Informe di Proclamadónan di Reino

Dios A Seca Su Lágrimanan

HENDE cu ta cambia nan bida pa armonis’é cu e ley i principionan di Jehova ta haña hopi bendicion. Maske no ta semper fácil pa haci e cambionan necesario, tin yudansa i animacion disponibel. (Salmo 84:11) E siguiente experencia for di Zuidoost Asia ta ilustrá esaki.

Durante su vakansi un ruman muher Testigo di Francia a papia cu Kim, * un señora doño di un pacus, tocante e propósito di Jehova pa e tera. Tambe el a laga cu Kim e buki Bo por biba pa semper den Paradijs riba tera. Ora Kim a blader den e buki el a topa cu e palabranan: “lo e seca tur lágrima di nan wowo.” (Revelacion 21:4) “E versículo aki a ègt conmové mi,” Kim ta corda. “Henter dia den pacus hende tabata mira mi smile i combersá. Ta ken por a kere cu anochi mi ta yora te pega soño?” Revelando e motibu di su ferdrit, e ta conta: “Mi tabatin 18 aña ta biba huntu cu un homber i mi tabata masha infelis pasobra e no kier a casa cu mi. Mi no kier a hiba e bida ei mas. Pero dor cu mi a biba asina tantu tempu cuné, mi no tabatin curashi pa bai lagu’é.”

Djis un poco tempu despues, Kim a aceptá un studio di Bijbel cerca un Testigo di Jehova cu yama Linh. “Mi tabata ansioso pa practicá loke Bijbel ta siña,” Kim ta bisa. “Por ehempel, mi a stop di adorá mi antepasadonan, maske esaki a pone cu mi famianan a bai contra mi. Fuera di esei, mi a haci intento pa legalisá nos union, pero mi compañero a nenga. Durante e tempu difícil aki, e Testigo di Francia a sigui manda literatura bíblico pa mi i Linh a animá mi mashá. E pacenshi i apoyo amoroso di e ruman muhernan aki a yuda mi perseverá te ora mi a ripará ken realmente mi compañero tabata. Mi a descubrí cu ya caba e tabatin 5 ‘casá’ i 25 yu! Esaki a duna mi e curashi pa bandon’é.

No tabata fácil pa laga un cas grandi i confortabel pa bai biba den un apartamento chikitu. Pió ainda, mi ex-compañero a preshoná mi pa bin biba bek cerca dje i asta el a menasá di desfigurá mi cu ácido si mi nenga. Cu yudansa di Jehova mi por a haci loke ta recto.” Kim a sigui progresá i finalmente el a bautisá na april 1998. Huntu cu esei, dos ruman muher di dje i su yu homber tiener a cuminsá studia Bijbel cu Testigonan di Jehova.

Kim ta bisa: “Ántes mi tabata pensa cu mi bida semper lo ta sin speransa, pero awe, mi ta felis i mi no ta yora anochi mas. Ya caba Jehova a seca e lágrimanan di mi wowo.”

[Nota]