná cu e condicion dje mortonan ta un mescla di tradicion local cu cristianismo pa nomber. Por ehempel, ta un custumber cerca hopi católico i protestant na West África, pa tapa spiel ora un persona muri pa asina niun hende no wak den spiel i mira spiritu dje defuntu.

Sí, ta tur tipo di contesta hende ta duna riba e pregunta: ‘Kico ta sosodé cu nos ora nos muri?’ Pero tog, loke nan tur tin en comun ta: Algu den un persona ta inmortal i ta sigui biba despues di morto. Tin hende ta kere cu e “algu” ei ta un spiritu. Por ehempel, den cierto partinan di África i Asia i den henter e region di laman Pacífico di Polinesia, Melanesia i Micronesia, hopi hende ta kere cu ta un spiritu ta inmortal, i no un alma. De echo, algun idioma no tin ni e palabra “alma.”

Tin un spiritu den un persona bibiente? Ta berdad cu ora e persona muri e spiritu ei ta bandoná e curpa? Si ta asina, kico ta sosodé cu e spiritu? I ki speransa tin p’e mortonan? Bo no mester ignorá e preguntanan aki. Sea cual sea bo antecedente cultural of religioso, morto ta un realidad cu bo tin cu enfrentá. Pues e cuestionnan tin di haber cu bo den un manera profundamente personal. Nos ta animá bo pa investigá e asuntu mas aleu.